Ngaba Iintlekele Zemvelo Zibangelwa NguThixo?

IBHAYIBHILE ithi: “UThixo uluthando.” (1 Yohane 4:8) Unokusesikweni kwaye unenceba. “NguLiwa, ugqibelele umsebenzi wakhe, ngokuba zonke iindlela zakhe zisesikweni. NguThixo wentembeko, tu ubugqwetha; lilungisa yaye uthe tye yena.”—Duteronomi 32:4.

Njengokuba enguMdali, uYehova uThixo unako ukubona izinto ezinokusenzakalisa yaye unako ukungenelela kuzo. Ngenxa yesi sibakala nangenxa yeempawu zikaThixo esifunda ngazo eBhayibhile, abantu abaninzi—bechan’ ucwethe ke phofu—bayazibuza, “Kutheni uThixo evumela iintlekele zemvelo?”a Njengokuba izigidi zabantu ezinalo mbuzo ziye zafumanisa, uThixo ngokwakhe uye wasinika impendulo esengqiqweni kwiLizwi lakhe. (2 Timoti 3:16) Nceda ucingisise nzulu ngoku kulandelayo.

Balugatya Uthando LukaThixo

IBhayibhile isixelela ukuba uThixo wanika abazali bethu bokuqala zonke izinto eziyimfuneko ukuze banandiphe ubomi baze bahlale benqabisekile. Ukongezelela koko, njengokuba bona nenzala yabo babeya kuthobela umyalelo kaThixo wokuba ‘baqhame bande bazalise umhlaba,’ abantu babeza kuxhomekeka kuThixo ukuze baphile.—Genesis 1:28.

Ngelishwa, uAdam noEva, ngabom, bamfulathela uMdali wabo baza ngokuzithandela, bakhetha ikhondo lokuzimela geqe. (Genesis 1:28; 3:1-6) Ngomlinganiselo omkhulu, inzala yabo iye yalandela ikhondo labo. (Genesis 6:5, 6, 11, 12) Ngamany’ amazwi, uluntu luye lwakhetha ukuzilawula nekhaya lalo umhlaba, ngaphandle kokhokelo lukaThixo. Kuba enguThixo wothando yaye ehlonela inkululeko esinayo yokuzikhethela, uYehova akanyanzelisi ukuba ngusomandla kwakhe ebantwini, naxa ikhondo esilithabathayo linokuba yingozi.b

Noko ke, uYehova akazange alushiye kwesinomhlwa uluntu. Ukuza kuthi ga ngoku wenza “ilanga lakhe liphume kubantu abangendawo nabalungileyo nemvula eyinisa kubantu abangamalungisa nabangengomalungisa.”(Mateyu 5:45) Ukongezelela, uThixo wenze abantu bakwazi ukufunda ngomhlaba nemijikelo yawo. Ngenxa yolo lwazi, abantu banokubona kusekude ukuza kwemozulu engentle nezinye iingozi ezifana nokugqabhuka kwentaba-mlilo.

Abantu baye bakwazi ukubona iindawo ezinokwehlelwa ziinyikima okanye enye imozulu emaxongo. Kwamany’ amazwe oku kuye kwaluncedo ekusindiseni abantu, kuba baye bafundiswa nangendlela yokwakha izakhiwo ezibhetele neenkqubo zokulumkisa. Nakuba kunjalo, inani leentlekele lintinga minyaka le. Izizathu zoku zininzi kwaye zintsonkothile.

Ukuhlala Kummandla Osengozini Yokuntlithwa Ziintlekele Zemvelo

Umonakalo owenziwa yintlekele yemvelo awusoloko uphenjelelwa ngamandla endalo. Ukuxinana kwabantu kusoloko kuyeyona nto yenza umonakalo. Ngokutsho kwengxelo eyenziwe yiBhanki Yomhlaba kumazwe ali-160, inkoliso yabemi baloo mazwe ihlala kwiindawo ezisengozini yokuntlithwa ziintlekele zemvelo. Isazinzulu uKlaus Jacob weYunivesithi YaseColombia eUnited States sithi: “Xa kuhlaliswa abantu abaninzi kwindawo esenokuba yingozi, basenokuphulukana nobomi babo xa kuvela intlekele yemvelo.”

Abanye oonobangela abenza imeko ibe maxongo nangakumbi, kuxa kusanda ngokukhawuleza abantu abahlala ezixekweni, ukugawulwa kwamahlathi nokwakhiwa kweendlela. Ezi zimbini zokugqibela zinokuba yingozi kuba zinokwenza udaka nezikhukula zihambe lula.

Izenzo zabantu zinokwenza inyikima ibe yintlekele, kaloku ukushukuma komhlaba akubulali bantu kodwa zizakhiwo ezenza oko. Sicacile isizathu sokuba izazi ngeenyikima zibe nesaci esithi: “Iinyikima azibulali bantu. Zizakhiwo ezibulala abantu.”

Ukusilela kukarhulumente kubulala abantu abaninzi. Enye intloko-dolophu yoMzantsi Merika, ikhe yatshayelwa kwathi tu kangangezihlandlo ezithathu kule minyaka ingama-400 idluleyo. Phofu, ukususela kwinyikima yokugqibela, ngowe-1967, abemi balapho baye baphindaphindeka kabini ukusa kwizigidi ezihlanu. Iphephancwadi iNew Scientist lithi: “Imithetho kamasipala yokwakha ibethwa ngoyaba okanye ayikho ngqongqo kangako.”

Yiloo nto kanye eyehlela isixeko saseNew Orleans, eLouisiana, eUnited States, esakhiwe kwindawo ethe tyaba nesesichengeni sokuba nezikhukula. Phezu kwalo nje udonga olwakhiwe ecaleni kolwandle kunye nezinto zokutsala amanzi, intlekele ekwakusoyikelwa ukuba iya kufika, yagaleleka ngowama-2005 xa iNkanyamba uKatrina yantlitha eso sixeko. “Izilumkiso ekudala zikho” zabethwa ngoyaba okanye “azizange zisiwe so kangako,” ngokutsho kwengxelo yeUSA Today.

Kuye kwasatyelwa ngendlela efanayo nakumbandela wokufudumala ngokugqithiseleyo komhlaba yaye izazinzulu ezininzi zikholelwa kwelokuba oku kunokwandisa amathuba obukho bemozulu engentle kuze kunyuse umphakamo wolwandle. Licacile ngoko elokuba, ezopolitiko, ezentlalo nezoqoqosho—izinto ezingenanto yakwenza noThixo—zingunobangela weentlekele zemvelo. Ezi zibakala zisikhumbuza inyaniso emsulwa ebhalwe eBhayibhileni yokuba “asikokomntu ohambayo ukwalathisa inyathelo lakhe.” (Yeremiya 10:23) Omnye unobangela owenziwa ngumntu sisimo sengqondo sabantu ngezilumkiso—izilumkiso zemvelo nezisuka kwabasemagunyeni.

Funda Ukuphulaphula Izilumkiso

Okukuqala alinakuphikwa elokuba iintlekele zemvelo azisoloko zibhungisa. INtshumayeli 9:11 ithi: ‘Sonke sehlelwa lixesha nasisihlo esingenakubonwa kwangaphambili.’ Ngamany’ amaxesha, kudla ngokubakho isilumkiso—esingokwemvelo okanye esivela kwabasemagunyeni—esisichazela ukuba kukho undonakele ozayo. Ngoko ke, xa abantu bezazi izilumkiso, kukho amathuba amaninzi okuzikhusela kwintlekele.

Xa itsunami yahlasela isiqithi saseIndonesia iSineulue, ngowama-2004, kwafa abantu abasixhenxe kubantu abangamawakawaka. Ukuyaluza kwamaza ngendlela engaqhelekanga kusenokutshayelela itsunami, ngoko abantu abaninzi babhacela kwezinye iindawo. Ngendlela efanayo, abantu baye bakhuseleka kugqabhuko lwentaba-mlilo okanye kwizantyalantyala zezikhukula ngokuthobela isilumkiso. Ngenxa yokuba kuqala kulumkise indalo ngokwayo ngaphambi kwabasemagunyeni, kububulumko ukuzazi zombini ezi ntlobo zezilumkiso, ingakumbi ukuba uhlala kwindawo esengozini yeentlekele zemvelo.

Esinye isazi ngogqabhuko lweentaba-mlilo sithi, okulusizi kukuba “abantu abaninzi abafuni nokuva xa kusithiwa kukho ingozi naxa sele ibonwa nanguthathatha.” Oku kwenzeka ngakumbi ukuba kudla ngokothuswa abantu ngenyoka efileyo okanye xa sele kuyiminyaka emininzi intlekele yehlayo. Ngamany’ amaxesha abantu abafuni ukushiya izinto zabo eziphathekayo, nkqu naxa sele bezibonela ingozi.

Kweminye imimandla abantu bangamahlwempu kakhulu ukuba bangafudukela kwenye indawo ekhuselekileyo. Kodwa ke, kunokuba sityhole uMdali wethu ngaleyo, inyaniso kukuba isizekabani ziintsilelo zabantu. Ngokomzekelo, oorhulumente bachitha intywenka yemali ekuthengeni izixhobo kodwa abakhuphi nepen’ emdaka ukuze bancede amahlwempu.

Noko ke, umlinganiselo othile woncedo ubakho kubantu abaninzi kungakhathaliseki iimeko abakuzo. Bancedwa njani aba bantu? Kaloku, uThixo, ngeLizwi lakhe iBhayibhile Engcwele, uye wasinika imigaqo esinokuyisebenzisa kubomi bethu.

Imigaqo Ekhusela Ubomi

◼ Uze ungamvavanyi uThixo. IDuteronomi 6:16 ithi: “Nize ningamvavanyi uYehova uThixo wenu.” AmaKristu okwenyaniso akanazinkolelo, ecinga ukuba uThixo uza kuwakhusela ngokungummangaliso ekonzakaleni. Ngoko ke, xa kufika intlekele, athobela esi silumkiso siphefumlelweyo: “Onobuqili ubona intlekele azifihle, kodwa abangenamava bayadlula baze bafumane isohlwayo.”—IMizekeliso 22:3.

◼ Xabisa ubomi ngaphezu kwezinto eziphathekayo. “Kwanaxa umntu enentabalala ubomi bakhe abuphumi kwizinto anazo.” (Luka 12:15) Ewe, zona izinto eziphathekayo zinendawo yazo, kodwa azibalulekanga kubantu abafileyo. Ngoko ke, abathanda ubomi nabaxabisa ilungelo lokukhonza uThixo abazibeki esichengeni sokwenzakala ngenxa nje yezinto eziphathekayo.—INdumiso 115:17.

UTadashi, ohlala eJapan, washiya indlu yakhe isaqala nje inyikima yowama-2004, bengekakhuphi nelimdaka abasemagunyeni. Ubomi bakhe babubalulekile kuye ngaphezu kwezinto zakhe eziphathekayo. UAkira ohlala kwakuloo mmandla wabhala wathi “umlinganiselo womonakalo awuxhomekekanga kwizinto ezonakeleyo kodwa kwimbono yomntu ngezo zinto. Le ntlekele indinike ithuba lokwenza ubomi bam bube lula.”

◼ Phulaphula izilumkiso ezivela kurhulumente. “Yonke imiphefumlo mayiwathobele amagunya awongamileyo.” (Roma 13:1) Xa abasemagunyeni bemisela umthetho wokuba kufudukelwe kwindawo ethile okanye kulandelwe amanyathelo athile okhuseleko, bubulumko ukuthobela loo miyalelo. UTadashi wahlala kude nendawo eyingozi ethobela umyalelo wokufuduka, yaye ngaloo ndlela wasinda ekonzakaleni okanye ekufeni kwizithonga ezalandela emva kwenyikima.

Xa kungekho silumkiso singokwasemthethweni sentlekele esenokuhla, abantu kufuneka bazikhethele ngokwabo indlela abaya kusabela ngayo becinga ngazo zonke iinkalo ezibandakanyekileyo. Kweminye imimandla oorhulumente basekuhlaleni basenokunikela amacebiso ngeendlela zokusinda kwiintlekele. Ukuba le nkcazelo iyafumaneka kummandla okuwo, ngaba uyazi kakuhle? Ngaba phofu sele nikuxubushile oku njengentsapho? (Funda ibhokisi ekweli nqaku) Kwimimandla emininzi ehlabathini, ngolwalathiso leofisi yesebe yelizwe, amabandla amaNgqina kaYehova aye amisele amanyathelo amele athatyathwe xa kusenokuhla intlekele yaye la manyathelo aye angqineka eluncedo.

◼ Bonisa uthando lobuKristu. UYesu wathi: “Ndininika umyalelo omtsha, wokuba nithandane; kanye njengoko ndinithandileyo mna.” (Yohane 13:34) Abantu ababonisa uthando lokuzincama lobuKristu benza konke okusemandleni ukunceda abanye balungiselele okanye basinde kwintlekele yemvelo. AmaNgqina kaYehova anabadala abasebenza ngenzondelelo ukuze baqiniseke ukuba onke amalungu ebandla akhuselekile okanye anokuya kwenye indawo ekhuselekileyo. Kwakhona, abadala baqinisekisa ukuba wonk’ umntu, unezinto ezisisiseko ezifana namanzi acocekileyo, ukutya, impahla namayeza. Kwangaxeshanye, amaKristu angamaNgqina avula amakhaya awo ukuze ahlale namanye amaNgqina asuka kwindawo yentlekele. Ngokwenene, uthando olunjalo “lungumxokelelwane ogqibeleleyo womanyano.”—Kolose 3:14.

Ngaba iintlekele zemvelo ziseza kuba mbi ngaphezu koku? Mhlawumbi, kodwa okwexesha nje elifutshane. Ngoba? Kaloku, sele kuza kuphela ukuzimela geqe kwabantu kuThixo. Ngaphezu koko, ihlabathi liphela kunye nabantu balo liza kuba phantsi kwesandla sikaYehova onamandla onke, yaye baya kukunandipha ukuphila kwelo hlabathi, njengokuba siza kubona.

[Imibhalo esemazantsi]

[Ibhokisi/Umfanekiso okwiphepha 7]

NGABA UKULUNGELE UKUFUDUKA?

Igosa Lemeko Yongxamiseko eNew York, licebisa ukuba kuthatyathwe ingxowa elula enezinto zongxamiseko. Unokufaka kuyo ezi zinto:c

◼ Faka amaphepha abalulekileyo kwinto engenako ukungena amanzi

◼ Kubekho izitshixo zendlu nezemoto

◼ Kubekho amakhadi ebhanki nemali

◼ Ibhotile yamanzi nokutya okungakhawulezi kubole

◼ Itotshi, unomathotholo, icellphone, neebhetri.

◼ Amayeza alungiselelwe iveki, nendlela yokuwasebenzisa, amaphepha okubhala amayeza, amagama oogqirha neenombolo zabo zefowuni. (Qiniseka ukuba amayeza uyawatshintsha xa ephelelwa lixesha)

◼ Ingxowa yoncedo lokuqala

◼ Izihlangu ezomeleleyo, ezimfumamfuma nezingangenwa ngamanzi

◼ Indlela yokuqhagamshelana njengentsapho nendawo eniza kudibana kuyo, ufake nemaphu yendawo enihlala kuyo

◼ Izinto zabantwana

[Umbhalo osemazantsi]

[Inkcazelo Ngomfanekiso okwiphepha 4]

USGS, David A. Johnston, Cascades Volcano Observatory