Abantu Abaselula Bayabuza . . .

Ndiphakathi Kwezithethe Ezahlukeneyo—Ndimele Ndenze Ntoni?

“Ekhaya singamaTaliyane yaye kuyinto eqhelekileyo ukubonisa indlela ovakalelwa ngayo. Kodwa ngoku sihlala eBritani. Abantu balapha bazibambile yaye kuyo yonk’ into bachul’ ukunyathela. Ndiziva ndingafaneleki kuzo zombini ezi zithethe—ndiliTaliyane kakhulu ukuba ndingaba liNgesi, ndiliNgesi kakhulu ukuba ndingaliTaliyane.”—UGiosuè, eNgilani.

“Esikolweni utitshala ukhe wathi kum mandimjonge ntsho emehlweni xa ndithetha naye. Kodwa xa ndijonga utata ngolo hlobo uthi ndikrwada. Ndiziva ndiphakathi kwezithethe ezibini ezingafaniyo.”—UPatrick, ummi waseAlgeria kodwa ofudukele eFransi.

Ngaba utata okanye umama wakho usuka kwelinye ilizwe?

◻ Ewe ◻ Hayi

Ngaba ulwimi okanye isithethe sasesikolweni sahlukile kwesakowenu?

◻ Ewe ◻ Hayi

NYAKA ngamnye izigidi ngezigidi zabantu ezifudukela kwamanye amazwe zijamelana neengxaki ezinzima. Zizibona ziphakathi kwabantu abathetha olunye ulwimi, abanezinye izithethe nendlela yokunxiba engafaniyo neyabo. Ngenxa yoku, abaphambukeli badla ngokuba zizisulu zokugculelwa—nto leyo intombazana egama linguNoor eyazibonela ngawayo amehlo. Intsapho yakowabo yafuduka isuka eJordan isiya eMntla Merika. Uthi: “Sasinxiba ngendlela eyahlukileyo, ngenxa yoko sasisiba yintlekisa. Phofu, sasingaziqondi izinto ezihlekisa abantu baseMerika.”

Intwazana egama linguNadia yaba nengxaki eyahlukileyo. Uthi: “Ndizalelwe eJamani. Kodwa ngenxa yokuba abazali bam bengamaTaliyane, ndithetha isiJamani ngendlela engaqhelekanga, yaye abanye abantwana esikolweni bathi ‘ndisisidenge.’ Xa ndisiya eItali, ndifumanise ukuba ndithetha isiTaliyane ngokungathi ndithetha isiJamani. Ndiziva ndingazazi kakuhle ukuba ndingubani. Naphi na apho ndiya khona ndingumntu wasemzini.”

Ziziphi ezinye iingxaki abajamelana nazo abantwana abanabazali abafudukele kwelinye ilizwe? Yaye banokuphumelela njani kule meko?

Umsantsa Owenziwa Sisithethe Nolwimi

Kubakho umsantsa phakathi kwabazali abafudukele kwilizwe lasemzini nabantwana babo. Kunokwenzeka njani oko? Abantwana batshintshela ngokukhawuleza kwizithethe ezitsha kunabazali babo. Ngokomzekelo, uAna wayeneminyaka esibhozo ubudala xa bafudukela eNgilani kowabo. Uthi: “Ukutshintshela kubomi baseLondon kwaba lula kakhulu kum nakumntakwethu. Kodwa kubazali bethu abakhe bangabemi kwisiqithi esincinane samaPhuthukezi iMadeira, kwakunzima kakhulu. UVoeun owayeneminyaka emithathu xa abazali bakhe bafudukela eOstreliya besuka eKhambodiya, uthi: “Kusenzima nangoku kubazali bam ukuqhela izithethe ezitsha. Xa ndithetha inyani, utata usuka abe ligqabi ngumsindo xa ndingasiqondi isimo sakhe sengqondo okanye indlela acinga ngayo.”

Umsantsa phakathi kwezithethe unokwahlula abantwana nabazali ngokungathi ngumsele omkhulu. Umsantsa wolwimi ufana nodonga olukhulu olugudle lo msele, yaye usenokuyahlukanisa ngakumbi intsapho. Yonke le nto iqala xa abantwana befunda ulwimi ngokukhawuleza kunabazali. Ukhule ngakumbi lo msantsa xa abantwana belulibala ulwimi lwabo yaye ukuncokola kusiba nzima ngakumbi nangakumbi.

UIan, ngoku uneminyaka eli-14 ubudala, wawubona uvuleka lo msantsa phakathi kwakhe nabazali bakhe emva kokufudukela eNew York besuka e-Ecuador. Uthi: “Ngoku ndithetha isiNgesi ngaphezu kweSpanish. Ootitshala bathetha isiNgesi esikolweni, nabantwana endifunda nabo bathetha isiNgesi, mna nomntakwethu sithetha isiNgesi. SisiNgesi esisentloko, iSpanish ndiya ngokusilibala.”

Ngaba uvakalelwa ngendlela efanayo noIan? Ukuba ufudukele kwelinye ilizwe usemncinane kakhulu, usenokungayicingi into yokuba ulwimi lwakowenu lunokuba luncedo kuwe ngeny’ imini ebomini bakho. Kusenokwenzeka ukuba uye wazivumela ukuba ululibale. UNoor, ocatshulwe ngaphambilana uthi: “Utata uye wanyanzelisa ukuba sithethe ulwimi lwakhe ekhaya, kodwa sasingafuni ukuthetha isiArabic. Sasicinga ukuba ukufunda isiArabic luxanduva. Abahlobo bethu bathetha isiNgesi. Iinkqubo esizibukela kumabonwakude zezesiNgesi. Kutheni ngoku kufuneka sifunde isiArabic?”

Njengokuba usithi dlundlu, usenokukuqonda ukubaluleka kokwazi ulwimi lwakho. Phofu usenokukufumanisa kunzima ukukhumbula amagama ayedla ngokuzizela ngokwawo. UMichael, oneminyaka eli-13 ubudala, owafuduka nabazali bakhe basuka eTshayina baya kuhlala eNgilani uthi: “Ndikhe ndibhidanise iikomityi ngezi lwimi zimbini.” UOrnelle, oneminyaka eli-15 ubudala, wafudukela eLondon esuka eCongo (eKinshasa). Uthi: “Ndidla ngokuzama ukuxelela umama nto ithile ngesiLingala, kodwa kusuke kube nzima, kaloku ndiqhele ukuthetha isiNgesi.” ULee, owazalelwa eOstreliya ngabazali abasuka eKhambodiya, uyazisola ngokungalazi kakuhle ulwimi lwakowabo. Uthi: “Xa ndithetha nabazali bam ndifuna ukunaba ndicacise indlela endivakalelwa ngayo ngezinto, ndifumanise ukuba andikwazi ukuthetha ulwimi lwabo kakuhle.”

Izizathu Zokuvala Lo Msantsa

Ukuba akusalazi ulwimi lwakowenu ungalahli ithemba. Usenokuphinda ulufunde olo lwimi. Kodwa kuqala kufuneka uzazi iingenelo zokwenza oko. Kakade unokuzuza ntoni ngokwenza oku? UGiosuè okhankanywe ngaphambilana uthi: “Ndiye ndafunda ulwimi lwabazali bam kuba ndifuna ukusondelelana nabo ngokweemvakalelo, kodwa okubaluleke nangakumbi kukusondelelana ngokomoya. Ukufunda ulwimi lwabo kuye kwandinceda ndayiqonda indlela abavakalelwa ngayo ngezinto. Phofu kuye kwandinceda ndaziqonda mna kuqala.”

AmaKristu amaninzi aselula afunda ulwimi lwabazali bawo kuba efuna ukushumayela kubantu basemzini abathetha olo lwimi ngeendaba ezilungileyo zoBukumkani bukaThixo. (Mateyu 24:14; 28:19, 20) USalomão owafudukela eLondon xa wayeneminyaka emihlanu, uthi: “Ukucacisa iZibhalo ngeelwimi ezimbini, kuyinto engenakuchazwa ngamazwi! Ndiphantse ndalibala ulwimi lwasekhaya, kodwa ngoku ndikwibandla lesiPhuthukezi kwaye ndithetha isiPhuthukezi nesiNgesi ngokutyibilikayo.” UOleg, ngoku ohlala eFransi, noneminyaka eli-15 budala, uthi: “Kuyandivuyisa ukunceda abanye. Ndiyakwazi ukucacisa iBhayibhile kubantu abathetha isiRashiya, isiFrentshi nesiMoldovan.” UNoor uthi wabona imfuneko yokushumayela kwintsimi ethetha isiArabic. Le ntwazana ithi: “Ngoku ndifunda olu lwimi yaye ndiqale apho bendiyeke khona. Isimo sengqondo sam sitshintshile. Ngoku ndifuna ukulungiswa xa ndenze impazamo kolu lwimi. Ndifuna ukulufunda.”

Yintoni onokuyenza ukuze wazi ulwimi lwakowenu kakuhle? Kwezinye iintsapho, kuye kwafunyaniswa ukuba ukunyanzelisa ukuba kuthethwe olo lwimi kuphela ekhaya, abantwana banokuzazi zombini iilwimi kakuhle.a Usenokucela abazali bakho bakufundise indlela yokubhala olu lwimi. UStelios, okhulele eJamani kodwa ulwimi lwakowabo sisiGrike, uthi: “Abazali bam badla ngokuxubusha itekisi yokusuku kunye nam. Badla ngokufunda ngokuvakalayo ndize ke mna ndibhale phantsi. Ngoku ndiyakwazi ukufunda nokubhala isiGrike nesiJamani.”

Ngokuqinisekileyo, ukuba uthetha iilwimi ezimbini okanye ngaphezulu kwaye uqhelene nezithethe zezo lwimi, unokuzuza lukhulu. Ukwazi izithethe ezibini kunokukhulisa amandla akho okuqonda indlela abantu abavakalelwa ngayo uze ukwazi ukuphendula imibuzo ngoThixo. IBhayibhile ithi: “Umntu uba nemihlali ngempendulo yomlomo wakhe, yaye hayi indlela elilunge ngayo ilizwi elithethwa ngexesha elifanelekileyo!” (IMizekeliso 15:23) UPreeti, owazalelwa eNgilani yaye abazali bakhe besuka eIndiya, ucacisa ngelithi: “Ngenxa yokuba ndisazi izithethe ezibini, ndiziva ndikhululekile entsimini. Ndibazi kakuhle abantu bezi zithethe zozibini—izinto abazikholelwayo nesimo sabo sengqondo.”

“UThixo Akakhethi Buso”

Ukuba uziva uphakathi kwezithethe ezibini ungaphelelwa lithemba. Imeko okuyo ifana nqwa nabalinganiswa abaliqela abaseBhayibhileni. Ngokomzekelo uYosefu, eseyinkwenkwe, wathathwa kwilizwe lakowabo lamaHebhere waza wachitha ixesha elininzi lobomi bakhe eYiputa. Nakuba kunjalo, akazange alulibale ulwimi lwakowabo. (Genesis 45:1-4) Ngenxa yoko, wakwazi ukunceda intsapho yakowabo.—Genesis 39:1; 45:5.

UTimoti, wahamba kakhulu nompostile uPawulos, uyise wayengumGrike unina engumYuda. (IZenzo 16:1-3) Kunokuba avumele imvelaphi yakhe engumxube ibe ngumqobo, wakwazi ukusebenzisa ulwazi lwakhe ngezi zithethe ukuze ancede abanye ngoxa wayeshumayela njengomvangeli wasemazweni.—Filipi 2:19-22.

Ngaba nawe ungazibona iimeko zakho njengento enokuba luncedo kunokuba uzijonge njengomqobo? Khumbula, “uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZenzo 10:34, 35) UYehova uyaluthanda uhlobo lomntu onguye kungakhathaliseki apho usuka khona. Ngaba nawe unokusebenzisa ulwazi namava onawo ukuze uncede abantu abasuka kwimvelaphi efana neyakho bafunde ngoThixo ongenakhethe, onothando uYehova? Ukwenza oku kuya kukwenza wonwabe kakhulu!—IZenzo 20:35.

Amanye amanqaku athi “Imibuzo Yabantu Abaselula . . . ” anokufumaneka kule Web site www.watchtower.org/ype

[Umbhalo osemazantsi]

OMELE UCINGE NGAKO

◼ Nguwuphi umsantsa wesithethe nolwimi ojamelene nawo?

◼ Unokuyicombulula njani le ngxaki?

[Umfanekiso okwiphepha 20]

Ukuthetha ulwimi lweenkobe kunokwenza nisondelelane njengentsapho