Abantu Aabaselula Bayabuza
Ngaba Ndifanele Ndidlale Imidlalo Ye-Elektroniki?
IMIDLALO ye-elektroniki asiyiyo imidlalo nje. Enyanisweni, ivavanya ubuchule bakho ize iphelise isithukuthezi. Kodwa yenza okungakumbi. Abaphengululi bathi imidlalo ye-elektroniki ikwenza uphaphe ngakumbi. Eminye inokude iphucule ubuchule bakho kwizibalo nasekufundeni. Ngaphezu koko, imidlalo ye-elektroniki yeyona nto kuncokolwa ngayo esikolweni. Ukuba ubukhe wawudlala umdlalo wakutshanje, uya kuba nento yokuncokola noontanga bakho.
Kakade ke, ngabazali bakho abanokugqiba enoba ufanele udlale imidlalo ye-elektroniki. (Kolose 3:20) Ukuba bayakuvumela, ufanele ukhethe umdlalo omnandi kodwa ofanelekileyo. Kodwa ke, kutheni ufanele ulumke?
Into Ephosakeleyo Ngayo!
UBrian oneminyaka eli-16 ubudala uthi, “Imidlalo yekhompyutha imnandi gqitha.” Kodwa uyazi nawe ukuba, asiyiyo yonke imidlalo engenabungozi. UBrian uyakuvuma oko esithi, “Kule midlalo wenza izinto ebezinokukufaka engxakini ukuba ubunokuzenza ngokoqobo.” Ikhuthaza ntoni le midlalo?
Imidlalo emininzi ikhuthaza ukuziphatha okubi, ukungcola nogonyamelo—zinto ezo zigxekwayo yiBhayibhile. (INdumiso 11:5; Galati 5:19-21; Kolose 3:8) Eminye imidlalo ikhuthaza ukusebenzelana nemimoya. UAdrian oneminyaka eli-18 ubudala, uthi omnye umdlalo odumileyo ubalaselisa “ukulwa, ukusetyenziswa kweziyobisi, ukuziphatha okubi ngokwesini, ukuthuka, nokuphalazwa kwegazi ngogonyamelo.” Mdlalo ngamnye omtsha uyagabadela ngobubi. UJames, oneminyaka eli-19 ubudala, uthi owona mdlalo uthandwa kakhulu kukudlala nomnye umntu kwi-Internet. Oku kwenza lo mdlalo ube mnandi gqitha. UJames uthi: “Unokukhuphisana nabantu abakwelinye ilizwe usebenzisa ikhompyutha yakho.”
Kweminye imidlalo edumileyo abadlali bayakwazi ukuzitshintshatshintsha. Kule midlalo, umdlali uba ngumntu othile, abe sisilwanyana okanye abe zizo zombini aze adlale namakhulukhulu abanye abadlali ehlabathini lonke. Kule midlalo kukho iivenkile, iimoto, izindlu, iindawo zemidaniso nezamahenyukazi—eneneni iba ngathi yindawo ekhoyo ngokoqobo. Abadlali bathumelelana imiyalezo ngekhompyutha.
Yintoni eqhubekayo apho? Omnye umcholacholi weendaba uthi: “Abantu benza izinto ebebengenakuzenza ngokoqobo.” Uhlabela mgama athi: “Eyona nto ixhaphakileyo ziintlobano zesini nobunongogo.” Ngokucofa nje amaqhosha ambalwa, abadlali be-elektroniki banokubandakanyeka kwiintlobano zesini ngoxa abadlali bokoqobo bethumelelana imiyalezo ethetha ngesini. Ngaphezu koko iphephancwadi iNew Scientist lithi, “kukho izenzo ezininzi zolwaphulo-mthetho, amaqela emigulukudu, abantu abathengisa ngamahenyukazi, abanobuqhetseba nezigwinta.” Elinye iphephancwadi lithi “abanye bayayigxeka imidlalo ebalaselisa izenzo ezingekho mthethweni, njengokudlwengulwa kwabantu kwiindawo zamahenyukazi, okanye iintlobano zesini phakathi kwabantwana.”
Kubalulekile Ukuba Ukhethe
Abo badlala le midlalo yogonyamelo okanye ebonisa ukuziphatha okubi ngokwesini basenokuthi: “Ayinabungozi. Yimidlalo nje.” Kodwa musa ukuqhatheka!
IBhayibhile ithi: “Kwangoqheliselo lwayo inkwenkwe izenza iqondwe enoba usulungekile na yaye uthe tye na umsebenzi wayo.” (IMizekeliso 20:11) Ukuba usoloko udlala imidlalo ye-elektroniki enogonyamelo nebonisa ukuziphatha okubi, ngaba kunokuthiwa unengqondo esulungekileyo nethe tye? Uphando lubonisa ukuba ukubukela ugonyamelo kwenza abantu babe ndlongo-ndlongo. Kutshanje iNew Scientist iye yathi: “Ukubandakanyeka kwimidlalo yevidiyo kunempembelelo ngakumbi kunokubukela umabonwakude.”
Ukukhetha ukudlala imidlalo enogonyamelo okanye ebonisa ukuziphatha okubi kufana nokudlala ngemichiza elahliweyo—usenokungayiboni ngokukhawuleza ingozi yayo, kodwa ibakho ngokuqinisekileyo. Njani? Ukuzichanaba ngokugqithiseleyo kule michiza kunokuba yingozi esiswini kuze kubangele iintsholongwane, nto leyo enokwenza umntu agule. Ngokufanayo, ukuzichanaba kwimidlalo ebonisa ukuziphatha okubi ngokwesini nogonyamelo kunokonakalisa ‘ukuziphatha’ kwakho yaye loo nto inokuphembelela ingqondo nezenzo zakho.—Efese 4:19; Galati 6:7, 8.
Ndifanele Ndikhethe Yiphi Imidlalo?
Ukuba abazali bakho bayakuvumela ukuba udlale imidlalo ye-elektroniki, unokuyikhetha njani yaye ufanele uchithe ixesha elingakanani kuyo? Zibuze le mibuzo ilandelayo:
◼ Ngaba umdlalo endiwukhethayo uya kumcaphukisa uYehova? Ukhetho lwakho lunokuyichaphazela indlela uThixo avakalelwa ngayo ngawe. INdumiso 11:5 ithi: “UYehova uhlolisisa lowo ulilungisa kwanalowo ungendawo, yaye umphefumlo Wakhe umthiyile ngokuqinisekileyo nabani na othanda ugonyamelo.” Ngokuphathelele abo basebenzelana nemimoya, iLizwi likaThixo lithi: “UYehova uyamcekisa wonke ubani ozenzayo ezi zinto.” (Duteronomi 18:10-12) Xa sifuna ukuba ngabahlobo bakaThixo sifanele sisebenzise icebiso elikwiNdumiso 97:10 elithi: “Nina nithanda uYehova, kuthiyeni okubi.”
◼ Lo mdlalo uya kuyichaphazela njani indlela endicinga ngayo? Zibuze, “Ngaba lo mdlalo uya kwenza kube lula okanye kube nzima ukuba ‘ndisabe kuhenyuzo’?” (1 Korinte 6:18) Imidlalo okanye incoko evuselela inkanuko yesini ayiyi kukunceda ukuba ingqondo yakho ihlale icinga ngezinto ezibubulungisa, ezinyulu nekuthethwa kakuhle ngazo. (Filipi 4:8) UAmy, oneminyaka engama-22 ubudala uthi: “Imidlalo emininzi inokukwenza ungaboni nto iphosakeleyo ngogonyamelo, ukuthuka nokuziphatha okubi, yaye ekuhambeni kwexesha inokukubeka esichengeni sokwenza nezinye izinto ezimbi. Ufanele uwulumkele umdlalo owukhethayo.”
◼ Ndiza kuchitha ixesha elingakanani kulo mdlalo? UDeborah oneminyaka eli-18 ubudala, uthi: “Andiqondi ukuba yonke imidlalo yekhompyutha iphosakele. Kodwa inokukutyela ixesha elininzi, kuze kube nzima nokwahlukana nayo.” Kwanemidlalo engeyongozi inokukuchithela ixesha. Ngoko bhala phantsi ixesha olichitha kule midlalo uze ulithelekise nexesha olichitha kwezinye izinto ezibalulekileyo. Ngokwenjenjalo uya kukwazi ukunikela ingqalelo kwezona zinto zibalulekileyo.—Efese 5:15, 16.
IBhayibhile ayithi ufanele uchithe lonke ixesha lakho ekufundeni okanye ekusebenzeni. Ibonisa ukuba “kukho ixesha . . . lokuhleka . . . nexesha lokudloba.” (INtshumayeli 3:4) Simele siqonde ukuba igama elithi ‘ukudloba’ linentsingiselo ephangaleleyo. Ngoko kutheni ungadlali neminye imidlalo eshukumisa igazi kunokuhlala nje phambi kwekhompyutha?
Khetha Ngobulumko
Ngokuqinisekileyo, imidlalo ye-elektroniki inokuba mnandi, ingakumbi xa ulichule ekuyidlaleni. Naso kanye isizathu sokuba ufanele ukhethe ngobulumko. Zibuze, ‘Ziziphi izifundo endibalasele kuzo esikolweni?’ Ngaba asizizo ezo uzithanda kakhulu? Eneneni, isifundo osithanda kakhulu sidla ngokuba seso ubalaseleyo kuso. Ngoko zibuze: ‘Nguwuphi owona mdlalo we-elektroniki ndiwuthandayo? Undifundisa ntoni lo mdlalo?’
Into enokukunceda xa ukhetha, kukuba ubhale imidlalo oyithandayo, uchaze injongo yayo nendlela edlalwa ngayo. Thelekisa oko ukubhalileyo nemigaqo yeBhayibhile echazwe kweli nqaku, uze wenze isigqibo enoba ufanelekile kusini na lo mdlalo.
Kunokuba udlale umdlalo kuba udlalwa ngoontanga bakho, zenzele olwakho ukhetho. Okubaluleke nangakumbi, sebenzisa eli cebiso leBhayibhile: ‘Qinisekisa ngoko kwamkelekileyo eNkosini.’—Efese 5:10.
Amanye amanqaku athi “Abantu Abaselula Bayabuza . . . ” afumaneka kwiWeb site ethi www.watchtower.org/ype
OMELE UCINGE NGAKO
◼ Ungathini xa umhlobo wakho ekucela ukuba nidlale kunye umdlalo we-elektroniki onogonyamelo okanye okhuthaza ukuziphatha okubi?
◼ Unokuqiniseka njani ukuba ukudlala umdlalo we-elektroniki akuphazamisani nezona zinto zibalulekileyo?
[Amagama acatshulweyo akwiphepha 19]
Ukukhetha ukudlala imidlalo enogonyamelo okanye ebonisa ukuziphatha okubi kufana nokudlala ngemichiza elahliweyo—usenokungayiboni ngokukhawuleza ingozi yayo, kodwa ibakho ngokuqinisekileyo
[Ibhokisi ekwiphepha 18]
Uyidlala kangakanani imidlalo ye-elektroniki?
□ Manqapha-nqapha
□ Kanye ngeveki
□ Yonk’ imihla
Uchitha ixesha elingakanani udlala?
□ Imizuzu embalwa
□ Iyure okanye ngaphantsi
□ Ngaphezu kweeyure ezimbini
Yiyiphi eyona midlalo uyithandayo?
□ Eyeemoto
□ Ezemidlalo
□ Eyokudubulana
□ Eminye
Bhala umdlalo we-elektroniki owaziyo ukuba awufanelekanga.
․․․․․
[Ibhokisi/Umfanekiso okwiphepha 20, 21]
UMYALEZO KUBAZALI
Kusenokwenzeka ukuba ubonile kwinqaku elandulelayo ukuba imidlalo ye-elektroniki itshintshe kakhulu kunangokuya wena wawusakhula. Njengomzali, unokumnceda njani umntwana wakho abone ubungozi bayo aze abuphephe?
Akuncedi nganto ukuthi yonke le midlalo ayifanelekanga yaye yinkcitha-xesha. Khumbula ukuba, asiyiyo yonke imidlalo engafanelekanga. Kodwa ke, kunokuba nzima ukwahlukana nayo yaye inokuchith’ ixesha. Ngoko ke jonga ixesha elichithwa ngumntwana wakho kule midlalo. Kwakhona hlolisisa imidlalo ethandwa ngumntwana wakho. Usenokude umbuze le mibuzo ilandelayo:
◼ Nguwuphi owona mdlalo uthandwa kakhulu eklasini yakho?
◼ Kuqhubeka ntoni kuloo mdlalo?
◼ Ucinga ukuba yintoni ebangela ukuba uthandwe kangaka?
Usenokufumanisa ukuba ininzi gqitha into eyaziwa ngumntwana wakho kunokuba ucinga! Mhlawumbi sel’ ekhe wayidlala neminye imidlalo ocinga ukuba ayifanelekanga. Ukuba kunjalo, musa ukucaphuka. Eli lithuba lokumnceda ukuba asebenzise amandla akhe okuqonda.—Hebhere 5:14.
Mbuze imibuzo eya kumnceda abone isizathu sokuba atsaleleke kwimidlalo engafanelekanga. Ngokomzekelo, unokumbuza le mibuzo:
◼ Ngaba uziva wahlukile kwabanye abantwana kuba ungavumelekanga ukuba udlale umdlalo othile?
Njengoko kubonisiwe ekuqaleni kwenqaku, ulutsha oluninzi ludlala imidlalo ethile ukuze lube nento yokuncokola. Ukuba kunjalo nangowakho umntwana, mhlawumbi uya kusabela ngendlela eyahlukileyo kunendlela obuya kusabela ngayo ukuba ebetsaleleke kwimidlalo enogonyamelo okanye ekhuthaza ukuziphatha okubi ngokwesini.—Kolose 4:6.
Kodwa kuthekani ukuba umntwana wakho uthanda izinto ezingafanelekanga kule midlalo? Abanye banokukhawuleza bathi ugonyamelo olukwimidlalo yekhompyutha alubachaphazeli nganto. Bathi, ‘Ukudlala umdlalo ekhompyutheni akuthethi kuthi ndiza kuhamba ndiyokuyenza loo nto.’ Ukuba umntwana wakho uvakalelwa ngaloo ndlela, funda naye iNdumiso 11:5, ecatshulwe kwiphepha 20. Njengoko le ndinyana ibonisa, uThixo akathiyanga nje umntu onogonyamelo, kodwa uthiye nabo baluthandayo. Kuyafana ke nangokuziphatha okubi ngokwesini okanye nasiphi na isenzo esigatywayo liLizwi likaThixo.—INdumiso 97:10.
Ezinye iingcali zinikela la macebiso:
◼ Musa ukuvumela abantwana ukuba badlalele imidlalo ye-elektroniki kwindawo esitheleyo, njengakwigumbi lokulala.
◼ Misela imithetho (ngokomzekelo, umntwana akanakudlala engekatyi okanye engekawugqibi umsebenzi wesikolo okanye nawuphi na omnye).
◼ Mbonise iingenelo zokudlala eminye imidlalo eshukumis’ igazi.
◼ Babukele abantwana bakho xa bedlala imidlalo ye-elektroniki—okanye mhlawumbi ungade udlale nabo ngamany’ amaxesha.
Kakade ke, ukuze ukwazi ukubanceda abantwana bakho kule nkalo, ufanele ube ngumzekelo. Ngoko ke zibuze, ‘Ndibukela ziphi iinkqubo kumabonwakude?’ Ungaziqhathi—ukuba nawe ubukela iinkqubo ezingafanelekanga,abantwana bakujongile!