Abantu Abaselula Bayabuza

Ndinokuhlangabezana Njani Nempilo Enkenenkene?

IMIZEKELISO 20:29 ithi: “Ubuhle babafana ngamandla abo.” Ukuba uyagula okanye unesiphene usenokucinga ukuba esi sibhalo asinanto yakwenza nawe. Kodwa siyabhekisela nakuwe! Inyaniso kukuba ulutsha oluninzi oluneziphene nolunezifo ezinganyangekiyo luye lwatyhubela ezintweni ezininzi. UVukani! uye wadlan’ indlebe nabasebatsha abane abanjalo.

UHiroki waseJapan wazalwa enzakele ebuchotsheni. Uthi: “Izihlunu zentamo azikwazi ukugcina intloko yam ithe nkqo yaye izandla zam azilawuleki. Andikwazi kuzenzela nto, ndixhomekeke kwabanye abantu.”

UNatalie nomntakwabo uJames baseMzantsi Afrika bazalwa bebafutshane ngendlela engaqhelekanga. Kwakhona uNatalie unesifombo. Uthi: “Ndiye ndenziwa utyando kumnqonqo kangangezihlandlo ezine yaye ngenxa yoko imiphunga yam ayisebenzi kakuhle.”

UTimothy waseBritani xa wayeneminyaka eli-17 ubudala kwafunyaniswa ukuba unesifo ekuthiwa yichronic fatigue syndrome (isifo sokudinwa ngokugqithiseleyo). Uthi: “Kungaphelanga neenyanga ezimbini ndayeka ukuba ngumqabaqaba odlamkileyo ndaba lutywantsi olungakwazi nokuhamba.”

UDanielle waseOstreliya xa wayeneminyaka eli-19 ubudala kwafunyaniswa ukuba unesifo seswekile. Uthi: “Nakuba xa uneswekile kungekho nto ibonisayo abanye abantu abaqondi ukuba uyagula. Inyaniso kukuba isifo seswekile sinokundisa kwantsonga-nyawana.”

Ukuba unohlobo oluthile lwesigulo okanye isiphene ngokungathandabuzekiyo uya kukhuthazwa nguHiroki, nguNatalie, nguTimothy noDanielle. Ukuba ungumqabaqaba amagqabaza abo aya kukunceda ukuba uzifake ezihlangwini zabantu abagulayo okanye abanesiphene.

UVukani! uyabuza: Bubuphi ubunzima ojamelana nabo?

UNatalie uyaphendula: Kunzima ukuyamkela indlela abantu abasabela ngayo xa bendibona. Andikhululeki. Ndivakalelwe kukuba ngalo lonke ixesha abantu bajonge mna.

UDanielle uyaphendula: Eyona nto iyingxaki kwisifo seswekile kukwazi ukuba ufanele utye ntoni, utye kangakanani nokuba zintoni ofanele ungazityi. Ukuba nditya nantoni na ephambi kwam ndiya kuba neswekile eninzi egazini nto leyo esenokukhokelela ekubeni ndife isiqaqa.

UHiroki uyaphendula: Ndinesitulo esinamavili esenzelwe mna ngokukhethekileyo yaye kangangeeyure ezili-15 ngosuku ndihlala ngendlela enye. Kwakhona ndinengxaki yokuphuthelwa. Ukuba kukho nje ingxolwana ndiphelelwa bubuthongo.

UTimothy uthi: Eyona nto ibilucelomngeni kum kukwamkela isibakala sokuba ndiyagula. Kwakungathi ungavuleka umhlaba ndingene.

UVukani! uyabuza: Ziziphi ezinye iingxaki ojamelena nazo?

UDanielle uyanaba: Isifo seswekile sibangela ukuba udinwe kakhulu. Ndilala ixesha elide kuneentanga zam. Kwakhona isifo seswekile asinyangeki.

Yena uNatalie uthi: Ukuba mfutshane ngendlela engaqhelekanga yeyona nto ilucelomngeni ebomini bam. Kunzima ukwenza izinto eziqhelekileyo njengokuthath’ izinto eshelufini yevenkile. Kuba nzima gqitha ukuhamba ndedwa xa ndisiya evenkileni.

UTimothy uyaphendula: Kufuneka ndinyamezele ukuqaqanjelwa yaye maxa wambi ndiye ndidandatheke. Ngaphambi kokuba ndigule ndandikhuthele. Ndandiphangela yaye ndineempepha zokuqhuba. Ndandidlala ibhola nomdlalo ekuthiwa sisisquash (umdlalo ofana nentenetya). Ngoku ndihleli kwisitulo esinamavili.

UHiroki uthi: Andivakali kakuhle xa ndithetha. Oku kuyandityhafisa yaye kwenza ndithandabuze ukuqalisa incoko. Maxa wambi ngenxa yokuba izandla zam zingalawuleki ngempazamo ndiye ndizibone sele ndibetha abantu. Xa kusenzeka lo nto ndiye ndingakwazi nokuthi “ndicel’ uxolo” ngenxa yokuba xa ndithetha andivakali.

UVukani! uyabuza: Yintoni eye yakunceda ukuze ujamelane nale ngxaki?

UDanielle uyanaba: Ndiye ndazama ukunikel’ ingqalelo kwizinto ezikhuthazayo ebomini. Ndinentsapho yasekhaya, abahlobo abandithandayo ebandleni yaye okubaluleke ngakumbi uYehova uye wandixhasa. Kwakhona ndizama ukufunda ngenkcazelo yakutshanje ngendlela yokunyamekela isifo seswekile. Ndenza unako nako ukuze ndinyamekele impilo yam.

UNatalie uthi: Umthandazo yeyona nto indomelezayo. Ndiye ndizame ukumelana nengxaki nganye endijamelana nayo. Ukuzigcina ndixakekile kuye kwandinceda andabi nalo ixesha lokucinga ngezinto ezidimazayo. Ndinabazali abandithandayo endinokuzityand’ igila kubo.

UTimothy uyaphendula: Ndiba nento endiyenzayo enento yokwenza nonqulo suku ngalunye nokuba ndiza kuyenza nje okwexeshana. Ngokomzekelo, suku ngalunye ndiye ndiqale ngokuqwalasela itekisi yosuku. Ukufunda iBhayibhile nokuthandaza zezona zinto zibalulekileyo kum, ngokukodwa xa ndiziva ndingonwabanga.

UHiroki unathi esithi: Andizikhathazi ngezinto ekungekho nto ndinokuyenza ngazo. Oko kundichithela ixesha. Kunoko, ndenza konke okusemandleni am ukuzakha ngokomoya yaye ukugula kwam andikwenzi isingxengxezo sokungayifundi iBhayibhile. Xa ndiphuthelwe, ndifumana ithuba lokuthandaza.—Funda amaRoma 12:12.

UVukani! uyabuza: Abanye abantu baye banikhuthaza njani?

UHiroki uyaphendula: Abadala bebandla basoloko bendincoma ngalo nto ndikwaziyo ukuyenza. Kwakhona abazalwana noodade abasebandleni bahamba nam xa besiya kumabuyelo nezifundo zabo.—Funda amaRoma 12:10.

UDanielle uthi: Eyona nto indichukumisayo kuxa abazalwana noodade basebandleni bendincoma ngokunyanisekileyo. Oko kundenza ndizive ndithandwa yaye kuyandikhuthaza.

UTimothy uhambisa athi: Kukho udade osele ekhulile owenza konke okusemandleni akhe ukuze ancokole nam kwiintlanganiso. Kwakhona abadala namakhosikazi abo baye bandikhuthaze baze bandinike amacebiso aluncedo. Omnye umdala oneminyaka engama-84 ubudala uye wandinceda ndazibekela usukelo endinokulufikelela. Esinye isicaka solungiselelo siye sandicela ukuba ndihambe naso xa ndisiya entsimini yaye siye salungiselela kwangaphambili ukuba sisebenze kummandla ekuza kuba lula kuwo ukuhambisa isitulo esinamavili.—Funda iNdumiso 55:22.

UNatalie uyaphendula: Xa ndingena nje kwiHolo yoBukumkani abazalwana noodade ebandleni bandibulisa ngobubele bencumile. Amaxhego namaxhegokazi asoloko endikhuthaza phezu kwazo nje iinzingo zawo.—Funda 2 Korinte 4:16, 17.

UVukani! uyabuza: Yintoni eye yakunceda wahlala unesimo sengqondo esihle?

UHiroki uyaphendula: Njengokuba ndiliNgqina likaYehova ndinxulumana nabantu abanethemba eliqaqambileyo. Ngenxa yokuba ndikwintlangano enabantu abanjalo oko kuye kwandinceda ndaba nesimo sengqondo esihle.—Funda 2 Kronike 15:7.

UDanielle uthi: Ndiye ndicinge ngelungelo endinalo lokuqonda injongo kaThixo. Bakhona abantu abayimiqabaqaba kodwa nakuba kunjalo abonwabanga njengam.—Funda iMizekeliso 15:15.

UNatalie uyanaba: Ndiyifumanise indinceda into yokuba phakathi kwabantu abanesimo sengqondo esihle. Kwakhona kuye kwandikhuthaza ukufunda ngabanye abantu abakhonza uYehova phezu kwazo nje iinzingo. EHolweni yoBukumkani ndiya ndisazi ukuba ndiza komelezwa yaye ndiza kukhunjuzwa ngendlela ekulilungelo ngayo ukuba liNgqina likaYehova.—Funda amaHebhere 10:24, 25.

UTimothy uhambisa athi: Njengokuba eyoku-1 kwabaseKorinte 10:13, uYehova akayi kusiyekela ukuba sihendwe ngaphezu koko sinokukuthwala. Ndifikelela kwisigqibo sokuba ukuba uMdali wam uvakalelwa kukuba ndinokukumelana nesi sigulo ndingubani mna ukuba ndingaxambulisana naye?

Amanye amanqaku athi “Abantu Abaselula Bayabuza” anokufunyanwa kwiWeb site ethi www.watchtower.org/ype

OZA KUCINGA NGAKO

◼ UHiroki noTimothy bobabini basebenzisa isitulo esinamavili. Ukuba ukwimeko efanayo neyabo, anokukunceda njani amagqabaza abo ukuba uhlale uchwayitile?

◼ UDanielle ukhe wayikhankanya into yokuba “Nakuba xa uneswekile kungekho nto ibonisayo ukuba uyagula abanye abantu abaqondi ukuba uyagula.” Ngaba unesigulo esingabonakaliyo? Ukuba kunjalo yintoni oyifundileyo koko kuthethwa nguDanielle?

◼ UNatalie uthi eyona nto ilucelomngeni kuye yindlela abantu abasabela ngayo xa bembona. Yintoni onokuyenza ukuze umenze azive ekhululekile umntu ofana noNatalie? Ukuba unesigulo okanye unesiphene esikwenza uvakalelwe ngendlela avakalelwa ngayo uNatalie unokusixelisa njani isimo sakhe sengqondo esihle?

◼ Bhal’ apha ngezantsi uludwe labantu obaziyo abanesiphene okanye abanesifo esinganyangekiyo.

․․․․․

◼ Yintoni onokuyenza ukuze ukhuthaze mntu ngamnye kwaba bantu?

․․․․․

[Ibhokisi ekwiphepha 27]

Intuthuzelo Esuka EBhayibhileni

◼ UYesu ubathanda ngokunyanisekileyo abantu abagulayo.—Marko 1:41.

◼ ‘Ngokuphilisa lonke uhlobo lwesifo nalo lonke uhlobo lobulwelwe’ uYesu wayebonisa oko kuza kwenzeka eBukumkanini bukaThixo.—Mateyu 4:23.

◼ Kwihlabathi elitsha likaThixo “akakho ummi wakhona oya kuthi: “Ndiyagula,” yaye neentlungu azisayi kubakho.—Isaya 33:24; ISityhilelo 21:1-4.

◼ Nkqu nokufa kuya “kutshitshiswa.”—1 Korinte 15:25, 26.

[Umfanekiso okwiphepha 26]

UHiroki, oneminyaka engama-23 ubudala waseJapan

[Umfanekiso okwiphepha 26]

UNatalie, oneminyaka engama-20 ubudala waseMzantsi Afrika

[Umfanekiso okwiphepha 26]

UTimothy, oneminyaka engama-20 ubudala waseBritani

[Umfanekiso okwiphepha 26]

UDanielle, oneminyaka engama-24 ubudala waseOstreliya