Ngaba Layilwa?

Iliso Elintsonkothileyo

◼ “Linoomaleko abaninzi ababekwe ngolungelelwano.” Yindlela leyo uNjingalwazi uLuke Lee weYunivesithi yaseKhalifoniya, eUnited States, alichaza ngayo iliso elintsonkothileyo lezinambuzane ezininzi.

Phawula: Iliso elintsonkothileyo lezinambuzane ezithile, njengenyosi nohlabamanzi, lineenxalenye ezininzi, nganye kuzo ekwaziyo ukujonga kwicala elahlukileyo. Oko kubonwa yinxalenye nganye, xa kudityanisiwe kwenza ukuba iliso libone yonke intshukumo eyenzeka macala onke.

Izazinzulu zizama iindlela zokulinganisa iliso elintsonkothileyo lezinambuzane ukuze zenze iikhamera ezikwaziyo ukufota macala onke. Ezi khamera zinokusetyenziswa ngeendlela ezahlukahlukeneyo. Zisenokusetyenziswa nakwezonyango—ngokomzekelo, zisenokufota ngaphakathi esiswini. Le khamera yezonyango “iliceba nje elincinane” elinokuginywa sisigulana. Xa ingaphakathi esiswini, inokufota konke okwenzeka ngaphakathi, ize idlulisele inkcazelo kwizazinzulu.

Likho iqela lezazinzulu esele liqalile ukwenza iliso elintsonkothileyo elineenxalenye ezingaphezu kwama-8 500 nelilingana nentloko kanotaka. Noko ke, lo zenzele weliso akayonto xa ethelekiswa neliso elintsonkothileyo lesinambuzane. Ngokomzekelo, isinambuzane esibizwa ngokuba nguhlabamanzi sineenxalenye ezimalunga nama-30 000 kwiliso ngalinye!

Zibuze: ‘Ngaba iliso elimangalisayo lesinambuzane libekho ngamabona-ndenzile? Okanye ngaba layilwa?’

[Umfanekiso okwiphepha 26]

Umfanekiso owandisiweyo wenxalenye yeliso elintsonkothileyo lenyosi

[Inkcazelo Ngemifanekiso ekwiphepha 26]

Background: © Stephen Dalton/Photo Researchers, Inc.; close-up: © Raul Gonzalez Perez/Photo Researchers, Inc.