Abantu Abaselula Bayabuza

Kutheni Abazali Bam Bengandithembanga?

“Ingathi abazali bam bangakhe bandiyeke ndizikhuphe bangabikho. Asikuko nokuba ndifuna nje ukuzula. Ndifuna nje ukutyelela umakazi, engekho umama oza kuzikhathaza ngento yokuba mna ndifuna ukushiya ikhaya.”—USarah, oneminyaka eli-18 ubudala.a

“Ndisoloko ndibabuza abazali bam ukuba kutheni bengandithembi xa ndifuna ukuzikhupha nabahlobo. Basoloko bendixelela ukuba: ‘Sikuthembile. Nto nje asibathembanga abahlobo bakho.’ Ndikhathazeka gqitha xa besitsho!”—UChristine, oneminyaka eli-18 ubudala.

UKUTHENJWA kufana nje nemali. Usebenza nzima ukuze ube nayo kodwa kulula ukuphulukana nayo yaye nokuba ungaba nesityhwentywe sayo soze uthi yanele. UIliana oneminyaka eli-16 ubudala uthi: “ Xa ndicela ukuya kubethwa ngumoya abazali bam bandihlaba imibuzo enjengethi uyaphi, uza kuhamba nabani, uza kwenza ntoni aph’ uya khona yaye uza kubuya nini. Ndiyazi ukuba ngabazali bam, kodwa ndiyacaphuka xa bendibuza le mibuzo!

Ngaba maxa wambi ukhe uvakalelwe kukuba akwaba abazali bebenokukhe nje bakuthembe? Ukuba kunjalo, yintoni onokuyenza? Kuqala makhe sihlolisise isizathu sokuba ukuthembana phakathi kwabazali nabantwana abaninzi ingumbandela onobuzaza.

Amanzithinzithi Okukhula

IBhayibhile iyavuma ukuba “indoda iya kumshiya uyise nonina.” (Genesis 2:24) Phofu ke, kusenokuthethwa okufanayo nangebhinqa. Enoba uyinkwenkwe okanye intombazana xa usekwishumi elivisayo uqeqeshelwa ukuba ngumntu omdala ofanelekileyo yaye ngelo xesha uya kukwazi ukuzimela, mhlawumbi ukwazi nokukhulisa abakho abantwana.

Noko ke, akulula xa uqeqeshelwa ukuba ngumntu omdala ofanelekileyo. Sinokukufanisa nezinyuko ofanele unyathele inqwanqwa ngalinye de udlule kwishumi elivisayo. Mhlawumbi wena nabazali bakho benisoloko nixambulisana njengokuba ukhula. UMaria ovakalelwa kukuba abazali bakhe abamthembi ukuba angakhetha abahlobo abafanelekileyo uthi: “Ndineminyaka engama-20 ubudala, yaye ukungathenjwa kuseyingxaki. Abazali bam bacinga ukuba andinakukwazi ukuyiphepha ingcinezelo yoontanga. Ndiye ndazama ukubaxelela ukuba ndiye ndaphumelela ekulweni nayo, kodwa khange incede loo nto!”

Njengokuba uMaria esitsho, ukuthenjwa kwabantwana ngabazali ngumbandela ontununtunu. Ngaba kunjalo nakowenu? Ukuba kunjalo, yintoni onokuyenza ukuze abazali bakho bakuthembe? Ukuba abakuthembi ngenxa yobuyatha obuthile owabenzayo, yintoni onokuyenza ukuze baphinde bakuthembe?

Benze Bakuthembe

Umpostile uPawulos xa wayebhalela amaKristu enkulungwane yokuqala wathi: “Hlalani nizicikida oko nikuko nina ngokwenu.” (2 Korinte 13:5) Eneneni, uPawulos wayengathethi ngolutsha olukwishumi elivisayo kulo mbhalo. Sekunjalo, lo mgaqo uyasebenza nakulo. Ukuze bakuthembe nawe ufanele ubenze bakuthembe. Oko akuthethi kuthi ufanele ufezeke. Ngapha koko, nabani na unokuyenza impazamo. (INtshumayeli 7:20) Phofu ke, ngaba indlela ozenza ngayo izinto yenza abazali bakho bangakuthembi?

Ngokomzekelo uPawulos wabhala wathi: “Sinqwenela ukuziphatha ngokunyaniseka kwizinto zonke.” (Hebhere 13:18) Zibuze, ‘Ngaba abazali bam ndibaxelel’ inyaniso ngokuba ndiyaphi nokuba ndiza kube ndisenza ntoni kulo ndawo?’ Makhe sihlolisise amagqabaza olutsha olumbalwa sikhe sive ukuba lona luqhuba njani kule nkalo.

ULori uyanaba: “Abazali bam bengazi ndandibhalelana nomnye umfana endandimazi nge-email. Bandibhaqa baza bathi mandiyiyeke le nto ndandiyenza. Ndabathembisa ukuba andizokuphinda ndimthumelele kodwa andizange ndiyeke. Ndayenza le nto kangangonyaka. Ndandidla ngokubhalelana nalo mfana, abazali bam bandibhaqe, ndicele uxolo ndithembise ukuba andizi kuphinda ndimbhalele kodwa ndandingayeki. Abazali bam abazange baphinde bandithembe.

Ucinga ukuba kutheni abazali bakaLori bengazange baphinde bamthembe yaye ucinga ukuba uLori ngewayeziphethe njani emva kokuba abazali bakhe bathetha naye ngale ngxaki okwesihlandlo sokuqala? Bhala impendulo yakho apha ngezantsi.

․․․․․

UBeverly uthi: “Abazali bam babengandithembi ukuba ndingakwazi ukuziphatha kakuhle xa ndiphakathi kwamakhwenkwe kodwa ngoku ndiyasiqonda isizathu sokuba bavakalelwe ngaloo ndlela. Ndandinomdla kubafana abaliqela ababebadala kum ngeminyaka emibini. Kwakhona ndandichitha ixesha elininzi ndincokola nabo efowunini yaye xa sisezimbuthweni ndandincokola nabo kuphela. Abazali bam bayithabatha ifowuni kangangenyanga yaye babengandivumeli ukuba ndiye kwiindawo aba bafana ekusenokwenzeka ukuba baza kubakho kuzo.”

Ucinga ukuba kutheni abazali bakaBeverly bengazange bamthembe yaye yintoni ebefanele ayenze ukuze alungise imeko?

․․․․․

UAnnette uyabalisa: “Xa ndandisekwisikolo samabanga aphakathi mna nomhlobo wam xa sigoduka sivela kwimbutho ethile sasiphatha itoti yebhiya—nakuba sasisazi ukuba abazali bethu babengayithandi lo nto—yaye sasizimisele ukuzisela emva kwexesha elithile sisenzela nje ukuzonwabisa. Itoti yebhiya yomhlobo wam yabhaqwa ngumama wakhe. Yavela into yokuba nam ndineyam. Hayi indlela adana ngayo umama akuva lo nto!

Ukuba uAnnette ebengudadewenu omncinane, unokumcebisa uthini ukuze kwakhona umama wakho aphinde amthembe?

․․․․․

Ukuphinda Uthenjwe

Kuthekani ukuba indlela ozenza ngayo izinto ibangele ukuba abazali bakho bangakuthembi njengokuba kunjalo ngolu lutsha lukhankanywe ngasentla? Nakuba kusenokuba kunjalo, qiniseka ukuba ungaphinda ubenze abazali bakho bakuthembe. Ungakwenza njani oko?

Abazali bakho bangakuthemba ukuba izinto uzenza ngendlela efanelekileyo. Ngokomzekelo: Cinga nje ngendoda enetyala ebhankini. Ukuba iyalihlawula ityala layo ibhanki iyayithemba yaye inokuphinda iyiboleke imali. Kunjalo kanye ke nasekhaya. Ukuba uthembekile—nakwezona zinto zincinane—abazali bakho bangakuthemba nakwixa elizayo.

Ekugqibeleni uAnnette wayifumana ingongoma. Uthi: “Xa usemncinane awuyiqondi indlela ebaluleke ngayo into yokuba uthenjwe ngabazali. Ngoku ndivakalelwa kukuba ndinembopheleleko yokwenjenjalo yaye ndiziva ndinyanzelekile ukuba ndenze izinto ngendlela eza kubenza bandithembe abazali bam.” Yintoni ofanele uyifunde koku? Kunokuba ulilisele ngento yokuba abazali bakho abakuthembanga, yenza izinto ngendlela efanelekileyo nto leyo eya kubenza bakuthembe.

Ngokomzekelo, ngaba unokuthenjwa kwezi zinto zidweliswe ngezantsi? Phawula kule bhokisi izinto ekusafuneka uphucule kuzo.

□ Ngaba ndibuya ngexesha abazali abafuna ndibuye ngalo ekhaya?

□ Ngaba ndiyalibamba ixesha?

□ Ngaba ndiyayenza imisebenzi endiyabelweyo?

□ Ngaba igumbi lam licocekile?

□ Ndiyisebenzisa njani ifowuni?

□ Ngaba ndiyazizalisekisa izithembiso?

□ Ngaba ndiyisebenzisa kakuhle imali?

□ Ngaba ndivuka kwangexesha?

□ Ngaba ndithetha inyaniso?

□ Ngaba ndiyazivuma iimpazamo ndize ndicele uxolo?

□ Nezinye izinto ․․․․․

Kutheni ungazimiseli ukuphucula kwezi nkalo usenzela ukuba abazali bakho bakuthembe? Landela isibongozo esiseBhayibhileni esithi: “Nibulahle ubuntu obudala obuvisisana nehambo yenu yangaphambili.” (Efese 4:22) “UEwe wenu makabe nguEwe.” (Yakobi 5:12) “Ngamnye kuni makathethe inyaniso nommelwane wakhe.” (Efese 4:25) “Bathobeleni abazali benu ezintweni zonke.” (Kolose 3:20) Ekuhambeni kwexesha, ukuhambela kwakho phambili kuya kubonakala ebantwini bonke, kuquka nakubazali bakho.—1 Timoti 4:15.

Kodwa kuthekani ukuba phezu kwayo nje imigudu oyenzayo ukuze abazali bakho bakuthembe, ubuya nemband’ esikhova? Kutheni ungathethi nabo ngalo mba? Kunokuba ulilisele ngento yokuba bafanele bakuthembe, ngentlonelo yiya kubo uze ubabuze ukuba ufanele wenze ntoni ukuze bakuthembe. Bachazele ngosukelo ozibekele lona kule nkalo.

Musa ukucinga ukuba abazali bakho baza kulala bengakuthembanga baze bavuke sele bekuthembile. Ngokungathandabuzekiyo baya kufuna ukuqiniseka ukuba uza kuzizalisekisa izithembiso zakho. Zingqine unokuthenjwa. Njengokuba ixesha lihamba abazali bakho baza kukuthemba. Kwenzeka lo nto kuBeverly okhankanywe ngasentla. Uthi: “Akulula ukwenza izinto eziza kubangela ukuba uthenjwe ngabazali bakho kodwa kulula ukungathenjwa. Ngoku abazali bam bandithembile yaye iyandonwabisa lo nto!”

Amanye amanqaku athi “Abantu Abaselula Bayabuza” anokufunyanwa kwiWeb site ethi www.watchtower.org/ype

[Umbhalo osemazantsi]

OZA KUCINGA NGAKO

◼ Kutheni kusenokungabi lula ukuba bakuthembe abazali bakho nakuba usenza konke okusemandleni akho ukuze bakuthembe?

◼ Kutheni kubalulekile ukuba uthethe nabazali bakho ukuze bakuthembe?

[Amagama acatshulweyo akwiphepha 29]

Yenza izinto ngendlela efanelekileyo ukuze abazali bakho bakuthembe

[Umzobo/Umfanekiso okwiphepha 28]

Ubunzima otyhubela kubo ukuze uthenjwe ngabazali bakho sinokubufanisa nezinyuko ofanele unyuke ngazo, inyathelo elinye ngexesha, de udlule kwishumi elivisayo

[Umzobo]

(Ukuba ufuna inkcazelo ehlahlelwe kakuhle, yiya kwimpapasho)

XA USENGUMNTWANA

XA UKWISHUMI ELIVISAYO

XA UNGUMNTU OMDALA