Umculo—Isipho SikaThixo Kubantu

NGUMBHALI KAVUKANI! ESPEYIN

UMCULO unamandla. Usenokusenza sizole, usichukumise uze usihlaziye. Uyakwazi ukuchaza izinto ezisivuyisayo nezisikhathazayo. Abantu bazo zonke iintlanga bayakwazi ukucula—mandulo nanamhla umculo wanelisa ingqondo nentliziyo. Ewe umculo sisipho esivela kuThixo.—Genesis 4:21.

Ukususela ngexesha lokuzalwa kwethu seva uhlobo oluthile lomculo. Mhlawumbi oomama bethu bebesiculela ngaphambi kokuba silale. Kwiminyaka yethu yeshumi elivisayo besithanda uhlobo oluthile lomculo. Nangona sele sikhulile ngoku kodwa sisayoliswa kukuphulaphula umculo xa siqhuba okanye xa sisekhaya emva komsebenzi.

Amazwi engoma asenokuquka izinto ezithile zenkcubeko okanye imbali yelizwe. AmaSirayeli amandulo ayebhiyozela iziganeko ezikhethekileyo ngokucula. (Eksodus 15:1-21; Abagwebi 5:1-31) Umprofeti uMoses waqamba ingoma eyayiquka imbali nesibongozo esisuka entliziyweni. (Duteronomi 32:1-43) Ngokuqinisekileyo ezo ngoma zaziluncedo ekukhumbuleni.

Ungayimvumi!

Mhlawumbi usenokucinga ukuba uliyilo. Khawucinge ngelizwi lakho. Sibamba ngazibini ngesi sixhobo sokucula sizalwa naso, phantse wonke umntu angakwazi ukucula enoba unazo ezinye izixhobo zomculo okanye akanazo. Into efunekayo kukuvul’ umlomo ucule. Xa ucula musa ukukhathazeka kuba uliyilo. Xa uqhelisela uza kude ukwazi.

Iphephancwadi laseSpeyin iPsychologies lithi: “Ilizwi lethu livela ndawonye neemvakalelo zethu yaye sesona sixhobo sinamandla sokuchaza iimvakalelo zethu.” UAinhoa Arteta oyimvumi uthi: “[Umculo] ukwenza wonwabe. Wolek’ umsundulu esithi: “Ndikhuthaza nabani na ofuna ukuveza indlela avakalelwa ngayo ukuba akwenze oko ngokukhululekileyo ngokucula.”

Ekubeni umculo unokuba nefuthe entliziyweni, kufuneka siwukhethe kakuhle. Ngokomzekelo, ezinye iingoma zisenokuba namazwi akhuthaza intiyo, ukuziphatha okubi nogonyamelo, mazwi lawo ebengenakuphulaphulwa ngabantu abanemilinganiselo ephakamileyo. (Efese 4:17-19; 5:3, 4) ILizwi likaThixo lithi: “Ngaphezu kwako konke okunye okumele kulondolozwe, londoloza intliziyo yakho, kuba iphuma kuyo imithombo yobomi.” (IMizekeliso 4:23) Kubalulekile ukuba uwukhethe umculo owuphulaphulayo.a

Umculo Unokuba Luncedo Empilweni

Incwadi ethi Principles and Practice of Stress Management ithi: “Esinye sesizathu sokuba zonke iinkcubeko zinomculo kukuba uyakwazi ukulondoloza impilo yabantu.” Enye imbekiselo ithi xa sicula umzimba wethu ubandakanyeka wonke. Iingoma ezipholileyo zenza izihlunu zikhululeke nto leyo edambisa iintlungu.

Abacebisi bezempilo badla ngokukhuthaza izigulana ukuba ziphulaphule umculo opholileyo onokuzinceda zichache. Ezinye izibhedlele zidlala umculo kumagumbi ezigulana ezigula kakhulu. Abantwana abazalwe ngaphambi kwexesha nezigulana ezityandiweyo zidla ngokukhawuleza zichache xa ziphulaphule umculo omnandi. Ngokutsho kwencwadi ethi Principles and Practice of Stress Management, uhlolisiso luye lwabonisa ukuba ukuphulaphula umculo opholileyo “kuyabanceda abantu bangaxinezeleki kakhulu xa betyandwa.”

Kwakhona umculo unokunceda amabhinqa akhulelweyo angaxinezeleki kakhulu xa enenimba okanye ebeleka. Maxa wambi oogqirha bamazinyo badlala umculo ukuze izigulane zikhululeke. Kodwa umculo nengoma unokuzisa iingenelo ezininzi kunezi zichaziweyo. Unokusinceda ngokomoya.

‘Ndiya Kumbonga Ngengoma UThixo’

Ngaba ubusazi ukuba inxalenye emalunga neshumi ekhulwini yeBhayibhile ibhalwe ngokungathi ngumculo? Imizekelo yazo ziiNdumiso, iNgoma Yazo Iingoma neZililo. Kuyaqondakala ukuba iimbekiselo zomculo ezingamakhulu amathathu zinxibelelene nonqulo lukaThixo. Ukumkani uDavide owayeyimvumi nomqambi ovunyiweyo wabhala wathi: “UYehova ungamandla am . . . , yaye ndiya kumbonga ngengoma yam.—INdumiso 28:7.

UDavide walungelelanisa amadoda angama-4 000 esizwe sakwaLevi ukuze abe ziimvumi zaseYerusalem. Abangama-288 kubo “babeqeqeshelwe ukuvuma iingoma kuYehova, beziingcali bonke.” (1 Kronike 23:4, 5; 25:7) Ngokuqinisekileyo ezi mvumi zazisoloko ziqhelisela. Umculo wawubaluleke gqitha ekunquleni uThixo kangangokuba iimvumi zazingayenzi eminye imisebenzi yasetempileni ukuze zibe nexesha elaneleyo lokuqhelisela.—1 Kronike 9:33.

Ngobusuku bangaphambi bokuba afe uYesu nabapostile bakhe baculela uThixo iindumiso kusenokwenzeka ukuba yiNdumiso 113 ukuya ku-118. Xa uYesu wayelapha emhlabeni, ezi ndumiso—zazibizwa ngokuba “Ziindumiso zeHallel” ezaziculwa xa kubhiyozelwa iPasika. (Mateyu 26:26-30) “Iindumiso ZeHallel” zabizwa ngale ndlela ngenxa yokuba ziphindaphinda ibinzana elithi “Haleluya” elithetha ukuba “Dumisa UYa!” Igama elithi “Ya” sisishunqulelo segama elithi Yehova, igama loYena Thixo Uphakamileyo.—INdumiso 83:18.

NamaKristu ayawuquka umculo kunqulo lwawo. KumaYuda awaguqukela ebuKristwini ayekuqhelile kakade ukucula kwindlu yesikhungu. . . . Ukongezelela kwiiNdumiso zesiHebhere unqulo lobuKristu lwalusoloko lusongezelela iingoma ezintsha.” Namhlanje amaKristu angamaNgqina kaYehova ayakuvuyela ukudumisa ngasese nakwiintlanganiso zawo zamaKristu.

Ekubeni umculo usenza sikwazi ukuveza indlela esivakalelwa ngayo nokuba unempembelelo enamandla entliziyweni, engqondweni nasemzimbeni sifanele sisiphathe ngentlonelo ‘isipho esilungileyo . . . esivela phezulu.’ (Yakobi 1:17) Ngamana singasisebenzisa ngesisa nangobulumko.

[Umbhalo osemazantsi]