Ukunqongophala Kwamanzi—Kwenziwa Ntoni Ngako?

Amanzi anqongophele emhlabeni wonke. Oku kubeka impilo yezigidi zabantu esichengeni. Yintoni eye yenziwa ukuze abantu bafumane amanzi awaneleyo?

EMZANTSI AFRIKA: Umxholo okwiphephancwadi iScience uthi: “Abantu BaseThekwini Bafumana Amanzi Emva Kweminyaka Emininzi.” Eli nqaku lithi abantu abahlala apho abahlelelekileyo babengafumani manzi kangangamashumi eminyaka, ngenxa yocalu-calulo lukarhulumente wangaphambili. Ngokutsho kweli nqaku, ngowe-1994, “abantu abayikota yesigidi abahlala eThekwini babengenawo amanzi acocekileyo okanye inkqubo yogutyulo.”

Ukuphelisa loo ngxaki, ngowe-1996 enye injineli yaqalisa inkqubo eyayiza kubangela ukuba mzi ngamnye ufumane iilitha ezingama-200 zamanzi suku ngalunye. Waba yintoni umphumo? Iphephancwadi iScience lithi “Kubahlali baseThekwini abasisi-3,5 sezigidi, bali-120 000 abanamanzi acocekileyo. Ngoku, abantu bahamba umgama omncinane ukuze bafumane amanzi—akusafani nangaphambili, apho abantu babehamba umgama ongaphezu kwekhilomitha xa beyokukha amanzi.

Iphephancwadi iScience lithi ukuze kulungiswe inkqubo yogutyulo, “izindlu zakudala zangasese” ziye zathatyathelwa indawo yiurine-diversion (UD) enemingxumo emibini, eyahlukanisa umchamo nelindle ukuze likwazi ukoma lize libole ngokukhawuleza.” Ngasekuqaleni kowama-2008 kangangama-60 000 ezindlu zangasese zeUD ziye zakhiwa, nangona kwakuthiwe zaziya kuthabatha malunga neminyaka emibini ngaphambi kokuba amakhaya afumane izindlu zangasese ezifanelekileyo.

EBrazil: Kwisixeko saseSalvador, amakhulu abantwana ayegula ngenxa yesisu esihambisayo esasibangelwa kukungabikho kwezindlu zangasese.a Ukulungisa lo ngxaki, eso sixeko safakela imibhobho eziikhilomitha ezingama-2 000 ubude, kulungiselelwa izindlu ezinokuba ngama-300 000. Waba yintoni umphumo? Inani labantu ababe nesisu esihambisayo lehla malunga nama-22 ekhulwini kweso sixeko, yaye kwindawo ezazinabantu abaninzi abanale ngxaki, inani labo lehla kangangama-43 ekhulwini.

EIndiya: Kwiinxalenye ezithile zomhlaba nangamaxesha athile onyaka kubakho amanzi acocekileyo, kodwa akasetyenziswa kakuhle. Ngenxa yoko, ngowe-1985 iqela lamabhinqa aseIndiya kwisithili saseDholera, kumntla-ntshona weGujarat, leza necebo elikrelekrele lokonga amanzi. Lalungiselela ukuba kwakhiwe idama, elalilingana nebala lebhola. Eli dama lafakwa iplastiki ukuze lingavuzi. Imigudu yalo yaphumelela. Enyanisweni, nakwiinyanga emva kokuba ixesha leemvula sele lidlulile, ayesekho amanzi—nangona nabanye “abantu abaselumelwaneni babewasebenzisa la manzi.”

EChile: Eli lizwe elikuMzantsi Merika limalunga neekhilomitha ezingama-4,265 ubukhulu, yaye kwintshona yayo kukho uNxweme lwePasifiki, kwaye ngasempuma kukho iiNtaba zeAndes. URhulumente uyaqiniseka ukuba abantu bayawafumana amanzi, yaye wakha amadama nemijelo yamanzi. Ube yintoni umphumo? Ngoku ama-99 ekhulwini abahlali beso sixeko, nama-94 ekhulwini abahlala emaphandleni bafumana amanzi aneleyo.

Isicombululo Sokwenene

Kubonakala ukuba lizwe ngalinye linendlela yalo yokucombulula le ngxaki yokuqongophala kwamanzi. Kweminye imimandla apho kubhudla khona umoya, iimpiko ezityhalwa ngumoya (windmills) zitsala amanzi emhlabeni yaye zenza nombane. Kumazwe atyebileyo, ukususwa kwetyuwa yamanzi olwandle kugqalwa njengesicomululo sokwenene. Kwindawo ezininzi amadama amakhulu agcina amanzi emilambo namanzi emvula—yaye kubonakala ukuba le nkqubo iyaphumelela ngandlel’ ithile, nangona iingingqi ezithile ziphulukana ne-10 ekhulwini lamanzi ngenxa yokunyuka komphunga.

AmaNgqina KaYehova, abapapashi beli phephancwadi, bakholelwa ukuba nguThixo, kungekhona umntu, onokucombulula ingxaki yokunqongophala kwamanzi. IBhayibhile ithi: “NgokaYehova [uThixo] umhlaba noko kuwuzalisileyo, umhlaba onemveliso nabo bahlala kuwo. Kuba yena uwumisele ngokuqinileyo phezu kweelwandle, naphezu kwemilambo uwuzinzisa ngokuqinileyo.”—Ndumiso 24:1, 2.

Enyanisweni, uThixo wanika abantu imbopheleleko yokunyamekela lo mhlaba. (Genesis 1:28) Ngalo ndlela, ukungakwazi komntu ukuwunyamekela—kunye nemiphumo eye yabangelwa koko—zinikela ubungqina bokuba “asikokomntu ohambayo ukwalathisa inyathelo lakhe.”—Yeremiya 10:23.

Uza kwenza ntoni uYehova ukuze alungise umhlaba? IBhayibhile isiqinisekisa ukuba ufuna ‘ukwenza zonke izinto zibe ntsha.’ (ISityhilelo 21:5) Yiba nombono wehlabathi elingenandlala, iimbalela kunye nokunqongophala kwamanzi. Cinga nje ngehlabathi elingenazikhukula, ezitshayela amawaka abantu nyaka ngamnye. Phantsi koBukumkani bakhe, uThixo uya kuzalisekisa izithembiso zakhe ezininzi! UYehova uthi: “Ngoko ilizwi lam eliphuma emlonyeni wam liya kuba njalo. Aliyi kubuyela kum ngaphandle kwemiphumo, kodwa ngokuqinisekileyo liya kukwenza oko ndiyoliswa kuko, likuphumelelise ngokuqinisekileyo oko ndilithumele kona.”—Isaya 55:11.

Ngaba ungathanda ukwazi okungakumbi ngenjongo kaThixo yokulungisa umhlaba, njengoko ichaziwe kwiLizwi lakhe, iBhayibhile? Inqaku elilandelayo liza kukunceda.

[Umbhalo osemazantsi]

[Amagama acatshulweyo akwiphepha 5]

“Xa amanzi engekho, ubomi abukho. . . . Siphila ngenxa yenceba kaThixo.”—UMichael Parfit ongumbhali weNational Geographic

[Amagama acatshulweyo akwiphepha 6]

Ukuvelisa itoni enye yeenkozo kufuneka amanzi aziitoni ezili–1 000.

[Amagama acatshulweyo akwiphepha 6]

“Ama-70 ekhulwini amanzi emhlabeni asetyenziselwa ukunkcenkceshela.”—IPlan B 2.0, ebhalwe nguLester R. Brown

[Iigrafu/Imifanekiso ekwiphepha 7]

(Ukuba ufuna inkcazelo ehlahlelwe kakuhle, yiya kwimpapasho)

Angakanani amanzi acocekileyo afumanekayo?

Amanzi afumanekayo

97,5% Amanzi amtyuba

2,5% Amanzi acocekileyo

Amanzi acocekileyo

99% Amanzi angumkhenkce okanye aphantsi komhlaba

1% Afumaneka phantse kubantu abazizigidi ezisixhenxhe nakwezinye izinto eziphilayo ezininzi

[Umfanekiso okwiphepha 7]

Ukufakwa kwemibhobho yamanzi acocekileyo, eThekwini, eMzantsi Afrika

[Inkcazelo]

Courtesy eThekwini Water and Sanitation Programme

[Umfanekiso okwiphepha 7]

Amabhinqa alungiselela ukonga amanzi, eRajasthan, eIndiya, ngowa-2007

[Inkcazelo]

© Robert Wallis/Panos Pictures

[Umfanekiso okwiphepha 7]

Abantu basekuhlaleni benza imijelo yamanzi kwidolophana ekufuphi neCopán, eHonduras

[Inkcazelo]

© Sean Sprague/SpraguePhoto.com