Xa Iintaka Zingqubeka Kwizakhiwo

NANGONA kwakusemini, isinqolamthi sabhabhela ngqo kurhec’ izulu wesakhiwo, sayokuwela emhlabeni. Le ntaka ayizange iyibone iglasi. Umntu owayehamba ngendlela wayichola le ntaka inesiyezi wayinyamekela, enethemba lokuba iza kuphila. Wavuya gqitha xa ebona le ntaka inkconkcoza, iphakama, ishukumisa amaphiko ayo, ibhabha.a

Okubuhlungu kukuba, ayizizo zonke iintaka ezisindayo xa zibethekile. Enyanisweni, isiqingatha seentaka ezingqubeka emizini siyafa. UMbutho iAudubon uthi, uhlolisiso lubonisa ukuba eUnited States kuphela, ngaphezu kwe-100 lezigidi zeentaka zifa nyaka ngamnye emva kokungqubeka kwizakhiwo ezahlukeneyo. Abanye abaphengululi bakholelwa kwelokuba elo nani linokufikelela kwiwaka lezigidi. Kutheni ke, iintaka zingqubeka kwizakhiwo? Yaye ngaba ikho into enokwenziwa ukuze ubomi beentaka bukhuseleke?

Zibulawa Yiglasi Nokukhanya

Iglasi inobungozi kwiintaka. Xa iifestile zicocekile, ngokuqhelekileyo iintaka zibona izinto ezikwelinye icala, ezinokuba luhlaza nesibhakabhaka. Ngenxa yoko, zingaqondanga maxa wambi iintaka zibhabhela ngqo eglasini ngesantya esiphezulu. Kwakhona, zinokubona kwiglasi izityalo ezihombisileyo phakathi emagumbini okanye emizini zize zizame ukwehlela kuzo.

Iiglasi ezimenyezelayo zinokubangela ingxaki. Phantsi kweemeko ezithile, iintaka zinokubona, kungekuphela nje iglasi, kodwa imbonakalo yezinto ezikwingingqi okanye isibhakabhaka zize zonzakale. Iintaka ziye zabulawa ziiglasi kwiindawo zotyelelo nezakhiwo ezikhulu zokugcina iintaka nezilwanyana ezikhuselweyo! UGqr. Daniel Klem, Omnci, osisazinzulu ngeentaka nongunjingalwazi webhayoloji, ukholelwa ukuba iintaka ezininzi zibulawa kukubhabhela kwiifestile kunayo nantoni na ebinokubangelwa ngabantu.

Kulula ngezinye iintaka ukuba zenzakale. Ngokomzekelo iintaka ezininzi ezintyilozayo nezifudukela kwamanye amazwe, zidla ngokugoduka ebusuku zikhokelwa ziinkwenkwezi. Ngenxa yoko, zinokudidwa zizikhanyiso eziqaqambileyo zezakhiwo ezingoorhec’ izulu. Ngoko ke ezinye iintaka zijikeleza ndawonye de zibe yimfe kukudinwa. Kwakhona kunokuba yingozi xa kunetha ebusuku okanye lisibekele. Xa kunjalo, iintaka zidla ngokubhabhela emazantsi, nto leyo ezibeka engozini yokungqubeka kwizakhiwo ezingoorhec’ izulu.

Zinciphisa Inani Leentaka

Enye ingxelo ithi, esinye isakhiwo esingurhec’ izulu eChicago, eIIIinois, eUnited States, siye sabulala malunga ne-1 480 seentaka ngexesha lazo lokufuduka. Ngoko ke kwiminyaka eli-14, esi sakhiwo siye sabulala iintaka ezingama-20 700. Enyanisweni, inani leentaka ezingqubeka ezakhiweni lingaphezulu kuneli nani. UMicheal Mensure ongumalathisi weFatal Light Awareness Program yaseToronto, eKhanada uthi, ngaphezu koko, ezi ntaka “ayingawo amahobe, amangabangaba, okanye amarhanisi, kodwa ziintaka ezisecicini lokuphela.”

Ngokomzekelo, eOstreliya komnye unyaka, iiglasi zabulala malunga nama-30 ezikhwenene, ekuye kwasala kuzo malunga nama-2 000. EUnited States, kuye kwafunyanwa iintaka ekuthiwa ziiBachman’s warbler, ngoku ekusenokwenzeka ukuba azisekho, ezangqubeka kwindlu yokukhanyisela iinqanawa yaseFlorida.

Kwiintaka eziye zasinda emva kokungqubeka kwizakhiwo, ezininzi kuzo zonzakele okanye azisenamandla. Oku kunokuba yingozi ngakumbi kwiintaka ezifudukayo. Ukuba zonzakele okanye ziwele phakathi kwezakhiwo, zinokufa ngenxa yendlala okanye ngenxa yokuhlaselwa zezinye izilwanyana, ezinokuzigqala njengokutya.

Ngaba Izakhiwo Zinokwenziwa Zingabi Yingozi Kwiintaka?

Ukuze zingabhabheli eglasini, iintaka kufuneka zibone zize ziqonde ukuba ezi zakhiwo zilungqameko oluqinileyo. Ngenxa yoko, abanye abaninimzi baye bancamathelisa imifanekiso ethile eziglasini nezinto ezibonakalayo ngaphandle ezifestileni ukunqanda ukubetheka kweentaka. Ngokutsho kukaKlem, into ebalulekileyo, asiyomifanekiso okanye izinto ezibonakalayo ngaphandle efestileni, kodwa yindlela ezibekwa ngayo. Uphando lwakhe lubonisa ukuba izinto ezibonakalayo azifanele zibe ngaphezu kweesentimitha ezintlanu ububanzi okanye ezine ukuphakama.

Yintoni enokwenziwa ukuze kuncedwe iintaka ezifuduka ebusuku? ULesley J. Evans Ogden ongumphengululi uthi: “Ukungqubeka kweentaka kwizakhiwo ebusuku . . . kunokuncitshiswa ngokuthi kucinywe izibane.” Kwezinye izixeko, izibane zokuhombisa ezikoorhec’ izulu bezakhiwo ziye zenziwa luzizi okanye zacinywa ebusuku, ngokukhethekileyo ngexesha lokufuduka kweentaka. Kwezinye iimeko, kubekwa umnatha ezifestileni bezi zakhiwo ukuze iintaka zingangqubeki ngempazamo zicinge ukuba sisibhakabhaka.

Ezo nzame zinokunciphisa umtyangampo wokufa kweentaka ezimalunga nama-80 ekhulwini, kuze kusinde izigidi zeentaka nyaka ngamnye. Kodwa le ngxaki ayikazokuphela ngoku, ngenxa yokuba abantu basazithanda izibane neeglasi. Sekunjalo, imibutho enceda ezi ntaka, njengeAudubon Society ifuna ukweyisela abayili bezakhiwo nabahlaziyi bazo ukuba bacingele neemfuno zezinto ezidaliweyo emhlabeni.

[Umbhalo osemazantsi]

[Ibhokisi ekwiphepha 10]

ZIBULAWA YINTONI IINTAKA?

Uqikelelo lweentaka ezifa ngenxa yabantu nyaka ngamnye eUnited States.

◼ Kwizakhiwo zamaza omoya—zizigidi ezingama-40

◼ Zizibulali-zinambuzane—zizigidi ezingama-74

◼ Iikati neengada—zizigidi ezingama-365

◼ Iiglasi zeefestile—zizigidi ezili-100 ukusa kwiwaka lesigidi

◼ Ukuphulukana namakhaya—inani alaziwa, kodwa kusenokwenzeka ukuba ngoyena nobangela uyingozi

[Umfanekiso okwiphepha 10]

Nyaka ngamnye eUnited States, malunga ne-100 lezigidi zeentaka zifa ngenxa yokungqubeka ezifestileni

[Inkcazelo]

© Reimar Gaertner/age fotostock