Ikhusi Lokugqibela Lezilwanyana Nezityalo Ezisengozini Yokuphela
NGUMBHALI KAVUKANI! ESPEYIN
IZITYALO nezilwanyana zisengozini emhlabeni wonke. Izazinzulu ziqikelela ukuba kuphela amawaka ezilwanyana nyaka ngamnye. Okuvuyisayo kukuba, iintaba ziyazikhusela izityalo nezilwanyana ezazidla ngokuxhaphaka kwiindawo ezininzi. Kodwa nakwezi ndawo zilikhusi, isekho ingozi ebangelwa kukungcola nangabantu. Oku kubonakala nakakhulu eYurophu, eyona ndawo inabantu abaninzi ehlabathini.
Kwiintaba zasePyrenees ezahlula iFransi kwiSpeyin, kukho imizi yokugcina izilwanyana yaye kulapho izilwanyana nezityalo zifumana khona ikhusi. Kwezi ndawo zikhuselekileyo, abakhenkethi bafumana ithuba lokubona ikhusi lokugqibela lezilwanyana nezityalo ezisengozini yokuphela. Makhe sibone oko kuqulethwe yile mizi.
Izilwanyana Nezityalo Ezisengozini Yokuphela
Iintyatyambo. Ezinye zezityalo ezintle zasendle zikhula kwindawo eziimitha ezili-1 500 ukuphakama. Isnow gentian netrumpet gentian (1), ezinamagqabi aluhlaza, zizala kumathambeka angenamithi. Ezantsi kwamathambeka, kukho iilady’s-slipper orchid (2) ezisengozini yokuphela ezikhula phakathi kwemithi ekuthiwa yibeech. Amakhulu abantu abathanda indalo eza apha nyaka ngamnye, ngoko kukho abalindi abahlala iiyure ezili-14 ukuze baqiniseke ukuba ezi ntyatyambo zixabisekileyo azonakaliswa okanye zincothulwe.
Amabhabhathane. Amadlelo asezintabeni azele zizityalo zasendle aba likhusi kumabhabhathane. Ibhabhathane iApollo (3), elinamaphiko anamachaphaza abomvu naqaqambileyo liphaphazela phakathi kweenkunzane. Amabhabhathane aluhlaza namabhabhathane alubhedu ekuthiwa (4) ziiLycaenidae ahlala qho kwiintyatyambo ezincinane. Amabhabhathane ekuthiwa ziipainted-lady neetortoiseshell wona aphaphazela kumathambeka.
Izilwanyana. Izilwanyana ezininzi ezanyisayo zaseYurophu zazihambahamba kulo lonke eli. Kodwa ezinye ziye zazingelwa phantse zaphela. Iingcuka, amabhere, ingqawa (5), inyathi, ichamois neebhokhwe zasezintabeni (6) ngoku zisele kuphela kwiintaba ezimbalwa nasemantla. Ezi zilwanyana zimangalisayo kwimizi yokugcina izilwanyana yasePyrenean zisikhumbuza ngokucacileyo ngezilwanyana ezazizininzi kwezi ntaba. Abanye abakhenkethi abaxhalabileyo bayazibuza ngekamva lezi zilwanyana zisaseleyo.
Singaqiniseka ukuba uMdali, uYehova, nguLowo “zizezakhe iincopho zeentaba,” yaye uzikhathalele izilwanyana nezityalo ezisezintabeni. (INdumiso 95:4) Kwenye yeendumiso, uThixo wathi: “Kuba zezam zonke izilwanyana zasendle ezisehlathini, amarhamncwa asezintabeni eziliwaka. Ndizazi kakuhle zonke izidalwa ezinamaphiko ezisezintabeni.” (INdumiso 50:10, 11) Ekubeni uYehova ewukhathalele umhlaba nezidalwa zawo oko kusenza sikholelwe ukuba akasayi kuvumela ukuba izilwanyana ezisezintabeni ziphele zonke.
[Imifanekiso ekwiphepha 16, 17]
1 Netrumpet gentian
2 Iilady’s-slipper orchid
3 IApollo
4 Namabhabhathane alubhedu ekuthiwa
5 Ingqawa
6 Neebhokhwe zasezintabeni
[Inkcazelo]
La Cuniacha