Abantu Abaselula Bayabuza

Ndinokulisebenzisa Njani Ixesha Lam Ngobulumko?

“Ndive omnye umntu eqhula ngelithi ukuba ufuna mna ndibe kwindawo ethile ngentsimbi yesine umele athi mandifike ngentsimbi yesithathu. Ndabona apho ukuba ndimele ndilisebenzise kakuhle ixesha lam!”—URicky.a

ZNGAPHI iiyure ezongezelelekileyo onokuzisebenzisa ngosuku? Unokulisebenzisa njani elo xesha?

□ Unokulichitha ukunye nabahlobo

□ Unokulala

□ Unokufunda

□ Unokwenza umthambo

□ Nantoni na eyenye ․․․․․

Nangona ubunokuthanda ukufumana iiyure ezongezelelekileyo ngosuku, oko akunakwenzeka! Ngoko unokwenza ntoni? Ulutsha oluninzi lufumanise ukuba ukulisebenzisa ngobulumko ixesha kuluncede lwanexesha elongezelelekileyo ebelingenalo. Kwakhona lufumanise ukuba ukulicwangcisa kakuhle ixesha kuye kwanciphisa uxinezeleko, kwaphucula amanqaku kwaza kwalwenza lwathenjwa nangakumbi ngabazali. Masikhe sibone indlela okunokukunceda ngayo ukulisebenzisa ngobulumko ixesha.

Ingxaki #1 Ukuzenzela Ucwangciso

Isizathu sokuba ungakuthandi. Kwaigama nje elithi ucwangciso likwenza uzive ubophelelekile! Uthanda ukuzenzela izinto ngokukhululekileyo, yaye akufuni ukuba ubomi bakho bulawulwe lucwangciso.

Isizathu sokuba ulwenze. UKumkani uSolomon wabhala wathi: “Amacebo okhutheleyo ngokuqinisekileyo ayingenelo.” (IMizekeliso 21:5) Alithandabuzeki elokuba uSolomon wayeyindoda exakekileyo. Wayetshatile, enabantwana, yaye engukumkani—mhlawumbi konke oku kwenzeka ngaphambi kokuba abe neminyaka engama-20 ubudala! Emva koko waxakeka nangakumbi. Ngendlel’ efanayo, nawe umaxhaphetshu. Kodwa mhlawumbi usenokuxakeka nangakumbi njengoko usiya ukhula. Kulunge ngakumbi ukuqalisa ukulungelelana kwangoku, ungekashiywa lixesha!

Oko kuthethwa lolunye ulutsha. “Kangangeenyanga ezintandathu ezidluleyo, ndiye ndaqalisa ukwenza ucwangciso rhoqo. Bendizama ukuzenzela lula, yaye oko kuye kwandinceda!”—UJoey

“Ukuzenzela uludwe lwezinto kuye kwandinceda ndanamathela kucwangciso lwam. Xa ndinomsebenzi omninzi, sinomama siye sibhale phantsi yonke into size sizame ukuncedisana silufikelele usukelo lwethu.”—UMallory

Izinto ezinokukunceda. Masithi mhlawumbi uza kuba nohambo. Lungu ngalinye lentsapho lifaka iibhegi zalo emotweni. Kubonakala ngathi azinakwanela zonke ezi zinto. Unokwenza ntoni? Usenokukhupha yonke into uze uqalise ukupakisha kwakhona, uqala ngeebhegi ezinkulu. Usenokude ufumane nendawo yeebhegi ezincinane.

Kunjalo nangobomi bakho. Ukuba uchitha ixesha lakho elininzi kwizinto ezingenamsebenzi, usenokungakwazi ukwenza ezinye izinto ezibalulekileyo. Ziphe ixesha lokuqala ngezinto ezibalulekileyo, yaye uya kumangaliswa lixesha onalo lokwenza ezinye izinto!—Filipi 1:10.

Ziintoni ezibalulekileyo ekufuneka uzenze?

․․․․․

Buyel’ umva uze ubeke izinto ezibalulekileyo kwindawo yokuqala—zidwelise ngokubaluleka kwazo. Ukuba uqala ngezinto ezibalulekileyo, uya kumangaliswa kukuba lininzi kwexesha eliseleyo lokwenza ezinye izinto ezingenamsebenzi. Kodwa, khumbula ukuba, akunakuze kukuncede ukuqala ngezinto ezingenamsebenzi!

Oko unokukwenza. Zifunele ipocket planner, uze ubhale kuyo izinto omele uzenze. Okanye, mhlawumbi usenokusebenzisa enye kwezi zilandelayo.

□ Ikhalenda yecellphone

□ Incwadi encinane

□ Ikhalenda yekhompyutha

□ Ikhalenda ebekwa edesikeni

Ingxaki #2 Ukunamathela Kucwangciso

Isizathu sokuba ungakuthandi. Ukuphuma kwesikolo ufuna ukuhlala phantsi uze ubukele umabonwakude nje kancinane. Okanye ubucebe ukufunda, kodwa wafumana umyalezo okumemela kwimovie. Awunakulitshintsha ixesha lemovie, kodwa usenokufunda ngokuhlwa. Uye uzixelele ukuba uyaphumelela xa usebenza uxinezelekile.

Isizathu sokuba unamathele kulo. Usenokufumana amanqaku aphezulu ukuba ufunda xa ingqondo yakho ithe qwa. Sele uxinezeleke ngokwaneleyo kakade. Kutheni ke usongeza ngokunkqayela uvavanyo ngobusuku? Uya kube unjani ngentsasa elandelayo? Usenokuselwa, uxinezeleke nangakumbi, uphum’ endlini ubaleka, mhlawumbi ungafiki nangexesha esikolweni.—IMizekeliso 6:10, 11.

Oko kuthethwa lolunye ulutsha. “Ndiyakuthanda ukubukela umabonwakude, ukudlala isiginkci, nokuba kunye nabahlobo. Ezi zinto aziphosakalanga; kodwa ngamanye amaxesha ziye zithabathe indawo yezona zinto zibalulekileyo ndize ndiphele sele ndizenza ngokungxama.”—UJulian.

Oko kunokukunceda. Musa ukucwangcisa kuphela izinto omele uzenze—cwangcisa nezo uthanda ukuzenza. UJulian uthi: “Kulula ukwenza izinto omele uzenze, xa usazi ukuba kukho izinto ozithandayo ocebe ukuzenza kamva.”

Elinye icebo kukuyazi into ofuna ukuyenza uze uzibekele usukelo oluza kukunceda unamathele kucwangciso lwakho. UJoey, oneminyaka eli-16 ubudala, ebesikhe sathetha ngaye ngaphambilana, uthi: “Ndifuna ukufundisa abantu iBhayibhile ixesha elizeleyo. Olo sukelo luyandinceda ndinamathele kucwangciso lwam ndilungiselela ubomi obuxakeke nangakumbi kwixesha elizayo.”

Oko unokukwenza. Yiyiphi into enye okanye ezimbini onokuzibeka njengosukelo lwakho kwezi nyanga zintandathu zilandelayo?

․․․․․

Luluphi usukelo onokulufikelela kule minyaka mibini ilandelayo, yaye ufanele wenze ntoni ngoku ukuze ulufikelele?

․․․․․

Ingxaki #3 Ukucoceka Nokulungelelana

Isizathu sokuba ungakuthandi. Mhlawumbi akuqinisekanga ukuba ukucoceka nokulungelelana kudibana njani nokulisebenzisa kakuhle ixesha lakho. Ngapha koko, kulula ukuba lixelegu. Igumbi lakho linokucocwa nangelinye ixesha—okanye lingacocwa! Ayikukhathazi nganto into yokuthi saa kwezinto egumbini lakho, asiyongxaki. Iyiyo ingxaki.

Isizathu sokucoceka nokulungelelana. Ukugcina izinto zicocekile yaye zilungelelene kunokunceda ungachithi ixesha ukhangelana nazo. Oku kuya kukunika uxolo lwengqondo.—1 Korinte 14:40.

Oko kuthethwa lolunye ulutsha. “Maxa wambi xa ndishiye iimpahla zam zithe saa, izinto endizifunayo zifihlakala ngaphantsi kwazo!”—UMandy.

“Ndandineveki ndingasasiboni isipaji sam. Yayindikhathaza gqitha loo nto. Ndathi ndakucoca igumbi lam ndasifumana.”—UFrank.

Oko kunokukunceda. Zama ukuzibuyisela ngokukhawuleza izinto kwiindawo zazo. Ukwenza oku ngokuthe rhoqo kunokuzilinda zide zifumbe kunokukunceda ukhawulezise xa ucoca yaye uzifumane lula izinto ozifunayo.

Oko unokukwenza. Zama ukukwenza umkhwa ukucoceka. Gcina izinto zicocekile, uze ubone enoba oko akuyi kuzenza lula na izinto.

Qala kancinane—namhlanje! Ngawaphi amacebiso akweli nqaku akuncede kakhulu wena?

․․․․․

Ndiza kuwazama la macebiso kangangeeveki ezi ․․․․․ ndize ndibone enoba aya kundinceda kusini na.

Amanqaku angakumbi kungcelele oluthi “Abantu Abaselula Bayabuza” anokufunyanwa kwiWeb site ethi www.watchtower.org/ype

[Umbhalo osemazantsi]

OKO UMELE UCINGE NGAKO

◼ Kufuneka ulale iiyure ezingaphi ukuze ukwazi ukusebenza kakuhle?

◼ Ngubani onokumcela akuncedise kucwangciso lwakho?

◼ Ukuba sele usebenzisa ucwangciso, luluphi uhlengahlengiso ekufuneka ulwenze?

[Ibhokisi/Umfanekiso okwiphepha 20, 21]

Ebudeni beveki, ulutsha oluphakathi kweminyaka esi-8 ukuya kweli-18 ubudala luchitha ixesha lalo ngale ndlela:o

Iiyure ezili-17

lukunye nabazali

Iiyure ezingama-30

lusesikolweni

Iiyure ezingama-44

lubukele umabonwakude, ludlala imidlalo yevidiyo, luthumela imiyalezo ngeecellphone yaye lumamele umculo

NDILISEBENZISA NJANI IXESHA LAM?

Dibanisa iiyure ozisebenzisa veki nganye

ubukele umabonwakude: ․․․․․

udlala imidlalo yevidiyo: ․․․․․

usebenzisa ikhompyutha: ․․․․․

uphulaphule umculo: ․․․․․

Lilonke: ․․․․․

Iiyure endinokuzichitha kwizinto ezibaluleke ngakumbi: ․․․․․

[Umfanekiso okwiphepha 20]

Ukuba uqala ngezinto ezingenamsebenzi, soze ube nalo ixesha lokwenza ezona zinto zibalulekileyo