Imfihlelo 6: Ukuxolelana

“Qhubekani ninyamezelana yaye nixolelana ngesisa.”—Kolose 3:13.

Intsingiselo yoku. Izibini eziphumelelayo ziyafunda kwizinto ezenzeke kwixesha elidluleyo; kodwa azigcini izinto ezidluleyo zize ziman’ ukukhalaza ngamazwi anjengathi, “Wasoloko ufika emva kwexesha” okanye “Akuva.” Indoda nomfazi bayazi ukuba “kuyinto entle . . . ukukubetha ngoyaba ukunxaxha.”—IMizekeliso 19:11.

Kutheni oku kubalulekile? UThixo “ukulungele ukuxolela” kodwa akusoloko kunjalo ngabantu. (INdumiso 86:5) Xa ukungavisisani okwenzeke kwixa elidluleyo kungalungiswa, kunokudala ingqumbo engapheliyo de kube ngathi akunakuze kuxolelwane. Iqabane ngalinye lisenokungafuni ukuthetha ngendlela elivakalelwa ngayo—ngalinye kuwo lingazikhathaleli iimvakalelo zelinye. Omabini aziva ngathi avaleleke emtshatweni ongenalo uthando.

Zama oku kulandelayo. Khawubuke iifoto enazifota kunye neqabane lakho ebutsheni bomtshato wenu okanye ngoxa nanisathandana. Zama ukuvuselela uthando owawunalo ngaphambi kokuba kuvele iingxaki zize zisithe indlela enizibona ngayo izinto. Emva koko, cinga ngeempawu ezakutsalayo ekuqaleni kwakho ukudibana neqabane lakho.

◼ Ziziphi iimpawu ozithandayo ngoku kwiqabane lakho?

◼ Cinga ngendlela abanokungenelwa ngayo abantwana bakho xa ungumntu oxolelayo.

Yenza isigqibo. Cinga ngendlela enye okanye ezimbini onokwenza ngazo ukuze uqiniseke ukuba iimpazamo ezenzeke kwixesha elidluleyo akuzifaki xa ningaboni ngasonye neqabane lakho.

Khawukhe ulincome iqabane lakho ngeempawu ozithandayo kulo.—IMizekeliso 31:28, 29.

Cinga ngezinye iindlela eninokuxolelana ngazo nabantwana bakho.

Unokuwuxubusha nabantwana bakho umbandela wokuxolela nendlela ukuxolela okunokulinceda ngayo ilungu ngalinye lentsapho.

[Umfanekiso okwiphepha 8]

Xa uxolela ufana nomntu ocima ityala. Akunakuphinda ufune ukuhlawulwa elo tyala