Imbono YeBhayibhile

Ukuthandana Ngenjongo Yokutshata

UJulie noLee babethandana yaye babezimisele ukuhlala beziphethe kakuhle.a Kodwa ngenye ingokuhlwa bebobabini, zaqala zavuka kubo iimvakalelo zesini. Ngethamsanqa, babuyela ezingqondweni bengekade bagabadele baze benze isono esinzulu.

UNQULO lwenyaniso alupheleli nje ekuyeni ecaweni rhoqo kanye ngeveki. Yindlela umntu aphila ngayo echaphazela imilinganiselo yokuziphatha. UYesu Kristu wathi ekuphela kwabantu akholiswa ngabo uThixo ‘ngabenza ukuthanda’ Kwakhe. (Mateyu 7:21) Ukuze simkholise uThixo, kufuneka sigcine ulwalamano lwethu nabantu besini esahlukileyo lucocekile size sithandane sineenjongo zokutshata.

Unokukugcina njani ukuthandana kwakho kucocekile emehlweni kaThixo, ingakumbi njengoko izibini ezithandanayo ziphantsi kwengcinezelo yokungayihoyi imilinganiselo yokuziphatha? Okokuqala nimele nazi ukuba imilinganiselo kaThixo yabhalwa kucingwa ngathi. Okwesibini, yiqondeni indlela abantu abangafezekanga abazenza ngayo izinto. Okwesithathu, bekani imilinganiselo yendlela eniza kuziphatha ngayo. Kanti okwesine makabekho uThixo kulwalamano lwenu. Makhe sihlolisise nganye yezi ngongoma.

Imilinganiselo Eyenzelwe Ukusinceda

KuIsaya 48:17, 18 sifunda oku: “Mna, Yehova, ndinguThixo wakho, Lowo ukufundisa okuyingenelo kuwe, Lowo ukubangela unyathele endleleni ofanele uhambe ngayo. Owu ukuba nje kuphela okunene ubunganikela ingqalelo kwimiyalelo yam! Ngoko uxolo lwakho beluya kuba njengomlambo, nobulungisa bakho njengamaza olwandle.”

Eneneni, imithetho nemigaqo ebhalwe kwiLizwi likaThixo eliphefumlelweyo, iBhayibhile Engcwele, yenzelwe ukunceda thina. (2 Timoti 3:16, 17) Ibubungqina bokuba ngokwenene uMdali wethu usikhathalele yaye ufuna ukuba sonwabe size siphumelele kuzo zonke iinkalo zobomi bethu. (INdumiso 19:7-10) Ngaba nawe uvakalelwa ngolo hlobo? Ukuba kunjalo, usisilumko sokwenene.

Yamkele Eyona Nyaniso Ngesiqu Sakho

Njengomhlobo wokwenene, uYehova akasiqhathi; usixelela inyaniso ngathi. Ngokomzekelo iLizwi lakhe lisilumkisa ngelithi “Intliziyo inenkohliso kunayo nantoni na yaye iyatyhudisa. Ngubani na onokuyazi?” (Yeremiya 17:9) Kanti iBhayibhile iphinda ithi: “Okholosa ngentliziyo yakhe usisiyatha, kodwa ohamba ngobulumko uya kusinda.”—IMizekeliso 28:26.

Isibini esithandanayo sinokubonisa njani ukuba sikholose ngeentliziyo zaso? Enye indlela kukuzivumela ukuba sibe kwimeko eza kubangela ukuvuseleleka kweemvakalelo zesini, kanye njengeso sithethe ngaso ekuqaleni. Enye indlela kukungawathobeli amacebiso abazali abahlonela uThixo. Aba bazali bayazi ukuba iimvakalelo zesini, ingakumbi xa nisebatsha, zinokufana nenjini enamandla, efuna ukulawulwa kakuhle.

Abantu abaselula ‘abahamba ngobulumko bukaThixo’ bayawaphulaphula amacebiso abazali. Eneneni, bayawaxabisa amacebiso abazali ababathanda kangangokude babaxelele nezinto abangafuni kuziva. Kambe ke, oyena mntu ukuthandayo, nguYihlo wasezulwini, uYehova uThixo, okucebisa ukuba ‘ushenxise ingqumbo entliziyweni yakho, uze uyinqande intlekele enyameni yakho.’ (INtshumayeli 11:9, 10) Unokuyenza njani loo nto? Ngokunganikezeli kwiminqweno engafanelekanga.

Bekani Imilinganiselo Ecacileyo Yendlela Eniza Kuziphatha Ngayo

“Kwabo babhunga kunye kukho ubulumko.” (IMizekeliso 13:10) Zisaqala nje ukuthandana, izibini ezilumkileyo ziyawasebenzisa loo mazwi ngokuvumelana ngeendlela ezingangqubaniyo neZibhalo zokubonisa uthando zize zingasuki kwezo ndlela. Ukubonisa uthando ngeendlela ezingafanelekanga okanye ukuzithemba ngokugqithiseleyo kufana nokuqhuba ngokungakhathali. Lidla ngokuba sele lidlule ixesha lokuthobela imithetho yendlela xa sele ukhutshwa phakathi kobugoxo bemoto!

IBhayibhile ithi: “Umfo [ibhinqa] ohlakaniphileyo uthi akuyibona isiza ingozi ayiphephe; ke yena ongaqondiyo uthwabaza aye kungena kuyo, aze ke ave ubuhlungu yiloo nto.” (IMizekeliso 22:3, iBhayibhile yesiXhosa yowe-1996) Isibini sinokuyiphepha inkathazo ngokuthandana siphakathi kwabantu abaninzi okanye kukho umntu wesithathu ofanelekileyo. Intlungu ebangelwa bubudenge obenzeka ngoxa nithandana inokuquka ukutyiwa sisazela, ukungazihloneli wena neqabane lakho, nokuhlazisa wonke umntu obandakanyekileyo, kuquka amalungu entsapho. Ngoko lumka; vumelanani ngokusebenzisa imilinganiselo yeZibhalo nize nibambelele kuyo!

UYehova Makabe ‘Ngumsonto Wesithathu’

Umtshato ufana nentambo entlu-ntathu, yaye uThixo ungowona msonto ubalulekileyo kule ntambo. INtshumayeli 4:12 ithi: “Intambo entlu-ntathu ayinakuqhawuka kubini ngokukhawuleza.” Lo mgaqo uyasebenza nakwizibini ezithandanayo. Ukuba isibini sifuna ukusikelelwa nguThixo, umele ngamnye kuso asondele kuye. INdumiso 1:1-3 ithi: “Unoyolo umntu ongahambanga ngecebo labangendawo . . . Kodwa oyoliswa ngumthetho kaYehova, efunda emthethweni wakhe ngesandi esiphantsi imini nobusuku. . . , yaye konke akwenzayo kuya kuphumelela.”

Kunjalo kanye, xa sifuna ukuphumelela ebomini, ebudeni bokuthandana naxa sele sitshatile, masenze izinto ngendlela kaYehova. Ngapha koko, unguMdali wethu yaye umtsalane wesini nomtshato zizipho ezivela kuye. Ngoko ke simele singazithathi lula.—Yakobi 1:17.

[Umbhalo osemazantsi]

NGABA WAKHA WAZIBUZA?

● Sazi njani ukuba uThixo ufuna izinto zisilungele?—Isaya 48:17, 18.

● Yiyiphi inyaniso ekufuneka siyamkele ngeziqu zethu?—Yeremiya 17:9.

● Yiyiphi imfihlelo yokuphumelela ebudeni bokuthandana naxa sele sitshatile?—INdumiso 1:1-3.

[Umfanekiso okwiphepha 13]

Zisaqala nje ukuthandana, izibini ezilumkileyo zivumelana ngeendlela ezingangqubaniyo neZibhalo zokubonisa uthando zize zingasuki kwezo ndlela.