Indalo Yayenza Kuqala

“Khawuncede, ubuze, . . . kwanezidalwa ezinamaphiko zezulu, zikuxelele. . . . Sisandla sikaYehova esenze oku.”—Yobhi 12:7-9.

ZONKE izinto ezinazo iintaka zibonisa ukuba zenzelwe ukubhabha. Ngokomzekelo, izikhondo zeentsiba zamaphiko zenzelwe ukuthwala umzimba wentaka xa ibhabha. Kunokwenzeka njani ukuba athi amaphiko ecekeceke kodwa enze umsebenzi omkhulu ngolo hlobo? Unokusibona isizathu soko xa usisika phakathi isikhondo solu siba. Oononjineli bathi, ingathi kuhlohlwe into ngaphakathi. Sifana nesponji ngaphakathi kodwa siyarhwexa ngaphandle. Oononjineli baye bazihlolisisa ezi zikhondo zeentsiba baza bahlohla into efanayo nakumaphiko eenqwelo-moya.

Enye into eyilwe ngendlela emangalisayo ngamathambo eentaka. Uninzi lwawo luholoholo ngaphakathi yaye amanye anokomelezwa ziintsika ezikhaphukhaphu, abathi oononjineli zaqalwa nguWarren. Okubangel’ umdla kukuba, ubuchule obufanayo basetyenziswa kumaphiko esiphekepheke esasisiya emajukujukwini.

Abaqhubi beenqwelo-moya bazigcina zihleli emoyeni ngokutshintshatshintsha imiphetho yamaphiko azo. Kodwa intaka isebenzisa izihlunu ezingama-48 ezisemaphikweni nasemagxeni ukuze itshintshe ukuma nokubetha kwamaphiko neentsiba, nto leyo eyenza kaninzi ngomzuzwana. Yiloo nto ebangela ukuba abenzi beenqwelo-moya bajonge kubuchule beentaka bokubhabha!

Intaka iwasebenzisa kakhulu amandla, ingakumbi xa induluka. Ngoko iintaka kufuneka zibe “neenjini” ezinamandla nezikhawulezayo. Intliziyo yentaka ibetha ngamandla kuneyesilwanyana esanyisayo esilingana nayo yaye idla ngokuba nkulu ize ibe namandla angakumbi. Kanti umoya ungena calanye kwimiphunga yentaka, nto leyo eyenza le miphunga isebenze bhetele kuneyesilwanyana esanyisayo.

Isebenza kakuhle kangakanani “injini” yentaka? Inqwelo-moya ibonwa ukuba isebenza kakuhle ngokukwazi ukunduluka nangona inamafutha. Ukuze iBoeing 747 ibhabhe kangangeeyure ezilishumi, ngokomlinganiselo kufuneka ibe namafutha alingana nesinye kwisithathu sobunzima bayo. Ngokufanayo, intaka encinane efudukayo ekuthiwa yithrush inokuhla kangangesiqingatha sobunzima bomzimba wayo xa ibhabha kangangeeyure ezilishumi. Kodwa xa leyo kuthiwa yigodwit isuka eAlaska isiya eNew Zealand, ngaphezu kwesiqingatha sobunzima bomzimba wayo siba ngamafutha. Okumangalisayo kukuba, ibhabha kangangeeyure ezili-190 (iintsuku ezisibhozo) ngaphandle kokuma. Ayikho inqwelo-moya enokuyenza loo nto.