Ukulawula Indlela Olisebenzisa Ngayo Ixesha Lakho
“Yonke into inexesha layo elimisiweyo.”—INtshumayeli 3:1.
UKUZE ube nexesha lezinto ezibalulekileyo, umele uqale uzazi ukuba ziintoni ezibalulekileyo. Oku kuya kuba lula ukuba uziqonda kakuhle ezona zinto uzixabisayo, usukelo lwakho kwakunye nezinye izinto ezixhasa oku.
Qala ngokuzenza zicace ezona zinto uzixabisayo. Unokuzama ukubhala zonke izinto ezixabisekileyo ozikhumbulayo, njengentsapho, ubuhlobo, ukusebenza nzima, imfundo, ukuphumelela, ukuba mhle, imali, ulonwabo, umtshato, ububele, ukuba sempilweni, unqulo. Emva koko zibuze, ‘Yiyiphi kwezi zinto eyeyona ibalulekileyo kum?
Emva koko, cinga ngosukelo ongathanda ukulufikelela ebomini. Yintoni umahluko phakathi kwezinto ozixabisileyo nosukelo? Into esiyithetha kweli nqaku yeyokuba, izinto ozixabisileyo ziya kuhlala zikho, ngoxa lona usukelo lufikelelwa.
Luluphi ke usukelo onokuzibekela lona? Ngaba ufuna ukuchitha ixesha elingakumbi nentsapho yakho? Ngaba ufuna ukufumana umsebenzi wengqesho okwanelisayo? Ngaba ufuna ukuphucula ubuchule bokwenza into oyithandayo? Ngaba ufuna ukuzama enye into? Ngaba ufuna ukuhlakulela uphawu oluthile? Ngaba ufuna ukuya eholideyini? Ngaba ufuna ukufunda incwadi? Ngaba ufuna ukubhala incwadi?
Emva koko, gqiba enoba luluphi kolu sukelo olulolona lubalulekileyo kuwe. Qiniseka ukuba luyahambisana nezona zinto uzithandayo. Ukuba ngokomzekelo uzibekela usukelo lokuba nobutyebi obugqithiseleyo, kusenokwenzeka ukuba uyazixakekisa.
Kusukelo ozibekele lona, cinga ngezinto eziliqela omele uzenze ezinokuba negalelo ekulufikeleleni. Ngokomzekelo, ukuba phakathi kosukelo onalo ufuna ukuhlisa ubunzima bomzimba, umele wenze umthambo.
Kunokukunceda Njani Oku Kuzihlola?
Ukuba usukelo lwakho luyahambisana nezinto ezixabisekileyo kuwe, wenza izinto eziza kukunceda ulufikelele yaye ubomi buya kuba lula kuwe. Uya kufumanisa ukuba uchitha ixesha elingakumbi usenza izinto ezibalulekileyo kuwe. Kakade ke, oko akuthethi kuthi ufanele ungazikhathaleli iintswelo neminqweno yabanye abantu. (Filipi 2:4) Kuthetha ukuba uya kukwazi ngakumbi ukubona izinto eziza kukuchithela ixesha uze wale ukuzenza.
Kuyavunywa ukuba luza kubakho ucelomngeni. Eminye imisebenzi isenokungabaluleki kodwa ibe iyimfuneko. Isenokubonakala ngathi iza kukutyela ixesha, ushiyeke ungenalo neli lokwenza izinto ezibalulekileyo. Kusenokuvela izinto ezingxamisekileyo. Yaye utshintsho olwenzeka kuwe lusenokubangela ukuba ucwangciso lwakho lungalawuleki. Xa usenza umgudu wokuchitha ixesha elingakumbi kwizinto ezibalulekileyo, loo nto iya kukwenza ukwazi ukulawula indlela olichitha ngayo ixesha lakho nendlela obuphila ngayo ubomi bakho.
[Ibhokisi/Umfanekiso okwiphepha 6]
NGABA ZIYALONGA IXESHA IIKHALENDA ZOMBANE?
Kwabanye ziyalonga kodwa kwabanye ziyalichitha. Ngokomzekelo, iPDA iba nekhalenda, uludwe lweenombolo zefowuni, iiadresi, uludwe lwezinto onokuzenza, inkqubo yokubhala, ikhamera ie-mail neInternet. Ungasisebenzisa esi sixhobo ukuze wonge ixesha ingakumbi xa usoloko usiphatha. Noko ke, unokuchitha ixesha ukuba usoloko ujongene naso ukhangela izinto ezikwi-Internet okanye utshintshatshintsha indlela esisebenza ngayo, okanye uthenge izinto ezingeyomfuneko okanye sikwenze ungabahoyi abantu okanye izinto omele uzenze.
Icebiso: Phanda ngaphambi kokuba uthenge. Ukuba isixhobo sombane sisoloko sisonakala kuye kufuneke ixesha elingakumbi lokusilungisa. Kwakhona nasiphi na isixhobo sombane sisebenza kakuhle xa umnikazi waso ekwazi ukusisebenzisa. Ngoko ke, ukuba unaso sisebenzisele ukonga ixesha kungekhona ukulichitha.
[Umfanekiso okwiphepha 4, 5]
Ngaba unokuzenzela ithuba lezinto ezibalulekileyo?