Zimisele Ukuyeka

“Ukuzimisela ukuyeka ukutshaya bekuyeyona nto ibalulekileyo kubantu abaye baphumelela.”—Incwadi ethi, “Stop Smoking Now!”

NGAMAFUTSHANE, kufuneka uzimisele xa ufuna ukuyeka ukutshaya. Unokukwenza njani oku? Phakathi kwezizathu ezininzi, umele ucinge ngendlela okuya kubuphucula ngayo ubomi bakho ukuyeka ukutshaya.

Uza konga imali. Ukutshaya ipakethe yecuba ngosuku kunokukubangela ukuba uchithe amashumi amawaka eerandi ngonyaka. “Ndandingayiqondi indlela eninzi ngayo imali endandiyichitha ekuthengeni icuba.”—UGyanu, waseNepal.

Ufanele wonwabe ebomini. “Ndaqala ndaba ngumntu mhla ndayeka ukutshaya yaye ndaya ndiphucuka.” (URegina, waseMzantsi Afrika) Xa abantu beyeka ukutshaya zisebenza bhetele kakhulu izivamvo zabo zokungcamla nezokujoja yaye badla ngokuba namandla baze bakhangeleke kakuhle.

Impilo yakho iba bhetele. “Ukuyeka ukutshaya kuphucula impilo yamadoda namabhinqa kungakhathaliseki ukuba badala kangakanani na.”—IThe U.S. Centers for Disease Control and Prevention.

Uzithemba ngakumbi. “Ndayeka ukutshaya kuba ndandingasafuni ukulawulwa licuba. Ndandifuna ukuba umzimba wam ulawulwe ndim.”—UHenning, waseDenmark.

Iyancedakala intsapho nabahlobo bakho. “Ukutshaya . . . kuyibeka esichengeni impilo yabantu abakungqongileyo. . . . Uhlolisiso lubonisa ukuba umsi wabantu abatshayayo ubulele amawakawaka abantu ngenxa yomhlaza wemiphunga nesifo sentliziyo.”—IAmerican Cancer Society.

Uya kumkholisa uMdali wakho. “Zintanda, masizihlambulule kuko konke ukudyobheka kwenyama.” (2 Korinte 7:1) ‘Yinikeleni imizimba yenu, ingcwele, yamkelekile kuThixo.’—Roma 12:1.

“Ndathi ndakufunda ukuba uThixo akazamkeli izinto ezingcolisa imizimba yethu, ndagqiba kwelokuba ndiyeke ukutshaya.”—USylvia, waseSpeyin.

Noko ke, ukuzimisela kukodwa kudla ngokunganeli. Sisenokufuna ukuncedwa ngabanye abantu, kuquka intsapho nabahlobo bethu. Yintoni abanokuyenza?