Uxinezeleko—Luyingozi Kakhulu Empilweni

“Andinaxesha lingqalileyo lokusebenza, noba kusemini okanye kusebusuku ndiyasebenza. Ixesh’ elininzi ndenza utyando kwesi sibhedlele, libe yimizuzwana nje elokuya kwesinye, kube ke phofu kuza kufuneka ndiqhube kwiindlela ezinyakazela iimoto.”—UGqr. Peter Stuart, waseMzantsi Afrika.

KUSENOKWENZEKA ukuba uyayiqonda indlela avakalelwa ngayo uGqr. Stuart, enoba ke ezakho iimeko ezikuxinezelayo zahlukile kwezakhe. Enoba lubangelwa kukuqhuba phakathi kwenyambalala yeemoto, iingxabano ekhaya okanye emsebenzini, okanye lubangelwa yiyo nantoni na enye, uxinezeleko alunto intsha phakathi kwabantu.

Kwiinkulungwane ezingaphezu kwama-30 ezadlulayo, ijoni elihlutshezwe yimfazwe latsho phandle ukuba: “Ukungcangcazela kundingene, nokutyhwatyhwa kundigubungele.” (INdumiso 55:5) Le ndoda yayiyazi kakuhle le nto kuthiwa luxinezeleko. Yayiseyinkwenkwe isalusa xa yagagana nengonyama, ibhere nejoni, elalifuna ukuyibulala.—1 Samuweli 17:4-10, 23, 24, 34-36, 41-51.

Kona, enyanisweni akukho nto imbi ngoxinezeleko. Lunokusinceda sikwazi ukwenza izinto ezinzima. Xa ubomi buphakathi kwenyama nozipho, uxinezeleko luye lwanceda abantu benza izinto ababengazange bazicinge ngaphambili. Xa ubuwabelwe ukwenza umsebenzi othile obalulekileyo, umzimba wakho unokuvelisa iadrenaline, ekunceda ukuba uwenze ngexesha elililo loo msebenzi.a

Noko ke, kubakho iingxaki xa uxinezeleko lungapheli nemizimba yethu ingade ifumane kuphumla. Omnye umphengululi uthi: “Uxinezeleko lunkqenkqeza phambili kwizinto ezibeka impilo yethu engozini.” Ukuba uva ngathi sele lukusinda okanye akufuni de ufike kwelo nqanaba, mhlawumbi uyazibuza, “Ngaba akukho nto ndinokuyenza ukuze ndinciphise uxinezeleko?”

Kuya kukuvuyisa ukwazi ukuba, ikho into onokuyenza! Nabani na, unokuyifumana le nto inike abantu abaninzi isiqabu. Ikumthombo obungenakufane uwucinge—iLizwi likaThixo, iBhayibhile. Nakuba ingeyoncwadi yamachiza, iBhayibhile inokusinika ubulumko esinokubusebenzisa. Ichaza isizathu sokuba kubekho uxinezeleko ngoku ize ichaze noonobangela balo. Kanti inamacebiso anokusinceda sihlangabezane noxinezeleko.

[Umbhalo osemazantsi]