Imbono YeBhayibhile
Ngaba Amabhinqa Afanele Afundise Ebandleni?
IBHINQA elingumKatolika labhalela iphephandaba iUSA Today lathi: “Iyandimangalisa yaye iyandicaphukisa into yokungabekwa kwamabhinqa ezikhundleni.” Abantu abaninzi bavakalelwa ngendlela efanayo. Kwezinye iicawa amabhinqa angababingeleli, oobhishophu noorabhi.
Iicawa zonke—ezo zikwalelayo nezo zikuvumelayo ukubekwa kwamabhinqa—zima ngelithi zithobela iZibhalo. Noko ke, iBhayibhile ayizixhasi zombini ezi mbono. Yenzeka njani ke leyo? Ukuze siphendule lo mbuzo, sifanele siqale sihlole ukuba iBhayibhile ilisebenzisa njani igama lesiGrike elithi “di·aʹko·nos,” ngokuqhelekileyo elibhekisela kumntu ofundisayo ebandleni.
Ngenkulungwane Yokuqala
Lithetha ntoni kuwe igama elithi di·aʹko·nos? Abantu abaninzi bakhawuleze bacinge ngenkokeli yecawa, indoda okanye ibhinqa elongamela ibandla xa kunqulwa. Kodwa yona iBhayibhile ilisebenzisa eli gama ngendlela ebanzi. Makhe sicinge ngebhinqa elingumKristu uFibhi, umpostile uPawulos awalazisa ‘njengodade wethu, ongumlungiseleli webandla eliseKenkreya.’—Roma 16:1.
Ngaba unombono kaFibhi emi phambi kwebandla laseKenkreya, eqhuba inkonzo yonqulo? Eneneni, luluphi uhlobo lokulungiselela olwalusenziwa nguFibhi? Kwileta yakhe eyayisiya eFilipi, uPawulos wathi amanye amabhinqa “aba nenxaxheba kwimizamo yam yokuhambisa iindaba ezimnandi.”—Akekeliswe sithi; Filipi 4:2, 3, iBhayibhile yesiXhosa yowe-1996.
Eyona ndlela amaKristu enkulungwane yokuqala awayezisasaza ngayo iindaba ezilungileyo ‘kusesidlangalaleni nakwizindlu ngezindlu.’ (IZenzo 20:20) Abantu ababesenza loo msebenzi babengabalungiseleli. Abo bantu babequka amabhinqa anjengoPrisila. Yena nomyeni wakhe, ‘bacokisa ukuyicacisela ngokuchane ngakumbi indlela kaThixo’ indoda eyayisoyika uThixo neyayingekabhaptizwa njengomKristu. (IZenzo 18:25, 26) NjengoFibhi, kucacile ukuba uPrisila wayengumlungiseleli ophumelelayo—njengokuba kwakunjalo nangamanye amabhinqa.
Isabelo Esibekekileyo
Ngaba ubulungiseleli basesidlangalaleni babusisabelo esingabalulekanga kangako nesasimele senziwe ngamabhinqa ngoxa wona amadoda esenza umsebenzi obalulekileyo wokuvelela ibandla? Akunjalo, ngenxa yezizathu ezibini. Okokuqala, iBhayibhile iyenza icace into yokuba onke amaKristu—kuquka amadoda anezabelo ezininzi ebandleni—ayefanele abe nesabelo kubulungiseleli basesidlangalaleni. (Luka 9:1, 2) Okwesibini, ubulungiseleli basesidlangalaleni buseyeyona ndlela amaKristu enoba ngamadoda okanye ngamabhinqa awuzalisekisa ngayo umyalelo kaYesu ‘wokubenza abafundi abantu beentlanga zonke, . . . bebafundisa.’—Mateyu 28:19, 20.
Ikho nenye into ebalulekileyo eyenziwa ngamabhinqa ebandleni. UPawulos wabhala wathi: “Abafazi abalupheleyo . . . mabafundise oko kulungileyo; ukuze babuyisele abafazana ezingqondweni ukuba bathande amadoda abo, bathande nabantwana babo.” (Tito 2:3, 4) Amabhinqa aqolileyo nanamava ekubeni ngamaKristu anelungelo lokunceda amabhinqa aselula nangenamava ukuze aqole. Naso esi sisabelo esikhulu esibekekileyo.
Ukufundisa Ebandleni
Noko ke, ayikho indawo eBhayibhileni ethi amabhinqa anokuma phambi kwebandla aze afundise. Kunoko, umpostile uPawulos uwayalela ukuba ‘mawathi cwaka emabandleni.’ Kutheni esitsho? Wabhala wathi, esinye isizathu kukuze izinto zenziwe “ngokundilisekileyo nangolungelelwano.” (1 Korinte 14:34, 40) Ukuze izinto zihambe kakuhle ebandleni, uThixo uye wayabela iqela elinye imbopheleleko yokufundisa. Phawula ukuba, le mbopheleleko yokuvelela ibandla ayinikwa nje nayiphi na indoda kodwa yabelwa amadoda afanelekayo.a—1 Timoti 3:1-7; Tito 1:5-9.
Ngaba isabelo uThixo asinike amabhinqa siyawathoba? Akunjalo. Khumbula ukuba uYehova uThixo ubamisele ukuba benze umsebenzi obalulekileyo—lowo wokunikela ubungqina ngaye esidlangalaleni. (INdumiso 68:11) Namhlanje, phakathi kwamaNgqina kaYehova kukho amadoda namabhinqa angabalungiseleli basesidlangalaleni aye anceda izigidi zabantu ukuba ziguquke zize zifumane usindiso. (IZenzo 2:21; 2 Petros 3:9) Ngumsebenzi obaluleke gqitha lowo!
Ilungiselelo lamadoda namabhinqa libangela ukuba kubekho uxolo ngoxa kwangaxeshanye lihlonela amadoda namabhinqa. Ngokomzekelo: Amehlo neendlebe ziyasebenzisana ukunceda umntu xa eza kunqumla isitrato esiphithizelayo. Ngendlela efanayo, xa amadoda namabhinqa esenza ukuthanda kukaThixo ngendlela awabelwe ngayo, uThixo ulisikelela ngokuba libe seluxolweni ibandla.—1 Korinte 14:33; Filipi 4:9.b
[Imibhalo esemazantsi]
a Phawula nokuba igunya enalo indoda ebandleni lilinganiselwe. UKristu yintloko yayo yaye ifanele isebenzise imigaqo yeBhayibhile. (1 Korinte 11:3) Kwakhona abo baneembopheleleko ebandleni bafanele ‘bathobelane,’ bebonisa umoya wokuzithoba nentsebenziswano.—Efese 5:21.
b Ngokuhlonela indima uThixo ayinike amadoda ebandleni, amabhinqa angamaKristu aba ngumzekelo nakwiingelosi ezisezulwini.—1 Korinte 11:10.
NGABA WAKHA WAZIBUZA?
● Ayefundisa njani amabhinqa ebandla lamaKristu lamandulo?—IZenzo 18:26.
● Ngoobani abamiselwe ukuba bavelele ibandla?—1 Timoti 3:1, 2.
● UThixo ubujonga njani ubulungiseleli bamabhinqa angamaKristu namhlanje?—INdumiso 68:11.
[Amagama acatshulweyo akwiphepha 29]
“NguYehova onikela eli lizwi; abafazi abavakalisa iindaba ezilungileyo bangumkhosi omkhulu.”—INDUMISO 68:11