Imbono YeBhayibhile

Ngaba UThixo Ungumntu Wokwenene?

NGENXA yendalo emangalisayo abantu abaninzi bakholelwa kumandla athile angaphezu kwawomntu, isithixo. Ngaba ukuntsonkotha kwendalo kuyakuchukumisa? Ngaba iyakumangalisa indalo esemhlabeni nendlela entsonkothileyo owenziwe ngayo umzimba womntu?

Ukuba kunjalo, mhlawumbi nawe uye weyiselwa ekubeni ukholelwe kumandla oMdali. Ezinye iicawa zifundisa ukuba uMdali uhlala ezintabeni, kwimithi, esibhakabhakeni nakwezinye izinto ezidaliweyo. Ezinye zikholelwa ekubeni imimoya yezinyanya, eluncedo nengendawo iyahlanganisana, aze la mandla angabonakaliyo xa edibene abe ngOyena Uphakamileyo—uThixo!

Kuzo zombini ezi mfundiso kukholelwa ukuba la mandla angaphezu kwawomntu awanabuntu. Kunzima ngabanye abantu ukukholelwa ekubeni uThixo uyacinga, uneemvakalelo, unenjongo nokuba uneminqweno. Ngaba uThixo ungumntu wokwenene? IBhayibhile, enye yezona ncwadi zindala ezingcwele, esasazwe kakhulu namhlanje inempendulo ecacileyo.

Ubuntu Babantu Busikrobisa Kubuntu BukaThixo

IBhayibhile ifundisa ukuba abantu badalwe ngokomfanekiso kaThixo. IGenesis 1:27 ithi, “uThixo wamdala umntu ngokomfanekiso wakhe.”

Licacile elokuba, loo mazwi awathethi kuthi abantu bokuqala babefana twatse noThixo. IBhayibhile ithi uThixo akabonakali, ngoxa abantu benziwe ngamasuntswana omhlaba. (Genesis 2:7; Yohane 4:24) Nangona kukho umahluko phakathi kwendlela uThixo nabantu abadalwe ngayo, xa siqwalasela iimpawu abantu abanazo, sitsho sibone indlela uThixo ayiyo.

Abantu bayakwazi ukubonisa igunya abanalo benze nezinto kakuhle. Ezo zinto zintle banokuzenza beqhutywa ziimpawu ezinjengobubele, ukukwazi ukucinga, ubulumko nokuba nokusesikweni. Abantu banokuba nothando, intiyo nomsindo. Ezi mpawu sinazo zahlukahlukeneyo zisenza singafani. Sonke sinobuntu obungafaniyo. Abantu banobuntu.

Ngaba kusengqiqweni ngoThixo ukuba asidale sintsonkothe kangaka aze yena abe ngumoya nje? Ukuba abantu badalwe ngokomfanekiso kaThixo loo nto ithetha ukuba ngeendlela ezininzi uThixo uyafana nabantu. Makhe sihlole oku kulandelayo.

UThixo unegama. IBhayibhile ithi kuIsaya 42:8: “NdinguYehova. Lilo elo igama lam.” UThixo ufuna igama lakhe laziwe. Kwakhona iBhayibhile ithi: “Ngamana igama likaYehova lingabongwa ukususela ngoku kuse phambili nakwixesha elingenammiselo. Ukususela ekuphumeni kwelanga kude kuse ekutshoneni kwalo Igama likaYehova malidunyiswe.” (INdumiso 113:2, 3) Ngokulisebenzisa rhoqo igama likaThixo, loo nto ithetha ukuba abanquli bakhe bamgqala njengomntu.

UThixo wahlukile. IBhayibhile ifundisa ukuba uThixo wahlukile. (1 Korinte 8:5, 6) IBhayibhile ithi: “Umkhulu ngokwenene, Nkosi enguMongami Yehova; kuba akakho omnye onjengawe, kungekho naThixo ngaphandle kwakho.” (2 Samuweli 7:22) Kwakhona iZibhalo zimchaza uYehova ‘njengoThixo oyinyaniso emazulwini phezulu nasemhlabeni phantsi. Akukho wumbi.’—Duteronomi 4:39.

UYehova uThixo ukuthiyile okubi. Ngumntu kuphela onokuba nentiyo. IBhayibhile isixelela ukuba uMdali uzithiyile izinto ‘ezinjengamehlo aziphakamisayo, ulwimi oluxokayo, nezandla eziphalaza igazi elimsulwa, intliziyo eyila amacebo enkohlakalo, iinyawo ezikhawulezayo ukubalekela ebubini, ingqina elixokayo elifutha ubuxoki, naye nabani na obangela usukuzwano phakathi kwabazalwana.’ (IMizekeliso 6:16-19) Phawula ukuba uThixo uzicekisile izinto ezenziwa ngabantu ezenzakalisa abanye abantu. Oku kusifundisa ukuba uThixo uyixhalabele impilo-ntle yethu nokuba uzithiyile izinto ezinokusenzakalisa.

UYehova nguThixo onothando. IBhayibhile isichazela ukuba uThixo uthanda “abantu beli hlabathi” kakhulu. (Yohane 3:16, iContemporary English Version) Imchaza njengoyise onenkathalo, obanqwenelela okuhle abantwana bakhe. (Isaya 64:8) Abantu banokufumana iintsikelelo ezininzi ngokwazi ukuba uThixo nguBawo onothando.

Unokuba Ngumhlobo KaThixo

Licacile elokuba, iBhayibhile ifundisa ukuba uMdali ngumntu onegama yaye unobuntu. Uyakwazi ukubonisa igunya nokwenza izinto ezintle eqhutywa ziimpawu ezinjengokuba nobubele, ubulumko nokuba sesikweni. Akakho kude kuthi. Kunoko, uthi: “Mna, Yehova uThixo wakho, ndibamba isandla sakho sasekunene, ndithi kuwe, ‘Musa ukoyika. Mna ngokwam ndiza kukunceda.’”—Isaya 41:13.

UThixo unenjongo ngoluntu. IBhayibhile ithi: “Amalungisa aya kuwudla ilifa umhlaba, ahlale kuwo ngonaphakade.” (INdumiso 37:29) Ukwazi ukuba uYehova wahlukile yaye unegama kwenza kube lula ngathi ukuba nolwalamano naye size sinandiphe iintsikelelo azinika abo baba ngabahlobo bakhe.—Duteronomi 6:4, 5; 1 Petros 5:6, 7.

NGABA WAKHA WAZIBUZA?

● Ngaba uThixo unegama?—Isaya 42:8.

● Ngaba kukho oothixo abaninzi?—1 Korinte 8:5, 6.

● Ngaba abantu banokuba ngabahlobo boThixo oyinyaniso?—1 Petros 5:6, 7.

[Umfanekiso okwiphepha 29]

Ngaba kusengqiqweni ngoThixo ukuba asidale sintsonkothe kangaka aze yena abe ngumoya nje?