Inyikima YaseHaiti—Indlela Ukholo Nothando Olwabonakaliswa Ngayo

NgoLwesibini ngoJanuwari 12, 2010 ngeye-4:53 emva kwemini, uEvelyn weva isandi esingathi sesenqwelo-moya waza nomhlaba waqalisa ukushukuma. Kwavakala nesandi sokudilika kwezakhiwo ezazikufutshane. Yakudamba inyikima, uEvelyn wakhwela kwindawo ephezulu. Weva izikhalo zabantu kuyo yonke indawo. IPort-au-Prince idolophu elikomkhulu laseHaiti yayigutyungelwe luthuli lwesamente olungathi ziingqimba zamafu.

NGEPHANYAZO izindlu, izakhiwo zikarhulumente, iibhanki, izibhedlele nezikolo zawa bhuma. Kwasweleka abantu abangaphezu kwama-220 000 kwaza kwenzakala abamalunga nama-300 000.

Abantu abaninzi abasindayo babehleli kumabhodlo ezindlu zabo bexakene nento. Abanye babevumbulula kuloo ngqushu bezama ukusindisa izalamane nabamelwane babo. Umbane wemka yaye kwakhawuleza kwamnyama kwaza kwafuneka abahlanguli bakhanyise ngeetotshi namakhandlela.

Kwisixeko saseJacmel, uRalphendy oneminyaka eli-11 ubudala wayecinezelwe ludonga lwesakhiwo esasidilikile. Iqela labahlanguli lachitha iiyure lizama ukumkhupha apho. Ekubeni umhlaba wawusaman’ unyikima, elo qela lamshiya apho kuba lisoyika ukuwelwa seso sakhiwo. Kodwa ke uPhilippe iNgqina likaYehova elingumthunywa wevangeli kwelo akazange ancame yaye uthi: “Ndandingenakukwazi ukumyeka afele apho uRalphendy.”

UPhilippe kunye nabanye abantu abathathu bazama ukuzinyakathisa kweso sakhiwo sidilikileyo ukuze bangene kwindawo emxinwa awayevaleleke kuyo uRalphendy, iinyawo zakhe zicinezelwe ludonga. Ukususela ezinzulwini zobusuku bazama ukumhlangula. Qho umhlaba ushukuma, udonga lwaluchachamba. Bada bamkhupha uRalphendy ngentsimbi yesihlanu ekuseni, emva kweeyure ezingaphezu kwe-12 inyikima idlulile.

Okubuhlungu kukuba asinguye wonke umntu owakhutshwa esaphila. Kwisixeko saseLéogâne esasintlithwe kanobom yile nyikima, uRoger nonyana wakhe omkhulu uClid basinda xa kwadilika ikhaya labo. Noko ke, uClarence unyana wakhe omncinane yena wasweleka. Inkosikazi kaRoger uClana yayisaphila ikwazi nokuthetha, kodwa yayicinezelwe luphahla entloko. URoger nomnye umhlobo wakhe basebenza nzima bezama ukumkhupha. Wakhwaza wathi: “Khawulezisani ndiphelelwa ngamandla, andikwaz’ ukuphefumla!” Kwiiyure ezintathu kamva kwafika iqela labahlanguli. Kodwa ke lathi limkhupha wabe sele eswelekile.

NgoLwesithathu, Januwari 13, Ngosuku Lwesibini

Kwathi xa kuthi qheke ukusa watsho wabonakala umonakalo owawenzekile. Izakhiwo ezininzi zasePort-au-Prince zazidilikile. Njengoko kwakuvakala iindaba zale ntlekele, imibutho yezoncedo nabanye abantu ehlabathini lonke yahlab’ ikhwelo lokuba kuye kuncedwa apho. Le nyikima yafikelela nakwiofisi yamatsha-ntliziyo yamaNgqina kaYehova yaseDominican Republic ekumgama weekhilomitha ezimalunga nama-300 ukusuka eHaiti. Esakuva ukuba eyona ndawo yayintlithwe kakhulu yiPort-au-Prince ekuhlala kuyo inkoliso yabantu baseHaiti abazizigidi ezilithoba, amaNgqina aseDominican alungiselela ukuya kunceda.

Kwakusele kuyiminyaka eli-150 iHaiti igqibele ukuba nenyikima. Ngenxa yoko zazingasakhiwa izakhiwo ezikwazi ukumelana nenyikima kodwa kwakusakhiwa ezo zikhusela abantu kwinkanyamba nakwizikhukula. Ngenxa yoko inkoliso yezakhiwo zalapho ayizange ikwazi ukumelana naloo nyikima. Noko ke iofisi yamaNgqina kaYehova aseHaiti eyakhiwa ngowe-1987 yayakhiwe ngohlobo lokuba ikwazi ukumelana nenyikima. Nangona yakhiwe ngakwimpuma yePort-au-Prince, ayizange idilike.

Ngobusuku nje obunye iofisi yaseHaiti yajika yaba yindawo yokunced’ abantu. Ekubeni iifowuni nee-e-mail zaziphazamisekile, abasebenzi bale ofisi babesiya ngakumda weDominican Republic kabini ukuze bathumele iingxelo. Ngelo xesha, amakhulukhulu abantu ababengxwelerhekile babethontelana ukuya kwiofisi yaseHaiti. Abanye abaninzi babesiwa kwizibhedlele ezimbalwa ezazisasebenza yaye zakhawuleza zaba nabantu abaninzi.

Ezibhedlele kwakububutyadidi, abantu abenzakeleyo bethe tywa phantsi kugxiz’ igazi kusitsho nezikhalo. Omnye wabo bantu babelele apho yayinguMarla, owayecinezelwe ludonga lwesakhiwo esidilikileyo kangangeeyure ezisibhozo. Wayengakwazi nokushukumisa nemilenze le. Wancedwa ngabamelwane bakhe baza bamsa esibhedlele kodwa bamsa kwesiphi? UEvan ugqirha oliNgqina nowayefike evela eDominican Republic waya kumkhangela nangona wayengamazi.

Ngelo xesha kwakusele kudlule iiyure ezingaphezu kwama-24 emva kwenyikima yaye kwakuphinde kwamnyama. Etsiba phezu kwezidumbu ezazingaphandle kwesinye sezibhedlele, uEvan wenza umthandazo omfutshane yaye waqhubeka ebiza igama likaMarla. Ekugqibeleni weva ilizwi lisithi, “Ndim lo!” UMarla wayemjongile encumile. Emangalisiwe, uEvan wambuza, “Kutheni uncumile nje?” Waphendula wathi: “Kuba ngoku ndikunye nomzalwana wam.” Zathi waxa iinyembezi kuEvan.

NgoLwesine, Januwari 14, Ngosuku Lwesithathu

Ikomkhulu lamaNgqina kaYehova, eliseUnited States—kunye nesebe laseKhanada, elaseDominican Republic, elaseFransi, elaseJamani, elaseGuadelope, elaseMartinique namanye—ancedisana ukuze asebenzise izithuthi ezazifumaneka, ezonxibelelwano, imali nabantu bokunceda. AmaNgqina kaYehova angama-78 aqeqeshwe kwiinkalo ezahlukeneyo zezonyango kuquka namanye amatshantliziyo amaninzi aya kunceda. Ngecala emva kwentsimbi yesibini ekuseni, ilori yokuqala eyayithwele iikhilogram ezingama-6 804 zokutya, amanzi, amayeza nezinye izinto yanduluka kwisebe laseDominican isingise kwiofisi yesebe yaseHaiti.

Ukufika kwelori, abantu abasebenza kwiofisi yesebe yaseHaiti alungiselela ukusasaza loo mpahla. Kwafuneka ukutya akufihle kuba kwakusenokubiwa ngamasela aze akuthengise. Amatsha-ntliziyo asebenza imini nobusuku efaka ezo zinto kwiiplastiki ezincinane elungiselela abantu. Kwiinyanga ezalandelayo amaNgqina kaYehova asasaza iikhilogram ezingama-450 000 zezinto zokunceda kuquka nezixa zokutya ezingaphezu kwama-400 000.

NgoLwesihlanu, Januwari 15, Ngosuku Lwesine

Kwathi kuba semini emaqanda kwaba sele kufike eHaiti oogqirha abangamaNgqina abali-19, abongikazi nabanye abantu abanolwazi lwezamayeza ababevela eDominican Republic naseGuadeloupe. Bakhawuleza baseka ikliniki yoncedo lokuqala. Kubantu ababenyangwa apho kwakhukho nabantwana abaninzi ababevela kwikhaya elinyamekela iinkedama ababenzakele. Ukongezelela koko, amaNgqina aphathela elo khaya ukutya kunye neentente. UÉtienne ongumphathi wekhaya leenkedama uthi “Ndiwabulela kakhulu amaNgqina kaYehova, andazi ngesiyintoni ngaphandle kwawo.”

Obelahlekile Uyafunyanwa

Xa kwakuqalisa inyikima, uIslande oneminyaka esixhenxe ubudala wakroba phandle waza wabona iintambo zombane ziqhushumba kutaka neentlantsi. Ngelo xesha wadilikelwa yindlu, wophuka umlenze waza wonzakala kakhulu. Emva kokuba ekhutshiwe phantsi kwezo zitena, utata wakhe, uJohnny wamsa kwisibhedlele esingaphaya kwemida yeDominican. Ukusuka apho wathathwa yinqwelo-moya yaza yamsa kwisibhedlele esikwikomkhulu lelo lizwe iSanto Domingo. Kodwa xa uJohnny wafowunela kweso sibhedlele kwathiwa uIslande akakho.

Kangangeentsuku ezimbini uJohnny wamkhangela uIslande kodwa akazange amfumane. Wayesiwe kwesinye isibhedlele, apho weviwa ngomnye umntu ethandaza kuYehova. (INdumiso 83:18) Loo mntu wambuza wathi: “Uyamthanda uYehova?” UIslande owayentywizisa wathi, “Ewe.” Wamthuthuzela wathi: “Ungakhathazeki uYehova uza kukunceda.”

UJohnny wacela iofisi yamaNgqina kaYehova eseDominican Republic ukuba imncedise ekukhangeleni intombi yakhe. UMelanie oliNgqina wancedisa ekumkhangeleni. Njengoko uMelanie wayebuzisa kwesinye isibhedlele, weviwa ngulaa mntu wayephulaphule uIslande ethandaza waza wambonisa apho akhoyo. Emva koko, uIslande wadityaniswa nabantu bakowabo.

Ukutyandwa Nokuchacha

Ngaphambi kokuba baye kule kliniki yenziwe ngamaNgqina eHaiti inkoliso yabantu ababenzakele babengazange bafumane unyango ngoko amalungu abo omzimba awayenzakele ayebola. Izihlandlo ezininzi ekuphela kwendlela yokusindisa ubomi babo bantu yayikukuwanqumla amalungu achaphazelekileyo. Kwiintsuku zokuqala emva kwenyikima izinto zokutyanda, amayeza kunye nezinto zokudambisa iintlungu zazinqongophele. Le meko yayinzima kakhulu nakoogqirha. Omnye ugqirha wathi: “Kukho izinto endizibonileyo nezikhalo endinqwenela ukuba uThixo azicime engqondweni yam.”

Kwiveki yesibini emva kwenyikima kwafika oogqirha baseYurophu abangamaNgqina ababenezixhobo ezazifuneka nababekwazi ukwenza utyando oluntsonkothileyo ekwakufuneka lwenziwe ebantwini. Abo gqirha batyanda abantu abangama-53 baza banyanga amawaka. UWideline oneminyaka engama-23 ubudala noliNgqina, wayefike ePort-au-Prince ngosuku olungaphambi kwenyikima. Emva kwale nyikima ingalo yakhe yasekunene yenzakala kangangokuba kwafuneka inqunyulwe. Izalamane zakhe zamsa kwisibhedlele esikufutshane nakowabo ePort-de-Paix ekumgama weeyure ezisixhenxe ukusuka apho. Kodwa imeko kaWideline yaba mandundu kangangokuba nabasebenzi basesibhedlele babesithi uza kufa.

Xa beva ngemeko yakhe, oogqirha abangamaNgqina basuka ePort-au-Prince baya kumnceda nokuze bambuyisele ekhaya ukuze ongiwe. Ezinye izigulane zancoma xa zabona ukuba abantu akhonza nabo babeze kumnceda. UWideline uye wancedwa kakhulu yintsapho nalibandla ukuze aqhele imeko akuyo ngoku.

EDominican Republic, amaNgqina kaYehova aye aqesha amakhaya ukuze ancede abantu abaye bathunyelwa khona. Kuloo makhaya kwakusebenza amaNgqina angoogqirha, oonesi nabanye abanobuchule bokunceda abantu abenzakeleyo. Babanyamekela aba bantu njengoko babechacha.

Ukuthetha Nabanye Ngokholo, Ithemba Nothando

KwiiHolo zoBukumkani zamaNgqina kaYehova zaseHaiti ezingama-56, zintandathu kuphela ezadilikayo. Inkoliso yamaNgqina awayelahlekelwe ziindawo zokuhlala yagcinwa kwiiholo ezasindayo nakwezinye iindawo. Ekubeni amaNgqina ekuqhelile ukuhlanganisana ndawonye, alungiselela ukuba iintlanganiso ziqhubeke.

UJean-Claude, ongumdala webandla lamaNgqina kaYehova lalapho uthi: “Iintlanganiso zebandla zaqhubeka njengesiqhelo, ukuze kuncedwe amalungu ebandla aselula nasele ekhulile.” Waba yintoni umphumo? Enye indoda yathi, “Kuhle ukubona ukuba amaNgqina kaYehova asashumayela. Ukuba besinganiboni besiza kucinga ukuba imeko imbi kakhulu.”

AmaNgqina abathuthuzela abantu. Elinye iNgqina lathi: “Phantse wonke umntu esasidibana naye wayecinga ukuba uThixo uyasohlwaya. Sabaqinisekisa ukuba inyikima ayibangelwa nguThixo kodwa yintlekele nje yemvelo. Sabafundela iGenesis 18:25. Kule ndinyana uAbraham uthi akunakwenzeka ukuba uThixo atshabalalise amalungisa nabantu abangendawo. Kwakhona sabafundela uLuka 21:11. Kule ndinyana uYesu waprofeta ngeenyikima ezaziza kwenzeka kule mihla, sabachazela ukuba kungekudala uza kuvusa abafileyo aze aphelise konke ukubandezeleka. Abantu abaninzi bazixabisa izinto esabafundisa zona.”a

Kodwa kwakusekho iingxaki. UJean-Emmanuel ongugqirha oliNgqina uthi: “Intlekele yokuqala inyikima, yayidlulile. Ngoku kwakufuneka sijamelene nemiphumo yayo. Ngaphandle kwezifo ezininzi ezinokuvela ngenxa yokuhlala kwinkampu exineneyo, engacocekanga nefumileyo abantu bahlala bothukile ngenxa yoko kusandul’ ukwenzeka.”

Kwiiveki eziliqela emva kwenyikima, elinye iNgqina leza ekliniki likhala ngentloko nokungehli kobuthongo, izinto ezidla ngokukhathaza abantu emva kokuba kwehle intlekele. Omnye umongikazi oliNgqina wabuza: “Ngaba ikhona into ekubethe entloko?” Laphendula lathi: “Akukho nto indibethileyo kodwa inkosikazi yam ebenditshate nayo kangangeminyaka eli-17 iswelekile. Kodwa ke besizilindele izinto ezinjalo. Kaloku noYesu wathi ziza kwenzeka.”

Umongikazi owayesele ewuqonda unobangela wale ngxaki wathi: “Ulahlekelwe liqabane lakho nje. Ibuhlungu into ekwehleleyo! Akukho nto imbi ngokukhala. NoYesu wakhala xa kwafa umhlobo wakhe uLazaro.” Loo mazwi ayenza yalila le ndoda.

AmaNgqina alapho ali-154 kwangaphezu kwali-10 000 abulawa yinyikima. Kuqikelelwa ukuba inkoliso yabantu basePort-au-Prince yalahlekelwa sisalamane esinye okanye nangaphezulu kuloo ntlekele. Ukuze ancede abantu abalahlekelweyo, amaNgqina kaYehova aye abatyelela ngokuphindaphindiweyo ukuze abathuthuzele aze abanike ithuba lokuphalaza imbilini yabo kumntu abanokumthemba. AmaNgqina ayesele esazi isithembiso seBhayibhile sokuvuswa kwabafileyo neseparadesi esemhlabeni, kodwa nawo ayefuna ukuzityand’ igila kwamanye amaKristu anovelwano nawayeza kuwathuthuzela.

Ukujamelana Neemeko Zanamhlanje Nekamva

Umpostile uPawulos wabhala wathi: “Noko ke, zintathu izinto eziya kuhlala zihleli, lukholo, nethemba, nothando; kodwa eyona inkulu kuzo luthando.” (1 Korinte 13:13) Ezi mpawu zinceda uninzi lwamaNgqina aseHaiti ukuba anyamezele, akhuthaze abanye aze angaloyiki ikamva. Kucacile ukuba lukholo, umanyano nothando olwenze amaNgqina omhlaba wonke ancede eHaiti. UPetra iNgqina laseJamani elingugqirha elalizele ukuza kunceda lathi: “Zange ndalubona uthando olunje. Ndakhala kakhulu kodwa yayiziinyembezi zovuyo.”

IThe Wall Street Journal ithi inyikima yaseHaiti yowama-2010 “isenokuba yeyona ntlekele inkulu ekhe yahlasela ilizwe elinye.” Sekunjalo, zininzi ezinye iintlekele eziye zabakho ukususela ngoko, ezemvelo nezibangelwa ngabantu. Ngaba ziya kuze ziphele? AmaNgqina kaYehova aseHaiti nasemhlabeni wonke aqinisekile ukuba kungentsuku zatywala uThixo uza kusizalisekisa isithembiso seBhayibhile esithi: “Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”—ISityhilelo 21:4.

[Umbhalo osemazantsi]

[Amagama acatshulweyo akwiphepha 15]

“Ndandingenakukwazi ukumyeka afele apho uRalphendy”

[Amagama acatshulweyo akwiphepha 19]

“Kuhle ukubona ukuba amaNgqina kaYehova asashumayela”

[Ibhokisi/Imifanekiso ekwiphepha 17]

UKWAKHELA AMAXHOBA IZINDLU

Emva kwenyanga inyikima idlulile, abakhi abangamaNgqina baqalisa ukuhlola izindlu ekwakunokuhlalwa kuzo kwakhona. Abantu abaninzi abaphulukana nezindlu zabo kwafuneka bakhelwe iindawo ababenokuxhwarha kuzo de baphinde babe nezindlu.

UJohn osebenza kwiofisi yesebe laseHaiti uthi: “Sakha izindlu ezingabizi mali eninzi, ezakheka lula nezazilingana nezo babekade behlala kuzo abaninzi, njengoko iqhele ukwenza imibutho yehlabathi enceda abantu ngexesha lentlekele. Zazikwazi ukukhusela abantu emvuleni nasemoyeni ibe zazingenakudilika xa umhlaba ushukuma kwakhona.” Kwiiveki nje ezintathu emva kwenyikima, amatsha-ntliziyo aseHaiti nawamanye amazwe aqalisa ukwakha ezi zindlu.

Ezitratweni abantu babengawuvali umlomo njengoko babebona kudlula iilori ezithwele izinto zokwakha. Xa yayihlola izinto zokwakha ezithunyelweyo, enye indoda esebenza kumda waseHaiti yathi: “AmaNgqina kaYehova ebephakathi kwabona bantu bokuqala ukuwela umda ukuza kunceda abantu. Akathethi nje ngokunceda abantu kodwa ayayenza loo nto.” Kwiinyanga nje ezimbalwa zokuqala emva kwenyikima, amaNgqina ayesele akhele abantu izindlu ezili-1 500.

[Imaphu ekwiphepha 14]

(Ukuba ufuna inkcazelo ehlahlelwe kakuhle, yiya kwimpapasho)

HAITI

PORT-AU-PRINCE

Léogâne

Eyona ndawo yantlithwa kakhulu

Jacmel

DOMINICAN REPUBLIC

[Umfanekiso okwiphepha 16]

UMarla

[Umfanekiso okwiphepha 16]

UIslande

[Umfanekiso okwiphepha 16]

UWideline

[Umfanekiso okwiphepha 18]

Iqela lamaNgqina kaYehova aseHaiti esiya kuthuthuzela amaxhoba enyikima

[Umfanekiso okwiphepha 18]

Ugqirha enyanga inkwenkwana kwikliniki yamaNgqina kaYehova