Abantu Abaselula Bayabuza

Ngaba Akho Yam?

“Ndandidla ngokuzeya xa ndizithelekisa nomnye wabahlobo bam. Yonke into yayibonakala ilula kuye. Loo nto yayindenza ndizibuze ukuba mna ndingotheni. Ndandizingcungcuthekisa ngokwenene.—UAnnette.a

NGABA uziva ungungantweni kangangokuba uyoyika ukuqala into ongayaziyo? Ngaba maxa wambi izinto ezithethwa ngabantu obahlonelayo zikwenza ungazithembi? Ngaba iimpazamo owakha wazenza zikwenza woyike ukuphinda uzame? Ukuba kunjalo, unokumelana njani nezinto oye wohluleka kuzo—ezikohlule ngokwenene nocinga ukuba zikohlule?

Ukufumana impendulo kulo mbuzo wokugqibela kuya kukunceda ngokwenene kuba wonke umntu ukhe ohluleke ngamanye amaxesha. (Roma 3:23) Kodwa abantu abazingisayo bayakwazi ukumelana nokwahluleka. Oko kuthetha ukuthi bayakwazi ukuzamkela iimpazamo zabo, bafunde kuzo baze baqale apho bebeyeke khona. Ngenxa yoko basenokuphumelela kwixa elizayo. Ngoko makhe sibone indlela onokuhlangabezana ngayo nezi ngxaki zintathu—xa ucinga ukuba uza kohluleka, xa ucinga ukuba wohlulekile naxa wohluleke ngokwenene.

USENOKUNGAPHUMELELI → INTO ESENOKWENZEKA Ubona ngathi uza kwahluleka ukwenza into ethile ngoko ugqiba kwelokuba ungazikhathazi nokuzikhathaza ngokuyizama kuba usithi uza kwahluleka kakade.

Yazi ingxaki. Faka olu phawu ✔ ecaleni kwento obungathanda ukuyenza—kodwa oqinisekileyo ukuba iza kwahlula enoba uzama kangakanani na.

◯ Ukuthethelela iinkolelo zakho kubantwana ofunda nabo

◯ Ukucela umsebenzi

◯ Ukuthetha phambi kwabantu

◯ Ukuba nenxaxheba kumdlalo othile

◯ Ukucula okanye ukudlala isixhobo somculo

◯ Enye into ․․․․․

Cingisisa kakuhle. Cinga ngale nto ubeke uphawu kuyo nangoko kunokwenzeka njengoko uphendula le mibuzo ilandelayo:

‘Yintoni ebendingathanda yenzeke?’

․․․․․

‘Yintoni endinexhala lokuba ingenzeka?’

․․․․․

Ngoku bhala isizathu esibangela ukuba ucinge ukuba umele uzame ukuyenza loo nto, nakubeni usoyika ukwahluleka.

․․․․․

Umzekelo oseBhayibhileni. Xa uMoses wathunywa nguYehova uThixo ukuba akhokele uhlanga lakwaSirayeli, zisuka nje wacinga ukuba kuthekani xa kunokubakho into engenzeki kakuhle. Wabuza oku kuThixo: “Kusenokwenzeka ukuba bangaliphulaphuli ilizwi lam.” Emva koko waqhubeka ecinga ngobuthathaka bakhe. Wathi: “Andizange ndibe liciko. Andazi ukuba ndiza kuthetha ndithini.” Kwanasemva kokuba uYehova ethe uza kumnceda, uMoses wambongoza esithi: “Nceda uthumele omnye umntu.” (Eksodus 4:1, 10, 13, ngokweContemporary English Version) Ekugqibeleni uMoses wasamkela isabelo sakhe yaye wakwenza kakuhle konke uYehova awamyalela kona. Esalathiswa nguThixo, uMoses wakhokela amaSirayeli kangangeminyaka engama-40.

Into onokuyenza. UKumkani uSolomon wabhala wenjenje: “Konke esikufumanayo ukuba sikwenze isandla sakho kwenze ngamandla akho onke.” (INtshumayeli 9:10) Ngoko ke, endaweni yokuyeka into ofuna ukuyenza ngenxa yokuba usoyika ukwahluleka, zama ngamandla akho onke. Kutheni ungakhe ucinge ngento owakha wayenza bhetele kunendlela owawucinga ngayo? Indlela owayenza kakuhle ngayo yakufundisa ntoni ngawe siqu? Eso sifundo sinokukunceda njani uyeke ukoyika ukungaphumeleli koko ufuna ukukwenza?

Icebiso: Ukuba kunokwenzeka, cela icebiso kumzali okanye kumhlobo oqolileyo onokukunceda uzithembe.b

UCINGA UKUBA WAHLULEKILE → INTO OCINGA UKUBA YENZEKILE Xa omnye umntu esenza into obungathanda ukuyenza ngokuphumelelayo, uye ucinge ukuba wena uza kwahluleka.

Yazi ingxaki. Uzithelekisa nabani, yaye yintoni ayenzileyo loo mntu ebangela ukuba ucinge ukuba wena wahlulekile?

․․․․․

Cingisisa kakuhle. Ngaba ngokwenene ukuphumelela kwaloo mntu kuthetha ukuba wena wahlulekile?

․․․․․

Ngoku bhala isizathu esibangela ukuba ucinge ukuba bekufanelekile ukuzama.

․․․․․

Umzekelo oseBhayibhileni. UKayin ‘wavutha ngumsindo’ akubona ukuba uYehova uyakholiswa ngumntakwabo uAbheli. UYehova wamkhalimela ngokuba nekhwele, waza wathi naye wayenokuphumelela xa efuna. UYehova wathi kuKayin: “Ukuba uyaguquka wenze okulungileyo, akusayi kuphakanyiswa yini na?”c—Genesis 4:6, 7.

Into onokuyenza. Kunokuba ‘ukhuphisane’—enoba loo mona ungaphakathi—bancome abanye abantu xa bephumelela. (Galati 5:26; Roma 12:15) Kwangaxeshanye, ngaphandle kokuqhayisa, nawe zazi iziphiwo onazo. IBhayibhile ithi: “Ngamnye makangqine oko ukuko umsebenzi wakhe, uya kwandula ke abe nesizathu sokugcoba ngaye siqu.”—Galati 6:4.

WAHLULEKILE → INTO EYENZEKILEYO Kukho into ongakwazanga ukuyenza, ngenxa yoko ucinga ukuba akukho nto uya kuze uyenze kakuhle.

Yazi ingxaki. Yiyiphi into ongakwazi kuyenza eyeyona ikudimazayo?

․․․․․

Cingisisa kakuhle. Ngaba le nto uyibhale ngasentla ibonisa ukuba ngokwenene akukho nto ukwazi ukuyenza? Ngokomzekelo, ukuba uye wayekelela kubuthathaka obuthile, ngaba loo nto ithetha ukuba ungungantweni? Okanye ngaba mhlawumbi ibonisa ukuba ufuna uncedo? Ukuba ubuye wawa ngoxa ukumdlalo othile, ubuza kuvuma xa omnye umntu ekunceda ukuze uphakame. Kutheni ungenzi okufanayo ukuze uhlangabezane naloo nto iye yakwahlula? Apha ngezantsi bhala igama lomntu onokuthetha naye ngengxaki onayo.d

․․․․․

Umzekelo weBhayibhile. Maxa wambi umpostile uPawulos wayedinyazwa bubuthathaka bakhe. Wabhala: “Hayi usizana endilulo!” (Roma 7:24) Sekunjalo, waqonda ukuba asibobuthathaka bakhe obabuchaza umntu anguye. Wabhala: “Ndiwulwile umlo omhle, ugqatso ndilubaleke kwada kwesa ekugqibeleni, ukholo ndilugcinile.”—2 Timoti 4:7.

Oko unokukwenza. Endaweni yokuba usoloko ucinga ngobuthathaka bakho, cinga nangeempawu zakho ezintle. Ngokuqinisekileyo yena uYehova akazilibali. IBhayibhile ithi: “UThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe”—Hebhere 6:10; INdumiso 110:3.

Ungaze ukulibale oku: Akukho mntu ufezekileyo. Wonke umntu ukhe ahluleke. Ukuba unokufunda ukumelana nako, uya kuba ufumene into eya kukunceda xa sele ungumntu omdala. IMizekeliso 24:16 ithi: “Ilungisa lisenokuwa kasixhenxe, yaye ngokuqinisekileyo liya kuvuka.” Nawe unokuba njalo!

Amanye amanqaku athi “Abantu Abaselula Bayabuza” afumaneka kwiWebhusayithi ethi www.watchtower.org/ype

[Imibhalo esemazantsi]

[Ibhokisi/Imifanekiso ekwiphepha 27]

OKO KUTHETHWA LOLUNYE ULUTSHA

“Ukuba wenza kuphela izinto okwaziyo ukuzenza—ukuba akukhe uzame ukwenza izinto ezintsha kuba usoyika ukungaphumeleli—udlala ngamathuba.”

“Unokufunda lukhulu kwizinto owahlulekileyo ukuzenza uze uzame ukuphucula okanye unokukhathazeka kakhulu ngenxa yeempazamo zakho ude ungafuni ukuzama kwakhona. Kuxhomekeka kuhlobo lomntu onguye.”

“Xa ndisazi ukuba ndisenokwahluleka ekwenzeni into ethile, ndiye ndiqhule ngaloo nto. Kubhetele ukuhleka kunokuqumba. Ukuba ulindele ukuphumelela kuyo yonke into oyenzayo, akusoze wonwabe.”

[Imifanekiso]

UAndrea

UTrenton

UNaomi

[Ibhokisi ekwiphepha 28]

KUTHENI UNGABUZI ABAZALI BAKHO?

Xa wawungangam, ziziphi izinto ezakha zakudimaza? Wahlangabezana njani nazo? Ngaba nangoku ukhe ujamelane nezo zinto?

․․․․․

[Umfanekiso okwiphepha 28]

Umntu onyamezelayo uyawa aphinde avuke—mhlawumbi ngokufumana uncedo