Imbono YeBhayibhile
Ukugcina Usuku Lweveki Olungcwele—Ngaba Kuyimfuneko?
EHLABATHINI jikelele, izigidi zamaSilamsi, amaYuda nabantu abathi bangamaKristu banosuku lweveki abalubekela bucala ukuze banqule. Kutheni besenjenjalo nje? Ngokomzekelo, uIbrahim oliSilamsi eliya rhoqo kwindlu yenkonzo ngolweSihlanu ukuze athandaze aze aphulaphule nentshumayelo, uthi: “Ndifuna ukusondela kuThixo ndize ndifumane uxolo lwengqondo.”
Ngaba iBhayibhile ifundisa ukuba uThixo uthi sifanele sibe nosuku lweveki esilugqala njengolungcwele? Ngaba kufuneka sinqule ngosuku oluthile ukuze sibe nobuhlobo obusondeleyo noThixo?
Ilungiselelo Lokwexeshana
Kwiminyaka engaphezu kwama-3 500 eyadlulayo, uThixo wasebenzisa umprofeti uMoses ukuze anike abantu imithetho ekhethekileyo. Le Mithetho yayiquka iimini ekwakuphumlwa ngazo okanye iiSabatha ekwakunqulwa ngazo. ISabatha eyayisibakho rhoqo yayiyeyeeveki ngeeveki. Yayiqala ukutshona kwelanga ngoLwesihlanu de kube sekutshoneni kwalo ngoMgqibelo.—Eksodus 20:8-10.
Ngaba zonke iintlanga zazifanele ziphumle ngolo suku? Akunjalo. UMthetho kaMoses wawunikwe kuphela amaSirayeli neentlanga ezazingabangeni kubuYuda. UThixo wathi kuMoses: “Oonyana bakaSirayeli mabayigcine ke isabatha . . . Phakathi kwam noonyana bakaSirayeli ingumqondiso wexesha elingenammiselo.”a—Eksodus 31:16, 17.
IBhayibhile ithi uMthetho kaMoses ‘wawusisithunzi sezinto ezizayo.’ (Kolose 2:17) Ngenxa yoko, iSabatha yayiyinxalenye yelungiselelo lonqulo olwalufanekisela ilungiselelo elongamileyo elaliza kubakho kamva. (Hebhere 10:1) IBhayibhile ibonisa ukuba kuThixo, uMthetho owawunikwe amaSirayeli kuquka nalowo weSabatha yaveki nganye, waphelelwa xa kwafa uYesu Kristu. (Roma 10:4) Yintoni eyathath’ indawo yawo?
Indlela Entsha Yokunqula
Unqulo olwamkelwa nguThixo emva kokuba uMthetho kaMoses uyifezile injongo yawo luchazwa kakuhle eBhayibhileni. Ngaba luthi sifanele sinqule ngosuku olukhethekileyo evekini?
IZibhalo zibonisa ukuba eminye imithetho eyanikwa uSirayeli yayisebenza nakwibandla lamaKristu. Le mithetho iquka umyalelo wokuzikhwebula kunqulo zithixo, kuhenyuzo nasekutyeni igazi. (IZenzo 15:28, 29) Kodwa ke umthetho wokugcina iSabatha awuzange uqukwe kwimithetho eyanikwa amaKristu.—Roma 14:5.
Yintoni enye esiyixelelwa yiBhayibhile ngokuphathelele indlela awayenqula ngayo amaKristu enkulungwane yokuqala? Ayehlanganisana rhoqo ukuze athandaze, afunde izibhalo, aphulaphule iintshumayelo aze acule neengoma zokudumisa uThixo. (IZenzo 12:12; Kolose 3:16) Xa ehlanganisene ngolo hlobo amaKristu ayefundiswa, komelezwe ukholo lwawo yaye ayekhuthazana.—Hebhere 10:24, 25.
Ayikho ivesi yeBhayibhile ethi amaKristu afanele ahlanganisane ngeCawa okanye ngolunye usuku oluthile evekini. Ukuba kunjalo, kutheni abantu abaninzi abathi bangamaKristu besithi iCawa lusuku olungcwele? Abantu baqala ukunqula ngeCawa emva kokuba iBhayibhile igqityiwe ukubhalwa, xa kwavela iinkolelo namasiko amaninzi angasekelwanga Bhayibhileni.
Ngaba uThixo waphinda wathi makunqulwe ngosuku oluthile olukhethekileyo? Akunjalo. IBhayibhile iyazichaza iinkcukacha zendlela ekufanele kunqulwe ngayo. Ayikho eminye imibhalo ephefumlelweyo eyongezwa kwiZibhalo Ezingcwele. Umpostile uPawulos waphefumlelwa ukuba abhale athi: “Ukuba thina okanye ingelosi yasezulwini ivakalise kuni iindaba ezilungileyo ezingaphaya kwezo sazivakalisayo kuni, makaqalekiswe lowo.”—Galati 1:8.
Unqulo Olumkholisayo UThixo
Nangona iinkokeli zonqulo zexesha likaYesu zaziqiniseka ukuba zigcina usuku olungcwele veki nganye, uThixo akazange alwamkele unqulo lwazo kuba iintliziyo zazo zazingendawo. Zazithand’ imali yaye zazibadelela abantu abaphantsi. Zazifuna ukubalasela, zinamaqhinga yaye zazingene zwabha kwiimpikiswano zezopolitiko. (Mateyu 23:6, 7, 29-33; Luka 16:14; Yohane 11:46-48) Zazisithi zimela uThixo. Kodwa zajika iSabatha uThixo awayeyenzele ukuhlaziya abantu zaza zayenza umthetho owawunobuceducedu obuninzi ukuze zicinezele abantu.—Mateyu 12:9-14.
Kucacile ukuba akufuneki ude ugcine usuku olungcwele veki nganye ukuze unqule uThixo ngendlela emkholisayo. Yintoni ke ngoko efunekayo? UYesu wathi: “Yizani kum, nonke nina nibulalekayo nenisindwa ngumthwalo, yaye ndiza kunihlaziya.” (Mateyu 11:28) Unqulo olusekelwe kwiimfundiso zikaYesu luyahlaziya. Alunaluhanahaniso namithetho icinezelayo.
AmaNgqina kaYehova asehlabathini lonke axelisa indlela ababenqula ngayo abalandeli bakaYesu. AmaNgqina ayahlanganisana ukuze afunde iBhayibhile rhoqo ngeveki. Iintsuku akhetha ukunqula ngazo zixhomekeka kwiimeko zeendawo ahlala kuzo kungekhona kwizithethe ezingekho zibhalweni. Nawe uyamenywa ukuba ukhe uye kwindawo anqulela kuyo ekufutshane nawe ukuze uzibonele indlela oluhlaziya ngayo unqulo lwawo.
[Umbhalo osemazantsi]
a Igama leBhayibhile elithi “ixesha elingenammiselo” alisoloko lithetha ukuthi ngonaphakade. Lisenokubhekisela kwixesha elide elingachazwanga ubude balo.
NGABA WAKHA WAZIBUZA?
● Ngaba ufanele unqule uThixo ngosuku olukhethekileyo evekini?—Roma 10:4; 14:5.
● Kutheni sifanele sihlanganisane ukuze sinqule?—Hebhere 10:24, 25.
● Yintoni efunekayo ukuze unqulo lwakho lukwanelise?—Mateyu 11:28.
[Isicangca/Imifanekiso ekwiphepha 10, 11]
(Ukuba ufuna inkcazelo ehlahlelwe kakuhle, yiya kwimpapasho)
NGOLWESIBINI
NGOLWESITHATHU
1 NGOLWESINE
2 NGOLWESIHLANU
3 NGOMGQIBELO
4 NGECAWA