Imbono YeBhayibhile

Indlela Yokwenza Umtshato Uphumelele

“Lowo wabadalayo ukususela ekuqaleni wabenza baba yindoda nebhinqa waza wathi, ‘Ngenxa yesi sizathu indoda iya kumshiya uyise nonina ize inamathele emfazini wayo, baze abo babini babe nyama-nye’ . . . Ngoko ke, oko uThixo akubophelele ngedyokhwe ndawonye makungahlukaniswa mntu.”—Amazwi kaYesu Kristu abhalwe kuMateyu 19:4-6.

KWELI hlabathi siphila kulo elinemilinganiselo etshintshayo, umtshato awusaxatyiswa. Abantu abaninzi abatshatileyo bahlala kunye de omnye abone ukuba iqabane lakhe alisekho lihle njengakuqala okanye de kuvele iingxaki—izinto nje ezingenamsebenzi ngamanye amaxesha—baze bohlukane okanye bawuqhawule umtshato. Okubuhlungu kukuba abantwana badla ngokusala besentlungwini.

Le nto ayibothusi abantu abafunda iBhayibhile. Ngokuphathelele ‘imihla yokugqibela’ esiphila kuyo ngoku, iBhayibhile yaprofeta isithi abantu abaninzi babengazi kuba nazo iimpawu ezimanyanisa iintsapho—njengokunyaniseka, uthando lwenene kunye nomsa wemvelo. (2 Timoti 3:1-5) Ngaba oku kuwohloka kwemilinganiselo yokuziphatha kunye nemiphumo yako kubomi bentsapho kuya kuxhalabisa? Ngaba uyawuxabisa umtshato?

Ukuba kunjalo, iBhayibhile inokukunceda kuba icebiso layo ekukudala likho liye lanceda abantu abaninzi abatshatileyo. Ngokomzekelo, khawuqwalasele nje imigaqo emihlanu enokuwenza uphumelele umtshato.a

Izinto Ezintlanu Ezinokuwenza Uphumelele Umtshato

(1) Umtshato wujonge njengomanyano olungcwele. Njengoko amazwi kaYesu acatshulwe ngasekhohlo ebonisa, kuye noMdali uYehova uThixo umtshato lumanyano olungcwele. Oku kubethelelwa yindlela awawaluleka ngokuqatha ngayo uThixo amadoda amandulo awayeqhawula umtshato nabafazi bawo ukuze aye kutshata amabhinqa aselula. UThixo wathi: “Uye wasophula isithembiso owasenza kumfazi owamtshata xa wawuselula. Wayeliqabane lakho, yaye wena usophule isithembiso sakho kuye, nangona wawuthembisile phambi koThixo ukuba uza kuthembeka kuye.” Emva koko uThixo wathetha la mazwi aqatha: “Kuyandicaphukisa ukubona omnye wenu esenza into ekhohlakele ngolo hlobo kumkakhe.” (Malaki 2:14-16, iToday’s English Version) Kucacile ukuba uThixo akawuthathi lula umtshato; uyayibona indlela amadoda nabafazi abaphathana ngayo.

(2) Indoda ifanele ibe nenkathalo. Xa kuvela imicimbi ebalulekileyo entsatsheni, kufanele kubekho umntu oza kwenza isigqibo. IBhayibhile ithi yindoda efanele yenze eso sigqibo. AmaEfese 5:23 athi: “Indoda iyintloko yomfazi wayo.” Kodwa ukuba yintloko kwayo akuthethi kuthi ifanele ibe nguzwilakhe. Indoda ifanele ikhumbule ukuba ‘inyama nye’ kunye nomfazi wayo yaye ifanele imphathe ngembeko ize ibuze izimvo zakhe xa kuvela imibandela edl’ umzi. (1 Petros 3:7) IBhayibhile ithi, “amadoda afanele abathande abafazi bawo njengemizimba yawo.”—Efese 5:28.

(3) Umfazi ufanele ayixhase indoda yakhe. IBhayibhile ithi umfazi “ngumphelelisi” wendoda yakhe. (Genesis 2:18) Xa esenjenjalo, udlala indima ebalulekileyo emtshatweni. Njengomphelelisi wendoda yakhe, akakhuphisani nayo kodwa uyayixhasa, ngaloo ndlela ebangela kubekho uxolo entsatsheni. AmaEfese 5:22 athi: “Abafazi mabathobele amadoda abo.” Kodwa kuthekani ukuba kukho nto ithile angavisisani ngayo nomyeni wakhe? Xa kunjalo ufanele athethe ngembeko, kanye ngendlela ebeya kuthanda ukuba umnyeni wakhe athethe ngayo naye.

(4) Yiba nengqiqo uze uzilindele iingxaki. Amazwi angacingisiswanga kakuhle nahlabayo, iingxaki zemali, ukugula kunye nokukhulisa abantwana kunokubangela iingxaki emtshatweni. Ngenxa yoko, iBhayibhile ithi abo batshatayo “baya kuba nembandezelo enyameni yabo.” (1 Korinte 7:28) Kodwa ke iimbandezelo okanye iingxaki azifanele ziwenze buthathaka umtshato. Eneneni, xa abantu abatshatileyo bethandana yaye benobulumko bobuthixo, banokukwazi ukuzilungisa iingxaki zabo. Ngaba unabo ubulumko obufunekayo ukuze ukwazi ukulungisa iingxaki ezinokuvela entsatsheni yakho? IBhayibhile ithi: “Ukuba kukho nabani na kuni oswele ubulumko, makaqhubeke ebucela kuThixo, kuba unika bonke ngesisa, engangcikivi.”—Yakobi 1:5.

(5) Nyaniseka kwiqabane lakho. Zimbalwa izinto ezonakalisa umtshato njengohenyuzo, okukuphela kwesizathu sokuqhawula umtshato esamkelekileyo kuThixo. (Mateyu 19:9) IBhayibhile ithi: “Umtshato mawubekeke phakathi kwenu nonke, nesilili somtshato masingadyojwa, kuba uThixo uya kubagweba abahenyuzi nabakrexezi.” (Hebhere 13:4) Yintoni enokwenziwa ngabantu abatshatileyo ukuze baphephe isilingo sokufuna ukuzanelisa ngokwesini kunye nomntu abangatshatanga naye? IBhayibhile ithi: “Indoda mayimnike okumfaneleyo umfazi wayo; kodwa nomfazi makenze ngokunjalo endodeni yakhe.”—1 Korinte 7:3, 4.

Abanye basenokuthi, ewe kona mahle la macebiso, kodwa ke aphelelwe lixesha. Kodwa yona imiphumo ichaza into eyahlukileyo. Iyafana naleyo ifunyanwa ngumntu ofuna icebiso likaThixo kubo bonke ubomi bakhe: “Ngokuqinisekileyo uya kuba njengomthi otyalwe ngakwimisinga yamanzi, onika isiqhamo sawo ngexesha lawo nonamahlamvu angabuniyo, yaye konke akwenzayo kuya kuphumelela.” (INdumiso 1:2, 3) Xa kusithiwa ‘konke akwenzayo’ kuquka nokuphumelela emtshatweni.

[Umbhalo osemazantsi]

NGABA WAKHA WAZIBUZA?

● UThixo ulujonga njani uqhawulo-mtshato?—Malaki 2:14-16.

● Indoda ifanele imphathe njani umfazi wayo?—Efese 5:23, 28.

● Bubulumko bukabani obuwenza uphumelele umtshato?—INdumiso 1:2, 3.