Ngaba Adalwa?
Amaphiko Ebhabhathane
● Imibala eqaqambileyo bubuhle obungayiwayo bamanye amabhabhathane iyatshintshatshintsha kuxhomekeka kwindawo olijonga ukuyo. Umbala wolunye uhlobo lwawo uqaqambe kangangokuba unokubonwa kumgama weemitha ezingama-805. Yintoni ebangela wonke lo mmangaliso?
Cinga ngoku: Imikrozo emincinane ekumaphiko ebhabhathane eliluhlala ekuthiwa yiswallowtail (Papilio blumei) ivelisa ukukhanya ngeendlela ezahlukahlukeneyo. Ngokomzekelo embindini wephiko ngalinye kubonakala umbala otyheli bulihlaza, ngoxa emacaleni kubonakala oluhlaza okwesibhakabhaka. Umbala osembindini weli phiko ukhanya ngokuthe ngqo, ngoxa ukukhanya okusemacaleni kuqala kubonakale kwiindawo ezahlukahukeneyo, nto leyo ebonisa ukuba kumana kuvela okanye kuyajikeleza. Umbala wokugqibela xa kusenzeka oku kuthiwa sisiseko sokugqibela ngenxa yokuntsonkotha kwendlela oveliswa ngayo.
Abaphandi kubathathe iminyaka elishumi ngaphambi kokuba bakwazi ukuvelisa into esebenza njengephiko leli bhabhathane. Banethemba lokuba obu bugcisa buya kubanceda ekwenzeni imali engamaphepha namakhadi ecredit ekunzima ukwenza umgunyathi wawo kunye noomatshini abaza kukwazi ngakumbi ukutsala amandla elanga. Noko ke, kusengumnqantsa ukwenza konke oku. UNjingalwazi Ullrich Steiner weZiko Lenzululwazi kwiYunivesithi yaseCambridge uthi: “Phezu kwalo nje ulwazi lwenzululwazi esinalo ngokukhanya, imibala emangalisayo yendalo iya kuhlala ingenakuthelekiswa nako nakuphi na ukukhanya okuveliswa ngobugcisa bethu.”
Ucinga ntoni? Ngaba amaphiko ebhabhathane azivelela? Okanye adalwa?
[Umfanekiso okwiphepha 24]
Ibhabhathane eluluhlaza iswallowtail
[Umfanekiso okwiphepha 24]
Iphiko lebhabhathane xa ulijonge ngemikroskopu
[Inkcazelo Ngemifanekiso ekwiphepha 24]
Butterfly: Faunia, Madrid; microscopic view: © Eye of Science/Photo Researchers, Inc.