Imbalasane EMalawi—IiHolo ZoBukumkani Ezili-1 000!
“ZANGE ndicinge ukuba kuya kuze kwenzeke oku eMalawi,” watsho njalo uAugustine. Wayethetha ngokwakhiwa kweeHolo zoBukumkani ezininzi, njengokuba amaNgqina kaYehova ezibiza njalo iindawo zawo zokunqula. Ngowe-1993, amaNgqina awayengama-30 000 ngoko eMalawi, ilizwe elincinane elikumzantsi-mpuma weAfrika, ayengenazo iindawo ezifanelekileyo zokunqula nokufunda iBhayibhile.
Noko ke, loo meko yahluke gqitha namhlanje. NgoSeptemba 2010 eBlantyre, amaNgqina aseMalawi akha iHolo yoBukumkani yawo yewaka!a Yintoni eyabangela ukuba amaNgqina alapho ade aye kufikelela kuma-30 000 ngaphambi kokuba azakhele iindawo zokunqula? Khona, yintoni eyawanceda akwazi ukwakha iiholo ezili-1 000 kwixesha nje elingephi ngoxa ehlala kwilizwe elihlwempuzekileyo? Le nkqubo imangalisa kangaka yokwakha ibe nawuphi umphumo kumaNgqina nabamelwane bawo?
Amaxesha Anzima
Ekuqaleni kweyee-1900, amaNgqina kaYehova, awayesaziwa ngokuba ngaBafundi BeBhayibhile ngoko, aqalisa ukufundisa inyaniso yeBhayibhile eMalawi. Ngowe-1967, inani lamaNgqina apho lalisele likhule laba malunga ne-17 000. NjengamaKristu enkulungwane yokuqala, ayesaziwa ngokuthobela nokuhlonela amagunya karhulumente. Ukanti, njengaloo maKristu enkulungwane yokuqala, ayengathabathi cala kwezopolitiko.—Yohane 18:36; IZenzo 5:29.
Okubuhlungu kukuba, phakathi kweyee-1960, elo nyathelo lawo lisekelwe eBhayibhileni labangela ukuba angquzulane norhulumente, aza ke ngowe-1967, avalwa umlomo. Zange kube kudala, amaninzi agxothwa ngaphandle kwesizathu emsebenzini, izaphuli-mthetho zathimba okanye zatshabalalisa imizi nempahla yawo. Ngenxa yentshutshiso eqatha noloyiko lokuba abulawe onke, amawaka amaNgqina abalekela kumazwe angabamelwane iMozambique neZambia.
Noko ke, imeko yamaNgqina kaYehova eMalawi yaba bhetele ekugqibeleni, inkoliso yawo yabuyela apho ekuqaleni kweyee-1990. Avuyiswa gqitha yinto yokuba emva kweminyaka engama-26 ephinde amkelwa ngokusemthethweni ngoAgasti 12, 1993! Kodwa ngoku ayeza kujamelana nengxaki entsha. Ekubeni ayefikelela ngaphaya kwama-30 000 kumabandla angama-583, ayengenazo iindawo ezifanelekileyo zokunqula! Ayeza kuthini?
Imbonakaliso Yothando!
Kangangeminyaka emithandathu emva kokuba ekhululekile, amaNgqina alapho enza umsebenzi oncomekayo wokwakha iiHolo zoBukumkani edibanisa ubugcwabalalana awayenabo. Oku kwakungelula kuba ngonyaka inani lawo lalisanda ngaphaya kwenani leeholo zawo. Saba yintoni isicombululo? Kwasetyenziswa umgaqo weBhayibhile okweyesi-2 kwabaseKorinte 8:14. “Ngokulinganisa,” intsalela yemali yamanye amazwe ukuze “ilingane ukuswela” kwamazwe afana neMalawi. Ngenxa yoko, ngowe-1999 iQumrhu Elilawulayo LamaNgqina KaYehova leza nenkqubo entsha eza kunceda kwakhiwe iindawo zokunqula kumazwe angathathi ntweni. Ngenxa yoku ncedo lothando, amaNgqina aseMalawi aye ayikhawulezisa gqitha inkqubo yokwakhiwa kweeHolo zoBukumkani.b
Ngaphambili, amabandla aseMalawi ayeqhubela iintlanganiso zawo zamaKristu ezikolweni, kwimikhukhu, okanye phantsi kwemithi. Ngoku, amabandla ali-1 230 angenela iintlanganiso zawo ukuze anqule yaye afundisise iBhayibhile kwizakhiwo ezifanelekileyo ezinikezelweyo ukuze unqulo oluyinyaniso lutyhalele phambili. Njengoku unokucinga, amaNgqina angaphezu kwama-75 000 eMalawi ayixabisa gqitha inkxaso yabazalwana noodade bawo bokomoya abasehlabathini.
Enye into encede amaNgqina alapho akha iindawo zonqulo ezininzi kangako kwixesha nje elingephi yaba ngumnqweno wawo wokuba neeholo ezingabizi mali ingako ngoxa zisebenza kakuhle. Akazange afune izakhiwo ezingayiwayo. Kodwa ayefuna ezilula, nezinesidima ukuze zizukise uThixo ngoxa ziza kufanelekela ukuqhuba ingxubusho nesifundo seBhayibhile.
Abantu Basekuhlaleni Bayaxhamla
Ngaphambili, amaNgqina kaYehova ayekade egculelwa eMalawi kusithiwa lunqulo olungenazakhiwo zalo. Ngenxa yoko, amanye ayesiba neentloni ukumemela abantu abanomdla kwiintlanganiso zawo. Cinga nje indlela avakalelwa ngayo xa efumene iHolo yoBukumkani yawo entle. Atsho akuvuyela ukumema abamelwane bawo nabantu abanomdla beze kwiintlanganiso zamaKristu. Enyanisweni, komnye ummandla ibandla lamangaliswa kukubona abantu abangama-698 beze kwintlanganiso kwiHolo yoBukumkani eyayisandul’ ukwakhiwa!
AmaNgqina amaninzi nabanye abantu balapho baye bathi zange khe bacinge ukuba baya kuze babe naloo holo inomfaneleko neyakhiwe kakuhle kangako kwindawo yabo. UAugustine, okhankanywe ekuqaleni kweli nqaku, usakhumbula elinye ibandla elalisiba neentlanganiso zalo phantsi komthi. Uthi: “Izinto zazihamba kakuhle xa kungekho mvula. Kodwa ixesha leemvula lalisiza neengxaki!” Ukuba wakha wanethwa kanobom yimvula edlivayo, umele ukuba uyazi kakuhle le nto ayitshoyo.
UAugustine ukhumbula esinye isihlandlo awayetyelele kwiBandla laseChimwanje. Uthi: “Sasiqhuba intlanganiso kwixhobongwana leepali elincinane nelifulelwe ngengca. Noko ke, sasingazi ukuba kwelo phahla lwengca kwakusele kuhlala isigcawu esikhulu nesinetyhefu eyingozi. Kwathi kanye xa ndiphakathi kwintetho yam, sehla saza kuwa ecaleni konyawo lwam! Ndeva ngelungu lebandla elothukileyo sele likhwaza lisithi, ‘Sityumze Augustine, sityumze!’ Nam ke andizange ndibe salibazisa. Yiloo nto ke ndisaphila nangoku.” Ngoku elo bandla lineHolo yoBukumkani entsha, azisekho ezo ziphazamiso.
“Iligugu Ekuhlaleni”
Le nkqubo yokwakhiwa kweeHolo zoBukumkani yaphumela ekubeni amaNgqina kaYehova ahlonelwe kwiindawo ezininzi naziinkosi zezo ndawo, njengokuba la magqabaza alandelayo ebonisa:
✔ “Ukwakhiwa kwendawo entsha yokunqula, kuquka uthando nomanyano oluboniswa ngamaNgqina kaYehova, yeyona nto iligugu ekuhlaleni, nemele ixeliswe zezinye iicawa.”—Inkosi yaseChabwenzi.
✔ “Eyona nto ndiwothulel’ umnqwazi ngayo amaNgqina lumanyano lwawo. Saqalisa ukwakha icawa yethu kwiminyaka elishumi edluleyo, kodwa asikayigqibi nangoku—ibe akukabikho nto ibonisa ukuba siza kuyigqiba. Sithi enkosi ngokwakha isakhiwo esihle kangaka kule ndawo yethu.”—Usibonda welali yaseChigwenembe.
✔ “Kumangalisa gqitha ukubona indlela enisebenza ngayo. Nikhawulezisa gqitha kodwa umsebenzi wenu mhle! Kuyacaca ukuba nimanyene ngokwenene.”—Inkosi yaseChiuzira.
Inkqubo yokwakhiwa kweeHolo zoBukumkani iye yaphawuleka kangangokuba ide yatsala ingqalelo yabanye abahleli besichazi-magama iChichewa/Chinyanja—English Dictionary, esithi ngamaNgqina kaYehova: “AmaNgqina kaYehova aye akha [iiHolo zoBukumkani] ezininzi.”
“Le Holo YoBukumkani Ngummangaliso”
NgoJanuwari 30, 2011, iBandla laseManyowe kwisixeko saseBlantyre elikhankanywe ekuqaleni, lanikezela iHolo yoBukumkani yalo entsha—eyewaka ukwakhiwa eMalawi! Elinye ilungu lelo bandla lathi: “Ukuba nale Holo yoBukumkani ngummangaliso. Ingathi ndiyaphupha.”
Enye intombazana eselula yelo bandla ithi: “Zange ndiphoswe nalusuku olunye xa kusakhiwa le holo. Ndivuya gqitha kuba ndiye ndafaka isandla ekwakhiweni kwendawo efanelekileyo yonqulo kummandla wethu.”
Omnye umdala webandla uthi: “Sisokole gqitha ukufumana imvume yokwakha le Holo yoBukumkani. Izihlandlo eziliqela amagosa esixeko ebesala ukusayina amaphepha-mvume afunekayo. Noko ke, uNksz. Liness Chikaoneka, inenekazi elingusibonda walapha liye labila lisoma ukuze leyisele amagosa ekubeni asayine ezi mpepha.”
Ngenye imini, uNksz. Chikaoneka wada wahamba nomnye umdala ukuze kusayinwe eli phepha-mvume. Wathi kwigosa lalapho: “Ndifuna amaNgqina akhe iHolo yoBukumkani yawo kwindawo yam. Angabantu abalungileyo. Zange khe ndifumane mntu uze kuwamangalela kula nkundla ndikuyo.” Emva koko eli gosa lawasayina la maphepha.
UNksz. Chikaoneka wayevuya engakwazi nokuzibamba mhla kwakunikezelwa loo Holo yoBukumkani. Wathi: “Ndivuya ngendlela engathethekiyo yaye ndivuyiswa gqitha kukubona esi sakhiwo sihle kangaka kwindawo yam!”
Kulo lonke elo laseMalawi, amaNgqina kaYehova nabamelwane bawo ayaqhubeka evakalisa umbulelo ngale nkqubo yokwakhiwa kweeHolo zoBukumkani. Ngenxa yokuzincama nokuzibhokoxa kwawo, eMalawi amaNgqina kaYehova akanayo intswelo engako yeeHolo zoBukumkani njengokuba kwakunjalo ngowe-1993. Yinyaniso ukuba kuseza kuqhubeka kukho imfuneko yokuba akhe iiHolo zoBukumkani ezingakumbi, njengokuba abantu besamkela ‘iindaba ezilungileyo zobukumkani bukaThixo,’ kusekwa namabandla amatsha. (Mateyu 24:14) Ngoko ke, amaNgqina anombulelo ongazenzisiyo ngenkxaso yobubele neminikelo yesisa eyenziwa ngamanye amaNgqina ehlabathini lonke.c
Kodwa ke, oyena mntu anombulelo ngakumbi kuye amaNgqina nguThixo, uYehova. Amazwi awo afana nalowo omdumisi owathi: “Ziya kuza zonke iintlanga ozenzileyo, zize ziqubude phambi kwakho, Yehova, zilizukise negama lakho. Kuba umkhulu yaye wenza izinto ezimangalisayo.”—INdumiso 86:9, 10.
[Imibhalo esemazantsi]
a Ngoku inani leeHolo zoBukumkani apho lingaphaya kwe-1 030.
b Ukususela ngowe-1999, ehlabathini lonke amaNgqina kaYehova aye akha iiHolo zoBukumkani ezingama-23 786 kumazwe ali-151 angathathi ntweni.
c Ehlabathini lonke, umsebenzi wamaNgqina kaYehova uxhaswa ngokupheleleyo neminikelo yokuzithandela.
[Umfanekiso okwiphepha 24]
Ngaphambi kokuba kuqaliswe inkqubo yokwakhiwa kweeHolo zoBukumkani, iintlanganiso zaziqhutyelwa kwiindawo ezifana neli xhobongwane lifulelwe ngengca
[Umfanekiso okwiphepha 24]
Ngoku amabandla ahlanganisana kwiiHolo zoBukumkani ezifana nale