IBhayibhile—Incwadi Yesiprofeto Esichanileyo, Inxalenye 3
“Simfumene UMesiya”
Olu ngcelele luneenxalenye ezisibhozo ‘kuVukani!’ luhlolisisa inkalo ebalaseleyo yeBhayibhile—iziprofeto zayo, okanye izinto eyazichazayo. La manqaku aza kukunceda ufumane iimpendulo zale mibuzo: Ngaba iziprofeto zeBhayibhile zizinto nje ezaziqikelelwa ngabantu abakrelekrele? Ngaba ngokwenene ziphefumlelwe nguThixo? Siyakucela ukuba ukhe uhlolisise obu bungqina.
KWIINKULUNGWANE eziliqela ngaphambi kokuzalwa kukaYesu, abaprofeti abangamaHebhere baxela kwangaphambili ngokuza kukaMesiya, igama lesiHebhere elithetha “uMthanjiswa.” Abo baprofeti babuchaza ngokweenkcukacha ubomi bukaMesiya—nomnombo wakhe—indawo nexesha awayeza kufika ngalo kuquka izinto ezaziza kumehlela.
AmaKristu enkulungwane yokuqala yeXesha Eliqhelekileyo ayekholelwa ukuba ezo ziprofeto zazaliseka kuYesu. Avakalelwa ngendlela efanayo nomfundi uAndreya, owathi kumntakwabo, uSimon: “Simfumene uMesiya.” (Yohane 1:40, 41) Ngaba wayechanile xa esitsho? Makhe siqwalasele iziprofeto ezine kwintaphane yeziprofeto eziphathelele uMesiya, yaye kwimeko nganye siza kunikela ingqalelo kubungqina.
Isiprofeto 1: “Uya kuhlala etroneni yobukumkani kaDavide.”—Isaya 9:7, “Knox.”
Inzaliseko: IVangeli kaMateyu ivula ngala mazwi: “Incwadi yembali kaYesu Kristu, unyana kaDavide, unyana ka-Abraham.” Emva koko uMateyu ulanda umnombo kaYesu aye kuma ngoDavide, njengokuba esenza nombhali weVangeli uLuka.—Mateyu 1:1-16; Luka 3:23-38.
Oko kutyhilwa yimbali:
● Umbhali-mbali ongumYuda uJosephus ubonisa ukuba ingxelo yomnombo wokuzalwa kweentsapho zamaYuda yayifumaneka koovimba bakawonkewonke. Ezo ngxelo zatshatyalaliswa ngowama-70 C.E. xa kwakutshatyalaliswa iYerusalem. Kodwa ngaphambi kokutshatyalaliswa kweYerusalem, lalisele lisaziwa ngokubanzi ibango lokuba uYesu uyinzala kaDavide. (Mateyu 9:27; 20:30; 21:9) Ukuba elo bango lalibubuvuvu, wonk’ umntu wayenokuliphikisa de abeke ubungqina etafileni. Ukanti, akukho ngxelo ibonisa ukuba kukho nabani na owakha wazama ukwenjenjalo.
Isiprofeto 2: “Bhetelehem Efrata, wena umncinane gqitha ukuba ube phakathi kwamawaka akwaYuda, kuwe ndiya kuphunyelwa ngulowo uza kuba ngumlawuli wakwaSirayeli.”—Mika 5:2.
Inzaliseko: UYesu wazalelwa eBhetelehem. Xa uKesare Agasto wakhupha umyalelo wokuba kubalwe abantu, uYosefu, indoda eyakhulisa uYesu njengonyana wayo kwanyanzeleka ukuba emke eNazarete aye “kwelakwaYuda, kwisixeko sikaDavide, esibizwa ngokuba yiBhetelehem, ngenxa yokuba elilungu labendlu nentsapho kaDavide, ukuya kubhalisa kunye noMariya.” Ngoxa belapho, uMariya “wazala unyana wakhe,” uYesu.—Luka 2:1-7.
Oko kutyhilwa yimbali:
● Abembi bezinto zakudala bayangqina ukuba amaRoma ayesiba nobalo lwabantu kuMbindi Mpuma ngenjongo yokuqokelela irhafu nobalo lomkhosi. Ubungqina bolo balo bunokubonwa kumyalelo werhuluneli yaseRoma eyayiseYiputa ngowe-104 C.E. Umbhalo waloo myalelo okhoyo ngoku kwiBritish Library, ufundeka ngolu hlobo: “Ekubeni lifikile ixesha lokubalwa kwabantu emizini yabo, bonke abo bangahlali kwizithili zabo ngenxa yezizathu ezahlukeneyo kufuneka banyanzelwe ukuba babuyele kumakhaya abo, ukuze babalwe nokuze balime amasimi abo.”
● Ngexesha lokuzalwa kukaYesu, kwaSirayeli zazimbini idolophu ezazibizwa ngokuba yiBhetelehem. Enye yayisemantla kufuphi neNazarete. Enye, ekucaca ukuba yayisaziwa ngokuba yiEfrata (okanye iEfratha), yayikufuphi neYerusalem kwaYuda. (Genesis 35:19) Yileyo ke awazalelwa kuyo uYesu kanye njengokuba uMika watshoyo malunga neenkulungwane ezisibhozo ngaphambili.
Isiprofeto 3: “Ukususela ekuphumeni kwelizwi lokuba ibuyiselwe ize yakhiwe kwakhona iYerusalem kude kuse kuMesiya iNkokeli, yoba ziiveki ezisixhenxe, neeveki ezingamashumi amathandathu anesibini.”—Daniyeli 9:25.
Inzaliseko: Ubude beli xesha lichazwe kwisiprofeto sikaDaniyeli liba sisimbuku sama-69 esiphindwe ngeminyaka esi-7, okanye iminyaka engama-483. Umyalelo wokwakhiwa kwakhona kweYerusalem waphuma ngowama-455 B.C.E. Njengokuba kwakuprofetiwe, kwiminyaka engama-483 (iiveki zeminyaka ezingama-69) kamva, ngowama-29 C.E., uYesu waba nguMthanjiswa, okanye uMesiya, xa wabhaptizwayo waza wathanjiswa ngomoya oyingcwele kaThixo.a—Luka 3:21, 22.
Oko kutyhilwa yimbali:
● Ekuqaleni kwenkulungwane yokuqala yeXesha Eliqhelekileyo, “abantu babenolindelo” lokufika kukaMesiya (Luka 3:15) Kwincwadi yakhe ethi A History of Messianic Speculation in Israel, umphengululi ongumYuda uAbba Hillel Silver uthi ngaphambi kokutshatyalaliswa kweYerusalem “wonke umntu wayenethemba lokuba uMesiya uza kufika ngokukhawuleza.” Uphinda achaze ukuba “uMesiya wayelindelwe ukuba afike malunga nekota yesibini yenkulungwane yokuqala ngaphambi kweXesha Eliqhelekileyo.” USilver uthi, olu lindelo lwamaYuda lwalusekelwe “kubalo maxesha lwezinto ezazilindelwe ngabantu belo xesha.”
Isiprofeto 4: “Liya kuba phakathi kwabangendawo ingcwaba lakhe, abe phakathi kodidi lwezityebi ekufeni kwakhe.”—Isaya 53:9.
Inzaliseko: UYesu wabulawa kunye nezaphuli-mthetho ezibini, ukanti ingcwaba lakhe lalikrolwe elityeni lingumnikelo owenziwa ngumlandeli wakhe osisityebi—uYosefu waseArimatiya.—Mateyu 27:38, 57-60; Yohane 19:38.
Oko kutyhilwa yimbali:
● Ababhali abaninzi abangengomaKristu—kuquka umbhali-mbali ongumYuda uJosephus nombhali-mbali ongumRoma uTacitus—bayangqina ukuba uYesu wabulawa njengesaphuli-mthetho.
● Kuphando lokwembiwa kwezinto zakudala olwenziwe ePalestina kuye kwafunyanwa amangcwaba amandulo akrolwe ematyeni. Ukuzilungiselela ingcwaba elinjalo kwakungeyongxaki kumntu osisityebi njengoYosefu waseArimatiya.
Le yimbinana nje kuthotho lweziprofeto eziphathelele uMesiya ezazaliseka kuYesu. Kuyacaca ukuba akukho mntu wayenokwenza inkohliso ngokuzaliseka kwezo ziprofeto zineenkcukacha. Ukuzaliseka kwazo ngokweenkcukacha kuyalomeleza ukholo lwethu lokuba nguThixo owayenguMthombo wazo kwanokuba useza kuzizalisekisa zonke iintsikelelo eziza kuziswa nguMesiya kubantu abathobelayo ezaxelwa kwangaphambili.
Kwinqaku elilandelayo lolu ngcelele, siza kuxubusha ngalo mbuzo ubangel’ umdla: Ukuba uYesu wayenguMesiya othenjisiweyo ngokwenene, kwakutheni ukuze avume ukubandezeleka aze afe?
[Umbhalo osemazantsi]
a Ukuze ufumane inkcazelo engakumbi ngesi siprofeto siphathelele ixesha lokubonakala kukaMesiya, funda iphepha 197-199 lencwadi ethi Yintoni Ngokwenene Efundiswa YiBhayibhile? Epapashwe ngamaNgqina kaYehova.
[Isicangca/Imifanekiso ekwiphepha 22, 23]
(Ukuba ufuna inkcazelo ehlahlelwe kakuhle, yiya kwimpapasho)
AMAXESHA EZIPROFETO EZINE ZIKAMESIYA
1 UMesiya wayeza kuvela kumnombo kaKumkani uDavide
1070 B.C.E.
UDavide uba ngukumkani wawo onke amaSirayeli
607 B.C.E.
IYerusalem itshatyalaliswa yiBhabhiloni
455 B.C.E.
Kukhutshwa umyalelo wokuba ibuyiselwe ize yakhiwe kwakhona iYerusalem
2 UMesiya wayeza kuzalelwa eBhetelehem yakwaYuda
2 B.C.E.
UYesu uyazalwa eBhetelehem yakwaYuda kumnombo wenzala kaDavide
3 UMesiya wayeza kufika kwiminyaka engama-483 emva kokuba kuphume umyalelo wokuba ibuye yakhiwe iYerusalem
29 C.E.
UYesu uyabhaptizwa aze athanjiswe njengoMesiya
4 UYesu wayeza kufa naboni aze angcwatywe nezityebi
33 C.E.
UMesiya ufa nezaphuli-mthetho aze angcwatywe nezinhanha