Ngoobani Endikhangela Kubo Njengomzekelo?

Kweli nqaku uza kufunda

ISIZATHU sokuba ufune abantu abayimizekelo

INDAWO onokubafumana kuyo

INDLELA yokubaxelisa

ISIZATHU SOKUBA UBAFUNE

INYANISO: Umntu udla ngokufana nabantu abathandayo. Oko kusenokuba kuhle—okanye kube kubi—kuxhomekeka kuloo mntu amthandayo.

Into efunekayo: Ngabantu abakufanelekayo ukuxeliswa.—Filipi 3:17.

Ingxaki: Abantu abaninzi bafuna ukuxelisa abantu abaziwayo—iimvumi, abadlali abaphum’ izandla, okanye abadlali beemovie—nokuba abo bantu badume ngokuziphatha okubi.

Cinga ngoku: IBhayibhile ithelekisa ubuntu bethu nesambatho. (Kolose 3:9, 10) Ukuba ufuna ukuthenga impahla yokunxiba, ngaba ubuya kuvumela umthengisi onxibe kakubi akuxelele into omele uyithenge? Kutheni ke uvumela ubuntu bakho buphenjelelwe ngumntu odumileyo oziphethe kakubi? Kunokusuka wenze oko okanye ulandele nje ulandele isininzi, ukukhetha abantu abayimizekelo emihle kuya kukunceda (1) ukhethe iimpawu ofuna ukuba nazo uze (2) uxelise abantu abanezo mpawu.

INDAWO ONOKUBAFUMANA KUYO

Chaza ukuba oku kulandelayo yinyaniso okanye bubuxoki.

1. Umele ufune ukufana nomntu owakha wadibana naye.

□Yinyaniso □Bubuxoki

2. Loo mntu umele angabi nasiphoso.

□Yinyaniso □Bubuxoki

3. Baninzi abantu onokubaxelisa.

□Yinyaniso □Bubuxoki

Impendulo

1. Bubuxoki. Imizekelo yabantu onokubaxelisa ungade uyikhethe nakubantu bamandulo. Eyona mizekelo mihle yileyo iseBhayibhileni. Ngokomzekelo, xa ufunda isahluko 11 sencwadi yamaHebhere, ufumana amagama amadoda nabafazi abali-16 umpostile uPawulos awathi bafanele ukuxeliswa. Eyona nto ibalulekileyo, kwisahluko esilandelayo uPawulos wabongoza amaKristu ukuba ‘akhangele ngenyameko’ kuYesu aze amlandele. (Hebhere 12:2) UYesu ngowona mzekelo simele siwuxelise.—Yohane 13:15.a

2. Bubuxoki. Ngaphandle kukaYesu, uAdam wayengenayo inzala efezekileyo. (Roma 3:23) Kwanomprofeti uEliya owayenesibindi “wayengumntu ofana nathi.” (Yakobi 5:17, iContemporary English Version) Wayenjalo noMiriyam, uDavide, uYona, uMarta noPetros. IBhayibhile izichaza phandle iimpazamo zaloo madoda namabhinqa. Sekunjalo, ayeyimizekelo emihle kwiinkalo ezininzi zobomi, ngoko afanele axeliswe.

3. Yinyaniso. Unokuxelisa abantu abayimizekelo emihle abaninzi kangangoko ufuna. Omnye usenokuba ngumntu okhutheleyo, ngoxa omnye esenokuba nomonde. Mhlawumbi omnye akatyhafi nokuba ujamelene neengxaki. (1 Korinte 12:28; Efese 4:11, 12) Ukuba ukhangela iimpawu ezintle kwabanye, uya kuzifumana ezo zifanele ukuxeliswa.—Filipi 2:3.

INDLELA YOKUBAXELISA

1. Qwalasela abantu obaxelisayo. Umpostile uPawulos waxelela amaKristu enkulungwane yokuqala oku: “Fundani ngokuqwalasela abo baphila ngendlela esanibonisa yona.”—Filipi 3:17, iHoly Bible—Easy-to-Read Version.

2. Qhelana nabo. Ukuba kunokwenzeka, chitha ixesha nabo ukhethe ukubaxelisa. IBhayibhile ithi: “Ohamba nezilumko uya kuba sisilumko naye.”—IMizekeliso 13:20.

3. Cinga ngeempawu ezintle zomntu omxelisayo. AmaHebhere 13:7 athi: “Njengoko nisondela impumelelo yehambo yabo xelisani ukholo lwabo.”

Sele ukulungele ukuqalisa? Bhala indlela oceba ukumxelisa ngayo umntu ongumzekelo omhle apha ngezantsi.

Oko Ndiceba Ukukwenza

Khetha uphawu onqwenela ukuba nalo. (Ngaba ungathanda ukuba ngumntu wabantu? ukuba nobubele? ngokhutheleyo? ngonyamezelayo? ukuba ngumntu onokuthenjwa?)

․․․․․

Khetha umntu oneempawu ongathanda ukuba nazo.b

․․․․․

Xa ukhetha umntu onokumxelisa, akufuni kuba nguye. Useza kuqhubeka uneempawu zakho ezintle. Sekunjalo, ukuxelisa abantu abayimizekelo emihle kuya kukunceda ukhule uneempawu ezintle ngakumbi. Ngaphezu koko, ukulandela imizekelo emihle kuya kubangela ukuba kubekho nabanye abafuna ukufana nawe.

Amanye amanqaku athi“Abantu Abaselula Bayabuza” afumaneka kwiWebhsayithi ethi www.watchtower.org/ype

[Imibhalo esemazantsi]

[Amagama acatshulweyo akwiphepha 21]

Kutheni ke uvuma ukuba ubuntu bakho buphenjelelwe ngumntu odumileyo oziphethe kakubi?

[Ibhokisi/Imifanekiso ekwiphepha 22, 23]

OKO KUTHETHWA LOLUNYE ULUTSHA

ULayla—Umhlobo wam uSandra ujonga izinto ngendlela efanelekileyo. IBhayibhile uyazi kakuhle. Ngenxa yoko, usoloko eyazi indlela yokucombulula iingxaki. Ndinokuzityand’ igila kuye naninina xa ndineengxaki, nokuba zinkulu okanye zincinane.

UTerrence—Abahlobo bam, uKyle noDavid bazikhathelele iimvakalelo zabanye. Basoloko bekulungele ukunceda abantu abaneengxaki, ngoxa ezabo izinto zisiza kamva. Ndibajonga njengomzekelo omhle.

UEmmaline—Umama ndimgqala njengomzekelo omhle kum. Uyayazi kakuhle iBhayibhile yakhe, kwaye usoloko ekhangela amathuba okuthetha nabanye ngokholo lwakhe. Ukholelwa ukuba umsebenzi wokushumayela lilungelo elixabisekileyo, awuyondinisa. Ndimthanda kakhulu ngenxa yoko!

[Ibhokisi ekwiphepha 23]

FUNDA OKUNGAKUMBI!

Ngaba ufuna uncedo lokufumana abantu abayimizekelo emihle? Funda amaHebhere isahluko 11 uze ukhethe indoda okanye ibhinqa elichazwe kwesi sahluko. Qalisa ukufunda ngaloo mntu uneempawu ofuna ukuzixelisa.

Usenokufumana abantu abaninzi abayimizekelo ekuthethwe ngabo eBhayibhileni kuMqulu woku-1 nowe-2 kwincwadi ethi Imibuzo Yabantu Abaselula—Iimpendulo Eziluncedo, epapashwe ngamaNgqina kaYehova. Khangela umxholo othi “Isalathiso Semizekelo Yokuxeliswa” kwiqweqwe elingaphakathi lencwadi nganye.

[Ibhokisi ekwiphepha 23]

KUTHENI UNGABUZI ABAZALI BAKHO?

Buza abazali bakho ukuba ngoobani ababeyimizekelo emihle kubo xa babelingana nawe kuquka imizekelo yabo ekhoyo ngoku. Kubancede njani ukuba nemizekelo ebomini?