IBhayibhile—Incwadi Yesiprofeto Esichanileyo, Inxalenye 8

SEYINGAMAWAKA amabini eminyaka, abo bathi bangamaKristu bethandazela uBukumkani bukaThixo ukuba bufike. Oku kusekelwe kumazwi kaYesu. Wafundisa abafundi bakhe ukuba bathandaze bathi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.”—Mateyu 6:10.

Buyintoni obu Bukumkani buthandazelwa ngabantu abaninzi kangaka? Ngurhulumente wasezulwini kaThixo, oza kulawula esikhundleni sabo bonke oorhulumente abakhoyo. Ekubeni ebekwe ukuba abe nguKumkani wobu Bukumkani, uYesu Kristu uphumeza ukuthanda kukaThixo ezulwini nasemhlabeni. (Daniyeli 2:44; 7:13, 14) Ngexesha elifanelekileyo, uThixo uza kuphendula lo mthandazo ngokuphelisa ubungendawo nokubandezeleka aze asindise ‘isihlwele esikhulu’ esingenakubalwa sabakhonzi abathembekileyo. (ISityhilelo 7:9, 10, 13-17) Emva koko, “amalungisa aya kuwudla ilifa umhlaba, ahlale kuwo ngonaphakade.”—INdumiso 37:29.

Ngaba ikho indlela esinokwazi ngayo ukuba kuza kuba njani xa kulawula uKristu? Ewe, ikho! Xa uYesu wayelapha emhlabeni, wasibonisa ukuba unomnqweno yaye uyakwazi ukunceda abantu kwiingxaki zabo. Makhe sihlolisise iziprofeto ezine zeBhayibhile size sibone indlela uYesu awabonisa ngayo oko aza kukwenza emhlabeni wonke xa enguKumkani woBukumkani bukaThixo basezulwini.

Isiprofeto 1:

‘UYehova uphelisa iimfazwe kuse esiphelweni somhlaba. Waphula isaphetha nomkhonto; iinqwelo uzitshisa emlilweni.’—INdumiso 46:8, 9.

Inzaliseko: UYesu Kristu, “iNkosana yoXolo,” uza kuzisa uxolo emhlabeni ngonaphakade. Ngenkqubo yokufundisa abantu uxolo nokubeka phantsi izixhobo ehlabathini, uBukumkani bukaThixo buya kumanyanisa lonke uluntu kubuzalwana bokwenene bazwenibanzi.—Isaya 2:2-4; 9:6, 7; 11:9.

Oko kutyhilwa yimbali:

UYesu wafundisa abalandeli bakhe ukuba, bangalwi, kodwa bahlale ngoxolo nabanye. Xa omnye umfundi wakhe wazama ukumkhusela ngekrele, uYesu wathi kuye: “Buyisela ikrele lakho endaweni yalo, kuba bonke abathabatha ikrele baya kutshabalala ngekrele.” (Mateyu 26:51, 52) UYesu wathi amaKristu okwenyaniso ayeya kubonwa ngokuthandana kwawo.—Yohane 13:34, 35.

Isiprofeto 2:

“Kuya kubakho ukudla okuziinkozo okuninzi emhlabeni; encotsheni yeentaba kuya kubakho ukuphuphuma.”—INdumiso 72:16.

Inzaliseko: UBukumkani bukaThixo buya kuphelisa ukungondleki, ukunqongophala kokutya, nendlala. Wonke ubani uya kuba nentabalala yokutya okulungileyo.

Oko kutyhilwa yimbali:

Lwabonakala uvelwano lukaYesu ngabantu abalambileyo, namandla akhe angummangaliso okondla izihlwele zabantu. Omnye umntu owayebona oko uthi: “[UYesu] wayalela izihlwele ukuba zingqendeve engceni, wazithabatha izonka ezo ezihlanu neentlanzi ezimbini, wakhangela phezulu ezulwini, wacela intsikelelo, waza akuba eziqhekezile izonka, wazabela abafundi, abafundi bona bazabela izihlwele. Ngoko bonke badla banela, kwaza kwakuqokelelwa amaqhekeza aseleyo, azalisa iingobozi ezilishumi elinesibini. Ukanti abo babesidla yayingamadoda amalunga namawaka amahlanu, ngaphandle kwabafazi nabantwana abaselula.”—Mateyu 14:14, 19-21.

Isiprofeto 3:

“Akakho ummi wakhona oya kuthi: ‘Ndiyagula.’” (Isaya 33:24) “Aya kuvulwa amehlo eemfama, zivulwe neendlebe zezithulu. Isiqhwala siya kutsiba njengexhama, nolwimi lwesimumu luya kumemelela ngochulumanco.”—Isaya 35:5, 6.

Inzaliseko: UBukumkani bukaThixo buya kususa lonke uhlobo lwezigulo nobulwelwe. Iimfama ziya kubona, izithulu zive zize zithethe. Akakho umntu oya kuze afune unyango, isibhedlele, okanye oogqirha.

Oko kutyhilwa yimbali:

Xa uYesu wayefundisa abantu ngoBukumkani bukaThixo, waphilisa zonke izigulo neziphene ababenazo. Ngomlinganiselo omncinane, uYesu wabonisa oko aza kukwenza emhlabeni wonke xa enguKumkani woBukumkani bukaThixo basezulwini.—Luka 7:22; 9:11.

Isiprofeto 4:

UThixo “okunene uya kuginya ukufa ngonaphakade.”—Isaya 25:8.

Inzaliseko: Xa sele uKristu enguKumkani woBukumkani bukaThixo, ‘abo basemangcwabeni’ baya kuvuswa baze baphile kumhlaba oyiparadesi. (Yohane 5:28, 29) UYesu uya kutshayela ukufa, olona tshaba lwethu lungenalusini, size siphile ngonaphakade.—INdumiso 37:29.

Oko kutyhilwa yimbali:

Ubuncinane kwizihlandlo ezithathu, uYesu wabonisa amandla akhe ngokuvusa abafileyo. (Luka 7:11-15; 8:41-55; Yohane 11:38-44) Emva kokuba efile, malunga nama-500 abantu azibonela ukuba uvusiwe ekufeni.—1 Korinte 15:3-8.

Olu ngcelele luneenxalenye ezisibhozo luye lwaxubusha ngeziprofeto zeBhayibhile eziliqela eziye zazaliseka. Zonke ezo ziprofeto, kuquka ezinye ezininzi, zibonisa ukuba iBhayibhile ayizongcamango nje zabantu abakrelekrele. Kunoko, inikela ubungqina bokuba iphefumlelwe nguThixo. Ngaphandle kwamathandabuzo “yonke into eseZibhalweni iliLizwi likaThixo.”—2 Timoti 3:16, Contemporary English Version.

Ekubeni iBhayibhile iyincwadi yesiprofeto esichanileyo, unezizathu ezivakalayo zokukholelwa ukuba “kusele ithutyana, angabikho ongendawo; uya kuyikhangela indawo yakhe, abe engekho. Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”—INdumiso 37:10, 11.