Kutheni Kubalulekile Ukwazi Ukuba Ukhona UMdali?

Kutheni ibalulekile into yokwazi ukuba ukhona nyhani na uMdali? Ukuba ubungqina obukhoyo bukwenza ukholelwe ukuba ukhona uThixo ongusomandla, mhlawumbi uza kufuna ukucingisisa nangobungqina obubonisa ukuba iBhayibhile yabhalwa nguye. Ibe xa uyikholelwa into ethethwa yiBhayibhile, uza kuncedakala ngezi ndlela zilandelayo.

Uza konwabela ngakumbi ukuphila

IBHAYIBHILE ITHI: ‘UThixo wenza into entle ngokuninika iimvula ezivela ezulwini nezivuno, ngokuninika ukutya okwaneleyo nokuqinisekisa ukuba niyonwaba.’—IZenzo 14:17.

INTO ETHETHWA SESI SIBHALO: Yonke into oyonwabelayo emhlabeni isisipho esivela kuMdali. Okukhona usiya uyazi indlela akukhathalele ngayo lo mntu ukupha ezi zipho, kokukhona nawe uza kuya uzixabisa nangakumbi.

Uza kufumana amacebiso anokukunceda ngoku

IBHAYIBHILE ITHI: “Uza kutsho ubuqonde ubulungisa, okusesikweni nokungakhethi buso, uyiqonde ngokupheleleyo into elungileyo.”—IMizekeliso 2:9.

INTO ETHETHWA SESI SIBHALO: NjengoMdali wakho, uThixo uyayazi into oyidingayo ukuze wonwabe. Xa ufunda iBhayibhile, uza kufunda izinto ezininzi eziza kukunceda ebomini.

Uza kufumana iimpendulo zemibuzo yakho

IBHAYIBHILE ITHI: “Utsho umazi uThixo.”—IMizekeliso 2:5.

INTO ETHETHWA SESI SIBHALO: Xa usazi ukuba ukhona uMdali, uza kutsho ukwazi ukufumana iimpendulo zeyona mibuzo ibalulekileyo. Eminye ifana nale ithi: Yintoni injongo yobomi? Kutheni kukho abantu abaninzi abehlelwa zizinto ezibuhlungu? Kwenzeka ntoni kuthi xa sisweleka? Unokufumana iimpendulo ezanelisayo eBhayibhileni.

Unokuba nethemba ngekamva

IBHAYIBHILE ITHI: “‘Kuba mna ndizazi kakuhle izinto endizicingayo ngani,’ utsho uYehova, ‘ndicinga ngoxolo, kungekhona intlekele, ukuze ndininike ithemba nekamva.’”—Yeremiya 29:11.

INTO ETHETHWA SESI SIBHALO: Kwixesha elizayo uThixo uthembisa ukuba uza kuphelisa izinto ezimbi, izinto ezibuhlungu ezehlela abantu, nkqu nokufa. Ukuba uyazikholelwa izinto uThixo azithembisayo, ithemba onalo liza kukunceda ukwazi ukuba nesibindi xa uneengxaki.

INDLELA EKUBANCEDE NGAYO ABANYE UKUKHOLELWA KUMDALI

“Isoloko indimangaza into yokubona indlela uThixo akwazi ukusinceda ngayo kwizinto ezininzi ebomini. Usinceda sizazi ezona zinto zibalulekileyo, sikwazi ukuvana nabanye size sikwazi nokuba ngabahlobo bakhe.”—UCyndi, waseU.S.A.

“Ukukholelwa kuMdali kwenza ubomi bam bube nenjongo buze bubangele umdla kuba azipheli izinto ezintle endinokucinga ngazo. Kusoloko kukho into entsha endinokuyifunda ngaye nangelizwi lakhe iBhayibhile.”—UElise, waseFrance.

“Ukwenza izinto uMdali wethu asifundisa zona eBhayibhileni kundenza ndonwabe nangakumbi. Kundinceda ndingakhawulezi ndigwebe, ndibe neliso elibukhali, ndize ndaneliseke zizinto endinazo. Kuye kwakwazi nokundinceda ukuba ndibe ngutata obhetele.”—UPeter, waseNetherlands.

“Ngaphambi kokuba ndifunde ngoThixo, ubomi bam babuphelele ekubeni nditye, ndilale, ndize ndifike emsebenzini ngexesha. Ndandingabonwabeli tu ubomi! Ngoku ubomi ndibujonga njengesipho—ekufuneka sisixabise.”—ULiz, waseEstonia.

“Ndingumntu ohleli nje unexhala. Kodwa ndiye ndikwazi ukunyamezela kuba ndiyayazi ukuba izinto ezimbi, ukungabikho kobulungisa, nokuhlupheka kuza kuphela.”—UAdrien, waseFrance.