IHLABATHI ELIGCWELE UBUBI

4 | Khusela Ithemba Onalo

KUTHENI KUBALULEKILE?

Amaxhala eli hlabathi ligcwele ububi anokusichaphazela ngokwasemzimbeni nangokweemvakalelo. Abantu abachatshazelwe zezi meko ababoni ukuba ezi meko zingaze ziphinde zitshintshe. Bajamelana njani nazo?

Abanye abafuni nokucinga ngekamva.
Abanye babaleka amaxhala abo ngokusebenzisa utywala neziyobisi.
Abanye bathi ukufa kubhetele kunokuphila. Abanye bathi xa bezibuza: “Ndisaphilela ntoni?”

Into Omele Uyazi

Ezinye zeengxaki onazo zisenokuba zezokwexeshana yaye zinokutshintsha zibe bhetele ungalindelanga.
Nokuba iimeko zakho azitshintshi, zikhona izinto onokuzenza ukuze unyamezele.
IBhayibhile inesithembiso sokuphelisa iingxaki zabantu ngokupheleleyo.

Into Onokuyenza Ngoku

IBhayibhile ithi: “Ningaze nixhalele ingomso, kuba ingomso liza kuba namaxhala alo. Usuku ngalunye luneengxaki ezilulingeneyo.”—Mateyu 6:34.

Jongana nosuku ngalunye. Sukuba nexhala kakhulu ngekamva ude ungakwazi ukwenza izinto ekufuneka uzenze ngoku.

Ukuzixhalabisa ngezinto ezimbi ezisenokwenzeka kuza kongeza kwistres onaso ize loo nto iphelise ithemba onalo ngekamva.

INDLELA YOKUMELANA NALE NTO—Amacebiso Aluncedo

JONGA IZINTO EZINTLE

IBhayibhile ithi: “Yonke imihla yomntu osentlungwini mibi, kodwa onentliziyo evuyayo uhlala enetheko.” (IMizekeliso 15:15) Ukuba usoloko ujonge ingxaki kakhulu, usenokude ungaboni ukuba uncedo lukhona. Kodwa, ukucinga ngezinto ezintle kunokukunceda ukwazi ukubona indlela yokulungisa iingxaki onazo.

Ligade ixesha olichitha ubukele iindaba.
Xa kuphela usuku, cinga ngezinto eziyi-2 okanye eziyi-3 onombulelo ngazo.
Bhala phantsi izinto ofuna ukuzenza ngosuku. Xa unomsebenzi omninzi wenze kancinci kancinci ukuze xa kuphela usuku ubone umsebenzi owenzileyo.

FUMANA ABANTU ABAZOKUNCEDA

IBhayibhile ithi: “Nabani na ozikhethayo ebantwini. . . ufulathela bonke ubulumko.” (IMizekeliso 18:1) Awunokwazi ukuziphumela kwingxaki enzima wedwa, kufuneka kubekho abantu abakuncedayo.

Cela abantu abakwintsapho yakho okanye abahlobo bakho ukuba bakuncede.
Nawe khangela iindlela onokunceda bona ngazo. Xa usenzela abanye izinto, awuzokucinga kakhulu ngezakho iingxaki.
Ukuba awunathemba, futhi awusasiboni nesizathu sokuba uqhubeke uphila, mhlawumbi ungaya kwagqirha. Kaloku ukuziva ngoluhlobo kusenokubonisa ukuba unesinye isigulo esifana nedepression. Abantu abaninzi baye bancedakala emva kokuba benyangiwe.a

a UVukani! akazami ukukhuthaza uhlobo oluthile lonyango.

IBhayibhile Isinika Ithemba Lokwenene

Umdumisi wakudala wathi xa ethandaza kuThixo “Ilizwi lakho lisisibane ezinyaweni zam, nokukhanya endleleni yam.” (INdumiso 119:105) Jonga indlela iLizwi likaThixo eliyiBhayibhile elinjalo ngayo.

Xa kumnyama ebusuku isibane siyasinceda sibone ukuba simele sihambe phi. Ngokufanayo, iBhayibhile inamacebiso obulumko anokusinceda xa kufuneka senze izigqibo ezinzima.

Isibane sinokukhanyisa endleleni esihamba kuyo ukuze sikwazi ukubona kude. Ngendlela efanayo, iBhayibhile inokusibonisa ithemba ngekamva.

IBhayibhile yincwadi engcwele engachazi kuphela ukuba sivela phi kodwa ethetha nangethemba lekamva. Ithi xa iphendula le mibuzo:

Njani?

Izinto ezibuhlungu zaqala njani? IBhayibhile ithi: “Isono sangena ngomntu omnye ehlabathini, nokufa kwangena ngenxa yesono, kwaza ukufa kwasasazeka kubo bonke abantu ngenxa yokuba bonke babenesono.”—Roma 5:12.

Kutheni?

Kutheni abantu bengakwazanga ukulungisa iingxaki zethu? IBhayibhile ithi: “umntu ohambayo akanalo kwaigunya lokwalathisa inyathelo lakhe.” (Yeremiya 10:23) Iingxaki ezikhoyo emhlabeni zibubungqina bokuba le vesi ithetha inyani.

Yintoni?

Yintoni aza kuyenza uThixo ukuze alungise le ngxaki? IBhayibhile ithi: “uza kuzosula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu.”—ISityhilelo 21:4.