UNGAMELANA NJANI NOKUNYUKA KWAMAXABISO?
Yiba Ngumntu Ophayo
Xa kunzima ukuthenga izinto ozidingayo ngenxa yokuba duru kwezinto, loo nto isenokwenza ucinge ukuba awunakwazi ukupha abantu izinto. Kodwa ke, unokufumanisa ukuba ukupha abanye kungakunceda ukwazi ukumelana neengxaki zemali. Ungakwazi ukonga imali nangona uqhubeka usipha abanye abantu.
KUTHENI KUBALULEKILE UKUPHA?
Siye sivuye size sizive kamnandi xa sisipha nokuba incinci kangakanani na into esibapha yona abanye. Uphando lubonisa ukuba ukupha kungasinceda sihlale siphilile ngokwasemzimbeni nangokwasengqondweni. Ngokomzekelo, ukupha kungakunceda wehlise amaxhala, istres, i-blood pressure nokuba buhlungu kwamalungu athile omzimba. Kungakunceda ulale kakuhle.
Xa sinceda abanye abantu ngemali okanye ngezinye iindlela, kuza kuba lula ukwamkela uncedo lwabo xa siludinga. UHoward ohlala eNgilani uthi: “Mna nomfazi wam siye sikhangele iindlela ezahlukeneyo zokupha nokunceda abanye, xa sisenza loo nto asiye sizive singumthwalo xa isithi abadinga uncedo.” Ewe kona, abantu abathanda ukupha, abaphi kuba nabo belindele ukuphiwa. Kodwa ke, banokufumana abahlobo abanokubanceda xa beneengxaki.
INTO ONOKUYENZA
Yipha abanye le nto unayo. Nokuba awunazinto zininzi ungakwazi ukupha abantu, akunyanzelekanga ukuba wenze into enkulu xa ubamemile. UDuncan nentsapho yakhe, abahlala eUganda, bayasokola kodwa bayathanda ukupha abanye. UDuncan uthi: “NgeeCawa mna nenkosikazi siye simeme umntu ekhayeni lethu, ukuze azokutya nathi isidlo nje esilula. Siyakuthanda ukuchitha ixesha nabanye.”
Kakade ke, xa usipha akufunekanga ubaxe ide intsapho yakho ingazifumani izinto ezidingayo. —Yobhi 17:5.
Khawuzame le nto: Yipha umntu into nje encinci etyiwayo okanye into eselwayo. Ukuba unezinto ongasazisebenzisiyo, kutheni ungaziniki abantu ezinokubanceda nabanokuzixabisa, abanjengabahlobo okanye abamelwane?
Yipha nangezinye iindlela. Ezinye izipho azidingi nesenti emdaka ukuze uzithenge. Ngokomzekelo, singasebenzisa ixesha lethu ukuze sincede abanye, ngaloo ndlela sibabonisa ukuba sibakhathalele. Baxelele ukuba uyabaxabisa ibe uyabathanda, loo mazwi othando azakufana nesipho kubo.
Khawuzame le nto: Nceda abanye ngemisebenzi yasendlini, balungiselele izinto zasendlini ezifuna ukulungiswa, okanye ubayele ezivenkileni. Ungabhalela umhlobo wakho ikhadi okanye umthumelele umyalezo ngefowni, nokuba umchazela nje ukuba ucinga ngaye.
Xa ukhangela amathuba okubonisa ububele uza konwaba kakhulu.