AmaKristu Neli Gama

AKUKHO mntu unokutsho ngokuchanileyo ukuba amaYuda asabambelele kwisithethe akuyeka nini na kanye kanye ukulibiza ngokuvakalayo igama likaThixo aza kunoko alithabathel’ indawo ngamagama esiHebhere elithi Thixo nelithi Nkosi enguMongami. Bambi bakholelwa kwelokuba igama likaThixo layekwa ukusetyenziswa kwimihla ngemihla kude ngaphambi kwexesha likaYesu. Kodwa kukho ubungqina obunamandla bokuba umbingeleli omkhulu waqhubeka elibiza kwinkonzo yonqulo etempileni—ingakumbi ngomhla Wocamagushelo—kwada kwasekudilizweni kwetempile ngowama-70 C.E. Ngenxa yoko, xa uYesu wayesemhlabeni, indlela yokubizwa kweli gama yayisaziwa, nangona mhlawumbi yayingasetyenziswa ngokubanzi.

Kutheni le nto amaYuda akuyekayo ukulibiza igama likaThixo? Mhlawumbi, ebuncinaneni, ngokuyinxenye kwakungenxa yokuwasebenzisa phosakeleyo amazwi omthetho wesithathu athi: “Uze ungafumane ulibize igama likaYehova uThixo wakho.” (Eksodus 20:7) Kakade ke, lo mthetho wawungakwaleli ukusetyenziswa kwegama likaThixo. Ukuba wawukwalela, kwakutheni ukuze abakhonzi bakaThixo bamandulo abanjengoDavide balisebenzise ngokukhululeke kangaka baze sekunjalo banandiphe iintsikelelo ezivela kuYehova? Yaye kwakutheni ukuze uThixo alivakalise kuMoses aze amxelele uMoses ukuba acacisele amaSirayeli ukuba wayethunywe ngubani na?—INdumiso 18:1-3, 6, 13; Eksodus 6:2-8.

Sekunjalo, ngexesha likaYesu kwakukho utyekelo olunamandla lokuthabatha imithetho kaThixo esengqiqweni ize ichazwe ngendlela engekho ngqiqweni kunene. Ngokomzekelo, owesine kwiMithetho Elishumi wayalela amaYuda ukuba agcine umhla wesixhenxe weveki nganye njengosuku lokuphumla, iSabatha. (Eksodus 20:8-11) AmaYuda abambelele emthethweni awusebenzisa lo myalelo ngokugabadele gqitha, esenza imithetho engenakubalwa elawula kwanesona senzo sincinane esasinokwenziwa okanye esasingenakwenziwa ngeSabatha. Ngokungathandabuzekiyo kwakukwangesimo sengqondo esikwasinye awathi athabatha umyalelo osengqiqweni, wokuba igama likaThixo lingaphathwa ngokungenambeko, awusa kwinqanaba eligabadeleyo, esithi elo gama akufanele nokuba libizwe.a

UYesu Neli Gama

Ngaba uYesu wayeya kulandela isithethe esingesosasibhalo ngolo hlobo? Nakanye! Akazange arhoxobise ekwenzeni imisebenzi yokuphilisa ngeSabatha, nakubeni oku kwakuthetha ukwaphula imithetho eyenziwe ngabantu eyiyeyamaYuda yaye ebeka esichengeni ubomi bakhe. (Mateyu 12:9-14) Enyanisweni, uYesu wabagweba abaFarisi njengabahanahanisi kuba izithethe zabo zazidlulela ngaphaya kweLizwi likaThixo eliphefumlelweyo. (Mateyu 15:1-9) Ngenxa yoko, akunakufane kwenzeke ukuba warhoxobisa ekulibizeni igama likaThixo, ingakumbi ngenxa yesibakala sokuba igama lakhe buqu elithi Yesu lalithetha ukuthi “UYehova Ulusindiso.”

Ngesinye isihlandlo, uYesu wema kwindlu yesikhungu waza wafunda inxalenye yomsongo kaIsaya. Elo candelo walifundayo koko namhlanje sikubiza ngokuba nguIsaya 61:1, 2, apho igama likaThixo livela izihlandlo ezininzi. (Luka 4:16-21) Ngaba ngewayengazange avume ukulibiza igama likaThixo apho, elithabathel’ indawo ngelithi “Nkosi” okanye “Thixo”? Kakade wayengenakwenjenjalo. Oko ngekwakuthethe ukulandela isithethe esingesosazibhalo seenkokeli zonqulo zamaYuda. Kunoko, sifunda ukuba: “Ebezifundisa njengonegunya, engafundisi njengabo ababhali.”—Mateyu 7:29.

Enyanisweni, njengoko sesifundile ngaphambilana, wafundisa abalandeli bakhe ukuba bathandaze kuThixo bathi: “Malingcwaliswe igama lakho.” (Mateyu 6:9) Yaye xa wayethandaza ngobusuku bangaphambi kokubulawa kwakhe, wathi kuYise: “Ndilibonakalisile igama lakho kubo abantu obundinike bona, bephuma ehlabathini . . . Bawo oyingcwele, balondolozele egameni lakho abo undinike bona.”—Yohane 17:6, 11.

Ibhekisela ekukhankanyeni kukaYesu igama likaThixo, incwadi ethi Der Name Gottes (The Name of God) icacisa isithi kwiphepha 76: “Imbono engokuzityhila kukaThixo ekwiTestamente Endala nekwakukudala ikho, simele siyiqonde njengesibakala esimangalisayo sokutyhilwa kwegama lakhe yaye oku kutyhutyha ukuya kutsho kwiinxalenye zokugqibela zeTestamente Endala, ewe, kuyaqhubeka ukuya kutsho nakwiinxalenye zokugqibela zeTestamente Entsha, apho, ngokomzekelo kuYohane 17:6 sifunda oku: ‘Ndilibonakalisile igama lakho.’”

Ewe, bekuya kuba kokungekho ngqiqweni ngenene ukucinga ukuba uYesu warhoxobisa ekusebenziseni igama likaThixo, ingakumbi xa wayecaphula kwezo ndawo zeZibhalo zesiHebhere ezazinalo.

AmaKristu Angaphambili

Ngaba abalandeli bakaYesu kwinkulungwane yokuqala babelisebenzisa igama likaThixo? Babeyalelwe nguYesu ukuba benze abantu bazo zonke iintlanga babe ngabafundi. (Mateyu 28:19, 20) Uninzi lwabantu ababemelwe bashunyayezwe babengenalwazi ngoThixo owayezityhile ngokwakhe kumaYuda ngegama lokuba unguYehova. AmaKristu ayeza kukwazi njani ukumchaza uThixo oyinyaniso kubo? Ngaba kwakuya kwanela ukumbiza ngokuthi Thixo okanye Nkosi? Hayi. Iintlanga zazinoothixo neenkosi zazo. (1 Korinte 8:5) AmaKristu ngewayewenze njani umahluko ocacileyo ophakathi koThixo oyinyaniso nabangabobuxoki? Kuphela kungokusebenzisa igama likaThixo oyinyaniso.

Kungoko ke umfundi uYakobi wathi ebudeni bentlanganiso yabadala eYerusalem: “USimon lo ukucacisile ukuba wathini na ekuqaleni uThixo ukuzivelela iintlanga, ukuba kuzo alinyulele abantu elakhe igama. Ayavumelana nako oko amazwi abaprofeti.” (IZenzo 15:14, 15) Umpostile uPetros, kwintetho yakhe eyaziwa kunene eyayingomhla wePentekoste, waphuhlisa inxalenye ebalulekileyo yesigidimi samaKristu xa wacaphula amazwi omprofeti uYoweli esithi: “Bonke abaya kubiza egameni LIKAYEHOVA bosindiswa.”—Yoweli 2:32; IZenzo 2:21, Inguqulelo yesiXhosa ka-Appleyard.

Umpostile uPawulos akashiyi mathandabuzo ngokubaluleka kwegama likaThixo kuye. Kwincwadi yakhe eya kwabaseRoma, ucaphula kwala mazwi manye omprofeti uYoweli aze ahlabele mgama ekhuthaza amaKristu angoowabo ukuba abonakalise ukholo lwawo kuloo mazwi ngokuphuma aye kushumayela ngegama likaThixo kwabanye khon’ ukuze nabo aba babe bangasindiswa. (Roma 10:13-15) Kamva wabhala wathi kwileta yakhe eya kuTimoti: “Mabasuke kuko ukungalungisi, bonke abalibizayo igama [likaYehova, NW].” (2 Timoti 2:19) Ngasekupheleni kwenkulungwane yokuqala, umpostile uYohane wasebenzisa igama likaThixo kwiincwadi zakhe. Igama elithi “Haleluya,” elithetha “Mdumiseni uYa,” libonakala kaninzininzi kwincwadi yeSityhilelo.—ISityhilelo 19:1, 3, 4, 6.

Noko ke, uYesu nabalandeli bakhe babeprofete ngelokuba kwakuya kubakho uwexuko kwibandla lamaKristu. Umpostile uPetros wayebhale wathi: “Naphakathi kwenu kuya kubakho abafundisi bobuxoki.” (2 Petros 2:1; bona kwanoMateyu 13:36-43; IZenzo 20:29, 30; 2 Tesalonika 2:3; 1 Yohane 2:18, 19.) Ezi zilumkiso zazaliseka. Omnye umphumo waba kukuba igama likaThixo latyhalelwa emva. Lade lasuswa kwimibhalo nakwiinguqulelo zeBhayibhile! Masibone indlela oko okwenzeka ngayo.

[Umbhalo osemazantsi]

[Umfanekiso okwiphepha 14]

Lo mfanekiso wombingeleli omkhulu womYuda, ononkontsho olunamagama esiHebhere athi “Ubungcwele BobukaYehova,” ufumaneka eVatican

[Umfanekiso okwiphepha 15]

Njengoko le nguqulelo yeBhayibhile yesiJamani yowe-1805 ibonisa, xa uYesu wafunda kwindlu yesikhungu kumsongo kaIsaya, walibiza igama likaThixo ngokuvakalayo.—Luka 4:18, 19

[Imifanekiso ekwiphepha 16]

UPetros noPawulos balisebenzisa igama likaThixo xa babecaphula kwisiprofeto sikaYoweli.—IZenzo 2:21; Roma 10:13, Inguqulelo yesiXhosa ka-Appleyard