Chapter 15
Ukwahlulwa Kwabantu Ngenxa Yembambano YoBukumkani
1. Kutheni ukwahlulwa ngenxa yembambano yoBukumkani kungumcimbi obalulekileyo kuye ngamnye wethu?
NGAMNYE wethu ujongene nesigqibo esibalulekileyo. Into eyimbambano sisimo sethu sengqondo ngoBukumkani bukaYehova obungoMesiya obulawulwa nguYesu Kristu. Abantu bazo zonke iintlanga bahlulwahlulwa ngenxa yale mbambano. Umntu ngamnye ubekwa kwelinye lamaqela amabini ngekhondo lakhe lesenzo. Kuphela linye kula maqela eliya kusinda kwintshabalalo yehlabathi esondelayo.—Mateyu 24:40, 41.
2. (a) Obu Bukumkani bulawulwa nguMesiya buhlobene njani nembambano yolongamo lukaYehova? (b) Buya kuba yintoni uBukumkani ngokukhawuleza, yaye yintoni esimele siyicinge ngokunzulu?
2 UYehova sele embekile etroneni uNyana wakhe othanjisiweyo, uMesiya wakhe, emazulwini. Ekupheleni ‘kwamaxesha eentlanga’ ngowe-1914, uThixo wanika uYesu Kristu iintlanga njengelifa lakhe—wonke umhlaba njengempahla yakhe. (INdumiso 2:6, 8) Uburhulumente obungoMesiya, etroneni obunoKumkani othanjiswe nguYehova, buyindlela uThixo aphumeza ngayo injongo yakhe yobulumko nenothando ngomhlaba. Ngoko ke, isimo sakho sengqondo ngoBukumkani, sibonisa indlela ovakalelwa ngayo ngolongamo lukaYehova lwendalo iphela. Kungekudala obo Bukumkani obulawulwa nguMesiya buya ‘kuyicola buyigqibe’ yonke inkqubo yobupolitika ngoku elawula imicimbi yabantu ibe buya kuba ngurhulumente omnye phezu kwawo wonke umhlaba. (Daniyeli 2:44; ISityhilelo 19:11-21) Xa buhlabela mgama buguqula lo mhlaba ube yiParadisi, uya kuba uphi wena? Ngaba uya kuba phakathi kwabo bakhokelwa bubo ukusa ekunandipheni ubomi obufezekileyo? UYesu wachaza indlela abantu abaphilayo ngoku abanokulifumana ngayo ithemba elinjalo.
UKUMKANI ‘NABAZALWANA’ BAKHE
3. KuMateyu 25:31-33, uYesu wachaza ntoni?
3 Xa wayexelela abapostile bakhe ‘ngokupheliswa kwephakade eli,’ uYesu wasebenzisa imizekeliso eliqela. Kowokugqibela wathi: “Xa ke athe wafika uNyana woMntu esebuqaqawulini bakhe, enazo zonke izithunywa ezingcwele, ngelo xa uya kuhlala phezu kwetrone yobuqaqawuli bakhe; zihlanganiswe phambi kwakhe zonke iintlanga abahlule abanye kwabanye, njengokuba umalusi ezahlula izimvu ezibhokhweni; athi zona izimvu azimise ngasekunene kwakhe, athi kodwa zona iibhokhwe azimise ngasekhohlo.”—Mateyu 24:3; 25:31-33.
4. (a) Lo mzekeliso uhlobene njani noDaniyeli 7:13, 14? (b) Yiyiphi imibuzo esinokuzibuza yona ngokunengenelo?
4 Phawula ukuba uYesu apha uthetha ngaye ‘njengoNyana woMntu,’ njengokuba wayesele etshilo ngokuphindaphindiweyo ngaphambilana kwesi siprofeto. (Mateyu 24:27, 30, 37, 39, 44) Ukusebenzisa kwakhe eli binzana kwakukhumbuza ngombono wesiprofeto owanikelwa kuDaniyeli phantse kwiinkulungwane ezintandathu ngaphambilana, lo mprofeti owabhala oku ngawo: “Ndabona emibonweni yasebusuku: nanko kusiza, ngamafu ezulu, onjengonyana womntu [uYesu Kristu], wafika kuNyangelemihla [uYehova uThixo], wasondezwa phambi kwakhe. Wanikwa igunya, nobuhandiba, nobukumkani, ukuze zonke iintlanga, nezizwe, neelwimi, zimbuse; igunya lakhe ligunya elingunaphakade, elingapheliyo; ubukumkani bakhe bobungayi konakaliswa.” (Daniyeli 7:13, 14; Hebhere 2:5-8) Elo gunya lolawulo sele linikelwe kuYesu Kristu. Ukususela ngowe-1914 ubelawula ekwitrone yakhe yasezulwini. Wena ngokobuqu uye wasabela njani kulawulo lwakhe? Ngaba indlela yakho yobomi inikel’ ubungqina bokuba umhlonela ngokufanelekileyo Lowo uThixo amenze uMlawuli wawo wonke umhlaba?
5. UKristu ugqiba njani ngokunyaniseka kwebango likabani lokuzinikela kuye njengoKumkani?
5 Amazwi nje akanele. Kulula ngomntu ukuthi uyakholelwa kuBukumkani bukaThixo aze athi uyamthanda uYesu Kristu. Kodwa kumzekeliso wakhe wezimvu neebhokhwe uYesu wabonisa ukuba, ekubeni wayengenakuba ngobonakalayo emazulwini, eyona nto iphambili awayeya kuyiqwalasela ekugqibeni ngokunyaniseka kwamazwi omntu yayiya kuba kukuphatha kwakhe abo bamela uKristu emhlabeni, ‘abazalwana’ bakhe.—Mateyu 25:40, 45.
6. Bangoobani aba “bazalwana” bakaKristu?
6 Bangoobani bona? Bangabo uThixo abanyule phakathi koluntu ukuba babe ziindlalifa kunye noKristu zoBukumkani basezulwini. Aba bali-144 000, ibe kuphela yintsalela yabo esesemhlabeni. (ISityhilelo 14:1, 4) Ekubeni ‘bezelwe ngokutsha’ ngokusebenza komoya kaThixo, bangoonyana bakaThixo, yaye ngenxa yeso sizathu eZibhalweni kuthethwa ngabo ‘njengabazalwana’ bakaYesu Kristu. (Yohane 3:3; Hebhere 2:10, 11) Okwenziwa ngabantu kwaba “bazalwana,” kwanakoyena ‘mncinane’ wabo, uYesu ukujonga njengokwenziwa kuye.
7. Kutheni le nto “abazalwana” bakaKristu bengengawo amalungu eecawa zeNgqobhoko?
7 Baphi aba “bazalwana” bakaKristu kumhla wethu? Ngaba uza kubafumana phakathi kwabantu beNgqobhoko abahamba icawa? Kaloku, wathini uYesu ngabalandeli bakhe bokwenyaniso? “Abangabo abehlabathi, njengokuba nam ndingenguye owehlabathi.” (Yohane 17:16) Ngaba oko kunokuthethwa ngenene ngeecawa zeNgqobhoko namalungu azo? Ngomlinganiselo omkhulu, isimo sazo sengqondo nehambo yazo zibonisa nje ezo ziqhelekileyo kwiindawo ezikuzo. Ukubandakanyeka kweecawa kwiipolitiki yinto eyaziwa kakuhle. Xa kwakubunjwa uMthetho-siseko weZizwe Ezimanyeneyo ngowe-1945, abameli beecawa zamaProtestanti, ezamaKatolika nezamaYuda babelapho njengabanikeli bamacebiso. Kwiminyaka yakutshanje, oopopu baseRoma baye bavakalisa iZizwe Ezimanyeneyo “njengethemba lokugqibela lemvisiswano noxolo” yaye bathe “ziyindawo ephakamileyo yokuxoxa ngoxolo nokusesikweni.” IBhunga LeeCawa Zehlabathi, elinamalungu anokuba ngama-300 amaqela eenkonzo, lide lanikela ngemali esetyenziselwa iimvukelo zobupolitika. Kanti, uYesu Kristu wathi kwirhuluneli yomRoma uPilato: “Ubukumkani bam asibubo obeli hlabathi.”—Yohane 18:36.
8. (a) Yintoni ekuncedileyo ukuze ukwazi ukufanisa “abazalwana” bakaKristu? (b) Ubaluleke kangakanani umsebenzi wokushumayela uBukumkani kubo?
8 Izibakala zibonisa ukuba kuphela liqela elinye elibumele ngokuqinileyo uBukumkani, lisenza umgudu onamandla wokubuvakalisa zwenibanzi, ngoxa liphepha ukubandakanyeka nangayiphi na indlela kwimicimbi yobupolitika yeli hlabathi. Eli qela lingamaNgqina kaYehova. Phakathi kwawo kufumaneka abaseleyo ‘babazalwana’ bakaKristu. Ngokuxelisa iNkosi yabo nabapostile bayo, baye bazinikela ekuhambeni kwisixeko ngesixeko nakwizindlu ngezindlu, bexelela abantu ngeendaba ezilungileyo zoBukumkani bukaThixo. (Luka 8:1; IZenzo 8:12; 19:8; 20:20, 25) Ngowe-1919, kwindibano yamaNgqina kaYehova (ngoko awayesaziwa njengaBafundi beBhayibhile beZizwe ngeZizwe) eyayiseCedar Point, eOhio, abantu ababeze kuloo ndibano bakhunjuzwa ukuba “babe nomsebenzi ibe basenawo, wokuvakalisa ubukumkani bukaMesiya obuzayo nobuzukileyo.” Kwindibano efanayo eyayingowe-1922 oku kwaphindwa kwabethelelwa, yaye babongozwa ngelithi: “Mbhengezeni, mbhengezeni, mbhengezeni, uKumkani nobukumkani bakhe.” Besebenzisa zonke iindlela abanokukwazi ukuzisebenzisa, baye baqhubeka besenza oko zwenibanzi ukuza kuthi ga kulo mhla. (Mateyu 24:14) Ngenxa yomsebenzi wabo, uye wayaziswa imbambano yoBukumkani. Yintoni oyenzayo ngayo?
‘WENJENJALO KOMNYE WABAZALWANA BAM’
9. (a) Iimeko ezichazwe kuMateyu 25:35-40 zihlobene njani nobulungiseleli boBukumkani? (b) Abantu kuzo zonke iindawo baye bajongana naluphi uvavanyo?
9 ‘Abazalwana’ bakaKristu abathanjiswe ngomoya baye bavavanywa ngokuqatha ngenxa yokubushumayela ngokungafihlisiyo uBukumkani bukaThixo, ngoxa behleli bengabahlukileyo ehlabathini. (Yohane 15:19, 21) Bambi baye balamba, banxanwa baza baswela into yokwambatha. Abaninzi baye bawashiya amakhaya abo ukuze bakhonze kwimimandla apho baye baba ngabantu basemzini khona. Ngoxa besenza ubulungiseleli babo, baye bagula baza bavalelwa ezintolongweni, bade babulawa nangabatshutshisi. La mava ‘abazalwana’ bakaKristu aye abangela abantu bazo zonke iintlanga ukuba bajongane novavanyo. Ngaba ukuthanda kwabo uThixo noKristu kuya kubabangela ukuba babancede aba nozakuzaku boBukumkani basezulwini? (Mateyu 25:35-40; thelekisa eyesi-2 yabaseKorinte 5:20.) Into uKumkani ayijonga njengeyenziwe kuye ngokobuqu ngokuyintloko asibobubele bobuntu kodwa luncedo olunikelwayo ngenxa yokuba bengabakaKristu.—Marko 9:41; Mateyu 10:42.
10. (a) Kutheni inkcaso eveliswa ‘ziibhokhwe’ iyengafanelekanga nje? (b) Ngokuchasene noko, sisiphi isimo sengqondo “izimvu” eziye zanaso?
10 Abo banikela uncedo olunjalo uYesu uthi bafana nezimvu. Abantu abasilelayo ukunikela uncedo ‘kubazalwana’ bakhe kumzekeliso kaYesu kubhekiselwe kubo njengeebhokhwe. “Iibhokhwe” zisenokuma ngelithi azizange zimbone uYesu Kristu. Kodwa uthumele abakhonzi bakhe kuzo, ibe bona baye bazibonakalisa ngokucacileyo. “Iibhokhwe” zisenokungabatshutshisi “abazalwana” bakaKristu xa zizonke, kodwa azishukunyiswa kukuthanda uKumkani wasezulwini ukuze zincede abameli bakhe. (Mateyu 25:41-45) Zibambelela kwihlabathi uSathana uMtyholi angumlawuli walo ongabonakaliyo. “Izimvu” nazo azinakumbona ngokoqobo uKristu. Kodwa, ngokungafaniyo ‘neebhokhwe,’ zona zizingqina zingakoyiki ukuzinxulumanisa ‘nabazalwana’ bakaKristu, ngokuxhasa aba bavakalisi boBukumkani bukaThixo. “Izimvu” ziyakwazi ezikwenzayo, ibe zenza ukhetho olungqalileyo ngokuvumelana noBukumkani bukaThixo obulawulwa nguYesu Kristu. Kungeso sizathu le nto isenzo sazo ibe sesifanelekileyo emehlweni kaKumkani.
11. (a) Ekubeni abantu abaninzi bengazange bahlangana ‘nabazalwana’ bakaKristu, banokugwetywa njani ngokwendlela echazwe apha? (b) Yintoni eqinisekisa impumelelo yalo msebenzi?
11 Noko ke, kwenzeka njani ngabantu bazo zonke iintlanga ukuba bagwetywe ngale ndlela? Akazange atsho na uYesu ukuba “abazalwana” bakhe, uYise awayeza kubanika uBukumkani basezulwini, babeya kuba ‘ngumhlambi omncinane’ nje? (Luka 12:32) Abantu abaninzi abazange ngokobuqu badibane nomnye wabo. Kuyinyaniso oko, kodwa “abazalwana” bakaKristu benza isiseko sentlangano yezizwe ngezizwe yamaNgqina kaYehova. Ngaba bantu balungelelanisiweyo, kunikelwa imbambano ebalulekileyo yoBukumkani ebantwini kuzo zonk’ iindawo. Konke oku kwalathiswa nguKristu ngokwakhe ekwitrone yakhe yasezulwini ibe encedwa zizithunywa zezulu. Jikelele ehlabathini kumazwe namaqela eziqithi angaphezu kwama-200—kwanalapho ukushunyayelwa koBukumkani bukaThixo kubhangiswe ngoorhulumente—umsebenzi wokwahlula uhambela phambili ngendlela engenakuxhathiswa, ibe isihlwele esikhulu sabantu sima ngakwicala loBukumkani bukaThixo.
12. (a) “Izimvu” zikucacisa njani ukuma ezikuthabathileyo? (b) Kutheni zisenza oko nje?
12 Bakubonisa njani oku? Ngokusebenza nabathanjiswa, bekuvakalisa ngenzondelelo ukuba uBukumkani buyalawula nokuba kungekudala buya kuphelisa inkqubo yehlabathi. Ngaloo ndlela bazichaza ekuhleni njengabami ngakwicala loBukumkani bukaYehova obulawulwa nguMesiya yaye bathi ngendlela enothando babongoze abanye ukwenza okufanayo. Aba bantu baneentliziyo ezifanelekileyo bashukunyiswa ngumnqweno ongenguwo nje kuphela owokusinda. Bamthanda ngokwenyaniso uYehova neendlela zakhe. Ilungiselelo loBukumkani bakhe obulawulwa nguKristu njengoKumkani lizalisa iintliziyo zabo ngombulelo, ibe bafuna abanye bangenelwe kubo. Ngoko baba nesabelo ngowona mlinganiselo mkhulu banokukwazi ukuwenza ekunikeleni ubungqina boBukumkani. Njengokuba uYesu wayalela abafundi bakhe, ‘bafuna tanci ubukumkani,’ bengakuvumeli ukuxhalela iintswelo zezinto eziphathekayo kubutyhalele kwindawo yesibini. Ngale ndlela bazenza bakwazi ukufumana iintsikelelo ezizukileyo.—Mateyu 6:31-33.
NGABA ‘UYA KUBUDLA ILIFA UBUKUMKANI’?
13. (a) UYehova ubecinga ngomvuzo waba babumvu ukususela nini? (b) Kuthetha ntoni kubo ‘ukudla ilifa ubukumkani’?
13 Ngokwenene iyamangalisa into abayigcinelweyo abo bazingqina ‘bezizimvu’ zomzekeliso kaYesu. Esetroneni yakhe yasezulwini, uthetha oku kubo: “Yizani, nina nisikelelweyo nguBawo, nibudle ilifa ubukumkani obalungiselwa nina kwasekusekweni kwehlabathi.” (Mateyu 25:34) Ukususela “ekusekweni kwehlabathi,” ngexesha laxa uAdam noEva baqalisa ukuvelisa abantwana ababenokungenelwa kwilungiselelo likaThixo lokuhlawulela uluntu, ngokweGenesis 3:15, 16, uYehova wayecinga ngokuzivuza ezi “zimvu.” (Thelekisa uLuka 11:50, 51.) Umvuzo wabo ngowokuba kwiParadisi ebuyiselweyo banandiphe ubomi bobuntu obufezekileyo obalahlwa nguAdam. ‘Ukudla kwabo ubukumkani njengelifa’ akuthethi ukuba baya kuya ezulwini, kuba umzekeliso ubonisa ukuba “izimvu” azifani ‘nabazalwana’ bakaKumkani, abaziindlalifa zoKumkani wasezulwini. Ngoko “izimvu” zimele ukuba zingabalawulwa basemhlabeni bobo burhulumente basezulwini. IGreek-English Lexicon kaLiddell noScott ithi igama lesiGrike elithi basileiʹa, apha eliguqulelwe ngokuthi “ubukumkani,” ngokwesixando sokwenziwa linokuqondwa, lithetha “ukulawulwa kukabani ngukumkani.” Apha ngokucacileyo lisebenza ngokwale ngqiqo.
14. Umgwebo oya kudluliswa ‘kwiibhokhwe’ uya kwahluka njani nokudla ‘kwezimvu’ ilifa?
14 Xa “iibhokhwe” zisiya “elubethweni olungunaphakade,” kwintshabalalo epheleleyo ngokungathi kungumlilo, “izimvu” ziya kulondolozwa nguKumkani onguMesiya. (Mateyu 25:41, 46; thelekisa ISityhilelo 21:8.) Ngaphandle kwayo nayiphi na imfuneko yokuba zife, ziya kulondolozwa ukutyhubela imbandezelo enkulu kuse ‘kumhlaba omtsha’ ozukileyo ongayi kuba nempembelelo eyonakeleyo kaSathana nenkqubo yakhe yezinto engendawo. Ziya kuyifumana loo ntsikelelo kuba zisenza ngoku isigqibo esifanelekileyo ngembambano yoBukumkani.
15. (a) Sazi njani ukuba lo mzekeliso usebenza ngoku? (b) Ngoko, nguwuphi umsebenzi obaluleke kunene?
15 Bekuya kuba yimpazamo embi gqitha ukuqiqa ngelithi, ngenxa yokuba intshabalalo ‘yeebhokhwe’ iyeyaphakade, lo mzekeliso ubungena kusebenza de kube kwithuba elizayo, mhlawumbi ebudeni boLawulo lukaKristu Lwewaka Leminyaka. Ngokuchasene noko, uYesu wanikela lo mzekeliso njengenxalenye yomqondiso ‘wokupheliswa kwephakade eli.’ (Mateyu 24:3) Akuchazayo kwenzeka emva kokuba ebekwe etroneni kodwa kuyenzeka nangoxa “abazalwana” bakhe besesenyameni yaye besiva iinzima azikhankanyayo. Siphila kwelo xesha, ibe liphela ngendlela ekhawulezileyo. Ngoko ke, hayi indlela ekubaluleke ngayo kungekuphela nje ukuba nentembelo epheleleyo kuBukumkani kodwa ukunceda abanye bakubone ukubaluleka kokwenjenjalo ngoku.