Chapter 22
Musa Ukuzinqwenela Izinto Ozishiyileyo!
1. (a) Ziziphi iintsikelelo eziza kufunyanwa kungekudala ngabakhonzi bakaThixo abathembekileyo? (b) Kanti, abanye abantu benze ntoni?
UKUZALISEKA kwesiprofeto seBhayibhile ngokungaphazamiyo kubonisa ukuba namhlanje sikowona mgubasi wenkqubo kaThixo yezinto entsha nezukileyo. Kungekudala ihlabathi elingendawo liza kuphela, yaye into eza kuphela nalo ziintliziyo ezibuhlungu, udano nobuhlungu obubangelwe lilo. Umhlaba uya kuguqulelwa ekubeni yiParadisi apho abanquli boThixo oyinyaniso baya kukwazi khona ukunandipha ubomi bobuntu obufezekileyo ngonaphakade. Ngokubhekisele ekuqinisekeni kwamadinga akhe angezi zinto, uYehova wathi kumpostile uYohane: “Bhala; ngokuba lawo ngamazwi ayinyaniso, athembekileyo.” (ISityhilelo 21:1-5) Kanti, nangona oko kusenokubonakala kumangalisa, bambi abantu abazaziyo ezi nyaniso babuyela emva kwindlela yobomi yehlabathi uThixo athi uza kulitshabalalisa. Hayi indlela okubuhlungu ngayo oko! Kutheni besenza oko nje?
2. (a) Ukuze awuphephe umphumo onjalo, umntu umele enze ntoni emva kokuyifunda okokuqala inyaniso? (b) Ukuba uyasilela ukwenza oku, yintoni esenokulawula indlela acinga ngayo, ibe ngawuphi umphumo?
2 Xa baziva okokuqala iindaba ezilungileyo ezingoBukumkani bukaThixo noko buya kukwenza, bazamkela ngovuyo. Kodwa kukwayinto ebalulekileyo ukutyhalela phambili ekukhuleni kobuKristu, ukukwenza nzulu ukuqonda kukabani iLizwi likaThixo aze afune iindlela zokulisebenzisa ngokupheleleyo kubomi bakhe. (Hebhere 6:1, 11, 12) Ukuba ukungabi naluxabiso kubangela nabani na akutyeshele oku, akayi kuqhubeka elijonga njengelixabisekileyo ilungelo lokukhonza uThixo. Umntu onjalo usenokungabi namonde ngeentsikelelo ezibonakalayo ezithenjiswe nguThixo, ngoxa esilela ukukuxabisa ukufuna kwakhe ukukhula ngokomoya nokubaluleka kokuba nesabelo ngokupheleleyo kangangoko kunokwenzeka kumsebenzi wokushumayela nowokwenza abafundi uThixo asinike wona ukuba siwenze ngoku. Ukwanelisa iminqweno yokufuna izinto eziphathekayo noko kubonakala ikukuzonwabisa kusenokuqalisa ukuthabatha ixesha lakhe elingakumbi nangakumbi. Ubeka izilangazelelo zokomoya kwindawo yesibini. Ubuyela emva ehlabathini, hayi ngequbuliso, kodwa ubuyela ngokuthe ngcembe.—1 Timoti 6:9, 10.
3. (a) Kutheni kuyingozi ukukhetha njengezihlobo abantu abangamnquliyo uYehova? (b) Umntu usenokuzifumana nini ngokulula enxulumana ngokukhululekileyo nabantu abanjalo?
3 Umntu usenokuthi ufuna ukusindela ‘kumhlaba omtsha,’ ukuphila kwihlabathi apho kuya kubakho ubulungisa. Kodwa ngaba ukukhetha kwakhe abantu anxulumana nabo kuyakungqina akuthethayo? Kakade ke, asinakukuphepha ukunxulumana imihla ngemihla nabantu abangamkhonziyo uYehova—emsebenzini, esikolweni, xa sisevenkileni, kwanasekhaya. Kodwa ebudeni bamathuba okuphumla emsebenzini, ngaphambi nasemva kwesikolo, xa etsala umnxeba okanye etyelela izihlobo, ebudeni bamaxesha okuzonwabisa, bubuhlobo bukabani abukhethayo? Ngaba ngokwenene kwenza umahluko? IBhayibhile ilumkisa ngokuthi: ‘‘Musani ukulahlekiswa. Incoko embi yonakalisa izimilo ezilungileyo.” (1 Korinte 15:33) Kodwa iyintoni “incoko embi”? Ngaba kwenza nawuphi na umahluko into yokuba abantu abathile babe abamnquli uYehova, into yokuba besenza nje okubonakala kufanelekile emehlweni abo? Ngokwendlela esele sifunde ngayo, siyazi ukuba abantu abalolo hlobo abayi kusindela ‘kumhlaba omtsha.’ Nabaphi na abayijongela phantsi imilinganiselo kaYehova xa benyula izihlobo kungekudala baya kuzifumana bebuyele ehlabathini ababekhe bacinga ukuba balishiyile. Kodwa imizekelo elumkisayo ebhalwe eZibhalweni inokusikhusela kwikhondo elinjalo ukuba siyithabathela entliziyweni.—1 Korinte 10:11, TE.
‘ZABHALELWA UKUSILUMKISA’
4. (a) Luhlobo olunjani lobomi uSirayeli awayeluphila eYiputa emva kokufa kukaYosefu? (b) Kutheni “inkitha engumxube” yathelela uSirayeli xa wayehlangulwa eYiputa? (c) Loo mbali yesiprofeto izalisekiswe njani kumhla wethu?
4 Xa uYehova wahlangula uSirayeli kubukhoboka baseYiputa, hayi indlela ekumele ukuba baziva bekhululeke ngayo! Ingcinezelo enenkohlakalo abayifumana emva kokufa kukaYosefu yenza iYiputa yabonakala njengeziko lomlilo elishushu ababephoswe kulo. (Eksodus 1:13, 14; Duteronomi 4:20) Kodwa ke uYehova wezisa izibetho ezilishumi eYiputa. Umahluko phakathi koThixo oyinyaniso noothixo baseYiputa wacaca. Ngoko, xa uSirayeli walishiyayo elo lizwe, “inkitha engumxube” yabantu ababengengomaSirayeli yahamba nawo, kanye njengokuba namhlanje “isihlwele esikhulu” sizahlulile ehlabathini saza sanxulumana nentsalela enguSirayeli wokomoya. (Eksodus 12:38) Kodwa kwenzeka ntoni eminqubeni emva nje kwaloo Mfuduko?
5. (a) Emva nje kokuhlangulwa kwawo, ‘abuyela njani emva eYiputa’? (b) Kutheni kwenzekayo nje oku?
5 UStefano owayengumfundi ongumKristu wacacisa ngokuthi: “Babuyela eYiputa ngeentliziyo zabo.” Oku kwenzeka kwiinyanga ezimbalwa nje kuphela emva kokuhlangulwa kwawo. (IZenzo 7:39, 40) Yintoni eyanikela ubungqina boku? Enza ithole legolide—into awayeqhelene nayo eYiputa—aza athi “ngumthendeleko kuYehova.” Kodwa ayexelisa amaYiputa. (Eksodus 32:1-6) Amcaphukisa kakhulu uYehova. Ihambo yawo yayingqubana ngokuthe ngqo noMthetho owanikelwa kwiNtaba yaseSinayi. Amawakawaka aphulukana nobomi bawo. Kutheni kwenzekayo nje? Nangona ayeyazi imiyalelo kaYehova, ngokucacileyo ayengenaluxabiso lusuk’ entliziyweni ngezi zinto nesibakala sokuba uThixo oyinyaniso wayewakhokela.
6. (a) Ngawaphi amalungiselelo uYehova awawenzela wona entlango? (1 Korinte 10:3, 4) (b) Kutheni le nto abathile baqalisa ukunqwenela oko babekade benako eYiputa?
6 Xa ashiya iYiputa, amaSirayeli ‘nenkitha engumxube’ eyayihamba nawo ayesazi ukuba kwakuyinto efanelekileyo ukwenjenjalo. Kodwa emva kokuba kudlule unyaka ayengekafiki kwiLizwe Ledinga; ayengekabi nawo amakhaya ‘kwilizwe elibaleka amasi nobusi.’ Ewonke ayenokudla kokwenyama ayemele akutye, yaye ngokukhethekileyo kwakukho intabalala yokudla kokomoya. Ilifu nomlilo zazibubungqina obusoloko bukho bokuba uYehova wayewakhokela. KuLwandle Olubomvu nakwiNtaba yeSinayi ayebone ubungqina obothusayo bamandla kaYehova. Umnqophiso woMthetho wawondla ngokomoya waza wawahlaziya. Wakwawanika okuninzi amele akwenze ngokobuqu, wawabonisa apho kwakufuneka ayihlengahlengise khona ihambo yawo, indlela yawo yokucinga, iintshukumisa zawo, ukuze ezi zinto zibe zezimkholisayo uYehova. Kodwa kunokuxabisa konke oko uYehova wayewenzela kona, aqalisa ukunqwenela izinto zokwenyama ayenazo eYiputa. Umnqweno wokuzingca wakhokelela ekutshabalaleni kwamaninzi.—Numeri 11:4-6, 31-34.
7. (a) Xa iintlola zezisa iingxelo zazo, kutheni abantu bathetha ngokubuyela eYiputa? (b) Waba yintoni umphumo? (Hebhere 3:17, 19)
7 Emva nje kokuba kwenzekile oku, uMoses wathumela amadoda ukuba ayokuhlola iLizwe Ledinga. Xa abuyayo onke avuma ukuba ngokwenene ‘yayilizwe elibaleka amasi nobusi.’ Kodwa iintlola ezilishumi zaziboyika abantu balapho yaye zisoyikiswa zizixeko zabo ezinqatyisiweyo. Azizange zikholose ngoYehova ngazo zonke iintliziyo zazo zaza zabangela iintliziyo zabanye zaba nedyudyu. Kwakhona iingcinga zabo zabuyela emva eYiputa, yaye bathetha ngamalungiselelo okubuyela apho. Ngenxa yokuswela kwabo ukholo, sonke eso sizukulwana esineminyaka engama-20 ubudala nangaphezulu ekugqibeleni safela entlango, asizange singene kwiLizwe Ledinga.—Numeri 13:27-33; 14:1-4, 29.
8. (a) Ukuze uLote nentsapho yakhe basindiswe xa iSodom yayitshatyalaliswa, kwakufuneka benze ntoni? (b) Kutheni umkaLote waphethukela ekubeni yintsika yetyuwa? (c) Sisiphi isigidimi sesilumkiso oko okusiqulathele sona thina?
8 Ngaphezu kweminyaka engama-400 ngaphambilana, eso sifundo sinye sabalaseliswa ngebali elahlukileyo. Unyana womntakobo Abraham onguLote waye wahlala eSodom, isixeko esasonakele ngokuziphatha kodwa esasityebile ngokwezinto eziphathekayo. Ngoko ukuziphatha okubi kwaseSodom nokwezithili zayo kwakukubi ngokunzulu kangangokuba uYehova wagqiba ngokuyitshabalalisa, ingaze yakhiwe kwakhona. Izithunywa zezulu zathunyelwa ukuba zihlangule uLote nendlu yakhe. Xa uLote walumkisa ababeza kuba ngabakhwenyana bakhe, emehlweni abo “waba njengohlekisayo.” Kodwa oko kwakungeyonto yakuhlekisa. Ekuseni izithunywa zezulu zamkhupha ngokungxama uLote nentsapho yakhe kweso sixeko zaza zabaxelela ukuba basabe bangakhangeli ngasemva. Ubomi babo babuxhomekeke ekuthobeleni. ULote neentombi zakhe ezimbini benza oko babekuxelelwe baza basindiswa. Kodwa umkaLote ngokucacileyo wayethandabuza ukwahlukana nezinto eziphathekayo awayezishiya ngasemva. Ejika ukuze ajonge ngasemva, waphulukana nobomi bakhe, waba yintsika yetyuwa. Ngaba sikuthabathel’ entliziyweni oko kuthethwa yiloo nto? Ukuze singalahlekelwa yingongoma apha, uYesu wakuquka oko kwisilumkiso esingokungxamiseka kokusaba kwinkqubo endala kumhla wethu. Kwakuxa wayelumkisa ngokuzixhalabela ngokugqithiseleyo izinto eziphathekayo awathi ngokufutshane nangokuchanileyo wathetha oku: “Khumbulani umkaLote.” (Genesis 19:12-26; Luka 17:31, 32) Yintoni enokusikhusela kwimigibe eyarhintyela amaSirayeli nomkaLote?
‘UKOLULELA KWINDAWO ELUNGILEYO’
9. Luyintoni ukholo, ibe sinokuluhlakulela njani?
9 Ukuze sikuphephe ukuphenjelelwa ekubeni sikhangele emva, kufuneka sihlakulele ukholo olongezelelekileyo kwizinto ezingaphambili. AmaHebhere 11:1 ukholo aluchaza ‘njengokukholosa ngezinto ezithenjiweyo; ukweyiseka bubukho bezinto ezingabonwayo.’ Lusisiqinisekiso, njengephepha lesiqinisekiso, sokuba siya kukufumana oko uThixo akuthembisileyo. Ukholo lusekelwe kubungqina obunamandla, yaye ngenxa yoko sinezizathu ezinamandla zokukholelwa koko kungenakubonwa liliso lenyama. Asikokweyiseka nje ngokukhawuleza, okanye ukukholelwa msinya ngenxa nje yokuba into ethile ivakala kakuhle. Ukuze sibe nokholo lokwenene, simele silumke ngokugqithiseleyo khon’ ukuze sibazi ngokobuqu ubungqina obusisizinzi salo. Kwakhona kufuneka siyiqwalasele kakuhle indlela oko sikufundayo okuhlobene ngayo nobomi bethu size sihlakulele uxabiso lokwenyaniso olusuk’ entliziyweni ngaloo nto.
10. (a) UAbraham wabunikela njani ubungqina bokholo lwakhe, yaye ithuba elide kangakanani? (b) Sazi njani ukuba oko wakwenzayo kwakufanelekile?
10 UAbraham wayenokholo olunjalo. Ngenxa yoko, ngokuyalelwa nguYehova uAbraham washiya isixeko esityebileyo saseUre kwelamaKaledi waza waya kwilizwe elikude lakwaKanan, awayengazange alibone ngaphambili. Apho wahlala njengomphambukeli, engazinxulumanisi ngenjongo yokunqabiseka kuzo naziphi na izikumkani zezixeko. “Wayewulindele umzi lo uneziseko [uBukumkani bukaYehova obungoMesiya], ungcibi, umbangi wawo, inguThixo.” Ukuba wayenokuhlala enqwenela ubomi kwelamaKaledi, ngokungathandabuzekiyo ngewayebuyele. Kunoko, ‘wazolulela kwikowabo elilungileyo, oko kukuthi, elasemazulwini.’ (Hebhere 11:8-16) Kwakungeyominyaka nje imbalwa, okanye kwanelishumi okanye engamashumi amabini, awathi uAbraham wolulela ‘kwikowabo elilungileyo.’ Waqhubeka esenjenjalo kwada kwaba sekufeni kwakhe, kwiminyaka eli-100 okanye ngaphezulu emva kokuba eshiye iUre. Akazange asuke nje athi wayenokholo; walubonisa ngemisebenzi yakhe. Ngenxa yoko umvuzo wakhe uqinisekisiwe. Ngoko ithemba lakhe lokuvuka liqinisekile, njengokuba uYesu wathi, ‘kuThixo, uAbraham uyaphila.’—Luka 20:37, 38; Yakobi 2:18.
11. UIsake noYakobi babonisa njani ukuba nabo babe nokholo?
11 Kodwa kuthekani ngonyana ka-Abraham uIsake, nonyana kaIsake onguYakobi? Abazange bayingcamle indlela yobomi yamaKaledi. Kodwa oku abazange bakujonge njengesizathu sokuba baziphandele babone ukuba babunjani na. Xa bafunda kubazali babo ngamadinga kaYehova oku bakuthabathela entliziyweni. Bahlakulela ukholo njengoAbraham. Nabo, ‘babolulele kwindawo elungileyo.’ UThixo wayengenazintloni ngabo.—Hebhere 11:9, 16, 20, 21; Genesis 26:24, 25; 28:20-22.
12. Yintoni eyakhokelela uEsawu noDina kwiingxaki ezinzulu?
12 Kwelinye icala, umntakobo Yakobi uEsawu akazange azixabise izinto zokomoya. Watshata abafazi ababengengabo abanquli bakaYehova. Kunokuba axabise izinto ezingcwele, wathengisa ngobuzibulo bakhe ngesidlo esinye. (Genesis 25:29-34; 26:34, 35; Hebhere 12:14-17) Wayengumntu owayefuna ukuzanelisa ngoku ngezinto zokwenyama. Intombi kaYakobi, uDina, naye wangena kwingxaki enzulu. Kwakutheni? Kwakungenxa yokuba wayekuthanda ukunxulumana ‘neentombi zelo zwe’ labahedeni.—Genesis 34:1, 2.
13. (a) Ngokwenene bunjani ubomi kubantu abayinxalenye yehlabathi namhlanje? (b) Yintoni eya kusilondoloza ukuze singabuyeli emva kulo?
13 Ukuba, njengoAbraham, uIsake noYakobi, ngokwenene ‘wolulela kwindawo elungileyo,’ kubomi obuphantsi koBukumkani bukaYehova obungoMesiya, musa ukuzivumela ukuba ubuyele emva ehlabathini. Khumbula ukuba, ihlabathi alinikeli kamva lihlala lihleli. Kodwa “owenza ukuthanda kukaThixo uhleli ngonaphakade.” Yaye hayi indlela obuya kwanelisa ngokutyebisa ngayo obo bomi!—1 Yohane 2:17.
[Umfanekiso okwiphepha 172]
Khumbula umkaLote!