Ukutshutshiswa Ngenxa Yobulungisa
Usenokuva kwizihlobo okanye kwizalamane ukuba amaNgqina kaYehova adla ngokungqubana nomthetho, uve nokuba avalw’ umlomo ngabanye oorhulumente, okanye ngandlel’ ithile angabantu ababi. Kutheni kukho le ntetho ingentle nje ngawo?
Akungengenxa yokuba amaNgqina akawuhloneli umthetho kodwa kungenxa yokuba alandela emanyathelweni kaYesu. UYesu wathi kubafundi bakhe abantu babeya kubagculela, babatshutshise baze bathethe zonke izinto ezingendawo ngabo bexoka. Oku kungenxa yokuba umchasi kaThixo oyintloko, uSathana, unguthixo weli hlabathi, yaye ebengathanda ukuphethulela abantu kude ekukhonzeni uThixo.—Mateyu 5:10-12; 10:16-22, 34-39; 24:9, 10; Yohane 15:17–16:3; 2 Timoti 3:12; 1 Petros 5:8; ISityhilelo 12:17.
Xa abapostile babanjwayo baza basiwa enkundleni, kwakungengenxa yokuba babezizaphuli-mthetho, amadoda ogonyamelo, okanye bechas’ urhulumente. Kwakungenxa yokuba babeshumayela iindaba ezilungileyo. Xa umpostile uPawulos wabhenela kwiinkundla eziphakamileyo, wayesenzela ukuthethelela nokumisela ngokusemthethweni ilungelo lamaKristu lokushumayela iindaba ezilungileyo.—IZenzo 4:18-20; 5:28-32; Filipi 1:7.
Namhlanje, amaNgqina kaYehova angamaKristu athobela umthetho nahlawula iirhafu zawo aze abonakalise intlonelo kwabo basegunyeni. Anikela izinto zikaKesare kuKesare nezikaThixo kuThixo. Ukuba angqubana nalo naliphi na igunya likarhulumente, kungenxa yokuba urhulumente akawugqali umsebenzi wawo wokushumayela, okanye kungenxa yokungathabathi cala kwawo kwimicimbi ephakathi kweentlanga. Kodwa koku amaNgqina kaYehova amele abe nembono efana neyabapostile, abathi: “Simelwe kukuthi sive uThixo kunokuba sive abantu.”—IZenzo 5:29; Marko 12:17; Yohane 18:36; Tito 3:1, 2.
AmaNgqina kaYehova awaziqhwayeli intshutshiso kodwa ebengathanda ukuphila ngokuzolileyo. Phofu ke, ukuba ngenxa yokulandela kwawo umthetho kaThixo nomzekelo kaYesu Kristu ayatshutshiswa, ayakuvuyela ukuyinyamezela.—Mateyu 5:10-12; IZenzo 5:40, 41; 1 Korinte 4:12; 1 Timoti 2:2; 1 Petros 3:14, 15; 4:12-16.
• Kutheni le nto abakhonzi bakaYehova begculelwa baze batshutshiswe?
• Kutheni amaNgqina kaYehova maxa wambi engqubana namagunya karhulumente, njengoko kwenzeka kubapostile abangamaKristu?
• Abakhonzi bakaYehova bayijonga njani intshutshiso?
[Imifanekiso ekwiphepha 29]
UYesu weziswa phambi koPilato yaye umpostile uPawulos wabanjwa ngenxa yokushumayela uBukumkani bukaThixo