Isahluko 5
Imbambano Ebandakanya Wena
1. Kungani abantu bekufumanise kunzima ukusiqonda isizathu sokuvumela kukaThixo ububi kuluntu?
PHEZU kwawo nje umnqweno oqhelekileyo woxolo nonqabiseko, imbali yomntu iye yonakaliswa kukuphalazwa kwegazi nobuhlungu. Ekubeni iBhayibhile ibonisa ukuba uThixo uzithiyile izinto ezinjalo, kutheni engazinqumamisanga nje ezi meko kwangaphambili? Ngokuqinisekileyo oku akakwenzanga ngenxa yokungabi namdla. IBhayibhile, kwanobuhle bomsebenzi wezandla zikaThixo wasemhlabeni, zinikela ubungqina obuyintabalala bothando nenkxalabo yakhe ngoluntu. (1 Yohane 4:8) Okubaluleke ngakumbi kukuba, uzuko lwegama likaThixo lubandakanyekile, ekubeni ezi meko zibangele abantu bamngcikiva. Ngoko, sisenokuba siyintoni isizathu sokunyamezela kwakhe iziphithiphithi nogonyamelo oluqhubeke kangangamawakawaka eminyaka?
2. (a) Kuphi eBhayibhileni apho sifumana isizathu sokuvumela kukaThixo iimeko ezimbi ithuba elide kangaka? (b) Yintoni eyenza kucace ukuba ingxelo yeBhayibhile engoAdam noEva isisibakala esingokwembali?
2 Impendulo ifumaneka kwingxelo yokuqala yeBhayibhile engoAdam noEva. Le ngxelo asinto nje ithelekelelwayo. Isisibakala esingokwembali. IBhayibhile inikela ingxelo epheleleyo nebubungqina obubhaliweyo yomlibo wokuzalwa othabathela kwinkulungwane yokuqala yeXesha Eliqhelekileyo usinge emva kubantu bokuqala. (Luka 3:23-38; Genesis 5:1-32; 11:10-32) Njengookhokho bethu bokuqala, uAdam noEva baba nempembelelo eqinisekileyo kuthi. Ibe esikuxelelwa yiBhayibhile ngabo kuyasinceda siqonde iimeko ezichaphazela ubomi bethu namhlanje.
3. Luhlobo luni lwamalungiselelo uThixo awalwenzela uluntu kwasekuqalekeni?
3 IBhayibhile ityhila ukuba onke amalungiselelo kaThixo esibini sokuqala esingabantu ayelungile kunene. Sasinayo yonke into eyayinokusenza sonwabe ebomini—ikhaya elinjengepaki e-Eden, iintlobo-ntlobo zokutya okuyintabalala, umsebenzi owanelisayo, ithemba lokubona intsapho yabo ikhula ize izalise umhlaba kwanentsikelelo yoMdali wabo. (Genesis 1:28, 29; 2:8, 9, 15) Ngubani owayenokuthi ngokusengqiqweni acele okungaphezulu kunoko?
4. (a) Ekudalweni kwabo, abantu babahluke ngokwaziphi iindlela kwezinye izidalwa zasemhlabeni? (b) Ukhokelo olufunekayo balulungiselelwa ngayiphi indlela?
4 Ingxelo ephefumlelweyo ekwiGenesis ityhila ukuba abantu babengabona babalaseleyo emhlabeni. Ngokungafaniyo nezilwanyana, babenemvakalelo yokuziphatha okuhle ibe bajizekwa ngelungelo lokuzikhethela. Kungeso sizathu le nto baxhotyiswa ngamandla okuqiqa nawokugweba kakuhle. Ukuze abakhokele, uThixo wamilisela kwindoda nomfazi isazela ukuze, njengabantu abafezekileyo, utyekelo lwabo oluqhelekileyo lube kokulungileyo. (Roma 2:15) Ngaphandle kwako konke oku, uThixo wabaxelela isizathu sokuba babephila, ababemele bakwenze, nokuthi ngubani owayebalungiselele zonke izinto ezizukileyo ababenazo. (Genesis 1:28-30) Ngoko, sisicacisa njani isizathu sokubakho ngoku kweemeko ezimbi ngolu hlobo?
5. (a) Yiyiphi imfuneko elula uThixo awayibekela isibini sokuqala esingabantu, ibe ngasiphi isizathu? (b) Kutheni le nto ithemba laso lobomi bexesha elizayo lalibandakanyeke ngokufanelekileyo?
5 Ingxelo yeZibhalo ibonisa ukuba kwavela imbambano—leyo ibandakanya ngamnye wethu namhlanje. Yabakho ngenxa yeemeko ezayilekayo emva nje kokudalwa kwesibini sokuqala esingabantu. UThixo wanika indoda nomfazi ithuba lokubonakalisa uxabiso lothando kuMdali wabo ngokuthobela into awayeyifuna. Le mfuneko yayingayi kuthetha ukuba babenotyekelo olonakeleyo ekwakufuneka baloyise. Kunoko, yabandakanya into eyayiqhelekile neyayifanelekile—ukutyiwa kokudla. Kunjengokuba uThixo waxelela umntu wathi: “Yonke imithi yomyezo ungayidla uyidle; ke wona umthi wokwazi okulungileyo nokubi uze ungawudli; kuba mhlana uthe wawudla, uya kufa.” (Genesis 2:16, 17) Le mfuneko ayizange isibandeze isibini sokuqala nayiphi na into eyayifuneka ebomini. Sasinokudla kuyo yonke eminye imithi esemyezweni. Kanti ithemba laso lobomi bexesha elizayo lalibandakanyeke ngokuqinisekileyo, ibe ngokufanelekileyo. Ngoba? Kuba Lowo wayefuna ukuthotyelwa wayenguMthombo noMzimasi wobomi babantu.
6. (a) Abazali bethu bokuqala ngebabephile ngonaphakade ukuba babenze ngokuvisisana nayiphi inyaniso esisiseko engolawulo? (b) Kungani babefanele bazive beqhutyelwe ekumthobeleni uThixo?
6 Injongo kaThixo yayingeyiyo eyokufa kwabantu. Akuzange kukhankanywe kufa kuAdam noEva ngaphandle kokubangelwa sisohlwayo sokungathobeli. Abazali bethu bokuqala ngaphambi kwabo babenethemba elizukileyo lokuphila ngonaphakade kwikhaya labo eliseluxolweni nelinjengepaki. Ukuze bakuzuze oku, yintoni eyayifuneka kubo? Kwakufuneka baqonde ukuba umhlaba ababephila kuwo ngowaLowo wayewenzile, ibe, njengoMdali, ngokufanelekileyo uThixo unegunya kwindalo yakhe. (INdumiso 24:1, 10) Ngokuqinisekileyo yena Lo, owayenike umntu konke awayekufuna, kuquka nobomi ngokwabo, wayekufanele ukuthotyelwa kuyo nayiphi na into awayeyicela kubo. Noko ke, wayengafuni ukuba loo ntobelo inyanzeliswe. Kunoko, yayimele iphume kwiintliziyo ezivumayo, ezishukunyiswa luthando. (1 Yohane 5:3) Kodwa abazali bethu bokuqala abangabantu abazange balubonise uthando olunjalo. Kwenzeka njani oku?
Imvelaphi Yokuchaswa Kolawulo Lobuthixo
7. (a) Ngokutsho kweBhayibhile, ukuchaswa kolawulo lukaThixo kwaqalisa phi? (b) Kutheni le nto kusengqiqweni ukukholelwa kummandla womoya?
7 IBhayibhile ibonisa ukuba ukuchaswa kolawulo lukaThixo akuzange kuqale emhlabeni, kodwa kwaqala kummandla ongabonakaliyo kumehlo abantu. Ngaba thina, njengabaninzi, sifanele sibuthandabuze ubukho baloo mmandla ngenxa nje yokuba singenakuwubona? Kaloku, umxhuzulane nomoya azinakubonwa. Kanti imiphumo yazo inokubonwa gqitha. Ngokukwanjalo, imiphumo yommandla ongabonakaliyo inokubonwa. Nangona ‘uThixo enguMoya,’ imisebenzi yakhe yendalo inokubonwa kuzo zonke iindawo ezisijikelezileyo. Ukuba siyakholelwa kuye, kunyanzelekile ukuba sikholelwe kummandla womoya. (Yohane 4:24; Roma 1:20) Kodwa ngaba nabani na uyahlala kulo mmandla?
8. Izithunywa zezulu ziluhlobo olunjani lwabantu?
8 Ngokutsho kweBhayibhile, izigidi zabantu abayimimoya, izithunywa zezulu, zabakho ngaphambi komntu. (Yobhi 38:4, 7; INdumiso 103:20; Daniyeli 7:10) Bonke aba badalwa befezekile, kungekho namnye otyekele kokubi. Kanti, njengendalo kaThixo yamva, engumntu, zaziphiwe ilungelo lokuzikhethela. Ngoko ke zazinokukhetha ikhondo lokuthembeka okanye elokungathembeki kuThixo.
9, 10. (a) Kunokwenzeka njani ukuba isidalwa somoya esifezekileyo sizive sityekele ekwenzeni okuphosakeleyo? (b) Ngoko, kwenzeka njani ukuba esinye sezithunywa zezulu sibe nguSathana?
9 Kodwa umbuzo ophakanyiswa ngabantu abaninzi uthi: Njengezidalwa ezifezekileyo, kunokwenzeka njani ngazo naziphi na kuzo ukuba zityekele ekwenzeni okuphosakeleyo? Kaloku, kukangaphi kubomi bethu kuvela iimeko ezisenza sijongane nezinto ezahlukahlukeneyo—zimbi zazo zilungile, ezinye zimbi? Ukuba nengqondo yokuqonda izinto ezimbi akuthi nje ngokuzenzekelayo kusenze abantu ababi, ngaba kunjalo? Umbuzo wokwenene ngothi: Siya kuyinamathelisa kweliphi ikhondo ingqondo nentliziyo yethu? Ukuba sizikis’ ingqondo kwiingcinga eziyingozi, sisenokutsaleleka ekuhlakuleleni umnqweno ophosakeleyo kwiintliziyo zethu. Umnqweno onjalo ekugqibeleni ubunokusiqhubela ekwenzeni izenzo eziphosakeleyo. Lo mjikelo wonakalisayo wachazwa ngumbhali weBhayibhile uYakobi: “Elowo ke uhendwa akutsalwa, abanjiswe, yeyakhe inkanuko. Ithi inkanuko, yakuba ithabathile, izale isono; sithi ke isono, sakuba sikhulelwe, sizale ukufa.”—Yakobi 1:14, 15.
10 IZibhalo zityhila ukuba oku kwenzeka komnye woonyana bakaThixo bomoya. Wabanjiswa zezakhe iinkanuko. Wabona izinto ezinokwenzeka kwindalo kaThixo engabantu. Ngaba yayinokumthobela kunokuba ithobele uThixo? Ngokucacileyo waqalisa ukunqwenela ubuncinane isabelo kunqulo olwalusingiswa kuThixo. (Luka 4:5-8) Esenza ngokomnqweno wakhe, waba ngumchasi kaThixo. Ngenxa yesi sizathu eBhayibhileni kuthethwa ngaye ngokuthi nguSathana, gama elo elithetha uMchasi.—Yobhi 1:6.
11. Sisiphi isizinzi esiphilileyo esikhoyo sokukholelwa ukuba uSathana ukho ngokwenene?
11 Kule nkulungwane yama-20 yabantu abathanda izinto eziphathekayo, ukukholelwa kumntu womoya onjalo onguSathana akwamkelwa. Kodwa ke, ngaba indlela yokucinga exhaphakileyo yakhe yalukhokelo oluqinisekileyo lokufumana inyaniso? Phakathi kwabo bafundisisa izifo, yakhe ayamkelwa into yokukholelwa ukuba iintsholongwane ezingabonakaliyo zazingunobangela wazo. Kodwa ngoku impembelelo yazo yaziwa kanobom. Ngokuqinisekileyo, ukungamkelwa kwento akutheth’ ukuba inokutyeshelwa. UYesu Kristu wayephuma kummandla womoya ibe wayenokuthetha ngegunya ngobomi obulapho. Ngokungqalileyo wamchaza uSathana njengomntu ongumoya ombi. (Yohane 8:23; Luka 13:16; 22:31) Kuphela kungokuqwalasela ubukho bolu tshaba lomoya esinokuthi siyiqonde indlela iimeko ezimbi ngolo hlobo ezaqalisa ngayo kulo mhlaba.
12. USathana wathetha njani nomfazi onguEva, yaye kungani wathetha ngale ndlela nje?
12 Ingxelo ephefumlelweyo, kwiGenesis isahluko 3, ichaza indlela uSathana awaqhubeka ngayo esanelisa umnqweno wakhe ophosakeleyo. Kumyezo wase-Eden waya kumfazi onguEva ngendlela eyafihla ufaniso lwakhe lokwenene. Wasebenzisa isilwanyana esasidla ngokubonwa sesi sibini singabantu—inyoka. Ngokucacileyo esebenzisa oko singakubiza ngokuthi ngumoya wemilozi, wenza ngokungathi amazwi akhe ayephuma kwesi sidalwa. Ubulumko baso obungokwemvelo bayifanela kakuhle imbonakalo uSathana awayefuna ukuyibonisa.—Genesis 3:1; ISityhilelo 12:9.
13. Wathini uSathana kuEva, ibe ngayiphi injongo ecacileyo?
13 Kunokumyalela ngokungqalileyo umfazi ukuba akhangele kuye njengomlawuli wakhe, uSathana kuqala wafuna ukuhlwayela ukuthandabuza kwingqondo yakhe, ebuza oku: “Utshilo na okunene uThixo ukuthi, Ze ningadli kuyo yonke imithi yomyezo?” Kwabangathi wayesithi: ‘Imbi gqitha into yokuba uThixo abe uthe ze ningadli kuyo yonke imithi esemyezweni.’ Ngale nto wayethetha ukuba kwakunokwenzeka ukuba uThixo wayebandeza into elungileyo. UEva waphendula ngokucaphula isalelo sikaThixo, esasibandakanya umthi omnye kuphela, yaye echaza nokuba isohlwayo sokungathobeli yayikukufa. Kwelo thuba, uSathana walinga ukukusingela phantsi ukuhlonela kwakhe imithetho kaThixo, esithi: “Anisayi kufa: kuba esazi uThixo ukuba, mhlana nithe nadla kuzo, oqabuka amehlo enu, nibe njengoThixo, nazi okulungileyo nokubi.” (Genesis 3:1-5) Ujongene nemeko enjalo, wena yintoni engewawuyenzile?
14. (a) Kungani uEva waba lixhoba likaSathana? (b) Wenza ntoni uAdam?
14 UEva wazivumela ukuba atsalwe ngumnqweno wokuzingca. Wakudla oko uThixo wayekwalele. Emva koko, ngokubongozwa nguye, umyeni wakhe uAdam naye wadla. Wakhetha ukuthelela yena kunokuvisisana noMdali wakhe. (Genesis 3:6; 1 Timoti 2:14) Waba yintoni umphumo?
15. Ke ngoko, uyintoni unobangela wolwaphulo-mthetho nogonyamelo, kwanezifo nokufa, eziye zayinxalenye yobukho babantu?
15 Yonke intsapho engabantu yeyeliselwa esonweni nakukungafezeki. Ngoku uAdam noEva babengenakudlulisela imfezeko ababekhe banayo kwinzala yabo. Kanye njengokuba imibhalo eveliswe kwinto enesiphene yonke inesiphene esifanayo, ngoko yonke inzala yabo yazalelwa esonweni, ikuzuz’ ilifa ukutyekela ekuzingceni. (Genesis 8:21) Olu tyekelo, lwakungahoywa, lukhokelele kububi obususe uxolo nonqabiseko kuluntu. Koku kuzuzw’ ilifa kwesono okuthe kwaphumela kwisifo nokufa.—Roma 5:12.
Iimbambano Ezaveliswayo
16, 17. (a) Ukuze siqonde isizathu sokuba uThixo anyamezele le meko ithuba elide kangaka, yintoni esimele siyiqonde? (b) Ngokwenene iyintoni imbambano eyaveliswayo?
16 Ekukhanyeni kwezi zibakala, iingqondo zethu zibuyela emva kumbuzo ongesizathu sokuba uThixo eyinyamezele le meko, eyivumela ikhulele kumlinganiselo ekuwo. Kungenxa yembambano enkulu eyaveliswayo nomphumo wayo kwindalo iphela. Kwenzeka njani oko?
17 Ngempikiswano yakhe yokuba umthetho kaThixo kuAdam noEva wawungabalungelanga nangokucel’ umngeni umphumo wokungathobeli owachazwa nguThixo, uSathana wayethandabuza ulawulo lukaThixo. Akazange asithandabuze isibakala sokuba uThixo ungumlawuli. Kunoko, imbambano eyaveliswa nguSathana yayisekelwe ekulungeni kolawulo lukaYehova, ulongamo Lwakhe, nobulungisa beendlela Zakhe. Ngelikhohlisayo, uSathana waphikisa ngelithi abantu babenokuqhuba kakuhle ngokuzilawula, xa bezenzela izigqibo ezizezabo kunokuzithoba kulwalathiso lukaThixo. (Genesis 3:4, 5) Noko ke, ngokwenene, ngokwenjenjalo babeya kulandela ukhokelo lotshaba lukaThixo.
18. (a) Yiyiphi enye imbambano eyayibandakanyekile, ibe oku kuboniswa phi eBhayibhileni? (b) Le mbambano isibandakanya njani?
18 Kwakubandakanyeke nenye imbambano. Ekubeni ezi zidalwa zikaThixo zamnikela umva apho e-Eden, zaziza kwenza ntoni ezinye? Kamva, ngemihla yendoda uYobhi, uSathana wabatyhola ngokuphandle abo bakhonza uYehova ngokuthi benjenjalo, kungengenxa yokuthanda uThixo nolawulo lwakhe, kodwa benjenjalo ngokuzingca, kuba uThixo ebalungiselela yonke into. USathana wayethetha ukuba akukho mntu wayenokuthi xa ekwingcinezelo aluxhase ngokunyanisekileyo ulongamo lukaYehova. Ngoko ukunyaniseka nengqibelelo yazo zonke izidalwa ezinengqondo ezulwini nasemhlabeni kwathandatyuzwa. Ngaloo ndlela le mbambano ibandakanya wena.—Yobhi 1:8-12; 2:4, 5.
19, 20. Ngokungabatshabalalisi ngokukhawuleza abavukeli, liliphi ithuba uThixo awalinika izidalwa zakhe, ezomoya nezingabantu?
19 Ejongene nocelomngeni olunjalo, wayeya kwenza ntoni uYehova? Ngewayemtshabalalise ngokulula uSathana noAdam noEva. Oko ngekwakubonise amandla olongamo lukaYehova. Kodwa ngaba ngekwakuyiphendule imibuzo eyaphakamayo ngoku ezingqondweni zazo zonke izidalwa zikaThixo ezazondele ezi ziganeko? Uxolo nonqabiseko lukanaphakade lwendalo iphela lwafuna ukuba le mibuzo izinziswe ngokupheleleyo, kube kanye ize izinziselwe amaxesha onke. Ngaphandle koko, ingqibelelo nokunyaniseka kwayo yonke indalo kaThixo enengqiqo kuye kwathandatyuzwa. Ukuba ibimthanda, ibiya kufuna ukusiphendula eso sityholo sobuxoki. UYehova wayinika ithuba lokwenza kanye oko. Kwakhona, ngokuvumela uAdam noEva ukuba bavelise inzala (nangona ingafezekanga), uThixo wayeza kuthintela ukubhangiswa kwentsapho yabantu—ntsapho leyo eye yaquka thina sonke baphilayo namhlanje. Oku kwakuya kunika le nzala ithuba lokuzikhethela enoba yayiya kuthobela ulawulo lobuthixo na. Olo khetho yinto ojongene nayo ngoku!
20 Ngoko, kunokuphumeza isohlwayo sokufa kwangoko, uYehova wabavumela abo bavukelayo ukuba baphile okwethuba elithile. UAdam noEva bagxothwa e-Eden, ukuze bafe ngaphambi kokuphela kweminyaka eliwaka. (Genesis 5:5; thelekisa iGenesis 2:17 neyesi-2 kaPetros 3:8.) NoSathana wayeza kutshatyalaliswa ngexesha elifanelekileyo, ngokungathi yinyoka enentloko etyunyuziweyo.—Genesis 3:15; Roma 16:20.
Okutyhilwe Kukudlula Kwexesha
21, 22. (a) Ngokuphathelele ulawulo, yintoni ebisenziwa nguSathana nangabantu ebudeni bexesha elivunyelwe nguThixo? (b) Yintoni eboniswa yimbali yabantu ngokubhekisele kurhulumente ozabalazela ukutyeshela uThixo?
21 Ube yintoni umphumo wokucel’ umngeni ukulunga kolawulo lukaThixo? Ngaba umntu uye wafumana ingenelo ngokuzabalazela ukuziqhubela ngokwakhe imicimbi yakhe? Uluntu luye lwavunyelwa ukuzama zonke iintlobo ezinokuyileka zoorhulumente. UYehova akayithintelanga imigudu yomntu ngaphambi kokuba imiphumo epheleleyo ibe ingabonwa. Kwanenkulungwane edlulileyo ibingaba ikhawuleze gqitha. Ngoko umntu wayesandul’ ukungena nje “kwixesha lobugcisa” ibe wayesandul’ ukuqala ukwenza amabango amakhulu ngoko wayeya kukufeza.
22 Kodwa ngaba kufuneka enye inkulungwane ukuze kubonwe oko umphumo uya kuba kuko kwikhondo lomntu lokungalawulwa nguThixo? Kwanamadoda adumileyo eburhulumenteni nakwezenzululwazi ayavuma ukuba umhlaba ujongene nengozi embi yokonakaliswa. Ngokuqinisekileyo uThixo akuyomfuneko ukuba avumele ukonakaliswa okupheleleyo ukungqina ukusilela okupheleleyo kokuzilawula komntu. Njengoko ubungqina beminyaka engamawaka amathandathu bunikela ubungqina ngokwenzekayo xa urhulumente etyeshela uThixo, akunakuze kutshiwo ukuba kwakungekho xesha laneleyo lokwenza ulawulo lwabantu lugqibelele. Izibakala zibonisa ukuba akukho rhulumente ozimele geqe kuThixo unokuzisa uxolo nonqabiseko lokwenene kulo lonke uluntu.
23. Yintoni eza kwenzeka kungekudala eya kuvulela indlela yokulawulwa komhlaba ngobulungisa nguNyana kaThixo?
23 Njengoko siza kubona kamva, kude ngaphambili nangokucwangciswa kwexesha ngokugqibeleleyo uYehova uThixo waphawula isizukulwana esithile esasiya kumbona eshenxisa yonke imvukelo enxamnye nolawulo lwakhe lobuthixo kwindalo iphela. Akuyi kutshatyalaliswa nje kuphela abantu abangendawo kodwa kuza kuthintelwa uSathana needemon zakhe ngokungathi baphoswe enzonzobileni, bangakwazi ukuphembelela imicimbi yabantu okanye yezithunywa zezulu. Oku kuza kuvulel’ indlela ukulawulwa komhlaba ngobulungisa ngoburhulumente boNyana kaThixo. Ebudeni bethuba leminyaka eliwaka, loo rhulumente uya kuyiphelisa yonke ingozi eziswe lulawulo lokuzingca lomntu obeluqhubeka kangangamawaka eminyaka. Uya kubuyisela umhlaba kubuhle beparadisi aze abuyisele noluntu olunentobelo kwimfezeko eyayinanditshwa e-Eden.—ISityhilelo 20:1, 2; 21:1-5; 1 Korinte 15:25, 26.
24. (a) Kungani uSathana needemon zakhe beza kukhululwa ekupheleni kweminyaka eliwaka? (b) Uya kuba yintoni umphumo?
24 IBhayibhile ithi ekupheleni kolo lawulo lwewaka leminyaka uSathana needemon zakhe bokhululwa ithuba elifutshane kwimiqathango abebeyimiselwe. Ngoba? Ukuze bonke abo boba bephila ngoko babe nethuba lokuzibonakalisa benyanisekile kulawulo lukaYehova olongamileyo. Inginginya yabantu iya kube ivusiwe emangcwabeni. Kwabaninzi eli iya kuba lithuba labo lokuqala lokubonakalisa phantsi kovavanyo ukuthanda kwabo uThixo. Le mbambano iya kufana naleyo yaveliswa e-Eden—enoba boluxhasa na ulongamo lukaYehova ngokuthobela ngokuthembekileyo. UYehova unqwenela kuphela abo uthando lwabo lushukumisa ukunyaniseka okunjalo njengabalawulwa bakhe. Abo banqwenela ukukholana notshaba lukaThixo needemon zakhe nakwawaphi na amalinge enziwa ngabo ukuphazamisa ngokutsha uxolo lwendalo iphela baya kukhululeka ukuba bazikhethele ngolo hlobo. Kodwa ngokuthi ngaloo ndlela bagatye urhulumente kaThixo, baya kufanelwa yintshabalalo. Ibe ngeli xesha iya kufika ngequbuliso, ngokungathi ngumlilo ophuma ezulwini. Bonke abavukeli, abokomoya nabangabantu, ngoko baya kutshabalala ngonaphakade.—ISityhilelo 20:7-10.
25, 26. Ukusingatha kukaYehova imicimbi ngokwenene kuphumele njani kwingenelo yakhe ngamnye wethu?
25 Kuyinyaniso ukuba, kangangamawakawaka eminyaka uluntu belubandezeleke kanobom. Kodwa oku bekungenxa yokhetho lwabazali bethu bokuqala, ingelulo ukhetho lukaThixo. UThixo unyamezele ungcikivo yaye uye wanyamezela izinto ezingamasikizi kuye ngalo lonke ixesha. Kodwa kuThixo, lowo kuye ‘imini enye injengeminyaka eliwaka,’ uthabatha ithuba elide ukujonga imicimbi, ibe oku kuyingenelo kwizidalwa zakhe. Kunjengoko umpostile ophefumlelweyo wabhala oku: “INkosi ayilibali dinga, njengoko abathile baba iyalibala; isuka izeke kade umsindo kuthi, ingangi kungatshabalala nabani; inga bonke bangasinga enguqukweni.” (2 Petros 3:8, 9) Ukuba bekungengenxa yomonde nokuzeka kade umsindo kukaThixo, akukho namnye kuthi obenokuba nethuba lokufumana usindiso.
26 Phofu ke, masingagqibi ngelithi ebudeni beminyaka engamawaka amathandathu edluleyo indima kaThixo ibiyeyokuyekelela nje kuphela. Akunjalo, ebengabunyamezeli nje ubungendawo, elinde ixesha lakhe yaye engathabathi manyathelo. Njengoko siza kubona, izibakala zibonisa okwahlukileyo koko.
[Umfanekiso okwiphepha 51]
USathana waphikisa ngelithi phantsi kovavanyo bonke abantu babeya kuyaphula ingqibelelo baze bazimele geqe kuThixo