Isahluko 9
Uxolo Nonqabiseko Emhlabeni Wonke—Lithemba Elinokuthenjwa
1, 2. Ziziphi iimeko, ezaxelwa kwangaphambili eBhayibhileni, ezaziya kwenza lo mhlaba ube yindawo eyolisa gqitha ukuphila kuyo?
LO MHLABA ubunokuba yeyona ndawo iyolisayo nebangel’ umdla ekunokuphilwa kuyo ukuba iimeko eziseluxolweni nakunqabiseko lokwenyaniso bezesamele kwiindawo zonke. Nangona zikude lee kuko oko ngoku, iBhayibhile ixela kwangaphambili ukuba umhlaba usaza kuba likhaya elizukileyo apho intsapho engabantu iya kunandipha ubomi ngokuzeleyo.
2 Ithembisa ntoni kanye iBhayibhile? Sinokuqiniseka njani ukuba iya kuzaliseka?
Isiseko Esiqinileyo Sokuba Nentembelo
3, 4. (a) Sifunda ntoni ngokuthenjwa kwemithetho esisiseko elawula ummandla wendalo? (b) Ngubani uMenzi waloo mithetho, ibe ke yintoni enye esinesizathu esihle sokukholosa ngayo?
3 Imithetho ethile esisiseko ilawula indalo iphela. Emininzi siyithabatha lula. Ukuphuma kwelanga, ukutshona kwelanga, iimbonakalo zenyanga namaxesha onyaka ayafika aze adlule ngendlela efak’ isandla ekuvisisaneni kokuphila kwabantu. Abantu benza iikhalenda baze bacebe imisebenzi kwiminyaka engaphambili. Bayazi ukuba ukuhamba kwelanga, inyanga nezijikelezi-langa kunokuthenjwa. Yintoni esinokuyifunda koku?
4 UMenzi waloo mithetho uthembeke ngokupheleleyo. Sinokukholosa ngoko akuthethayo nakwenzayo. Kungenxa yegama lakhe, njengoMdali wezulu nomhlaba, le nto iBhayibhile ithembisa ngolungelelwaniso olutsha lobulungisa. (Isaya 45:18, 19) Kumsebenzi wethu oqhelekileyo wobomi, sidla ngokuthi ngomlinganiselo othile sikholose ngabanye abantu—abo basa ukudla emalikeni, abo bahambisa iposi kwanezihlobo ezisenyongweni. Ngoko, akukho ngqiqweni na ukuba nentembelo egqithiseleyo kuThixo nakwinzaliseko ethile yamadinga akhe?—Isaya 55:10, 11.
5. Ukungabi nayo intshukumisa yokuzingca koko uThixo asithembise kona kusinika njani ukholo?
5 Nangona amadinga abantu edla ngokungathembeki, amadinga kaThixo athembeke ngokupheleleyo ibe ngawokulungelwa kwethu, akangawokulungelwa kwakhe. Nangona uThixo engaswele nantoni na kuthi, uyayoliswa ngabo bamkholelwayo ngenxa yokuba bemthanda yena neendlela zakhe zobulungisa.—INdumiso 50:10-12, 14.
6. Luhlobo luni lokholo iBhayibhile esinceda ukuba silufumane?
6 Ngoko, kwakhona, iBhayibhile ifuna sisebenzise amandla ethu okuqiqa. Ayilufuni ngegunya ukholo olumfamekileyo okanye ukholo olungaphandiyo. Enyanisweni, ichaza ukholo lokwenyaniso ngokuthi “kukukholosa ngezinto ezithenjiweyo; kukweyiseka bubukho bezinto ezingabonwayo.” (Hebhere 11:1) EBhayibhileni, uThixo usinika isizinzi esiphilileyo sokholo. Ukuphila kweso sizinzi kucaca ngakumbi nangakumbi njengoko sikhula ekwazini iLizwi likaThixo size sibone inyaniso yalo isebenza kubomi bethu nangokwenzaliseko yeziprofeto zalo.—INdumiso 34:8-10.
7. Njengoko sihlolisisa amadinga eBhayibhile eentsikelelo zexesha elizayo yintoni esingamele silindele ukuba ukuwakholelwa kofuna yona kuthi?
7 Amadinga eBhayibhile eentsikelelo zexesha elizayo agqithela ngaphaya koko abantu banokuzama ukukunikela. Kanti loo madinga akafuni ukuba sikholelwe kwizinto ezinxamnye nawo onke amava abantu. Ibe akachasene neminqweno yabantu eqhelekileyo. Khawuqwalasele ezinye zezi ntsikelelo zizukileyo uze ubone indlela okuyinyaniso ngayo oku.
Umhlaba Uza Kuba Likhaya Elingumyezo
8, 9. (a) Yiyiphi ingcamango efanele idluliselwe ezingqondweni zethu ligama elithi “paradisi”? (b) Ngaba into enjalo yakha yakho emhlabeni? (c) Yintoni ebonisa ukuba kuyinjongo kaThixo ukuba iParadisi yesamele emhlabeni wonke?
8 Igama elithi “paradisi” liphuma kumagama afanayo awayesetyenziswa kumaxesha amandulo (par·desʹ ngesiHebhere; pai·ri·daeʹza ngesiPersi; pa·raʹdei·sos ngesiGrike), magama lawo ayesetyenziselwa ukuchaza izinto ngoko ezazikho ngokwenene emhlabeni. Onke la magama anengcamango esisiseko yepaki entle okanye umyezo onjengepaki. Njengakumaxesha amandulo, ngokukwanjalo namhlanje zininzi iindawo ezinjalo, zimbi zazo ziipaki ezinkulu. Ibe umntu ubulangazelela ngokwemvelo ubuhle bazo. IBhayibhile ithembisa ukuba iya kufika imini yaxa lo mhlaba uya kuba ngumyezo onjalo ofana nepaki okanye iparadisi!
9 Xa uThixo wadala isibini sokuqala esingabantu wasinika umyezo wase-Eden njengekhaya laso, gama elo elithetha “iParadisi Yemihlali.” Kodwa le Paradisi yayingayi kupheleliselwa kuloo mmandla mnye. UThixo wathi kubo: “Qhamani, nande, niwuzalise umhlaba niweyise.” (Genesis 1:28; 2:8, 9) Oku kwakuya kuquka ukuvulwa kwemida yeParadisi ise esiphelweni somhlaba, injongo eyachazwa nguThixo ayizange iphele ngenxa yekhondo lokungathobeli lika-Adam noEva. UYesu Kristu wabonakalisa intembelo kule njongo xa wathembisa indoda eyayisifa ecaleni kwakhe ukuba yayiya kuba nethuba lokuphila kwiParadisi yomhlaba elolo hlobo. (Luka 23:39-43, NW) Kuya kwenzeka njani oku?
10. Ngokutsho kweSityhilelo 11:18, yiyiphi imiqobo esa eParadisi uThixo athembisa ukuyishenxisa?
10 “Embandezelweni enkulu” ezayo uThixo uya kushenxisa yonke imiqobo ethintela ukuza kweParadisi yakhe yasemhlabeni ‘ngokonakalisa abo bawonakalisayo umhlaba.’ (ISityhilelo 11:18) Ngaloo ndlela uThixo uya kwenza into oorhulumente babantu abangenakuze bayenze. Uya kubashenxisa bonke abo bawungcolisa ngokuzingca umhlaba ukuze banelise ukubawela urhwebo, bonke abalwa iimfazwe ezitshabalalisayo nabo bonke abawusebenzisa kakubi umhlaba ngenxa yokungabi nantlonelo ngezipho ezininzi ezilungiselelwe nguThixo.
11. (a) Sisiphi isiganeko esingokwembali esibonisa ukuba ukumiselwa kweParadisi emhlabeni akuchasananga namava abantu? (b) Oku komeleza ukholo lwethu kweyiphi intsikelelo ethenjisiweyo?
11 Ngoko wonke umhlaba uya kutyatyamba bubuhle. Uhlaziyeko nococeko ziya kwandula ke zibe kumoya wawo, emanzini naselizweni. Oku kubuyiselwa kweParadisi asinto ingenakukholelwa, ibe akuchasananga namava abantu. Kwiinkulungwane ezininzi ezadlulayo, xa uhlanga lukaSirayeli lwaphumayo ekuthinjweni eBhabhiloni, uYehova uThixo walubuyisela kwilizwe lalo, ngoko elaliyinkangala. Kanti, ngenxa yentsikelelo kaThixo kulo nomsebenzi walo, kungekudala eli lizwe laba lihle kangangokuba izizwe ezingabamelwane zadanduluka zathi: ‘Lisuke laba njengomyezo wase-Eden!’ Kwakhona laba lelinemveliso kunene, lishenxisa nasiphi na isisongelo sokulamba nendlala. (Hezekile 36:29, 30, 35; Isaya 35:1, 2; 55:13) Oko uThixo wakwenzayo ngomlinganiselo omncinane kucacisa oko asaya kukwenza ngomlinganiselo wehlabathi lonke ukuzalisa amadinga akhe. Bonke abantu ababalelwa befanelekile ukuphila ngelo xesha baya kunandipha uyolo olulungiselelwe nguThixo lobomi eParadisi.—INdumiso 67:6, 7; Isaya 25:6.
Ukuphela Kobuhlwempu Nobukhoboka Boqoqosho
12. Ziziphi iimeko zoqoqosho nezomsebenzi ezimele ziconjululwe ukuba siza kubunandipha ngokwenene ubomi?
12 Ubuhlwempu nokukhotyokiswa ziinkqubo zoqoqosho lwelizwe zizinto eziqhelekileyo kumhlaba wonke. IParadisi ibingayi kunanditshwa ngokwenene ukuba izigidi bezibulalekela ukufumana into nje yokuziphilisa okanye bezisebenza umsebenzi oyindinisa owenza umntu abe njengentsimbi encinane engabalulekanga kumatshini omkhulu.
13-15. (a) Siwufumana phi umzekelo ongokwembali osibonisa oko ukuthanda kukaThixo ngomntu kukuko kule nkalo? (b) Elo lungiselelo lafak’ isandla njani kunqabiseko nasekunandipheni ubomi komntu ngamnye nasentsatsheni?
13 Ukuthanda kukaThixo ngomntu kule nkalo kubonwa kwindlela awayalathisa ngayo imicimbi enjalo kuSirayeli wamandulo. Apho, ntsapho nganye yafumana umhlaba olilifa. (ABagwebi 2:6) Nangona oku kwakunokuthengiswa, nabantu bazithengisele ebukhobokeni ukuba babetshone ematyaleni, uYehova sekunjalo wenza amalungiselelo okulumkela ukufunjwa kwemihlaba emikhulu okanye ukukhotyokiswa kwabantu ithuba elide. Njani?
14 Ngamalungiselelo angokoqoqosho aseMthethweni awawunika abantu bakhe. Unyaka wesixhenxe wobukhoboka ‘wawungunyaka woyekelelo’ xa nawuphi na umSirayeli osebukhobokeni wayemele akhululwe. Kwakhona, unyaka wama-50 yayingunyaka “wentlokoma” kuhlanga luphela, unyaka ‘wokuvakalisa inkululeko’ kubo bonke abemi. (Duteronomi 15:1-9; Levitikus 25:10) Ngoko naliphi na ilifa elalithengisiwe lalibuyiselwa kumnini walo wokuqala. Bonke abasebukhobokeni babekhululwa, nakubeni iminyaka esixhenxe isenokuba yayingaphelanga. Eli yayilixesha elivuyisayo lokumanyana ngokutsha nangendlela eyonwabisayo kweentsapho nesiqalo esitsha kubomi obungokoqoqosho. Ngaloo ndlela, akukho mhlaba wawunokuthengiswa ngokusisigxina. Ukuthengiswa kwawo, kwakungathi yingqesho nje eyayinokuthi iphele ngonyaka weNtlokoma kungekhona ngemva koko.—Levitikus 25:8-24.
15 Konke oku kwafak’ isandla ekuzinzeni koqoqosho lohlanga nonqabiseko noxolo lwentsapho nganye. Xa le mithetho yathi yagcinwa, olo hlanga lwalungaweli kumbono olusizi esiwubonayo namhlanje kumazwe amaninzi kangaka apho kukho abazizityebi ngokugqithiseleyo nabangamahlwempu ngokugqithiseleyo. Iingenelo ezafunyanwa ngabantu ngabanye zalomeleza olu hlanga kuba akukho namnye ekwakufuneka esingelwe phantsi aze acinezelwe ziimeko ezimbi zoqoqosho. Kunjengoko kwabikwa ebudeni bolawulo lukaKumkani uSolomon kwathiwa, “ahlala amaYuda namaSirayeli ekholosile, elowo ehleli phantsi komdiliya wakhe naphantsi komkhiwane wakhe.” (1 Kumkani 4:25) Namhlanje abaninzi abanakuzisebenzisa zonke iziphiwo zabo nokuzimisela kwabo kuba babanjiswe kwiinkqubo zoqoqosho ezibanyanzelela ukuba bakhonze iminqweno yabambalwa okanye bakhonze owomntu omnye. Phantsi kwemithetho kaThixo umntu okhutheleyo wayencedwa ukuba anikele ngobuchule bakhe kwimpilontle nakulonwabo lwabo bonke. Oku kusenza sizive sixabisekile yaye sinesidima nto ezo eziya kunanditshwa ngabo bazuza ubomi kuLungelelwaniso Olutsha lukaThixo.
16. Ngokuphathelele iimeko zokuphila nemeko kabani engoqoqosho, uBukumkani bukaThixo buya kulungiselela ntoni kubo bonke abalawulwa babo?
16 Kumhlaba wonke isiprofeto sikaMika 4:3, 4 siya kuzaliseka ngendlela ezukileyo. Abantu abathanda uxolo abaphila phantsi kolawulo lukaThixo lobulungisa baya “kuhlala elowo phantsi komdiliya wakhe, naphantsi komkhiwane wakhe, kungabikho uboyikisayo; kuba umlomo kaYehova wemikhosi uthethile.” Akukho namnye kubalawulwa boBukumkani bukaThixo oya kuhlala kumabobosi amdaka okanye kumagumbi aqeshwayo axineneyo. Baya kuba nemihlaba namakhaya angawabo. (Isaya 65:21, 22) UKumkani, uKristu Yesu, wathembisa kudala ukuba ‘abanobulali, umhlaba baya kuwudla ilifa,’ ibe ‘emazulwini nasehlabathini unegunya’ lokuqinisekisa ukuba oku kuyenzeka.—Mateyu 5:5; 28:18.
Impilo Nobomi Obusisigxina
17-19. (a) Yintoni ebonisa ukuba impilo entle nobomi obude zizinto eziyiminqweno yemvelo yoluntu? (b) Ziziphi izibakala ezingobomi babantu nangohlaza ezenza ubufutshane bobomi babantu bubonakale bumangalisa? (c) Yintoni into ekhoyo ngobuchopho bomntu ebonisa ukuba kusengqiqweni ukukholelwa ukuba umntu wayeyilelwe ukuphila ngonaphakade?
17 Noko ke, akukho nanye kwezi meko zintle ebingenza ubomi bube seluxolweni nakunqabiseko lokwenyaniso lo gama nje ukugula, nokwaluphala nokufa zifiphaza ikamva. Ngaba akukho ngqiqweni okanye kuchasene na namava abantu ukuthemba ukukhululeka kwezi zinto zinxunguphalisayo? Ngokuqinisekileyo akuchasene nemvelo yomntu ukukufuna oku, kuba abantu bachithele ubomi nezixa ezingenakubalwa zemali ekuzameni ukufeza oku.
18 Ngoko ithemba lempilo nobomi obusisigxina zizinto ezisengqiqweni ngokupheleleyo. Okunene, into engekho ngqiqweni yile: Kanye xa abantu befikelela ubudala apho bathi baqalise ukuba nolwazi, amava nobuchule bokwenza izinto ezifanelekileyo, bathi baqalise ukwaluphala baze ke ekugqibeleni bafe. Kanti, kukho imithi ephila kangangamawakawaka eminyaka! Kutheni le nto umntu, owenziwe ngokomfanekiselo kaThixo, ephila nje iqhezu lexesha eliphilwa luhlaza oluthile olungenangqiqo? Akafanele na yena ngokusengqiqweni aphile ixesha elide kakhulu?
19 Kwiingcaphephe ezifundisisa ngokwaluphala, le nkqubo iseyimfihlelo gqitha. Enye into eyimfihlelo sisibakala sokuba ubuchopho bomntu buyilelwe ukwamkela izixa zenkcazelo eziphantse zingabi namlinganiselo. Kunjengoko omnye umbhali wezenzululwazi wathi, ubuchopho “bukwazi kakuhle ukusingatha nawuphi na umthwalo wokufunda nenkumbulo ekungenzeka isiqu esingumntu sibuthwalise bona—ibe bungenjenjalo kangangezihlandlo eziliwaka lezigidi ngaphezu kweso sixa.”55 Oko kuthetha ukuba ubuchopho bakho buyakwazi ukusingatha kungekuphela nje nawuphi na umthwalo osenokubuthwalisa bona kwixesha lobomi beminyaka engama-70 okanye engama-80 kodwa kwanezihlandlo ezingakumbi eziliwaka lesigidi! Akumangalisi ukuba umntu abe ulunxanelwe kangaka ulwazi, abe unomnqweno ololu hlobo wokufunda ukwenza nokufeza izinto. Kanti uthintelwa bubufutshane bobomi bakhe. Kusengqiqweni na ukuba amandla angaqhelekanga obuchopho bomntu amele abekho ukanti kungasetyenziswa kwaneqhezu elincinane lamandla abo? Akukho ngqiqweni ngakumbi na ukugqiba ngelithi, njengoko iBhayibhile ibonisa, uYehova wamyila umntu ukuba aphile ngonaphakade emhlabeni waza wamnika ubuchopho obuyifanele kakuhle loo njongo?
20. Yintoni iBhayibhile ethi uThixo uthembise ukuyenzela uluntu ngokubhekisele kwimiphumo yesono, kuquka nokufa ngokwako?
20 IBhayibhile ibonisa ukuba ngaphambili umntu wayenalo ithuba lokuphila ngonaphakade kodwa waphulukana nalo ngemvukelo: “Isono sangena ngamntu mnye [uAdam] ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.” (Roma 5:12) Kodwa iBhayibhile ikwanedinga likaThixo lokuba kwiParadisi ebuyiselweyo, ‘akuyi kubakho kufa, kungabi sabakho nasijwili, nakukhala nantlungu.’ (ISityhilelo 21:3, 4; thelekisa esesi-7:16, 17.) Ithi ubomi obungunaphakade, obungenayo imiphumo yesono, buyinjongo kaThixo ngoluntu. (Roma 5:21; 6:23) Ngaphezu koko, ithembisa ukuba iintsikelelo zoLungelelwaniso Olutsha lukaThixo ziya kuvulelwa amawaka ezigidi athe afa kwixa elidluleyo. Njani? Ngovuko lwabafileyo oluqongqotha ingcwaba eliqhelekileyo loluntu. Ngentembelo uYesu waxela kwangaphambili wathi: “Kuza ilixa abaya kuthi ngalo bonke abasemangcwabeni balive ilizwi lakhe; baphume ke.”—Yohane 5:28, 29.
21, 22. Kungani ithemba lokubuyiselwa empilweni epheleleyo kungekuko ukuzikhohlisa ukuba nethemba kulo?
21 Namhlanje inzululwazi yezamayeza iyakwazi ukuvelisa “iziyobisi ezingummangaliso” ize iphumeze imisebenzi yotyando eyayinokubonakala ingakholeleki kwanakumashumi eminyaka embalwa edluleyo. Ngaba sifanele sithandabuze ukuba Lowo wadala abantu unokwenza imisebenzi yokuphilisa emangalisa ngakumbi? Ngokuqinisekileyo uMdali unamandla okubuyisela abantu abaneentliziyo zobulungisa kwimpilo entle, ade ahlehlise nokwaluphala. Ibe oku unokukwenza ngaphandle kokubhenela kwiziyobisi, kutyando, okanye kumalungu enziwe ngumntu. Ngovelwano, uThixo unikele ubungqina bokuba iintsikelelo ezinjalo asikokuzikhohlisa ukuthembela kuzo.
22 UThixo wamnika amandla uNyana wakhe ngoxa wayesemhlabeni ukuba enze imisebenzi yamandla yokuphilisa. Le misebenzi isiqinisekisa ukuba akukho buthathaka, siphene, okanye sifo esingaphaya kwamandla kaThixo okuphilisa. Xa umntu onyama yakhe ineqhenqa wabongoza uYesu ukuba amphilise, uYesu esikwe yimfesane wamchukumisa lo mntu yaye esithi: “Hlambuluka.” Ibe, njengoko ingxelo yembali isitsho, “lahlambuluka kwaoko iqhenqa lakhe.” (Mateyu 8:2, 3) UYesu ezi zinto wazenza ebonwa ngokupheleleyo ngamangqina amaninzi, njengoko umbhali-mbali onguMateyu ebika oku: “Kweza kuye izihlwele ezininzi, zinazo iziqhwala, iimfama, izidenge, izilima, nabanye abaninzi, zababeka phantsi ezinyaweni zikaYesu; wabaphilisa; zada zamangaliswa izihlwele ezo, . . . zamzukisa uThixo kaSirayeli.” (Mateyu 15:30, 31) Zifundele ngokwakho ingxelo ekuYohane 9:1-21 uzibonele indlela esisibakala neyinyaniso ngayo ngokwenene ingxelo engokwembali yokuphilisa okunjalo. Ubunyaniso bezi ziganeko bungqinwa ngamangqina amaninzi, kuquka nogqirha, ugqirha wezamayeza uLuka.—Marko 7:32-37; Luka 5:12-14, 17-25; 6:6-11; Kolose 4:14.
23, 24. Kungani kusengqiqweni ukukholelwa ukuba abafi baya kubuyiselwa ebomini phantsi koBukumkani bukaThixo?
23 Ngezizathu ezifanayo akufuneki ukuba silijonge lingakholeleki idinga leBhayibhile lokuba “kuza kubakho uvuko” lwabafileyo. (IZenzo 24:15) Kwaneminyaka emva kokufa, ilizwi, imbonakalo nezenzo zomntu zinokubuyiselwa zisuka kwifilimu okanye kwivideo. Akafanele na Lowo wamdalayo umntu, ukwaziyo ukwakheka kweathom nokwamasuntswana omntu, ukukwazi ukwenza okungaphezulu lee kunoko? Iikhompyutha ezenziwe ngumntu zinokugcina zize zilungelelanise ngokoqobo amawaka ezigidi enkcazelo. Kodwa uThixo wadala le ndalo yoyikekayo yanamawaka ezigidi zamakroza, kroza ngalinye linamawaka ezigidi zeenkwenkwezi. Oko kufikelela kumawaka ezigidi ngezigidi, kumawaka ezigidi ngezigidi zezigidi, kwanangaphezulu lee! Kanti, INdumiso 147:4 ithi: “Ulobala inani leenkwenkwezi, ezibiza zonke ngamagama”! Ngokuqinisekileyo bekuya kuba lula kuThixo, onenkumbulo enkulu ngolo hlobo, ukukhumbula ubuntu babantu ngabanye ukuze ababuyisele ebomini.—Yobhi 14:13.
24 Kwakhona, uYehova usilungiselele imizekelo engokwembali yokomeleza ukholo lwethu kwithemba elimangalisa ngolo hlobo. Wanika uNyana wakhe amandla okubonisa ngokomlinganiselo omncinane oko aya kukwenza ngomlinganiselo omkhulu ebudeni bolawulo lwakhe lobulungisa emhlabeni. UYesu wavusa abantu abafileyo abaliqela, ngokufuthi esenjenjalo ebonwa ngokupheleleyo ngababukeli. ULazaro, awamvusa kufuphi naseYerusalem, wayenethuba efile kangangokuba umzimba wakhe wawuqala ukubola. Ngokuqinisekileyo ithemba lovuko linesiseko esiphilileyo.—Luka 7:11-17; 8:40-42, 49-56; Yohane 11:38-44.
Ukukwazi Komhlaba Ukuba Nabemi Abanjalo
25, 26. Xa abafi bevuswa, iya kubaphi indawo yokuhlala wonke umntu?
25 Ngaba lo mhlaba unganayo indawo entle yokuhlala yabemi abanjalo abaya kuziswa kukuvuswa kwabafileyo? Kwathabatha iminyaka engaphezu kwama-5 000 ukuba abemi bomhlaba bafikelele iwaka lesigidi ekuqalekeni kweminyaka yee-1800. Namhlanje, unabemi abanokuba ngamawaka ezigidi ezihlanu.
26 Ngoko ke, abo badla ubomi namhlanje bamela icandelo elikhulu lenani elisisimbuku sabantu abakhe baphila. Bambi baye baqikelela abemi bomhlaba xa bebonke ukutyhubela yonke imbali yabantu bemalunga nabantu abali-15 000 000 000. Ummandla womhlaba ungaphezu kweehektare ezili-15 000 000 000. Mntu ngamnye ebeya kufumana ummandla ongaphezu kwehektare. Oku bekungayi kuthi nje kuphela kulungiselele isithuba semveliso yokudla kodwa bekungavumela kwanamahlathi, iintaba, kwaneminye imimandla ebukekayo—ngaphandle kokuxinana okungeyomfuneko kwiParadisi. Kwakhona, iBhayibhile ibonisa ukuba asingabo bonke abo ngoku baphilayo abaya kusinda baze baphile kuLungelelwaniso Olutsha. Eneneni, uYesu wathi, “Libanzi isango, iphangalele nendlela, esa entshabalalweni; baninzi ke abangena ngalo.” Kwakhona waphawula ukuba xa kufika intshabalalo yehlabathi, abo bangakwenziyo ukuthanda kukaYehova bamele ‘bemke baye elubethweni olungunaphakade.’—Mateyu 7:13; 25:46.
27. Ngaba umhlaba unokuvelisa ukutya okwanele bonke abo bantu?
27 Kodwa ngaba umhlaba unokuvelisa ukudla okwaneleyo kwabantu abaninzi kangaka? Izazinzulu zithi unako, kwanaphantsi kweemeko ezikhoyo. Ingxelo yeToronto Star yathi: “Ngokutsho kweNtlangano YeZizwe Ezimanyeneyo Kwicandelo Lokudla Nezolimo sele kukho ukudla okuziinkozo okwaneleyo okulinywa zwenibanzi nokunokondla wonk’ ubani osemhlabeni ngeecalorie ezingama-3 000 ngosuku, nto leyo ethetha ukuba . . . malunga nama-50 ekhulwini ngaphezu komlinganiselo ongowona mncinane nowamkelekileyo.”56 Ngokuphathelele ikamva, yacacisa ukuba kwanaphantsi kweemeko zanamhlanje, kunokubakho ukutya okwaneleyo kokwanelisa iintswelo zabemi behlabathi abaphindwe kabini kunabakhoyo. Kwakhona, simele sikhumbule ukuba uYehova uya kubalathisa abantu bakhe ukuba basebenzise amandla omhlaba angawolimo ngokufanelekileyo, kuba INdumiso 72:16 isiqinisekisa ngelithi: “Makubekho intabalala yengqolowa ezweni, ise encotsheni yeentaba.”
28. Kungani kungekho ngozi ebantwini abaphila ngonaphakade yokuba umhlaba ekuhambeni kwexesha ubungaxinana?
28 Simele siphawule oko injongo kaThixo ikuko, njengoko ngaphambili yachazwa kwisibini sabantu sokuqala. Bachazelwa ukuba ‘bazalise umhlaba baweyise,’ bandise imida ye-Eden kuse kwezona ndawo zikude zomhlaba. (Genesis 1:28) Ngokucacileyo, oku kuthetha ukuzalisa umhlaba ngokomlinganiselo owaneleyo, ungaxinani ngabantu. Oko kwakusaya kuvumela umhlaba ‘oweyisiweyo’ ube yipaki yazwenibanzi efana nekhaya lokuqala lomntu elalinjengepaki. Ngoko, lo myalelo wobuthixo ubonisa ukuba ngexesha nangendlela kaThixo efanelekileyo, ukwanda kwabemi kuya kulawulwa.
Isiseko Esiqinisekileyo Solonwabo Olusisigxina
29. Ulwalamano nabanye abantu lunawuphi umphumo kulonwabo lomntu?
29 Noko ke, kwanemekobume entle, ukuma kakuhle ngezinto eziphathekayo, umsebenzi obangel’ umdla nempilo entle aziyi kuqinisekisa ukonwaba kwakho ngokusisigxina. Abaninzi namhlanje banazo ezi zinto ukanti abonwabanga. Kutheni? Kungenxa yabantu ababangqongileyo abasenokuba ngabazingcayo, abanengxabano, abahanahanisayo okanye abanentiyo. Ulonwabo olusisigxina kuLungelelwaniso Olutsha lukaThixo luya kuphuma ubukhulu becala kwinguqulelo yazwenibanzi kwisimo sengqondo sabantu. Ukumthanda nokumhlonela kwabo uThixo nokunqwenela kwabo ukuphumeza iinjongo zakhe kuya kuzisa ukuma kakuhle ngokomoya. Ngaphandle koko, ukuma kakuhle ngezinto eziphathekayo akwanelisi yaye kuba lilize.
30. Sazi njani ukuba abo baphila kuLungelelwaniso Olutsha lukaThixo baya kuba kuphela kwabantu abafak’ isandla kuxolo nakunqabiseko lwabanye?
30 Ewe, kuyolisa ngokwenene ukuba phakathi kwabantu abanobubele, abathobekileyo, abanobuhlobo—abantu onokubathanda uze ukholose ngabo ngokwenene, abavakalelwa ngendlel’ efanayo ngawe. (INdumiso 133:1; IMizekeliso 15:17) Ukuthanda uThixo koko kuqinisekisa uthando lokwenyaniso ngommelwane, nto leyo eya kwenza ubomi buyolise kunene kuLungelelwaniso Olutsha Lwakhe. Bonke abo uThixo aya kubababala ngobomi obungunaphakade baya kube bekungqinile ukumthanda kwabo nabantu abangoowabo. Unabamelwane abanjalo, abahlobo nosebenza nabo, uya kukwazi ukunandipha uxolo nonqabiseko lokwenyaniso nolonwabo olusisigxina.—1 Yohane 4:7, 8, 20, 21.
31. Ukuba ngokwenene siyabufuna ubomi kuLungelelwaniso Olutsha lukaThixo, yintoni esimele siyenze ngoku?
31 Ngokwenyaniso, ithemba elizuke ngolo hlobo ulivulelwe! Ngoko ikhondo lobulumko neliluncedo kukufumanisa okufunekayo ukuze ubufumane. Lingoku ixesha lokuvisisanisa ubomi bakho nezinto ezifunwa nguThixo kwabo baya kusindiswa ukutyhubela “imbandezelo enkulu.”—2 Petros 3:11-13.
[Umfanekiso okwiphepha 98]
Kungekudala luza kufika usuku lwaxa wonke umhlaba uza kuguqulelwa ekubeni yiparadisi