Isahluko 12
Ukuhlonela Igunya Kubalulekile Ukuze Kuphilwe Ngoxolo
1-3. (a) Yintoni eye yafak’ isandla ekucekisweni ngokubanzi kwegunya kumhla wethu? (b) Esi simo sengqondo siboniswa ngaziphi iindlela ezahlukahlukeneyo? (c) Kuphi apho iviwa khona imiphumo?
UMOYA wokuzilawula utyhutyha ihlabathi lanamhla. Ukungathenjwa kwegunya okukho ngokubanzi kuye kwabonakala, ingakumbi kwabo bazalwe ukususela kwiMfazwe Yehlabathi II. Kutheni? Phakathi kwezinye izinto, abazali babo babebone ingcinezelo engenakulinganiswa nanto kwanamacebo obuzwilakhe nawokonakala abo basegunyeni. Baye banembono emfiliba ngegunya. Ngokomphumo, uninzi lwabo, lwakuba ngabazali, aluzange lubethelele ukuhlonitshwa kwegunya ebantwaneni balo. Okungekho sikweni okwenziwa ngabasemagunyeni okubonwa ngabantwana nako akuyincedanga imicimbi. Ngenxa yoko, ukungahlonelwa kwegunya kuye kwaba yinto eqhelekileyo.
2 Oko kungahloniphi kubonakaliswa ngeendlela ezahlukahlukeneyo. Maxa wambi kubonakaliswa ngokwamkela uhlobo lwesinxibo okanye ukuzilungisa okubonakalisa ukugatywa kwemilinganiselo eyamkelekileyo. Kusenokuquka ukudelwa ekuhleni kwamapolisa, okanye kwanogonyamelo nokuphalazwa kwegazi. Kodwa oku akupheleli koku. Kwanaphakathi kwabo bangazibonakalisi ngezi ndlela ziphandle zingakumbi, abaninzi bayayityeshela okanye bayayiphepha imithetho ukuba abavumelani nemithetho enjalo okanye bayifumanisa ingabalungelanga.
3 Le meko iyichaphazele ngokunzulu imeko yasemakhaya, ezikolweni, kwiindawo zengqesho nasekudibaneni namagosa karhulumente. Abantu abangakumbi nangakumbi abakufuni ukuxelelwa nangubani na oko mabakwenze. Basukela abakukholelwa kuyinkululeko engakumbi. Njengoko ujongene nale meko, yintoni oya kuyenza?
4. Ngento esiyenzayo kulo mcimbi, sibonisa isimo sethu sengqondo kweyiphi imbambano?
4 Ikhondo lakho liya kubonisa apho umi khona kwimbambano yolongamo lukaYehova lwendalo iphela. Ngaba ngokwenene uyamhlonela uYehova njengoMthombo woxolo nonqabiseko lokwenyaniso? Ngaba uya kukufuna uze ukusebenzise ebomini bakho oko kuyalelwa liLizwi lakhe? Okanye ngaba uya kuhambisana nabo bathi ngokuzilawula bazenzele izigqibo ezizezabo ngokubhekisele kokulungileyo nokubi?—Genesis 3:1-5; ISityhilelo 12:9.
5. (a) Yintoni edla ngokuba ngumphumo ngokulandela ukhokelo lwabantu abathembisa “inkululeko”? (b) Ukhululeke kangakanani umntu owenza ukuthanda kukaThixo?
5 Ulwazi oluchanileyo lweBhayibhile lunokukukhusela ukuba ungalahlekiswa ngabo bathi, ngoxa ‘bethembisa nje inkululeko, bona ngokwabo babe ngabakhonzi bokonakala.’ Ukulandela ukhokelo lwabantu abanjalo kungasuka nje kukufake kwakuloo meko yobukhoboka. (2 Petros 2:18, 19) Inkululeko yokwenyaniso inokufumaneka kuphela ngokufunda uze wenze ukuthanda kukaThixo. Umyalelo wakhe wobuthixo ‘ungogqibeleleyo wenkululeko.’ (Yakobi 1:25) Oku kunokutshiwo kuba uYehova akasibekeli imiqathango ngokungeyomfuneko, esibiyela ngemithetho engenanjongo iluncedo. Kodwa umthetho wakhe unikela ulwalathiso oluzisa inkululeko, uxolo nonqabiseko olusekelwe kulwalamano olufanelekileyo noThixo nomntu onguwethu.
6, 7. (a) Ngubani ongoyena ukulungeleyo ukwenza into ngokusetyenziswa kakubi kwegunya? (b) UYesu wakubonisa njani okwenzekayo kubantu abazama ukuwuthabathela kubo umthetho?
6 UThixo uwazi ngaphezu kwakhe nabani na umlinganiselo wokonakala komntu nokusetyenziswa kakubi kwegunya. Ibe ulinikele ilizwi lakhe ukuze kungakhathaliseki ukuphakama kwabo babangela ingcinezelo, ababize baziphendulele. (Roma 14:12) Ngexesha elimiselwe nguThixo, ‘baya kunqunyulwa abangendawo ezweni, abanginizayo bancothulwe kulo.’ (IMizekeliso 2:22) Kodwa akunakuphumela ekulungelweni kwethu okusisigxina ukuba sisuka singxame size siwuthabathele kuthi umthetho.—Roma 12:17-19.
7 Ngobusuku bokungcatshwa nokubanjwa kwakhe, uYesu wakugxininisa oku kubapostile bakhe. Ngenxa yeemeko ezazikho kwelo lizwe, kuquka ubukho bamarhamncwa, abantu babedla ngokuphatha izixhobo. Ngoko ngeso sihlandlo kwakukho amakrele amabini kubapostile bakaYesu. (Luka 22:38) Kwenzeka ntoni? Kaloku, babona ukugqwethwa kokusesikweni okuzintloni xa uYesu wabanjwa ngaphandle kwesizathu. Ngoko umpostile uPetros ngokungxama walirhola ikrele lakhe waza wanqumla indlebe yenye yamadoda. Kodwa uYesu wayibuyisela indlebe enqunyuliweyo waza waluleka uPetros wathi: “Libuyisele endaweni yalo ikrele lakho; kuba bonke abathabatha ikrele baya kutshabalala likrele.” (Mateyu 26:52) Abantu abaninzi, nakumhla wethu, ngebesindile ekufeni ngaphambi kwexesha ngokulandela eli cebiso.—IMizekeliso 24:21, 22.
Imbono Efanelekileyo Ngegunya Lehlabathi
8. (a) Njengoko kuchazwe kwabaseRoma 13:1, 2, amaKristu amele abajonge njani abalawuli behlabathi? (b) Athetha ntoni amazwi athi “amiswe nguThixo”?
8 Xa wayebhalela amaKristu aseRoma, umpostile uPawulos waphefumlelwa nguThixo ukuba axubushe ngendlela awayemele aziphathe ngayo ngokuhlobene namagunya ehlabathi. Wabhala oku: “Yonke imiphefumlo mayiwalulamele amagunya awongamileyo. Kuba akukho gunya lingelilo elivela kuThixo; amagunya ke akhoyo amiswe nguThixo. Ngoko olichasayo igunya, umelene nommiselo kaThixo; abo ke bameleneyo nawo, baya kuziguqulela ukugwetywa.” (Roma 13:1, 2) Ngaba oku kuthetha ukuba uThixo ubeke aba balawuli behlabathi egunyeni? IBhayibhile iphendula ngokungqalileyo ngokuthi akunjalo! (Luka 4:5, 6; ISityhilelo 13:1, 2) Kodwa akho ngokuvunyelwa nguye. Ibe indawo “amiswe” kuyo ekuqhubekeni kwembali yamiselwa nguThixo. Yayiyintoni loo ndawo?
9. Nakubeni amagosa ebandakanyeka kuqheliselo oluphosakeleyo, kutheni sinokuwahlonela nje?
9 Isibhalo esisandul’ ukucatshulwa sithi ‘yeyongamileyo.’ Ngaloo ndlela amagosa karhulumente akamele aphathwe ngendelelo. Imithetho emiselwa ngawo ayimele ityeshelwe. Oko akuthethi ukuba ngokuyimfuneko ukholana nawo, yaye kungathethi nokuba wamkela nakuphi na ukonakala asenokubandakanyeka kuko. Kodwa intlonelo ngokufanelekileyo ibonakaliswa ngenxa yesigxina akuso.—Tito 3:1, 2.
10. Kumele kujongwe njani ukuhlawulwa kweerhafu, ibe ngoba?
10 Ngokomlinganiselo omkhulu, imithetho yehlabathi iyingenelo. Inceda ekugcineni ulungelelwano ize iqinisekise umlinganiselo wokhuseleko ebantwini nakwimpahla yabo. (Roma 13:3, 4) Kwakhona, oorhulumente badla ngokulungiselela iindlela, umsebenzi wokucoca, ukukhuselwa emlilweni, imfundo kwaneminye imisebenzi eyingenelo ebantwini. Ngaba kufuneka behlawulwe ngale misebenzi? Ngaba sifanele sizihlawule iirhafu? Lo mbuzo udla ngokushukumisa iimvakalelo ezinamandla ngenxa yeerhafu eziphakamileyo nangokusoloko kusetyenziswa kakubi imali kawonke wonke. Nangexesha likaYesu, lo mbuzo wawudibene nezobupolitika. Kodwa uYesu akazange athi imeko eyayikho yayivumela nakuphi na ukungafuni ukuhlawula. Ebhekisela kwimali eyayiqingqwe nguKesare waseRoma, wathi: “Nikelani kaloku izinto zikaKesare kuKesare, neento zikaThixo kuThixo.” (Mateyu 22:17-21; Roma 13:6, 7) Hayi, uYesu akazange avumelane nengcamango yokuba mntu ngamnye aziqingqele umthetho.
11, 12. (a) IZibhalo zibonisa njani ukuba kukho nelinye igunya elimele liqwalaselwe? (b) Ubungenza ntoni ukuba abalawuli behlabathi bakhuphe imiyalelo engqubanayo nezinto ezifunwa nguThixo, yaye ngoba?
11 Noko ke, uYesu wabonisa ukuba “uKesare,” urhulumente wehlabathi, wayengekuphela kwegunya elalimele ligqalwe. “Amagunya awongamileyo” awaphakamanga kuThixo okanye awalingani nokulingana naye. Ngokwahlukileyo koko, aphantsi gqitha kuye. Ngoko igunya lawo lilinganiselwe, asililo elokugqibela. Ngenxa yoku, amaKristu ngokufuthi aye ajongana nesigqibo esibalulekileyo. Sisigqibo nawe omele ujongane naso. Xa abantu abasegunyeni bekufuna ngegunya okukokukaThixo, uza kwenza ntoni? Ukuba bayakwalela okuyalelwa nguThixo, uya kuthobela bani?
12 Abapostile bakaYesu ngentlonelo kodwa ngokuqinileyo basichaza isimo sabo sengqondo kumalungu enkundla ephakamileyo eYerusalem: “Singenako thina ukuthi singazithethi izinto esazibonayo, esazivayo. . . . Simelwe kukuthi sive uThixo kunokuba sive abantu.” (IZenzo 4:19, 20; 5:29) Maxa wambi oorhulumente baye bamisela imiqathango kwiimeko zonxunguphalo, ibe oko kuyaqondakala. Kodwa maxa wambi imiqathango yaseburhulumenteni isenokuyilelwa ukuphazamisa ukunqula kwethu uThixo ize ibangele kungabi nakwenzeka ukuphumeza iimfanelo esizinikwe nguThixo. Kuthiweni ke? ILizwi eliphefumlelwe nguThixo liphendula ngokuthi: “Simelwe kukuthi sive uThixo kunokuba sive abantu.”
13, 14. (a) Sifanele sikulumkele kangakanani ukungayithobeli imithetho yehlabathi ngenxa nje yezizathu zobuqu? (b) NgokweZibhalo, yalatha izizathu zoku.
13 Nangona ukuphumeza le mfanelo kuThixo kusenokungqubana nokufunwa ‘nguKesare,’ oku kwahluke gqitha ekwaphuleni imithetho ngokufuna ukuzilawula nto leyo esingavumelaniyo nayo. Kuyinyaniso ukuba, ngokwendlela umntu abona ngayo, imithetho ethile isenokubonakala ingeyomfuneko okanye iyimiqathango engeyomfuneko. Kodwa oko akukuthetheleli ukutyeshelwa kwemithetho engangqubaniyo nemithetho kaThixo. Kuthekani ukuba bonke abantu bebethobela kuphela imithetho abayigqala iyeyengenelo kubo? Oko bekungakhokelela kwisiphithiphithi.
14 Maxa wambi umntu usenokuba noluvo lokuba unokulityeshela igunya aze enze akholwa kuko kuba akanakufane abanjwe aze ohlwaywe. Kodwa kukho ingozi embi koku. Ngoxa ukutyeshelwa komthetho ekuqaleni kusenokubandakanya izinto ezincinane, ukuhlala komntu engohlwaywa kunokumqinisa ukuba aphule umthetho ngakumbi. Kunjengokuba INtshumayeli 8:11 isithi: “Ekubeni isigwebo singawiswa kamsinyane emsebenzini ombi, ngenxa yoko intliziyo yoonyana babantu izele ngaphakathi kwabo kukwenza okubi.” Kodwa ngaba isizathu sokwenene sokuthobela umthetho kukoyika nje ukohlwayelwa ukungathobeli? KumKristu, kumele kubekho impembelelo enamandla ngakumbi. Umpostile uPawulos wayibiza ngokuthi “sisizathu esinyanzelisayo”—ukunqwenela isazela esicocekileyo. (Roma 13:5, NW) Umntu onesazela esiqeqeshwe yimigaqo yeZibhalo uyazi ukuba ukufuna ikhondo lokwaphula umthetho bekuya kuba ‘kukumelana nomthetho kaThixo.’ Kungakhathaliseki enoba abantu bayakwazi na esikwenzayo, uThixo uyazi, ibe ithemba lethu lobomi bexa elizayo lixhomekeke kuye.—1 Petros 2:12-17.
15. (a) Yintoni efanele ikhokele umntu kwisimo sakhe sengqondo ngomfundisi-ntsapho okanye ngomqeshi? (b) Ngale ndlela siphepha ukuphenjelelwa ngumoya kabani?
15 Kukwanjalo nangesimo sengqondo somntu oselula ngomfundisi-ntsapho wakhe nesimo sengqondo somntu omkhulu ngomqeshi wakhe wehlabathi. Isibakala sokuba abantu abaninzi abasingqongileyo benza izinto eziphosakeleyo asimele sibe ngunobangela ogqibayo. Enoba umfundisi-ntsapho okanye umqeshi uyakwazi esikwenzayo akumele kwenze nawuphi na umahluko. Umbuzo ngulo, Yintoni elungileyo? Yintoni ekholisa uThixo? Kwakhona, ukuba oko sicelwa ukukwenza akungqubani nomthetho kaThixo okanye nemigaqo yobulungisa, sithi sibe nentsebenziswano. Abafundisi-ntsapho ngokuqhelekileyo bangabameli borhulumente wehlabathi, ngenxa yoko bangoothunywashe ‘bamagunya awongamileyo,’ ibe ke bakufanele ukuhlonelwa. Yaye ngokubhekisele kubaqeshi behlabathi, umgaqo weBhayibhile okuTito 2:9, 10 usenokusebenza, nakubeni uPawulos apho wayethetha ngolwalamano olwahlukileyo, olo lwamakhoboka nabanini bawo. UPawulos wathi: “Abe ngakholekileyo kakuhle . . . abonakalise konke ukuthembeka okulungileyo, ukuze ayivathise imfundiso yoMsindisi wethu uThixo ezintweni zonke.” (Tito 2:9, 10) Ngaloo ndlela, siyayiphepha impembelelo kaSathana, omoya wakhe “usebenzayo ngoku kubo abangevayo,” ibe sakha ulwalamano loxolo nabantu abangoowethu.—Efese 2:2, 3.
Igunya Ekhayeni
16. Yiyiphi imfuneko yobomi obuvisisanayo bentsapho echazwe kweyoku-1 yabaseKorinte 11:3?
16 Intsapho ngomnye ummandla okunokuthi ukuhlonelwa kwegunya kubangele ubudlelane boxolo. Xa ngokufuthi gqitha intlonelo entle ngolo hlobo ingekho, iphumela ekuqhawukeni kolwalamano lwentsapho ibe ngokufuthi nasekudilikeni kwekhaya. Yintoni enokwenziwa ukuphucula le meko? Umgaqo wobuntloko, njengoko wandlalwe kweyoku-1 yabaseKorinte 11:3, unikel’ impendulo: “Intloko yomntu wonke oyindoda nguKristu, intloko ke yomfazi yindoda, intloko ke kaKristu nguThixo.”
17. (a) Ngokuphathelele ubuntloko, siyintoni isigxina sendoda? (b) Nguwuphi umzekelo omhle ongobuntloko bendoda owamiselwa nguKristu?
17 Phawula ukuba loo mazwi elungiselelo likaYehova akaqali ngokwalatha kubuntloko bendoda. Kunoko, atsalel’ ingqalelo kwisibakala sokuba kukho uthile indoda emele ikhangele kuye ukuze ifumane ulwalathiso, lowo omzekelo wakhe imele iwulandele. Loo mntu unguYesu Kristu. Uyintloko yendoda. Ibe kwiinkqubano zakhe nebandla lakhe, elifaniswa nomtshakazi, uKristu wabonakalisa indlela yokuphumelelisa ubuntloko bendoda. Umzekelo wakhe omhle washukumisa intsabelo evumayo kubalandeli bakhe. Xa wakhokelayo, kunokuba abe yingqwayingqwayi, abe rhabaxa aze afune ngegunya kubalandeli bakhe, uYesu ‘wayenobulali, ethobekile ngentliziyo,’ ukuze bayifumanele ukuphumla imiphefumlo yabo. (Mateyu 11:28-30) Ngaba wabasingela phantsi ngenxa yeentsilelo zabo? Ngokwahlukileyo koko, wabaluleka ngothando waza wada wancama ubomi bakhe ukuze abahlambulule ezonweni. (Efese 5:25-30) Enjani intsikelelo nakweyiphi na indlu ukuba nendoda ethi ngokunyanisekileyo izabalazele ukulandela lo mzekelo!
18. (a) Umfazi unokubonisa ngaziphi iindlela ukuba uyalihlonela igunya lendoda yakhe? (b) Abantwana banokubahlonela njani abazali babo, ibe ngoba?
18 Xa kukho ubuntloko obunjalo ekhayeni, akunzima emfazini ukuthobela indoda yakhe. Ibe ukuthobela kwabantwana kuba lula ngakumbi. Kodwa kukwakho okuninzi okunokwenziwa ngumfazi nabantwana ekufakeni isandla kulonwabo lwentsapho. Ngokukhuthala kwakhe ekunyamekeleni indlu nangomoya wakhe wentsebenziswano, umfazi ubonisa ukuba ‘uyayoyika indoda yakhe.’ Ngaba kunjalo kwindlu yakho? (Efese 5:33; IMizekeliso 31:10-15, 27, 28) Ngokuphathelele abantwana, ukubathobela ngokuvumayo utata nomama kubonisa ukuba bayababeka abazali babo, njengokuba uThixo efuna. (Efese 6:1-3) Belungayi kubakho na uxolo olungakumbi nemvakalelo engakumbi yonqabiseko ngokobuqu kwindlu enjalo kunaleyo apho igunya lingahlonelwayo?
19. Ukuba nguwe kuphela entsatsheni ozama ukukhokelwa liLizwi likaThixo, umele wenze ntoni?
19 Unokuncedisa ekulenzeni ikhaya lakho libe yindawo enjalo. Enoba amanye amalungu entsapho anyula ukuxhasa iindlela zikaYehova okanye akunjalo, wena unokwenjenjalo. Abanye basenokusabela kumzekelo wakho omhle. (1 Korinte 7:16; Tito 2:6-8) Nokuba abenjinjalo, okwenzayo kuya kuba bubungqina bokulunga kweendlela zikaThixo, yaye oko akunto ixabiseke kancinane.—1 Petros 3:16, 17.
20, 21. (a) IBhayibhile ibonisa njani ukuba igunya lendoda nelabazali asililo elokugqibela? (b) Ke, umfazi ongumKristu okanye abantwana abakholwayo basenokujongana nasiphi isigqibo, ibe iyintoni efanele ibashukumise?
20 Khumbula ukuba lonke igunya lentsapho livela kuThixo. Ngaloo ndlela amadoda amele azithobe kuKristu, abafazi kumadoda abo “njengoko kufanele abaseNkosini,” ibe abantwana bazithobe kubazali babo “kuba oko kukholekile kuyo iNkosi.” (Kolose 3:18, 20; 1 Korinte 11:3) Ngoko uThixo akanakutyeshelwa, akunjalo na? Oku kuthetha ukuba igunya lendoda emfazini nelabazali ebantwaneni babo, lelilinganiselweyo. Oko kukuthi, iqabane elingumKristu nabantwana bazithoba kuThixo nakuKristu kuqala, bethobela isiluleko sabo. Kumaqabane okanye kubazali abathile abangakholwayo loo ngcamango ekuqaleni isenokungakholisi. Kodwa okunene isebenzela ukulungelwa kwabo, kuba iya kunceda ekwenzeni iqabane nabantwana abakholwayo bathembeke ngakumbi baze bahlonele ngakumbi.
21 Noko ke, kuthekani ukuba indoda ibingafuna ngegunya ukuba umkayo enze into ‘ebingafanele abaseNkosini’? Okwenziwa ngumfazi kuya kubonisa enoba ngokwenene ‘woyika uThixo oyinyaniso’ okanye akunjalo. (INtshumayeli 12:13) Kuyinto efanayo xa abantwana bebadala ngokwaneleyo ukuba babe nokuqonda baze bathobele iLizwi likaThixo. Ukuba abazali babo abanawo umnqweno wokukhonza uYehova, abantwana bamele bagqibe enoba baya kunyaniseka kuThixo okanye babe njengabazali babo abanganyanisekanga kuye. (Mateyu 10:37-39) Kodwa ngaphandle kwemfanelo yabo yokuqala eya kuThixo, abantwana bamele bazithobe “ezintweni zonke,” enoba oku kuthetha ukwenza izinto abangazithandiyo. (Kolose 3:20) Eli khondo lehambo lisenokude litsale abazali babo ukuba beze kumalungiselelo kaYehova osindiso. Ngokwenyaniso “kukholekile kuyo iNkosi” xa intshukumisa kabani iyeyokunyaniseka kuYehova nakwiindlela zakhe zobulungisa, kunokungathobeli okubangelwa ngumoya wokuzilawula.
Ebandleni LamaKristu
22, 23. (a) Abaveleli abangamaKristu bawakhonza njani amalungu ebandla? (b) Ngoko, sisiphi isimo sengqondo athi amaHebhere 13:17 sifanele sibe naso kubo?
22 Kwaoku kunyaniseka kuYehova kufanele kubonakaliswe kwisimo sethu sengqondo ebandleni lamaKristu nakwabo balinyamekelayo. UYehova ulungiselele abaveleli bokwalusa “umhlambi.” Abafumani mvuzo kodwa bayazinikela ngenxa yokubaxhalabela ngokwenyaniso abazalwana noodade abangamaKristu. (1 Petros 5:2; 1 Tesalonika 2:7-9) Bayalinceda ibandla liphumeze umsebenzi wokushumayela iindaba ezilungileyo zoBukumkani bukaThixo. Kwakhona, ngokuxhalabela ilungu ngalinye lebandla, bawanceda ukuba afunde indlela yokusebenzisa imigaqo yeBhayibhile kubomi bawo. Kwakhona, ukuba naliphi na ilungu lebandla lithabatha inyathelo eliphosakeleyo ngaphandle kokuliqonda ngokupheleleyo, kwenziwa umgudu wokulilungelelanisa. (Galati 6:1) Ukuba ilungu liyasityeshela isiluleko esingokweZibhalo lize lizingise kwisenzo esiphosakele ngokunzulu, abaveleli bayaqinisekisa ukuba liyagxothwa. Ngaloo ndlela ibandla liyakhuselwa kwimpembelelo yalo eyonakalisayo.—1 Korinte 5:12, 13.
23 Ngokuxabisa eli lungiselelo lothando likaYehova ukuqinisekisa uxolo phakathi kwabantu bakhe, simele sithobele isiluleko esikumaHebhere 13:17: “Bathambeleni abakhokeli benu, nibathobele; kuba bona abalali, ngenxa yemiphefumlo yenu, ngokwabaya kuphendula, ukuze bakwenze oko bevuyile, bengancwini; kuba anisizakali kuko oko.”
24, 25. (a) Okufundiswa ngabadala kufanele kuyiphembelele njani indlela esibajonga ngayo? (b) Esikufundiswa eBhayibhileni sifanele sikusebenzise nini yaye phi? Ngoba?
24 IBhayibhile igxininisa ukuba isizathu esiyintloko esibangela ukuba aba baveleli okanye abadala bafanelwe kukuhlonelwa sesokuba bafundisa “ilizwi likaThixo.” (Hebhere 13:7; 1 Timoti 5:17) Ibe ngokuphathelele amandla elo “lizwi,” amaHebhere 4:12, 13 athi: “Ilizwi likaThixo liphilile, lisebenza, libukhali ngaphezu kwamakrele onke antlangothi mbini; lihlaba liphumele, lide lahlule umphefumlo kwanomoya, amalungu kwanomongo; linokugweba iingcingane nezicamango zentliziyo. Kanjalo akukho sidalwa singabonakaliyo emehlweni akhe; izinto zonke ke zize, zityhilekile, emehlweni alowo esinokuthanani naye.”
25 Ngaloo ndlela iinyaniso ezikwiLizwi likaYehova zibhenca umahluko ophakathi koko umntu asenokubonakala ekuko noko akuko ngokwenene. Ukuba unokholo lokwenyaniso kuThixo nomnqweno wokwenyaniso wokukholisa uMdali wakhe, intshukumisa yakhe ngokufanelekileyo iya kubonakalisa ‘uzuko lukaThixo’ kwanaxa engabonwa ngabadala bebandla. (Roma 3:23) Akayi kubandakanyeka kwihambo ethile engeyoyazibhalo ngenxa nje yokuba ingekho phakathi kweziphoso ezinzulu anokugxothelwa zona ebandleni. Ngenxa yoko, ukuba nabani na utyekele ekuthabatheni lula isiluleko esifumaneka kwiLizwi likaThixo, ufanele akuhlolisise ngenyameko oko isimo sengqondo sakhe kuThixo ngokwenene sikuko. Ngaba unjengaloo mntu INdumiso 14:1 ethi ngaye: “Sithi isidenge”—kungekhona ekuhleni—kodwa “entliziyweni yaso, Akukho Thixo”?
26, 27. (a) Kungani kubalulekile ukuwathabatha nzulu ‘onke amazwi’ kaYehova? (b) Ubomi bethu buchatshazelwa njani xa sisithi ngaloo ndlela silihlonele igunya?
26 Xa wayelingwa nguMtyholi, uYesu wathi: “Umntu, uphila ngamazwi onke aphuma emlonyeni kaThixo.” (Mateyu 4:4) Uyakholelwa na kukuba ‘onke amazwi’ kaYehova abalulekile, yaye akukho nalinye eliza kugatywa? Ukuthobela ezinye zezinto ezifunwa nguYehova, ngoxa ujonga ezinye ngokungabalulekanga, akwanele nje kwaphela. Siphakamisa ukulunga kolongamo lukaYehova okanye sayame ngecala likaMtyholi lembambano ngokuzandlalela owethu umlinganiselo wokulunga nokubi. Banoyolo abo babonisa ukuba bawuthanda ngokwenyaniso umthetho kaYehova.—INdumiso 119:165.
27 Abantu abanjalo abarhintyelwa ngumoya owahlulahlulayo wehlabathi. Bengazifici nakwihambo eziintloni yabo bawutsibayo umqathango wokuziphatha kakuhle. Ukumhlonela ngokunzulu uYehova neendlela zakhe zobulungisa kubenza bube bobuzinzileyo ubomi babo. Ukuhlonela uYehova neendlela zakhe ngolo hlobo kubenza bawahlonele ngokufanelekileyo amagunya asemhlabeni, nto leyo ebalulekileyo ekuphileni eluxolweni.
[Umfanekiso okwiphepha 134]
Abapostile bakaYesu baxelela inkundla ephakamileyo oku: “Simelwe kukuthi sive uThixo kunokuba sive abantu”