Isahluko 16
Ukhetho Oluqinisekisa Ubomi Eluxolweni Nakunqabiseko Lokwenyaniso
1. Ukuba sikhetha ngokufanelekileyo, luluphi uxolo nentembelo esinokuzifumana ngoku?
OLUNJANI uvuyo ukuba nenjongo yokwenene ekuphileni, ukwazi apho uya khona! Ibe olunjani uxolo lwengqondo nentliziyo olufumaneka ngenxa yesiqinisekiso sokuba alikho ikhondo elilunge ngakumbi ebekungenzeka uhambe ngalo! Uxolo nentembelo enjalo zinokuba zezakho, kodwa kuphela nje ukuba ukhetha ngendlela elungileyo ngoku.
2. Ukwazi kwethu uYehova neenjongo zakhe kusinceda njani ngokubhekisele kwimbono yethu ebomini?
2 Bucacile ubungqina bokuba asinakukhangela kweli hlabathi njengomthombo woxolo nonqabiseko lokwenyaniso. Ezorhwebo, ezonqulo nezobupolitika, kuquka iZizwe Ezimanyeneyo nokuvakalisa kwazo ‘uxolo nonqabiseko,’ zonke ezi zinto azinakuluzisa. Ngoko ke, iBhayibhile isalathisela kuYehova uThixo njengokuphela koMthombo woxolo nonqabiseko lokwenyaniso. Ukwazi yena neenjongo zakhe kuyasinceda siqonde isizathu sokuba lapha emhlabeni nesizathu sokuba izinto zibe njengokuba zinjalo namhlanje. Sifunda ngembambano enkulu ebandakanya ulongamo lukaYehova lwendalo iphela, nendlela echaphazela ngamnye wethu. Sifunda ukuhlolisisa ukulunga nobulumko bosukelo lwethu, ibe sizuza imilinganiselo yokuziphatha okuhle nethenjiweyo esimele siphile ngayo. Xa sijongene nokugula, ukwaluphala, okanye ukufa, sinethemba elithuthuzelayo lobomi kubulungisa, ulungelelwaniso olutsha olunik’ impilo, kwanangokuvuswa kwelabafileyo, ukuba kuyimfuneko.
3. Kutheni uYehova engulowo esimele thina sonke sithembele ngaye?
3 Ngoko, akumangalisi ukuba uIsaya 26:4 abe usiyala ngelithi: “Kholosani ngoYehova ngonaphakade; kuba uYa, uYehova, uliliwa elingunaphakade.” Ekubeni engaguquki, engusomandla, yaye engongunaphakade, ngokwenene uYehova ungulowo thina sonke esinokuthembela ngaye. Ngaba uyakufuna ukunandipha ukhokelo nenkuselo yakhe kungekhona nje ngoku kodwa kulo lonke ixesha elizayo kuLungelelwaniso Olutsha oluthenjiswe nguye? Ukuba kunjalo, yintoni omele uyenze?
4. Ukuze sibe ngabakholisekileyo kuYehova, yintoni efunekayo, ibe yintoni ekubangela kube nokwenzeka oko?
4 Uluntu luphela luye lwatyeka kuThixo ngenxa yesono sabazali bethu bokuqala. Kodwa uThixo uvule indlela yokuba sixolelaniswe size sibe zizihlobo naye ngedini loNyana wakhe. (2 Korinte 5:19-21; Efese 2:12, 13) Kanti, akwanele ngathi ngoku ukuthi nje sifuna ubuhlobo noThixo.
5. Yintoni emele isishukumise ekufuneni ukuba zizihlobo noYehova?
5 Simele sikuvume, side sikulangazelele, ukungqina kuye ukuba siyakufuna oku, ibe sikufuna ngentshukumisa efanelekileyo. Ngokomzekelo, ngaba sifun’ ubuhlobo noYehova ngokuyintloko ukuze sisinde kwintlekele? Ukuba siza kuzuza ukuma okufanelekileyo noThixo, oku asinakukwenzela nje eli thuba longxamiseko ngaphambi komgwebo wakhe singenakukwenzela nje ukuze sisinde ‘kwimbandezelo enkulu’ ezayo. (Mateyu 24:21, 22) Oko simele sikwenzele lonke ixesha elizayo. Luthando lokwenyaniso kuphela oluya kusinika le ntshukumisa. Ngoko sinokubonakalisa ukunyaniseka komnqweno wethu wokuba zizihlobo naye, uYehova wandlale eLizwini lakhe izinto ezithile ngamnye wethu amele azenze ukuze axolelaniswe naye.
Ukholo Oluphilileyo
6. Ukuze sikholise uThixo, yiyiphi intembelo esimele sibe nayo kuye?
6 UYehova unguThixo wenyaniso. Ngoko sinokuba nentembelo epheleleyo kumadinga akhe. Enyanisweni, “lungekho ukholo, akunakubakho ukumkholisa kakuhle; kuba lowo uzayo kuThixo, umelwe kukukholwa ukuba ukho, nokuba ungumvuzi wabo bamfunayo.” (Hebhere 11:6) Ukuba unalo ukholo olunjalo, ngoko uyazi ukuba yonk’ into uThixo ayenzayo inenjongo yobulungisa, ibe uyazi ukuba usoloko esinqwenelela okuhle entliziyweni yakhe. Kwimisebenzi yakhe yendalo nakwiLizwi elibhalwe nguye, uyabona ukuba akanguye ongalumkanga nongenamandla nje ngokupheleleyo kodwa ukwanguThixo wobubele obunothando. Kakade ke, akayi kuze atyeke kwimilinganiselo yakhe yobulungisa. Kanti, nakubeni singafezekanga yaye sisenza iimpazamo, ukuba siyabuthanda ubulungisa, unayo indlela yokuqhubana nathi eya kuphumela kwiintsikelelo.
7. Ukuba nentembelo ekulungeni nakubulumko bukaYehova kuya kusilondoloza njani?
7 Ngaloo ndlela, xa sifumana uqeqesho oluvela kuThixo, siya kwazi ukuba oko kokwempilontle yethu kanaphakade. Siya kuthi sikholose ngoYehova njengoko unyana okanye intombi ithi ikholose ngobawo onothando, olumkileyo nonamandla. (INdumiso 103:13, 14; IMizekeliso 3:11, 12) Sakuba nokholo olunjalo, asiyi kubuthandabuza ubulumko beziluleko zakhe singayi kukuthandabuza nokulunga kweendlela zakhe, nakubeni okwexesha elithile sisenokungayiqondi ngokupheleleyo imicimbi ethile. Ngaloo ndlela sizibeka phakathi kwabo umdumisi awabachaza ngolu hlobo: “Banoxolo olukhulu abawuthandayo umyalelo wakho; akukho sikhubekiso kubo.”—INdumiso 119:165; IMizekeliso 3:5-8.
8. (a) Kutheni le nto ukholo lulodwa nje lunganele? (b) Ukholo lumele lusishukumisele kwesiphi isenzo esikhankanywe kwiZenzo 3:19?
8 Kodwa “ukholo, ingekho imisebenzi, lufile,” ubonisa oko uYakobi 2:26. Ukholo lokwenyaniso lushukumisa umntu ukuba abe nento ayenzayo. Yaye enye yezinto zokuqala olushukumisa umntu ukuba azenze yileyo umpostile uPetros wayibongozayo esithi: “Guqukani . . . nibuye, ukuze zicinywe izono zenu; ngokokuze afike amathuba okuphumza, evela ebusweni beNkosi.” (IZenzo 3:19) Kuthetha ntoni oku?
Ukuguquka Nokubuya
9. (a) Iyintoni inguquko yokwenyaniso? (b) Kufuneka siguquke entwenini?
9 EBhayibhileni, inguquko isingisele kwinguquko yengqondo ephelekwa bubuhlungu obusuk’ entliziyweni ngenxa yendlela yobomi yangaphambili okanye ngenxa yezenzo eziphosakeleyo. (2 Korinte 7:9-11) Kodwa ukuba siza kunandipha “amathuba okuphumza” athenjiswe nguThixo, asinakusuka nje siguquke kwizenzo eziphosakeleyo zexa elidluleyo. Kunoko, simele sibonise inguquko kuba siqonda ukuba, njengenzala ka-Adam, imvelo yethu inesono. Kunjengoko umpostile uYohane wathi: “Ukuba sithi asinasono, siyazikhohlisa, . . . simenza ixoki [uThixo] ilizwi lakhe alikho kuthi.” (1 Yohane 1:8, 10) Ngokufanelekileyo sifanele simmele kakuhle uMdali wethu, sibonakalisa ‘umfanekiselo wakhe nokufana naye.’ Kanti isono esisizuz’ ilifa siyasithintela singakwenzi oku ngokufezekileyo. Ngenxa yoko, ‘siyasilela kuphawu,’ olukoko igama elithi “isono” lithetha kona eBhayibhileni.—Genesis 1:26; Roma 3:23.
10, 11. (a) Ngubani esimtyalayo ubomi bethu buphela, ibe ngoba? (b) Ngoko, simele sibusebenzise njani ubomi bethu?
10 Ngoko sifuna ukuxolelwa nguThixo. (Mateyu 6:12) Siyaqonda ukuba ubomi bethu buxhomekeke kuye njengoMdali wethu. Kodwa ngoku sifunda ukuba ngedini loNyana kaThixo, uluntu nalo ‘lwathengwa ngexabiso’ eliphezulu kakhulu. Ngoko asifanele sibe ‘ngamakhoboka abantu,’ kwanaweenkanuko zethu zokuzingca. (1 Korinte 7:23) Kanti, ngaphambi kokufunda nokwamkela inyaniso, sasingenjalo na thina sonke?—Yohane 8:31-34.
11 Entliziyweni yakho, usixabisile na isipho sikaThixo soNyana wakhe noko akwenzileyo ngoKristu ukulungiselela ukusinda kubukhoboka besono nokufa? Ngoko ngokuqinisekileyo uya kuthi ngokunyanisekileyo ube buhlungu ngako nakuphi na ukusilela kwixa elidlulileyo ekusebenziseni ubomi bakho ukuthobela uMdali wakho. Oku kuya kukushukumisela ukuba uguquke ngokusuk’ entliziyweni ekubeni ulandele ikhondo lobomi elinjengelo lehlabathi, elingavisisaniyo nokuthanda neenjongo zikaThixo.—IZenzo 17:28, 30; ISityhilelo 4:11.
12. Umntu oguqukileyo ubonisa njani ukuba ngokwenene ulichasile ikhondo lakhe langaphambili?
12 Le nguquko yokwenyaniso ikhokelela ‘ekubuyeni,’ okuthethwa ligama elithi “ukujika.” Umntu oguquke ngokwenyaniso akabi buhlungu nje ngokubusebenzisa phosakeleyo ubomi bakhe. Uyalicekisa elo khondo liphosakeleyo aze ngokwenene azithiye iindlela zakhe eziphosakeleyo. Oku ukubonisa ‘ngokubuya’ aze enze “imisebenzi efanele inguquko,” evisisanisa ubomi bakhe nokuthanda kukaThixo.—IZenzo 26:20; Roma 6:11.
13. (a) Iyintoni intsingiselo yamazwi kaYesu athi abalandeli bakhe bamele ‘bazincame’? (b) Sizithoba kuYehova ngokwasiphi isizathu, ibe oku kusichaphazela njani?
13 Inxalenye yoku kuguquka nokubuya iquka oko uYesu akubiza ngokuthi ‘kukuzincama.’ (Mateyu 16:24) Oko kukuthi, asisaphili ngokweenkanuko zethu zokuzingca singakuxhalabelanga ukuthanda neenjongo zikaThixo. Kunoko, siyaqonda ukuba uYehova uThixo ngokwenene unebango elipheleleyo kubomi bethu njengoMdali wethu noMthengi wethu ngedini lentlawulelo loNyana wakhe. Njengoko iBhayibhile isitsho, ‘asingabethu. Kuba sathengwa ngexabiso.’ (1 Korinte 6:19, 20) Ngoko, kunokuyisebenzisa kakubi inkululeko ezukileyo evulelwe thina yinyaniso, sizithoba ngokupheleleyo ekwenzeni ukuthanda kukaThixo. (Galati 5:13; 1 Petros 2:16) Ibe oku sikwenza kungekuphela nje kuba kulungile kodwa sikwenza kuba sithanda uYehova uThixo ‘ngentliziyo, ngomphefumlo, ngengqondo nangamandla ethu ephela.’ (Marko 12:29, 30) Ngokuqinisekileyo oku kufuna ukuba ngamnye wethu aphile ubomi bokuzahlulela kuThixo. Kunokuba libe ngumthwalo, eli khondo lisenza sikwazi ukunandipha ubomi ngaphezu kunanini na ngaphambili.—Mateyu 11:28-30.
Ukuvuma Ekuhleni Ukuze Usindiswe
14. (a) Xa umntu evuma ukuba ngokufanelekileyo uYehova ungumnini wakhe, unokukuvakalisa njani oku kuThixo? (b) Yiyiphi enye into amele anqwenele ukuyenza, njengoko kuboniswe ngamaRoma 10:10?
14 Kuyinto entle ukuvakalisa emthandazweni ukholo lwethu kumalungiselelo kaThixo, sivuma ukuba ungumnini wethu. Kodwa sinokulubonakalisa ukholo lwethu ngokubhekele phaya ibe simele senjenjalo, njengoko amaRoma 10:10 esixelela: “Umntu ukholwa ngentliziyo, ukuze abe nobulungisa; avume ke ngomlomo [ekuhleni, NW], ukuze asindiswe.” Oku kuvakalisa “ekuhleni” ukholo lwethu kuYehova nakumalungiselelo akhe ngovuyo kumele kuphume entliziyweni ezele luxabiso. Ukwenza olu vakaliso kuquka ukwahlulela ubomi bethu kuYehova ukuze senze ukuthanda kwakhe size sikufuzisele oku ngokubhaptizwa emanzini.
15. Kutheni simele sicinge nzulu ngobhaptizo lwasemanzini?
15 Xa uYesu Kristu waqalisa ubulungiseleli bakhe basekuhleni, wayalela uYohane uMbhaptizi ukuba amntywilisele emanzini. IBhayibhile ibika ukuba ngelo thuba uYesu wathi kuThixo: “Ndiza kwenza ukuthanda kwakho.” (Hebhere 10:9; INdumiso 40:7, 8) UYesu wayalela ukuba bonke abo bathi babe ngabafundi bakhe bamele babhaptizwe nabo. Ngaba ungumfundi onjalo? Ngoko ukubhaptizwa kwakho emanzini kuya kuba ‘kukuvakalisa ekuhleni’ oku.—Mateyu 28:19, 20.
16. (a) Unokugqiba njani enoba ukulungele ukubhaptizwa? (b) Abaveleli babanceda njani abantu ekulungiseleleni kwabo ukubhaptizwa?
16 Kulilungelo elizukileyo ukuba lingqina likaYehova elizahluleleyo nelibhaptiziweyo, uMongami wendalo iphela. Hlolisisa ngoku okuqukwa koku: UYehova ngothando uvule indlela yokuba wena ube nobuhlobo kunye naye. Kodwa ukuze ubuzuze, umele ube nokholo, ngokwenyaniso ukholelwe ukuba iBhayibhile iliLizwi eliphefumlelwe nguThixo. (2 Timoti 3:16, 17) Kwakhona umele ube nokholo kwidini likaYesu lentlawulelo njengekuphela kwendlela yokuzuza ukuma okwamkelekileyo noThixo. (IZenzo 4:12) Kufuneka ukuqondile ukuxhomekeka kwakho kuYehova uze uzithobe kuye ukuze wenze ukuthanda kwakhe, ungakwenzi nje iminyaka embalwa, kodwa ukwenze ngonaphakade. Ikhondo elinjalo liquka ‘ukungabi ngowehlabathi.’ (Yohane 17:16; 1 Yohane 2:15) Njengobungqina bokuba uguqukile waza ‘wabuya,’ umele ukuba ushiye naluphi na uqheliselo oluchasene nemilinganiselo kaThixo yobulungisa ibe umele wenze oko uThixo akuyalelayo. Ngaba uyenze kumila kumbi ingqiqo yakho ukuze le ibe yindlela obujonga ngayo ubomi? (Roma 12:1, 2) Ukuba kunjalo, iBhayibhile ikukhuthazela ukuba ‘uluvakalise ekuhleni’ ukholo olunjalo. Inyathelo lokuqala iya kuba kukuthetha nomnye wabaveleli bebandla lamaNgqina kaYehova abakummandla okuwo uze umazise ngendlela ovakalelwa ngayo. Uya kulungiselela ukuba abe nohlolisiso alwenzayo nawe ngeemfundiso ezisisiseko zeBhayibhile ukulungiselela ukubhaptizwa.
17. Usebenzisa iBhayibhile, bonisa indlela esimele siqhubeke ngayo ‘siluvakalisa ekuhleni ukholo lwethu.’
17 Inyathelo lobhaptizo aliyi kuphawula isiphelo ‘sokuluvakalisa ekuhleni ukholo lwakho.’ NjengomKristu ozahlulele kuYehova uThixo, uya kufuna ukuvakalisa ithemba lakho ngokuzibonakalisa kwindibano yasekuhleni, ‘umdumisa ebandleni elikhulu.’ (INdumiso 35:18; 40:9, 10) Kwakhona uya kufuna ukuba nesabelo kumsebenzi okhethekileyo ‘wokuvakalisa ekuhleni’ uYehova awawabela bonke abaya kumkhonza—ushumayela iindaba ezilungileyo zoBukumkani kulo lonke ihlabathi uze ubenze abafundi abantu bazo zonke iintlanga.—Mateyu 24:14; 28:19.
Ukuxabisa Ulwalamano Lwakho NoThixo
18. Lubaluleke kangakanani ufundisiso lobuqu ekuqinisekiseni ukuba ulwalamano lukabani noYehova luya kuhlala ngokusisigxina?
18 Ke ngoko, unokuqinisekisa njani ukuba, wakuluzuza, ulwalamano lwakho noYehova luya kuhlala ngokusisigxina ngonaphakade kuxolo nonqabiseko oluvuyisayo? Phakathi kwezinye izinto uya kufuna ukuhlala ukhula ekumazini. Ngofundisiso lobuqu uya kufumana uyolo lokwenene ekuzuzeni ubutyebi bobulumko obugcinwe eLizwini likaThixo. Unokuba njengomntu ochazwa yiNdumiso 1:2, 3: “Yena unonelela umyalelo kaYehova: ucamanga ngomyalelo wakhe imini nobusuku: unjengomthi omiliselwe phezu kwemijelo yamanzi, onika isiqhamo ngexesha lawo, ogqabi lawo lingabuniyo; konke akwenzayo kophumelela.” Ewe, ukwazi uThixo, nokukusebenzisa oko, kuya kukwenza uhambe ‘kwiindlela ezimnandi’ ‘nakumendo woxolo,’ kuba oku kuya kukunika ubulumko bokujongana nazo zonke iingxaki zobomi. (IMizekeliso 3:13, 17, 18) Ukunxanelwa kwakho ulwazi lweBhayibhile olulolo hlobo ngoku kuya kubonakalisa ukufanelekela kwakho ubomi kuLungelelwaniso Olutsha lukaThixo, kuba ngoko “ilizwe liya kuzala kukwazi uYehova, njengamanzi egubungele ulwandle.”—Isaya 11:9.
19. Kutheni ukuya rhoqo kwiintlanganiso kuyimfuneko kubomi babantu bakaYehova?
19 Enye into oyifuna ngokwenene kukuya rhoqo kwiintlanganiso nabanye abakhonzi bakaYehova. Apho uya kulolwa ngokwenyaniso eluthandweni nakwimisebenzi emihle, uya kufumana ukhuthazo lokuzingisa kulwalamano lwakho olufanelekileyo noThixo. (Hebhere 10:23-25) Unxulumano oluyolisayo nolunjengolwentsapho lwabakhonzi bakaYehova lunikela ubungqina obomelezayo bokuba uxolo nonqabiseko oluthenjiswe kuLungelelwaniso Olutsha lukaThixo zizinto zokwenene.—INdumiso 133:1; 1 Korinte 14:26, 33.
20. Amadoda amakhulu ebandleni anokusinceda njani kumaxesha enkcaso nobunzima bobuqu?
20 Ebandleni unokungenelwa kwelinye ilungiselelo lothando. UYesu, ‘uMalusi Olungileyo,’ ‘unabalusi abangaphantsi’ emhlabeni. Aba ngabaveleli, okanye amadoda amakhulu ngokomoya, anyamekela “izimvu” zakhe. Angoothunywashe abanamandla ekukhuthazeni uxolo nonqabiseko phakathi kwabantu abahlanganiswe nguThixo zwenibanzi. (1 Petros 5:2, 3) La madoda anjengendawo “yokuzimela umoya, neyokusithela esiphangweni; abe njengemijelo yamanzi emqwebedwini, njengomthunzi wengxondorha enkulu ezweni elibharhileyo.” (Isaya 32:1, 2) Ewe, kumaxesha esiphango sengcinezelo nonxunguphalo olubangelwa yinkcaso yehlabathi okanye kukungavisisani ngokobuqu, ngokholo lwawo olubungxondorha nokunamathela kwawo ngokuqinileyo kwiLizwi likaThixo, la madoda makhulu ngokomoya anokunikela inkxaso yokwenene. Anokukunika isiluleko esihlaziyayo nokhuthazo.
21. Yintoni eya kusithintela singaze sivumele ukungafezeki kwabanye konakalise ulwalamano lwethu noYehova?
21 Kuyinyaniso ukuba ukungafezeki kwabantu kuya kuzibonakalisa, kwanaphakathi kwabakhonzi bakaThixo. Sonke siyaphazama imihla ngemihla. (Yakobi 3:2) Kodwa ngaba sozivumela sikhutyekiswe kukungafezeki kwabanye size sivumele oku konakalise ulwalamano lwethu noYehova? Ekubeni nathi, sizenza iimpazamo, ngaba asimele sibonakalise kwabanye ukuxolela okufanayo esikufunayo kuthi? (Mateyu 6:14, 15) Ukuba siza kuzingqina singabalawulwa abafanelekileyo boLungelelwaniso Olutsha lukaThixo loxolo, ngoku simele sibonakalise ubuchule bethu bokuhlala kunye nabanye eluxolweni. Asinakumthanda uThixo ngaphandle kokuthanda abazalwana noodade bethu bokomoya uKristu awabafelayo.—1 Yohane 4:20, 21.
22. Umthandazo ufanele ube nayiphi indima ebomini bethu?
22 Ulwalamano lwakho olufanelekileyo noThixo lukunika elinye ilungelo elizukileyo: ukuthetha noThixo ngomthandazo unesiqinisekiso sokuba uyakuva. Lixabise elo lungelo ibe lisebenzise imihla ngemihla, imini yonke. Iingxaki ziza kuvela. Ukungafezeki kwakho kusenokukukhathaza. Kanti iBhayibhile iluleka ngokuthi: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.”—Filipi 4:6, 7.
23. Xa sijongene neemvavanyo nokubandezeleka kukholo lwethu, yintoni eya kusinceda sinyamezele?
23 Ngokukhetha ukukhonza uYehova, uMthombo wokwenyaniso woxolo nonqabiseko, nokuthembela kuLungelelwaniso Olutsha lwakhe, uya kuba wenze isiqalo esifanelekileyo. Ngoku, njengoko iBhayibhile isitsho, ‘kufuneka ukuba ube nomonde, ukuze uthi, wakuba ukwenzile ukuthanda kukaThixo, uzuzane nalo idinga.’ (Hebhere 10:36) Wakuba uyingcamle intsikelelo yolwalamano oluhle noYehova, zimisele ukungaze unikezele. Ungaze uvumele iziyolo zomzuzwana zehlabathi zikukhukulise. Nangona iimvavanyo ezivela kutshaba olulihlabathi ziya zisiba qatha, khumbula ukuba zezokwexeshana. Xa zithelekiswa neentsikelelo uYehova aya kuzinika abo bamthandayo, ukubandezeleka okunjalo akunto yanto.—2 Korinte 4:16-18.
24. (a) Sinesizathu sokuvuya ngenxa yantoni ngokukodwa namhlanje? (b) Njengomdumisi, sifanele sisoloko sivakalelwa njani ngoYehova nangolwalamano lwethu naye?
24 Qhubeka kwikhondo lokuhlonel’ uThixo, unentembelo yokuba le yeyona ndlela ilungileyo yobomi ngoku ibe iya kukhokelela kubomi obungunaphakade kuLungelelwaniso Olutsha lukaThixo. (1 Timoti 4:8) Vuyiswa bubungqina bokusondela kolo Lungelelwaniso Lutsha noxolo nonqabiseko olungunaphakade oluya kuziswa lulo. Njengoko uqhubeka usakha ulwalamano lwakho noYehova, ngalo lonke ixesha vakalelwa njengoko umdumisi ophefumlelweyo wathi wavakalelwa, owabhala oku: “Iliwa lentliziyo yam, nesabelo sam, nguThixo ngonaphakade. Ngokuba, yabona, abanyawukileyo kuwe baya kudaka; uyababhangisa bonke abahenyuzayo, bemke kuwe. Mna ke, ukusondela kuThixo kulungile kum, ndiyenza ihlathi lam iNkosi uYehova, ukuze ndiyibalise yonke imisebenzi yakhe.”—INdumiso 73:26-28.
[Imifanekiso ekwiphepha 181]
Ukuvakalisa ekuhleni