Isahluko 6
Ukuphapha ‘Ekuphelisweni Kwephakade’
1. Kutheni kufuneka siphaphe nje?
SIPHAKATHI kanye ‘ekuphelisweni kwephakade eli,’ kodwa ‘asiwazi umhla nelixa’ ekuya kuphela ngalo ixesha lokukhanyisa okusindis’ ubomi. Kungeso sizathu le nto uYesu wathi: “Phaphani ngoko, ngokuba ningayazi imini kwanalo ilixa.”—Mateyu 24:3; 25:13.
2. Ngawaphi amava adanisayo amele aphetshwe?
2 Eneneni bekuya kuba yinto edanisayo emntwini ukuba uthe ngenxa yokulibaziseka wafika kade kwindawo yesidlo somtshato waza wafumana ucango luvaliwe. Kanti oko koko kanye kuza kuthi kwikamva elingekude kuhlele uninzi lwabantu oluthi lungamaKristu. “UMthetheli woxolo” wakuzekelisa oku ngala mazwi: “Zithi ke kamva zifike nezinye iintombi ezo, zisithi, Nkosi, nkosi, sivulele. Yaphendula ke yona yathi, Inene ndithi kuni, andinazi nina.”—Mateyu 25:11, 12.
3. (a) Unyaka we-1919 wangqineka ulixesha lantoni? (b) Ngaba abantu beenkonzo zeNgqobhoko bakwazile ukulungiselela ioli yokomoya efunekayo?
3 Ukususela ngowe-1919 bekufumaneka ukukhanya kokomoya okudluliswa zeziziingqondi ngoncedo ‘lweoli’ yeLizwi likaYehova nomoya oyingcwele, kodwa eziziziyatha zizama ukuthenga ioli yokomoya kwabo beNgqobhoko abathi bayayithengisa. (Mateyu 25:9) Noko ke, abantu beenkonzo zeNgqobhoko abanalo uhlobo olufanelekileyo lweoli. Abakwazanga ukunikela ukhanyiso ngobukho bukaYesu Kristu njengoMyeni wasezulwini. Balindele ukuba xa besifa baza kuya ezulwini ngokukhawuleza baze badibane naye, bengakhange baba nesabelo kumsebenzi wokukhanyisa ebudeni ‘bokupheliswa kwephakade eli.’
4. Ukuza kuthi ga ngoku, abo bafanekiselwa ziintombi eziziziyatha baye basilela ukwenza ntoni, yaye ngoba?
4 Kwelinye icala, bekukho abo, njengeentombi zokomoya, baye bangqineka belondoloze “ioli” yomoya oyingcwele neLizwi likaThixo ukwenzela umsebenzi wasemva kwemfazwe wokukhanyisa zwenibanzi ngokubhekisele ‘kuBukumkani.’ (Mateyu 24:14) Abo kumzekeliso kaYesu bachazwe njengeentombi eziziziyatha abanasabelo kuwo ngokuvumela ukukhanya kukhanyise ezi ndaba zilungileyo zibaluleke kwizizwe ngezizwe. Babengenayo “ioli” yeLizwi likaThixo elikhanyisayo nomoya wakhe oyingcwele, ibe uMgwebi onguMyeni kwitempile yokomoya wakuqonda oku kusilela kwabo. Iintliziyo zabo zazingqina zingahambisani nomsebenzi wasemva kwemfazwe owenziwa ngokukhawuleza ngowe-1919 ziintombi ezingamaKristu ezaziziingqondi ekuqondeni ixesha nomsebenzi.
5. Iintombi eziziziyatha zisilela ukuba nesabelo entwenini nto leyo ebalulekileyo ekumanyaneni kwazo noKumkani onguMyeni?
5 Ngokwahlukana nabo babexhasa intlangano kaYehova ebonakalayo, eziziziyatha zazisilela ukuba nenxaxheba ekunikeleni ubungqina ngoBukumkani zwenibanzi. Ekugqibeleni zafumana “ioli” elukhanyiso lonqulo, kodwa yayingelohlobo lufanelekileyo lweoli. Yayingenakunikela lukhanyiso kwisiganeko esifanelekileyo ngexesha elifanelekileyo. Ngoko azisishumayeli isigidimi soBukumkani “nomhla wempindezelo yoThixo wethu.” (Isaya 61:1-3) Azimzukisi uKumkani onguMyeni njengoko intsalela ethanjisiweyo yodidi lweentombi isenjenjalo.
Umphumo Wokukhanya Kwesibane Ezinzulwini Zobusuku
6, 7. (a) Kwenzeka ntoni kwiminyaka ephakathi yee-1930 eyabonisa ukuba zazanele iintombi zokwenza inani lamalungu odidi lomtshakazi libe lelipheleleyo? (b) Ingqalelo yatsalelwa kuluphi udidi ngoku ekwakufuneka luhlanganisiwe?
6 Phakathi kweminyaka yee-1930, kwenzeka into ebalulekileyo. Okwenzekayo kwabonisa ukuba amalungu omtshakazi wokomoya kaKristu ayephelele, kwabonisa nokuba emhlabeni kwakukho abafundi boMyeni abaneleyo abazelwe ngomoya ukuze babumbe inani elipheleleyo lomtshakazi wakhe wasezulwini.
7 Ngelo xesha, ngowe-1935, kwaqaliswa ukutsalela ingqalelo kolunye udidi lwabafundi bakaYesu ababumvu. Olu yayiludidi ingqalelo kawonke wonke eyatsalelwa kulo ebudeni bemfazwe yehlabathi yokuqala. Intetho ethi “Izigidi Eziphilayo Ngoku Zisenokungaze Zife” yanikelwa ngoFebruwari 24, 1918, kubaphulaphuli abanomdla mhlawumbi nabathandabuzayo. Kwindibano yowe-1935 yamaNgqina kaYehova eWashington, D.C., kwachazwa into ekhuthazayo ngokuhlanganiswa kwezi zigidi ‘zizizimvu ezizezinye’ zikaKristu ‘kumhlambi’ omanyeneyo phantsi kukaYesu Kristu ‘njengomalusi omnye.’ (Yohane 10:16) Kwachazwa indlela yokufanisa le nxalenye ‘yezinye izimvu’ njengoko yaxelwa kwangaphambili kwiSityhilelo 7:9-17.
8. Iintombi eziziingqondi zaba nayiphi imfanelo ngowe-1935, nto leyo ezazingayilindelanga?
8 Ngoku intsalela ‘yomhlambi omncinane’ yaba nemfanelo yokuqalisa ukuhlanganisa esi ‘sihlwele sikhulu’ ‘sezinye izimvu.’ (Luka 12:32) Oku kwakungenxa yokuba inani leentombi eziziingqondi ezazifuneka ukwenza umtshakazi kaYesu ube linani elaneleyo ngoku laliphelele. Kodwa iintombi ezinjalo azizange zithatyathwe ngoko nangoko zisiwe ezulwini. Ziseza kwamkelelwa kuloo ndawo yasezulwini yomsitho xa zigqiba ikhondo lazo lasemhlabeni njengamangqina agcina ingqibelelo oThixo wawo, uYehova. Ngenxa yomsebenzi wawo wokuthembeka nongowokukhanyisa ukuza kuthi ga ngowe-1935, zanikwa ilungelo elikhethekileyo ezazingazange zalilindela ngaphambi kweminyaka ephakathi yee-1930.
9. Abaseleyo beentombi eziziingqondi balinani elingakanani ngoku?
9 Sekudlule isiqingatha senkulungwane ukususela ngowe-1935, ibe ebudeni bale minyaka inani leziziingqondi kudidi lweentombi belincipha. Kwelinye icala, umsebenzi wokunikel’ ubungqina uye wanda wafikelela kwihlabathi lonke, ewe, waquka amazwe angaphezu kwama-200. Ngeli thuba, udidi lweentombi lunciphile lwaya kutsho kwabamalunga nama-9 000.
Amaqabane Aluncedo Abakhanyisi
10. Ngenxa yobukhulu bomsebenzi, ngaba intsalela yeentombi eziziingqondi iyakwazi ukuhlangabezana nemfuno yabasebenzi?
10 Phantse ibe isithwe kwaphela intsalela ethanjisiweyo yeentombi ezizezokomfuziselo ngabavakalisi boBukumkani abangaphezu kwezigidi ezithathu abakumabandla angaphezu kwama-49 000 amaNgqina kaYehova jikelele emhlabeni. Ibinokwazi njani na intsalela ethanjisiweyo neliqaqobana nje ukunyamekela umsebenzi wokunikela ubungqina emazweni angaphezu kwama-200 apho kukho loo mawakawaka amabandla? Ibingenakukwazi.
11. (a) Ukufaniswa ‘komkhonzi othembekileyo noqondayo’ kwabangela ukuba kwenzeke ntoni phakathi kwabo bathi baziintombi? (b) Yintoni abo bodidi ‘lomkhonzi ongendawo’ abangakwaziyo ukuyiqonda ngenxa yokungabi nalukhanyiselo lwaneleyo lokomoya?
11 Kakade ke, ngokweZibhalo ikhonza kwisigxina esaxelwa kwangaphambili ‘somkhonzi othembekileyo noqondayo’ iNkosi enguMyeni eyamfumana ethembekile ekuzeni kwayo etempileni ize kugweba. Ngelo xesha kwaqaliswa ukwahlulwa kweentombi eziziingqondi kwiintombi eziziziyatha zodidi lweentombi zokomfuziselo. Ezo zajongwa ziludidi ‘lomkhonzi ongendawo’ azinayo ioli yeLizwi likaThixo elikhanyisayo nomoya wakhe oyingcwele kwizitya zazo ukwenzela ukukhanyisa izibane zazo. Ngaloo ndlela zazingenalo ukhanyiselo lokomoya olwaneleyo lokuqonda “isihlwele esikhulu” ‘sezinye izimvu,’ ebesikade sihlanganiswa ukususela ngowe-1935 njengenxalenye ‘yomhlambi omnye.’—Mateyu 24:45-51.
12. Ngoobani abaye baba ngamaqabane angenakwahlulwa entsalela yodidi lomtshakazi?
12 Ukususela ngeMfazwe Yehlabathi II, ukuzaliseka kwesiprofeto sikaYesu ‘sokupheliswa kwephakade eli’ ikakhulu kubangelwa yindima ephunyezwa seso ‘sihlwele sikhulu’ ‘sezinye izimvu.’ Ukukhanya okubangelwa zizibane ezikhanyisayo zentsalela kuqaqambise amehlo eentliziyo zaso, ibe sincediwe ukubonakalisa oku kukhanya kwabanye abasahleli ebumnyameni beli hlabathi. (Thelekisa amaEfese 1:18.) Sincede izigidi zabemi balo mhlaba ukuba baqonde ubukho boKumkani onguMyeni njengoko lusondela usuku lokutshata kwakhe nodidi olupheleleyo lomtshakazi. Siye saba ngamaqabane angenakwahlulwa entsalela yodidi lomtshakazi.
13, 14. (a) Yiyiphi imeko evuyisayo ngokubhekisele kumaqabane entsalela echazwe ngokomfuziselo kwiSityhilelo 7:9, 10? (b) Yaba yintoni intsabelo ekhawulezileyo kwingcaciso yeso siprofeto?
13 Ukususela ngowe-1935 la maqabane entsalela yodidi lomtshakazi ebevuya. Akavuyiswa nje kuphela ngamalungelo azukileyo asele efunyenwe yintsalela kodwa akwavuyiswa nangamalungelo okusikelelwa aye enziwa awafumana ngenxa yentsalela yodidi lomtshakazi.
14 Abantu bakaYehova bakhanyiselwa isibhalo esimangalisayo eWashington, D.C., kwindibano yowe-1935, ibe sona sayixela kwangaphambili imeko eyonwabisayo ‘yesihlwele esikhulu,’ amaqabane abathanjiswa. Khawube nomfanekiso-ngqondweni nje waso, ‘simi phambi kwetrone [kaYehova uThixo] naphambi kweMvana, sithiwe wambu ngeengubo ezinde ezimhlophe, sinamasundu ezandleni zaso’! Khawuphulaphule oko sikuvakalisa ngokudanduluka ukuze kuve bonk’ abantu: “Usindiso kuye uThixo wethu, lowo uhleli phezu kwetrone, nakuyo iMvana”! (ISityhilelo 7:9, 10) Sele sinokholo ‘kwiMvana kaThixo, ethwala isuse isono sehlabathi,’ ibe sizahlulele ngayo kuYehova uThixo saza sabhaptizwa ngokufuzisela oko kuzahlulela. (Yohane 1:29) Ewe, abangama-840 kuso babhaptizwa usuku emva kokuba kuphulaphulwe ingcaciso yeSityhilelo 7:9-17 ngoLwesihlanu, ngoMeyi 31, 1935.
15. Ukususela ngoko, bangaphi abaye babhaptizwa, ibe baye bachazwa njani kwiSityhilelo 7:14-17?
15 Abangaphezu kwezigidi ezithathu benze okufanayo ukususela kuloo ndibano yaseWashington ngowe-1935. Ngaloo ndlela bafaniswa njengabanxibe iingubo ezimhlophe ngenxa yokuba bezihlambe egazini elicocayo leMvana. Ibe banethemba lokuphuma kwimbandezelo enkulu ejongene nalo lonke ihlabathi loluntu, ekubeni beya kukhuselwa ngokucacileyo nguThixo ukutyhubela loo mbandezelo. (Mateyu 24:21, 22) Ngoko ke, bachazwa njengabakwitempile yokomoya kaYehova yaye bemkhonza nentsalela yodidi lweentombi.—ISityhilelo 7:14-17.
16. Ngoko, umbulelo omkhulu ubhekiswa koobani ngenxa yendima yabo ngokunxibelelene nokuzalisekisa uMateyu 24:14?
16 Ngoko ke, kuthiwa maz’ enethole ‘kwisihlwele esikhulu’ sezizwe ngezizwe nesithetha iilwimi ezininzi ngenxa yendima enkulu esiye sayiphumeza ekuzalisekiseni isiprofeto soMyeni esikuMateyu 24:14!
“Lwavalwa Ke Ucango”
17. (a) Luya kuvalwa nini ucango olusa kwimisitho yomtshato? (b) Yintoni ekufuneka yenziwe ngoku yintsalela yodidi lweentombi ‘nesihlwele esikhulu’ samaqabane ayo?
17 Ukuba kanye kanye intsalela yodidi lweentombi iya kungena nini na kwimigidi yesidlo somtshato, kuze kuvalwe ucango, oko akwaziwa. Kodwa ngokungathandabuzekiyo kusondele ngaphezu kunanini na ngaphambili, ibe ixesha liyaphela! Ngoko, ngokufanelekileyo, uYesu waqukumbela umzekeliso weentombi ngala mazwi esilumkiso athi: “Phaphani ngoko, ngokuba ningayazi imini kwanalo ilixa.”—Mateyu 25:13.
18. (a) Iintombi eziziziyatha ziye zazihlanganisa noobani ngoku? (b) Yiyiphi inxalenye yomzekeliso kaYesu eziza kuyifumana kungekudala?
18 Ngenxa yesi sizathu iintombi eziziziyatha ziya kufikelwa koku zingalindelanga. Ngokwahlukana kwazo neentombi eziziingqondi, ziye zaba yinxalenye yeli hlabathi ligwetyiweyo zaza zazihlanganisa nabo bonke abanye abantu bonqulo abakwisithokothoko sobumnyama emhlabeni wonke. Ngaloo ndlela zimele zifumane oko uMyeni onguYesu Kristu wakuchaza kula mazwi omzekeliso: “Zithi ke kamva zifike nezinye iintombi ezo, zisithi, Nkosi, nkosi, sivulele. Yaphendula ke yona yathi, Inene ndithi kuni, andinazi nina.”—Mateyu 25:10-12.
19. Ngoko ke ngoobani abafanekiselwa ziintombi eziziziyatha, ibe kutheni behlanganiswa neBhabhiloni Enkulu nje?
19 Ngoko ezo ntombi ziziziyatha azinakuluvulelwa ucango ukuze zifumane isidlo. Zibafanekisela kakuhle abo bathi ebudeni ‘bokupheliswa kwephakade eli’ basilele ukungena ‘kubukumkani bamazulu.’ (Mateyu 24:3; 25:1) Ngenxa yokunamathela kwabo kuhlobo lonqulo abalunyulileyo, njengoko kuboniswe ngokuya kwazo kwindawo yentengiso ukuze zithenge enye ioli, bahlanganiswa neBhabhiloni Enkulu.
20. (a) Xa iintombi eziziziyatha zibona “iimpondo ezilishumi” ‘zerhamncwa’ ziqalisa ukujikela iBhabhiloni Enkulu, ziya kubhenela kubani yaye zisithini? (b) Nakuba kunjalo kungani ziya kutshatyalaliswa nje?
20 Ngenxa yoko, xa “irhamncwa” lokomfuziselo, elikhwelwe lihenyukazi lonqulo, lilijikela ‘ngeempondo zalo ezilishumi,’ ziya kubhujiswa kunye nalo. (ISityhilelo 17:16) Xa abantu bonqulo abanjalo, abafanekiselwa ziintombi ezintlanu eziziziyatha, bebona oku kuqaliswa kokugatywa konqulo olubuBhabhiloni yimikhosi enamandla yobupolitika, baya kuphethukela kuKumkani onguMyeni, besithi nabo bangabodidi ‘lobukumkani basezulwini’ ibe bamele bangeniswe kumsitho womtshato wokomoya neentombi eziziingqondi. Okukhwankqisayo kukuba, lowo bambiza ngokuthi “Nkosi,” uMyeni onguYesu Kristu, akayi kuvuma ukubagqala njengabafanelwe kukungeniswa kuBukumkani bamazulu. Ibe abafumananga kwanethemba lobomi obungunaphakade ‘nesihlwele esikhulu.’ Ngoko ayikho enye into abaya kuyifumana aba bantu bonqulo baziziyatha ngaphandle kokutshatyalaliswa nobukhosi behlabathi bonqulo lobuxoki, iBhabhiloni Enkulu!
21. (a) Ngenxa yelo themba loyikisayo, liliphi ikhondo elilandelwa ziintombi eziziingqondi namaqabane azo? (b) Ngawaphi amalungelo enkonzo amalungu ‘esihlwele esikhulu’ anethemba lokuwanandipha?
21 Elinjani ithemba ukoyikisa abajongene nalo! Ikuqonda oku, intsalela nenginginya yamaqabane ayo baya kusoloko besamkela icebiso likaYesu ‘lokuphapha.’ Baya kusoloko bezaliswe ngumoya kaThixo oyingcwele baze bavumele ukukhanya kukhanyise ngokungenaloyiko kuse ekuzukisweni kukaYehova uThixo noYesu Kristu. Umvuzo abaya kuwufumana sisiqinisekiso solonwabo! Ibe amalungu ‘esihlwele esikhulu’ alindele ukufumana izigxina zokuba ngabathetheli ‘kumhlaba omtsha,’ njengoko beya kukhethwa nguKumkani onguMyeni otshatileyo.—Isaya 32:1; thelekisa INdumiso 45:16.
22. (a) Ukuzaliseka komzekeliso weentombi kuqinisekisa siphi isibakala? (b) Ngoobani abaya kuvuyiswa ngulo mtshato woKumkani onguMyeni nomtshakazi wakhe oziintombi?
22 Ngoko le nzaliseko ingakumbi yomzekeliso weentombi ezilishumi iqinisekisa isibakala sokuba siphila ‘ekuphelisweni kwephakade eli.’ Hayi indlela esinokuba nombulelo ngayo kuba siye sakhanyiselwa ukuba sibone obu bungqina bokusondela komtshato kaYesu Kristu nodidi lwakhe olupheleleyo lomtshakazi! Ngenxa yalo mtshato wasezulwini, izulu ‘nomhlaba omtsha’ wobulungisa ziya kuba novuyo olungathethekiyo.—ISityhilelo 19:6-9.