Isahluko 7
Ukuhlolisiswa Kwendlela Esetyenziswe Ngayo Imali KaKristu
1. Nguwuphi urhulumente ongenazo iingxaki zoqoqosho, ibe ngoobani ngoku ekufuneka baphendule kulo rhulumente?
NGAPHANDLE nje korhulumente omnye jwi, bonke oorhulumente baneengxaki zoqoqosho. Oorhulumente abaninzi bathe zwabha ematyaleni. Urhulumente omnye ongenawo ‘bubukumkani bamazulu’ ngoku obuvakaliswa ngokubanzi. (Mateyu 25:1) Abo banethemba lokuba ngamalungu oBukumkani basezulwini abasebenzela loo rhulumente basekho emhlabeni. Ebudeni beli thuba lilelomngcipheko gqitha kuyo yonke imbali yabantu, aba bakhonzi ‘bobukumkani bamazulu’ babizelwa ukuza kuphendula. Bamele baphendule kurhulumente ngendlela abazisebenzise ngayo izinto ezixabisekileyo abebeziphathisiwe.
2. Kungani simele sibe nomdla gqitha kumzekeliso othile njengoko wabaliswa “nguMthetheli Woxolo”?
2 Ukuze kucaciswe lo mbandela, oyena mmeli uphambili wobo “bukumkani bamazulu” kudala ngaphambili wabalisa umzekeliso. Oku kumele kubangel’ umdla kuthi namhlanje, kuba “uMthetheli woxolo” wawuquka kwisiprofeto sakhe esithabatha ithuba elide ‘nesingumqondiso’ owawuya kuphawula ‘ukufika’ kwakhe eBukumkanini enegunya elipheleleyo lokulawula. (Mateyu 24:3) Thina namhlanje sibandakanyeke ngokupheleleyo kwimiphumo elandela ukuzaliseka komzekeliso wesiprofeto, ekubeni ukuqhubeka kwethu sikho, ubomi bethu kanye, bubandakanyekile. Ngoko “uMthetheli woxolo” wawubalisa ngale ndlela lo mzekeliso kubapostile bakhe kwiintsuku ezimbalwa ngaphambi nje kokufa kwakhe njengedini eKalvari.
Umzekeliso Weetalente
3. Abakhonzi abafumana iitalente ezivela enkosini ngaphambi kokuhamba kwayo baziphatha njani ebudeni bethuba lokungabikho kwayo?
3 “Phaphani ngoko, ngokuba ningayazi imini kwanalo ilixa. Kuba kunjengomntu owathi, eza kuhambela kwelinye [kwelikude, NW], wabiza abakhe abakhonzi, wayinikela kubo impahla yakhe. Wathi omnye wamnika iitalentea zantlanu, omnye zambini, nomnye yaba nye, walowo wanikwa ngokwawakhe amandla; wahambela kwelinye [kwelikude, NW] kwaoko. Lowo ke wamkela iitalente ezintlanu, waya wasebenza ngazo, wenza esinye isihlanu seetalente. Kwangokunjalo nalowo wamkela ezimbini, naye wazuza esinye isibini. Ke naye lowo wamkela yanye, waya wemba emhlabeni, wayifihla imali yenkosi yakhe.
4. Yathini inkosi kwabo bakhonzi balandisayo inani leetalente?
4 “Ithi ke emveni kwexesha elikhulu, ifike inkosi yabo bakhonzi, ibalelane nabo. Weza lowo wamkela iitalente ezintlanu, wazisa esinye isihlanu seetalente, esithi, Nkosi, wandinika iitalente zantlanu; khangela, ndizuze esinye isihlanu seetalente phezu kwazo. Yathi ke kuye inkosi yakhe, Hee ke, mkhonzi ulungileyo, uthembekileyo! Ubuthembekile kwiinto ezimbalwa; ndiya kukumisa phezu kweento ezininzi; ngena eluvuyweni lwenkosi yakho. Weza ke nalowo wamkela iitalente ezimbini, wathi, Nkosi, wandinika iitalente zambini; khangela, ndizuze esinye isibini seetalente phezu kwazo. Yathi kuye inkosi yakhe, Hee ke, mkhonzi ulungileyo, uthembekileyo! Ubuthembekile kwiinto ezimbalwa; ndiya kukumisa phezu kweento ezininzi; ngena eluvuyweni lwenkosi yakho.
5, 6. Umkhonzi wesithathu wazithethelela ngokuthini ngokufihla italente, ibe yenza ntoni inkosi kuye?
5 “Weza ke nalowo wamkela italente yanye, wathi, Nkosi, bendikwazi wena ukuba ungumntu olukhuni, uvuna apho ubungahlwayelanga khona, ubuthe apho ungelelanga khona; ndasuka ndoyika, ndaya ndayiselela italente yakho ngomhlaba; nanku unako okwakho. Yaphendula ke inkosi yakhe yathi kuye, Mkhonzindini ukhohlakeleyo, ulivila, ubusazi nje ukuba ndivuna apho ndingahlwayelanga khona, ndibuthe apho ndingelelanga khona, ubumelwe kukuthi ngoko ube ubuyibeke imali yam kubananisi, ndaza ndakufika mna, ndabuya ndakuzuza okwam kunenzala.
6 “Mhlutheni ngoko italente leyo, niyinike lowo uneetalente ezilishumi. Kuba wonke umntu onako uya kunikwa, abe nako ngokugqithiseleyo; ke ongenako, uya kuhluthwa kwanoko anako. Naye umkhonzi ongancedi lutho, mkhupheleni ebumnyameni obungaphandle; khona apho kuya kubakho ukulila nokutshixiza kwamazinyo.”—Mateyu 25:13-30.
7. Iitalente zimela ntoni?
7 Kulo mzekeliso, iitalente zimela ntoni? Zimela into exabiseke kakhulu, kungekuko ngokwemali kodwa ngokomoya. Iitalente zimela uthumo lokwenza abafundi bakaKristu. Into ehambisana nolu thumo lithuba lelungelo elixabisekileyo lokusebenza njengoonozakuzaku bakaKristu, uKumkani, ukumela uBukumkani kuzo zonke iintlanga zehlabathi.—Efese 6:19, 20; 2 Korinte 5:20.
8. (a) Udidi lomkhonzi ‘olivila’ luphoswe kubuphi ubumnyama ebudeni ‘bokupheliswa kwephakade eli’? (b) Kungani ihlabathi loluntu lingakunandiphi nje ukukhanya kwenkoliseko nentsikelelo kaThixo?
8 Ngokungathandabuzekiyo, thina namhlanje sifikelele encotsheni yenzaliseko yalo mzekeliso wesiprofeto! Kwesi sizukulwana kufike elona thuba lobumnyama kuyo yonke imbali yabantu! Eneneni, kukho ubumnyama obumele bubekho ngaphandle kwenxalenye ebonakalayo yentlangano kaYehova apho udidi lomkhonzi ‘olivila’ ‘nongancedi lutho’ lunokuphoswa khona ngokuyalela kweNkosi. ‘Ubumnyama obungaphandle’ obunjalo bufanekisela imeko eyenziwe mnyama yehlabathi loluntu, ingakumbi ngokonqulo. Ihlabathi loluntu alikunandiphi ukukhanya kwenkoliseko nentsikelelo kaThixo. Alinako ukukhanya kolwazi olungoBukumkani bukaThixo. Liphantsi ‘kothixo weli phakade,’ oye “wazimfamekisa ngaphakathi kwabo iingqiqo zabangakholwayo, ukuze singabengezeli kubo isikhanyiso seendaba ezilungileyo zobuqaqawuli bukaKristu, ongumfanekiselo kaThixo.”—2 Korinte 4:4.
9. (a) Ngokuzalisekisa lo mzekeliso, ngubani ofanekiselwa ngulo ‘mntu,’ ibe wahamba umgama ongakanani? (b) Bubuphi ubungqina obubonisa ukuba ubuyile?
9 Namhlanje buyacaca ubungqina bokuba lowo wafanekiselwa ‘ngumntu,’ owayeneetalente zesilivere ubuncinane ezisibhozo, ubuyile ekutyeleleni kwakhe kwelikude. Loo ‘mntu’ nguKristu Yesu. Watyelela kwelikude waya kuMdali welanga, wenyanga neenkwenkwezi zendalo yethu. Ukuphawula ukubuya kwakhe, iimfazwe ezimbini zehlabathi, ngoku eziye zaphelekwa zezinye iimfazwe ezininzi ezincinane, zenze umhlaba wethu wagcwal’ igazi. Njengoko kwaxelwa kwangaphambili, ezi mfazwe ziye zaphelekwa ziindlala, ziindyikitya zokufa neenyikima zomhlaba nokwanda kokuchas’ umthetho nokushunyayelwa ‘kwezi ndaba zilungileyo zobukumkani’ kwelimiweyo liphela. Oku kuzalisekise iinkcukacha zoko uYesu wathi kwakuya kuba ‘ngumqondiso wokufika kwakhe nowokupheliswa kwephakade eli.’—Mateyu 24:3-15.
10. (a) Kungani lo mntu watyelela kwelikude nje? (b) Kungani le nto ihlabathi loluntu lingazange likubone ngokwenene ukubuya kwakhe?
10 Nangona oku kungaboniswanga ngokungqalileyo kumzekeliso kaYesu, umntu owatyelela kwelikude, engayi kubakho ithuba elide, ngokwenene wayethabathe uhambo lokuya kuzuza “ubukumkani bamazulu,” ekubhekiselwe kubo ngaphambilana kuMateyu 25:1. Phezu kwako nje ukuqhambuka kweMfazwe Yehlabathi I, uYehova uThixo, obukumkani bakhe phezu koSirayeli babhukuqwa ngowama-607 B.C.E., wayibek’ etroneni iNdlalifa efanelekileyo yoBukumkani ngowe-1914 C.E., ngexesha elifanelekileyo lokunqunyanyiswa kokunyathelelwa phantsi kwabo. IiNtlanga azizange zikubone ngamehlo azo emvelo ukubekwa etroneni kwaLowo uKumkani uDavide awambiza ngokuthi ‘Nkosi yam.’ (INdumiso 110:1) Zazingenakumbona kuba lo mntu womzekeliso, uYesu Kristu, wayethe kubafundi bakhe, ngaphambi kokutyelela kwelikude: “Lise lilifutshane ixesha, ukuze ihlabathi lingabi sandibona.”—Yohane 14:19.
11. (a) Yayiza kuba yintoni inxalenye yomqondiso ophawula ukubuya nobukho bakhe? (b) Kwakuza kwenzeka nini?
11 Ekubeni ukuza kukaKristu emandleni oBukumkani basezulwini kwakungabonakali emehlweni abantu, kwaye kwafuneka abucacise ubukho bakhe kuBukumkani basezulwini ngomqondiso owacelwa ngabapostile kuye kwiintsuku ezintathu ngaphambi kokufela kwakhe ukholo. Inxalenye yaloo mqondiso weyisayo yayiyeyokuba lo mntu wayeya kubuya kwelikude aze azinzise imicimbi nabakhonzi bakhe awayebaphathise iitalente ezixabiseke gqitha. Ekubeni kunjalo, oko kuzinziswa kwemicimbi kunye nabo bababalwa ngokusebenzisa iitalente kwakufanele kwenzeke emva kowe-1914.
12. (a) Imfanelo yokukhokela ekunikeleni ubungqina boBukumkani ithiwe zinzi phezu koobani? (b) Usindiso lwabo lokugqibela luxhomekeke entwenini?
12 Oku kwakuya kuthetha ukuphendula kwabo babeziindlalifa ‘zobukumkani bamazulu.’ Oku kwakuya kuthetha ukuphendula kwentsalela yelo qumrhu lamaKristu, eyayizelwe ngomoya kaThixo ukususela ngomhla wePentekoste yonyaka wama-33 C.E. (IZenzo, isahluko 2) Kwakuza kubakho intsalela yabo emhlabeni ebudeni ‘bokupheliswa kwephakade eli’ ukususela ngowe-1914 ukubhekisa phambili. Aba yayiza kuba ngabo babeya kunikwa imfanelo yokukhokela ekuzalisekiseni isiprofeto sikaYesu selo xesha: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” (Mateyu 24:14; Marko 13:10) Phezu kwabo kuthe zinzi imbopheleleko yokuthembeka kude kube sekupheleni, ukuze basindiselwe kuBukumkani bamazulu. (Mateyu 24:13) Ejonge ekubasindiseni ekugqibeleni, uThixo onguSomandla uye wabomeleza ukuze banyamezele kude kube ngoku, phezu kwayo nje intshutshiso yazwenibanzi. Esi sibakala sibubungqina bokuba uyakholiswa ngabo!
Amabango Obuxoki Okuba Neetalente
13. (a) Ngoobani ababanga ukuba bafumene iitalente? (b) Sigqiba ngelithini ke ngabo?
13 INgqobhoko ithi ngokuzukileyo inikwe iitalente zomntu osisityebi okumzekeliso kaYesu. Kodwa xa siqwalasela ikhondo layo lesenzo ukususela ngowe-1914, sifikelela kwesiphi isigqibo? Sifikelela kwesi sigqibo: Ayiphilanga ngokuvisisana noko ikubangayo. Ingathembekanga kumntu womzekeliso, iye yazimanyanisa nezikumkani zeli hlabathi; abapolitiki babo rhulumente behlabathi bazizithandane zayo. Isaxhasa iZizwe Ezimanyeneyo, ezilandela uManyano Lwezizwe ngoku olufileyo.
14. Siyifumana phi iNgqobhoko namhlanje?
14 Ayifani kwanaye nomkhonzi owayenetalente enye, owangqineka elivila nongazange azandise izinto zenkosi yakhe. Ngoko kweli thuba elisusela kwincopho yeMfazwe Yehlabathi I ngowe-1918, iNgqobhoko iye yabhencwa ngokungqalileyo njengebisoloko isebumnyameni ngaphandle kwendlu yeNkosi ekhanyiswe kakuhle. Ngaphandle ebumnyameni obusisithokothoko ehlabathini kulapho, ngokufuziselayo, sele ilila khona yaye itshixiza namazinyo. Okungakumbi koku kuseza kwenzeka xa izithandane zayo zobupolitika ziyijikela zize ziyihlube ihambe ze njengeyona nxalenye imangalelekayo kuyo yonke iBhabhiloni Enkulu, ubukhosi behlabathi bonqulo lobuxoki.
Ukukhutshwa Kodidi ‘Lomkhonzi Okhohlakeleyo’
15. Ngoobani abafanekisela umkhonzi olivila, ibe bazifumana bephi ngoku?
15 Abo ngokwenene baye bayinxalenye yentsalela ethanjiswe ngomoya baza baphathiswa izinto ezixabisekileyo zoBukumkani, kodwa abaye abenza umgudu wokwandisa izilangazelelo zeNkosi ebuyileyo, baye bakhutshwa kwinkonzo yeNkosi yasebukhosini. (Mateyu 24:48-51) Asisalufumani udidi ‘lomkhonzi okhohlakeleyo’ olivila lushumayela “ezi ndaba zilungileyo zobukumkani.” Kunoko, lubalaselisa usindiso lwalo lobuqu endaweni yokubalaselisa izilangazelelo zoBukumkani bukaThixo. Ngoku luzifumana ‘lusebumnyameni obungaphandle,’ apho kukho ihlabathi loluntu. Italente yalo yokomfuziselo iye yoxuthwa kulo yaza yanikelwa kudidi olubonakalise ukuvuma ukusebenzisa loo talente ebudeni benxalenye eseleyo ‘yokupheliswa kwephakade eli.’
16. (a) Eli lelona xesha lifanelekileyo lokuzisebenzisela ntoni iitalente zokomfuziselo? (b) Yiyiphi imfanelo ngoku ethe zinzi ‘kwisihlwele esikhulu’ ‘sezinye izimvu’?
16 Alizange libekho ixesha elifaneleke kangaka lokuvakalisa ‘iindaba ezilungileyo zobukumkani’ ngokusebenzisa “italente,” oko kukuthi, ilungelo elingaqhelekanga, ithuba lokusebenza ‘njengezigidimi [oonozakuzaku, NW] ngenxa kaKristu,’ uKumkani olawulayo nokwenza abafundi bakhe. (2 Korinte 5:20) Ibe njengoko isiphelo sisondela ngokukhawuleza, kufanelekile ukuba “isihlwele esikhulu” ‘sezinye izimvu’ sibancede abo nozakuzaku bazelwe ngomoya basaseleyo njengoko besithi ngenzondelelo bayisebenzise ngokupheleleyo “italente” exabisekileyo abayiphathisiweyo.
[Umbhalo osemazantsi]
a Italente yesilivere yamaGrike inobunzima obungama-20,4 eekhilogram.
[Umfanekiso okwiphepha 59]
Abo babonakalisa iimpawu zomkhonzi okhohlakeleyo bayakhutshwa kwinkonzo yeNkosi baze baphoswe ebumnyameni