Isahluko 21
Ukubuyiselwa Komyezo Wase-Eden—Emhlabeni Wonke
1. (a) Umyezo wase-Eden uya kubuyiswa ngayiphi indlela, ibe kutheni le nto ungayi kugubungela kuphela ummandla olinganiselweyo womhlaba? (b) Abonisa ntoni amazwi kaYesu awayewabhekisa kumenzi wobubi?
UMYEZO wase-Eden “wawuyiparadisi yolonwabo,” ibe uya kubuyiselwa ngokwaloo ngqiqo. (Genesis 2:8, Douay Version) IParadisi yangaphambili yayigubungele ummandla olinganiselweyo womhlaba. Kodwa uYehova wayenenjongo yokuba imida yayo yayiza kwandiswa, jikelele, yintsapho yabantu eyandayo de le Paradisi igubungele umhlaba wonke ize iwugubungele ngobuhle bemvelo obubalaseleyo. (Genesis 1:26-28; 2:8, 9, 15) Amazwi kaYesu kumenzi wobubi onovelwano owafa ecaleni kwakhe eKalvari aqinisekisa le ndoda ukuba yayiya kuvuswa xa ukubuyiselwa kweParadisi kuqhubeka, ibe ngelo xesha uya kuphawula inguqulelo entle emhlabeni. (Luka 23:43, NW) Iya kuba njani iParadisi yasemhlabeni ebuyiselweyo? Iya kwahluka njani kumyezo wase-Eden owawukho ngaphambili?
2. (a) Yintoni eyayikho kumyezo wangaphambili wase-Eden eya kube ingekho kwiParadisi yomhlaba wonke? (b) Kutheni le nto kusengqiqweni ukuthi uThixo akayi kukuvavanya ukuthobela koluntu ngomthi omnye?
2 Kwiziprofeto ezichwayitisayo zezinto ezizukileyo neziza kubakho kungekudala, kukho into esiyibonayo engekhoyo kwiParadisi ebuyiselweyo yasemhlabeni wonke. Iyintoni leyo? ‘Ngumthi wokwazi okulungileyo nokubi’ ‘owawuphakathi emyezweni.’ (Genesis 2:17; 3:3) Ngokucacileyo lo yayingumthi omnye. Ngaba bekuya kuba sengqiqweni ukucinga ukuba phakathi kumyezo wase-Eden obuyiselweyo nakuwo wonke umhlaba kumele kubekho umthi owodwa onjalo ebekuya kubakho isalelo sobuthixo kuwo? Hayi. Oku bekuya kufuna ukuba abantu bahambe umgama omde besuka kwiimbombo ezikude zomhlaba ukuze baye kwindawo enomthi onjalo kuMbindi Mpuma ukuze mhlawumbi badle esiqhameni sawo ukuze bangathobeli uThixo Osenyangweni.
3. Yintoni enye engayi kubakho kwiParadisi ebuyiselweyo?
3 Ngaphezu koko, kwindawo enjalo akuyi kubakho nyoka “ithethayo” emema abo basondela kulo mthi ukuba badle kwisiqhamo sawo esikhangeleka sinomtsalane ngenxa nje yokudela imiyalelo kaThixo. Ibe akuyi kubakho moya ungendawo ungabonakaliyo wokusebenzisa inyoka nokuyenza ibonakale ithetha nokumema obukeleyo ukuba avukele uThixo ngokuhamba ngekhondo lokungathobeli uMdali, nto leyo eya kuthetha imiphumo ebulalayo.
4. Kutheni le nto uSathana uMtyholi engayi kubakho ebudeni boLawulo Lwewaka Leminyaka ‘loMthetheli Woxolo’?
4 Isidalwa somoya esingabonakaliyo esasibangela ukuba inyoka “ithethe” emva apho kumyezo wase-Eden sobe singekho ebudeni boLawulo Lwewaka Leminyaka ‘loMthetheli Woxolo,’ uKristu Yesu. Lowo ungendawo, uSathana uMtyholi, uya kuthintelwa ngokupheleleyo emva kweArmagedon. ISityhilelo 20:2, 3 sisixelela ukuba “uMthetheli woxolo” uya kuyibamba ‘inyoka yakudala uMtyholi, uSathana ke,’ aze ambophe yaye amphose enzonzobileni iminyaka eliwaka.
Uxolo Nonqabiseko Lokwenyaniso KwiParadisi Ebuyiselweyo
5. KwiParadisi ebuyiselweyo, kutheni le nto uxolo nonqabiseko lokwenyaniso luya kwesamela emhlabeni wonke?
5 Olunjani uxolo nonqabiseko oluya kulandela! Iya kuba ingekho impembelelo kaSathana nokulawula kwakhe uluntu ‘njengomphathi wehlabathi’! (Yohane 14:30) Njengoko imikhosi kaSathana yeedemon nayo iya kube isenzonzobileni, ekugqibeleni umhlaba uya kube wahlukene nazo zonke iintlobo zokukhafula, ubugqwirha bomlingo nobugqi—ewe, woba wahlukene nazo zonke iintlobo zobudemon, uYehova azicekisileyo.—Duteronomi 18:10-12.
6, 7. (a) Kutheni le nto indalo yezilwanyana ingayi kuba sisisongelo ebantwini? (b) Kule nkalo sisiphi isiprofeto esiya kuzaliseka ngokoqobo?
6 Indalo yezilwanyana ayiyi kwenzakalisa okanye ibe sisisongelo kwabahlala kwiParadisi ebuyiselweyo. UThixo uya kubuyisela kwizidalwa eziphantsi nawuphi na umlinganiselo ezingenawo wokoyika abantu. Ngaloo ndlela sinokukhangela ingcaciso entle yobomi bezilwanyana eyandlalwe kuIsaya 11:6-9 njengeya kuba nenzaliseko yokoqobo ebudeni boLawulo Lwewaka Leminyaka ‘loMthetheli Woxolo’:
7 “Ingcuka iya kuhlala nemvana, ingwe ibuthe netakane lebhokhwe; kubuthe ndawonye ithole lenkomo, nengonyama entsha, nenkomo etyetyisiweyo; nomntwana aziqhube ezo zinto. Ithokazi lenkomo nemazi yebhere ziya kudla utyani ndawonye, amankonyana azo abuthe ndaweni-nye; ingonyama idle umququ njengenkomo; adlale umntwana owanyayo emngxunyeni wephimpi, olunyulweyo ase isandla sakhe elukhozweni lweliso lerhamba. Ezo zinto aziyi kwenza bubi, aziyi konakalisa ezintabeni zam zonke ezingcwele; ngokuba ilizwe liya kuzala kukwazi uYehova, njengamanzi egubungele ulwandle.”
8. Iyintoni intsingiselo yamazwi esiprofeto athi ukudla kwenyoka ‘koba luthuli’?
8 Bekuya kuba yinto engavisisaniyo ngoThixo ukuphefumlela isiprofeto esinjalo ukuba oko bekunentsingiselo nje yokomoya yaye kungabonisi ukuba izinto ezinjalo ziya kubakho kubomi bokwenene basemhlabeni. Ngokufanayo, uIsaya 65:25 usixelela oku: “Kuya kudla ndawonye ingcuka nemvana, ingonyama idle umququ njengenkomo; inyoka, sibe luthuli isonka sayo.” Ngaba oku kubonisa ukupheliswa kwentsapho yenyoka kumyezo wase-Eden oya kubakho kumhlaba wonke? Hayi, ingcaciso yesiprofeto ethi ukudla kwenyoka ‘koba luthuli’ ithetha ukuba amalungu entsapho yezidalwa ezirhubuluzayo akayi kuphinda abe sisisongelo kubomi nakwimpilo entle yezidalwa ezingabantu. Kuya kufuneka eqondile ukuba uluntu lulawula zona ibe lulawula yonk’ into eshukumayo phezu komhlaba, kanye njengokuba kwakunjalo ngoAdam kumyezo wase-Eden xa wathiya zonke izilwanyana ngaphandle koloyiko.—Genesis 2:19, 20; Hoseya 2:18.
9, 10. Yintoni exelwa kwangaphambili yiNdumiso 65 noIsaya 25:6 ngomhlaba phantsi kolawulo ‘loMthetheli Woxolo’?
9 Ubuhle nobukhulu baloo myezo wazwenibanzi wase-Eden asinakuwuthelekelela. Kodwa iBhayibhile isinika ingcaciso yesiprofeto kwiNdumiso yama-65, ebhekiswa kuThixo. Ngokuyinxenye, le ndumiso ithi: “Uwuvelele umhlaba, wawunyela, wawutyebisa kakhulu. Umjelo kaThixo uzele ngamanzi: Walungisa ingqolowa yabo, ngokuba uwenjenje ukuwulungisa.” Ngelo xesha akuyi kubakho zimbalela, kunoko, kobakho ‘iziphango’! (INdumiso 65:1, 9-13) Kuya kubakho ukudla okuyintabalala kwabo bonke abemi bomhlaba.
10 Le ntabalala yezinto ikwaxelwa kwangaphambili kuIsaya 25:6: “UYehova wemikhosi uya kuzenzela zonke izizwe isidlo sezinto ezityebileyo kule ntaba, isidlo sewayini egcinwe ngeentsipho, sezinto ezityebileyo ezinomongo, sewayini egcinwe ngeentsipho, yaza yahluzwa.” Abemi beParadisi ebuyiselweyo baya kudla izinto ezityebileyo ezinomongo ezondla intliziyo nezenza ubuso buqaqambe. Baya kusela iwayini, egcinwe ngokufanelekileyo ngeentsipho yaza yahluzwa, nto leyo eya kwenza iintliziyo zabo zivuye. (INdumiso 104:14, 15) Ukudla akuyi kunqongophala phantsi koLawulo Lwewaka Leminyaka ‘loMthetheli Woxolo’! Kunoko, kuya kubakho “intabalala.”—INdumiso 72:16.
Iinguqulelo Kulwimi Nakwimozulu
11. Yiyiphi inguqulelo yolwimi eya kwenzeka, ibe oku kuya kuluchaphazela njani uluntu?
11 Ngaba iParadisi yomhlaba wonke iya kufumana ubunzima ngenxa yesiphithiphithi sokuba neelwimi ezininzi? Hayi, kuba “uMthetheli woxolo” kukwabhekiselwa kuye ‘njengoThixo oligorha.’ (Isaya 9:6) Ngaloo ndlela uyakwazi ukushenxisa isiphithiphithi seelwimi esaqalisa kwiNqaba yaseBhabheli. (Genesis 11:6-9) Luya kuba yintoni ulwimi olufanayo lwabo bonke abantwana basemhlabeni ‘bakaBawo Ongunaphakade’? Ngaba iya kuba lulwimi lwangaphambili luka-Adam wokuqala, ulwimi uYehova awamnika lona? Mhlawumbi kunganjalo. Nokuba kunganjani na, yonke imiqobo yolwimi iya kushenxiswa. Uya kukwazi ukuya naphi na uze uncokole nabantu. Uya kukwazi ukubaqonda, ibe nabo bokuqonda. Kuya kubakho ulwimi olunye kuluntu lonke, ibe kuya kufaneleka ngayo yonke iBhayibhile ukuba ifumaneke ngolo lwimi. (Thelekisa uZefaniya 3:9.) Ngolo lwimi wonk’ umhlaba uya kuzaliswa ngokwazi uYehova “njengamanzi egubungele ulwandle.”—Isaya 11:9.
12. UZekariya 14:9 uya kuzaliseka njani?
12 Ngelo xesha aya kuzaliseka amazwi kaZekariya 14:9: “Ngaloo mini iya kuba nguYehova yedwa, negama lakhe lodwa.” NguYehova kuphela oya kunqulwa njengokuphela koThixo oyinyaniso. “Ngaloo mini” yoBukumkani bukaYehova obulawulwa ‘nguMthetheli Woxolo,’ uThixo uya kutyhila indlela yokubizwa ngokuchanileyo kwegama lakhe. Ngelo xesha iya kuba nye kuphela indlela yokubizwa kwelo gama lingcwele ngumntu wonke emhlabeni. Igama lakhe liya kuba linye.
13. Kutheni le nto imozulu, umoya namaza zingayi kuzisa isisongelo kubemi bomhlaba?
13 Ukuba ziziphi na iinguqulelo zemozulu nezingokwemeko-bume eziya kubakho ngoko nako ikwangumcimbi womdla wokwenene kwabo bakhangele phambili kwiParadisi yomhlaba ‘yoMthetheli Woxolo.’ Inye into eqinisekileyo yile: Wonke umhlaba uya kwenziwa indawo eyolisayo ekunokuphilwa kuyo. Ayinakuze loo Paradisi iphazanyiswe ziinkqwithelo ezitshabalalisayo, zizitshingitshane, ngamaza akhukulayo, okanye zizikhukula zamanzi. Umoya, amaza nemozulu zonke ezo zinto ziya kuthobela “uMthetheli woxolo.” (Marko 4:37-41) Kumyezo wase-Eden womhlaba wonke kuya kubakho ulawulo olupheleleyo lwemozulu. Wonke umhlaba uya kwenziwa mhle ube yiparadisi yolonwabo, apho kuya kuba lilungelo elonwabisayo ngoluntu lonke ukuhlala ngokunqabisekileyo ukusa kwixesha elingenasiphelo.
14, 15. (a) Liliphi idinga elibhalwe kwiSityhilelo 21:3, 4 eliya kuzaliseka? (b) UThixo uya kuhlala njani phakathi koluntu? (c) Luhlobo luni lweenyembezi oluya kusulwa ngonaphakade?
14 Ngelo xesha akuyi kubakho sizathu sokubakho kweenyembezi zobuhlungu! ILizwi likaYehova lesiprofeto lisiqinisekisa oku: “Umnquba lo kaThixo unabantu; uya kuhlala nabo emnqubeni, bona babe ngabantu bakhe, yena uThixo abe nabo, enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu.”—ISityhilelo 21:3, 4.
15 Amazulu ayitrone kaThixo, ibe umhlaba usisihlalo seenyawo zakhe. (Isaya 66:1) Ngoko uThixo akanakuhlala emhlabeni ngokoqobo. Kodwa uya kuhlala noluntu. Ebudeni boLawulo Lwewaka Leminyaka, uYehova uya kuhlala noluntu ngokumelwa nguNyana wakhe ozukileyo, uYesu Kristu. Hayi indlela ekuchane ngayo ukuba ubukho bukaYehova bube buya kumelwa ‘nguMthetheli wakhe Woxolo’! Oku kusikhumbuza ngamazwi kaIsaya 7:14 ngegama elasetyenziswa kuMesiya—uImanuweli. Elo gama lithetha oku “uThixo Unathi.” (Mateyu 1:23) Hayi indlela ekuchwayitisa ngayo ukuba, ngoNyana wakhe othandeka kunene, uThixo abe uya ‘kuba’ noluntu! Ngoko iinyembezi zovuyo mhlawumbi zophuma emehlweni ethu njengoko sibona imimangaliso emihle isenziwa ngulo ‘Thixo uligorha,’ ingakumbi xa abathandekayo abafileyo bebuyiselwa ebomini ngokuvuselwa kwiimeko zeParadisi. (IZenzo 24:15) Imimangaliso enjalo iya kuba bubungqina obumangalisayo bokuba uThixo unoluntu nokuba usula zonke iinyembezi zobuhlungu emehlweni ethu ngonaphakade.
Indawo Entle Kwindalo Engenasiphelo
16. Ngaba ukuvuswa kwabafileyo kufuneka kulinde de iParadisi yandiswe ukugubungela umhlaba? Cacisa.
16 UAdam wokuqala waxelelwa indlela yokuqalisa umsebenzi wokwandisa iParadisi ukususela kwalapho kumyezo wase-Eden. Ukufezwa kwaloo njongo yangaphambili yokuyandisa ifikelele emhlabeni wonke kuya kuzaliseka. Kodwa ngaba ukuvuswa kwabafileyo kofuneka kulinde de kwandiswe iParadisi jikelele emhlabeni? Hayi. Ngokomzekelo, abo babuyayo kuvuko lokuqala baya kuvuselwa kumacandelo omhlaba apho kukho abasindi beArmagedon ibe beguqule imimandla enjalo yaba yiparadisi. Njengoko ukuvuswa koluntu lonke kuqhubeka, le mimandla yeParadisi iya kwanda de ihlangane ibumbe iParadisi yomhlaba wonke.
17. Yiyiphi ingcaciso enikelweyo ngeParadisi yomhlaba?
17 IParadisi ezayo iya kugqwesa zonke iipaki okanye imiyezo ethandekayo ekhoyo namhlanje. Ngokuqaqambileyo, wonke umhlaba uya kubonakala njengeparadisi enoxolo, leyo ivuyisa kungekuphela nje amehlo omntu kodwa kwanamehlo oMdali. Iya kuba ngumyezo womhlaba wonke we-Eden ehonjiswe ngohlaza nangemithi—ekuya kuba luyolo ukuyibukela ize ivelise ukudla kokondla izidalwa emfezekweni. Umhlaba uya kuhlala uyindawo entle ngonaphakade kwindalo iphela kaYehova. Ibe lonke uluntu olumanyeneyo luya kuba nemfanelo nelungelo elingunaphakade lokugcina umhlaba uyindawo entle ngolo hlobo.
18. Sazi njani ukuba onke amadoda nabafazi, baya kuhlala kunye eluxolweni njengabazalwana noodade?
18 Onke amalungu ale ntsapho yabantu abahlonel’ uThixo aya kuhlala kunye eluxolweni njengabazalwana noodade benobunyulu obupheleleyo, kuba ngokwenene baya kuba ngabantwana ‘boBawo Ongunaphakade,’ “uMthetheli Woxolo.” Ngoko amadoda akayi kubalawula ngokuzikhukhumalisa abafazi, abaya kuba ngoodade bawo. Kodwa abafazi abafezekileyo baya kuba koko uYehova uThixo afuna babe kuko, kwanjengokuba wayenenjongo yokuba uEva abe ‘ngumncedi’ wendoda yakhe efezekileyo, uAdam.—Genesis 2:18; bona kwaneyoku-1 kaPetros 3:7.
19. Umhlaba oyiParadisi uya kubonakala njani kwabo bakumazulu angabonakaliyo?
19 Imbonakalo yomhlaba oyiparadisi ozaliswe ngamadoda nabafazi abafezekileyo kwabo bakumazulu angabonakaliyo iya kuba yezuke ngakumbi nethandeka ngakumbi kunembonakalo yomhlaba xa wathi waqalisa ukudalwa, ekwathi ngelo xesha ‘amemelela kunye amakhwezi okusa, beduma bonke oonyana bakaThixo.’ (Yobhi 38:7) Ngoko uThixo Osenyangweni, uYehova, uya kube ethethelelwe ngokupheleleyo njengaLowo onjongo yakhe izukileyo ingenakuze ichithwe. Yonke indumiso yoya kuye!
[Umfanekiso okwiphepha 172, 173]
Iparadisi yokoqobo iya kusenza sibe sihle sonke ‘isihlalo seenyawo’ zikaThixo, umhlaba