Isahluko 22
Uyeha Wokuqala—Iinkumbi
1. Ngoobani abalandelayo xa iingelosi zikhalisa amaxilongo, yaye ukuvuthelwa kwexilongo lesihlanu kuvakalisa ntoni?
INGELOSI yesihlanu ilungiselela ukuvuthela ixilongo layo. Sele kukhaliswe amaxilongo amane asezulwini, yaye izibetho ezine sele ziphoswe kwisinye kwisithathu somhlaba uYehova asijonga njengesona sibekek’ ityala—iNgqobhoko. Kuye kwatyhilwa imeko ekuyo yokugulela ukufa. Ngoxa iingelosi zikhalisa amaxilongo, kulandela abantu abenza izibhengezo emhlabeni. Ngoku ixilongo lesihlanu elivuthelwa yingelosi sele liza kuvakalisa uyeha wokuqala, owoyikeka ngakumbi kunoko bekuqhubeka ngaphambili. Uhlobene nesibetho esoyikekayo seenkumbi. Noko ke, okokuqala, masihlolisise ezinye izibhalo eziza kusinceda sisiqonde kakuhle esi sibetho.
2. Yiyiphi incwadi yeBhayibhile echaza ngesibetho seenkumbi esifana neso sibonwa nguYohane, yaye waba yintoni umphumo waso kuSirayeli wamandulo?
2 Incwadi yeBhayibhile kaYoweli, eyabhalwa ebudeni benkulungwane yesithoba ngaphambi kweXesha Eliqhelekileyo, ichaza ngesibetho sezinambuzane, kuquka iinkumbi, esifana neso sibonwa nguYohane. (Yoweli 2:1-11, 25)a Esi sibetho sasiza kubangela ukungonwabi okukhulu kuSirayeli owexukileyo kodwa kwakhona sasiza kuphumela ekubeni mntu ngamnye ongumYuda aguquke aze aphinde akholeke kuYehova. (Yoweli 2:6, 12-14) Ekufikeni kwelo xesha, uYehova wayeza kuthulula umoya wakhe phezu “kwalo lonke uhlobo lwenyama,” ngoxa imiqondiso neempawu ezoyikekayo zaziya kwandulela ‘ukufika kwemini kaYehova enkulu neyoyikekayo.’—Yoweli 2:11, 28-32.
Isibetho Senkulungwane Yokuqala
3, 4. (a) UYoweli isahluko 2 wazaliseka nini, yaye njani? (b) Sabakho njani isibetho esifana nebubu leenkumbi kwinkulungwane yokuqala yeXesha Eliqhelekileyo, yaye esi sibetho saqhuba ixesha elide kangakanani?
3 UYoweli isahluko 2 wazaliseka ngenkulungwane yokuqala. Kwakungoko, ngePentekoste yowama-33 C.E., awathi umoya oyingcwele wathululwa kumaKristu okuqala, uwanika amandla okuba athethe “izinto zobungangamela zikaThixo” ngeelwimi ezininzi. Ngenxa yoko, kwahlanganisana isihlwele esikhulu sabantu. Umpostile uPetros wathetha nabo babukeli bamangalisiweyo, ecaphula uYoweli 2:28, 29 yaye ecacisa ukuba babebona inzaliseko yakhe. (IZenzo 2:1-21) Kodwa ayikho ingxelo yesibetho sokoqobo sezinambuzane ngelo xesha, esabangela ukungonwabi kwabathile saza sakhokelela abanye kwinguquko.
4 Ngaba sasikho isibetho sokomfuziselo ebudeni baloo mihla? Ewe, sasikho ngenene! Sabangelwa kukushumayela okungayekeleliyo kwamaKristu awayesandul’ ukuthanjiswa.b Ngokusebenzisa wona, uYehova wamema loo maYuda awayeya kuphulaphula ukuba aguquke aze anandiphe iintsikelelo ezivela kuye. (IZenzo 2:38-40; 3:19) Abantu abasabelayo baba ngabakholekileyo kuye ngomlinganiselo ophawulekayo. Kodwa kwabo babengasamkeli esi simemo, amaKristu enkulungwane yokuqala aba njengebubu leenkumbi ezitshabalalisayo. Esusela eYerusalem, ahamba lonke elakwaYuda nelaseSamariya. Kungekudala aba kuzo zonke iindawo, ethuthumbisa amaYuda angakholwayo ngokukuvakalisa ekuhleni ukuvuswa kukaYesu, nako konke okwakuthethwa koku. (IZenzo 1:8; 4:18-20; 5:17-21, 28, 29, 40-42; 17:5, 6; 21:27-30) Oko kuthotywa kwezibetho kwaqhubeka de kwafika ‘imini eyoyikekayo,’ ngowama-70 C.E., xa uYehova wazisa imikhosi yamaRoma ukuba itshabalalise iYerusalem. Kwasinda kuphela amaKristu awathi ngokholo abiza egameni likaYehova.—Yoweli 2:32; IZenzo 2:20, 21; IMizekeliso 18:10.
Isibetho Seenkumbi Namhlanje
5. Isiprofeto sikaYoweli sizaliseke njani ukususela ngowe-1919?
5 Ngokusengqiqweni, sinokulindela ukuba isiprofeto sikaYoweli sinenzaliseko yokugqibela kwixesha lesiphelo. Hayi indlela okungqineke kuyinyaniso ngayo oku! Kwindibano yaBafundi BeBhayibhile eyayiseCedar Point, eOhio, eUnited States, ngoSeptemba 1-8, 1919, umoya kaYehova owathululwa ngendlela ephawulekayo washukumisa abantu bakhe ukuba balungelelanise iphulo lokushumayela ehlabathini lonke. Kubo bonke abantu abathi bangamaKristu, ngabo kuphela abathi, ngokuqonda ukuba uYesu wayebekwe etroneni njengoKumkani wasezulwini, abazibandeza ekuvakaliseni ngokubanzi ezo ndaba zilungileyo. Ukunikela kwabo ubungqina ngokungayekeleliyo, ngokuzalisekisa isiprofeto, kwaba njengesibetho esithuthumbisayo kwiNgqobhoko ewexukileyo.—Mateyu 24:3-8, 14; IZenzo 1:8.
6. (a) Wabona ntoni uYohane xa ingelosi yesihlanu ivuthela ixilongo layo? (b) Ngubani ofuziselwa yile ‘nkwenkwezi,’ yaye ngoba?
6 ISityhilelo esabhalwa kwiminyaka enokuba ngama-26 emva kokutshatyalaliswa kweYerusalem, naso siyasichaza eso sibetho. Yintoni esiyongezayo kwingcaciso kaYoweli? Masiyihlolisise le ngxelo, njengoko ichazwa nguYohane: “Neyesihlanu ingelosi yavuthela ixilongo layo. Yaye ndabona inkwenkwezi eyayiwele emhlabeni ivela ezulwini, yaza yanikwa isitshixo somhadi wenzonzobila.” (ISityhilelo 9:1) Le ‘nkwenkwezi’ yahlukile kuleyo ichazwe kwiSityhilelo 8:10 eyabonwa nguYohane isiwa. Ubona ‘inkwenkwezi ivela ezulwini’ ibe yona inesabelo esihlobene nalo mhlaba. Ngaba lo ngumntu wokomoya okanye wokwenyama? Umntu ophethe “isitshixo somhadi wenzonzobila” kamva uchazwa njengophosa uSathana “enzonzobileni.” (ISityhilelo 20:1-3) Ngoko umele ukuba ungumntu wokomoya onamandla. KwiSityhilelo 9:11, uYohane usixelela ukuba iinkumbi ‘zinokumkani, oyingelosi yenzonzobila.’ Zombini ezi ndinyana zimele ukuba zibhekisela kwakumntu ofanayo, ekubeni ingelosi ephethe isitshixo senzonzobila ngokusengqiqweni yayiya kuba yingelosi yenzonzobila. Yaye le nkwenkwezi imele ukuba ifuzisela uKumkani omiselwe nguYehova, ekubeni amaKristu athanjisiweyo egqala kuphela uKumkani omnye oyingelosi, uYesu Kristu.—Kolose 1:13; 1 Korinte 15:25.
7. (a) Kwenzeka ntoni xa kuvulwa “umhadi wenzonzobila”? (b) Iyintoni ‘inzonzobila,’ yaye ngoobani abachitha ixesha elifutshane kuyo?
7 Le ngxelo ihlabela mgama isithi: “Yawuvula umhadi wenzonzobila, kwaza kwenyuka umsi uphuma emhadini apho njengomsi weziko elikhulu, lamnyama ilanga nomoya ngumsi womhadi lowo. Emsini apho kwaphuma iinkumbi zaya emhlabeni; zanikwa igunya elifanayo neloonomadudwane bomhlaba.” (ISityhilelo 9:2, 3) NgokweZibhalo, ‘inzonzobila’ yindawo ekungasetyenzwayo kuyo, ekwayeyokufa. (Thelekisa amaRoma 10:7; ISityhilelo 17:8; 20:1, 3.) Iqaqobana labazalwana bakaYesu lachitha ixesha elifutshane ‘kwinzonzobila’ enjalo yokungasebenzi okulinganiselweyo ekupheleni kwemfazwe yehlabathi yokuqala (1918-19). Kodwa xa uYehova wathulula umoya wakhe phezu kwabakhonzi bakhe abaguqukileyo ngowe-1919, bazimisela ngenkuthalo ukwenza umsebenzi owawungaphambi kwabo.
8. Kwenzeka njani ukuba ukuvulelwa kweenkumbi kuphelekwe “ngumsi” omninzi?
8 Njengoko uYohane ebona, ukuvulelwa kweenkumbi kuphelekwa ngumsi omninzi, “njengomsi weziko elikhulu.”c Oko koko kwenzekayo ngowe-1919. Imeko yaba mbi kwiNgqobhoko nakwihlabathi ngokubanzi. (Thelekisa uYoweli 2:30, 31.) Ukuvulelwa kwezo nkumbi, udidi lukaYohane, ngenene yayikukoyiswa kwabefundisi beNgqobhoko, ababecebe nababenze iyelenqe lokutshabalalisa umsebenzi woBukumkani ngonaphakade nabathe ngoku bachasa uBukumkani bukaThixo. Ubungqina obunjengomsi omninzi baqalisa ukudandalaza phezu kweNgqobhoko ewexukileyo njengoko elo qela linjengeenkumbi lalinikwe igunya lobuthixo laza laqalisa ukulisebenzisa ekuvakaliseni izigidimi ezinamandla zomgwebo. “Ilanga” leNgqobhoko—ukubonakala kwayo njengezisa ukhanyiso—laba mfiliba, “nomoya” waba mnyama ngenxa yokuvakaliswa komgwebo wobuthixo njengoko ‘umlawuli wegunya lomoya’ weli hlabathi waboniswa enguthixo weNgqobhoko.—Efese 2:2; Yohane 12:31; 1 Yohane 5:19.
Ezo Nkumbi Zithuthumbisayo!
9. Yiyiphi imiyalelo yedabi eyafunyanwa ziinkumbi?
9 Yiyiphi imiyalelo yedabi eyafunyanwa zezo nkumbi? UYohane uchaza oku: “Zaxelelwa ukuba zonakalise kungekhona utyani bomhlaba nayo nayiphi na into eluhlaza nawo nawuphi na umthi, kodwa kuphela abo bantu bangenalo itywina likaThixo emabunzini abo. Yaye ezo nkumbi zanikwa, kungekhona igunya lokubabulala, kodwa elokubathuthumbisa iinyanga ezintlanu, kwaye ukuthuthunjiswa kwabo kwakunjengokuthuthumbisa kukanomadudwane xa athe wahlaba umntu. Ngaloo mihla abantu baya kukufuna ukufa, bangakufumani, baya kukunqwenela ukufa, kusuke ukufa kusabe kubo.”—ISityhilelo 9:4-6.
10. (a) Esi sibetho sibhekiswa koobani ngokuyintloko, yaye uba yintoni umphumo kubo? (b) Luhlobo olunjani lwentuthumbo olubandakanyekileyo? (Bona nombhalo osemazantsi.)
10 Phawula ukuba esi sibetho okokuqala asibhekiswanga ebantwini okanye kwababalaseleyo abaphakathi kwabo—‘uhlaza nemithi yomhlaba.’ (Thelekisa iSityhilelo 8:7.) Ezi nkumbi zimele zenzakalise kuphela abantu abangenalo itywina likaThixo emabunzini abo, abo bakwiNgqobhoko bazibanga betywiniwe kodwa imisebenzi yabo ingavumelani noko. (Efese 1:13, 14) Ngaloo ndlela, amazwi athuthumbisayo ezi nkumbi zanamhla ekuqaleni abhekiswa kwiinkokeli zonqulo zeNgqobhoko. Hayi indlela ekumele ukuba bathuthunjiswa ngayo aba bantu bazingcayo bakuyiva ivakaliswa ekuhleni into yokuba babengasilelanga nje kuphela ukukhokela imihlambi yabo ukuya ezulwini kodwa nabo ngokwabo babengayi kuya apho!d Ngokwenyaniso, imeko yabo ibifana ‘neyemfama ekhokela imfama’!—Mateyu 15:14.
11. (a) Iinkumbi zigunyaziswe ukuba zizithuthumbise ithuba elide kangakanani iintshaba zikaThixo, yaye kutheni oko kungelothuba lifutshane ngenene? (b) Iqatha kangakanani le ntuthumbo?
11 Le ntuthumbo iqhuba ithuba elingangeenyanga ezintlanu. Ngaba elo lixesha elifutshane ngokwentelekiso? Akunjalo xa kujongwa imeko yenkumbi yokoqobo. Iinyanga ezintlanu zichaza ubude obuqhelekileyo bobomi bezinye zezi zinambuzane. Ngoko ke, iinkumbi zanamhla ziyaqhubeka zihlaba iintshaba zikaThixo lo gama nje zisaphila. Ngaphezu koko, intuthumbo iqatha kangangokuba abantu bafuna ukufa. Ngokwenyaniso, asinangxelo yokuba nabaphi na kwabo babelunywe ziinkumbi bazama ngokwenene ukuzibulala. Kodwa eli binzana lisinceda ukuba sibone ubukhulu bentuthumbo—ngokungathi kukuhlasela okungayekeleliyo koonomadudwane. Kufana nokubandezeleka okwabonwa kwangaphambili nguYeremiya okwakuza kwehlela amaSirayeli angathembekanga awayeza kuchithachithwa ngaboyisi baseBhabhiloni nekwakuya kuthi kuwo ukufa kube yeyona nto ilunge ngakumbi kunobomi.—Yeremiya 8:3; bona neNtshumayeli 4:2, 3.
12. Kutheni le nto iinkumbi zinikwe imvume yokuthuthumbisa ngokomoya iinkokeli zonqulo lweNgqobhoko, kodwa zingazibulali?
12 Kutheni kusithiwa mazibathuthumbise ngokomoya aba bantu, kodwa zingababulali? Lo nguyeha wokuqala ekubhencweni kobuxoki beNgqobhoko nokusilela kwayo, kodwa kuphela kukamva, njengoko imini yeNkosi iqhubela phambili, eya kuthi imeko yayo yokomoya efana nokufa ivakaliswe ngokupheleleyo. Kuya kuba sebudeni boyeha wesibini ekuya kuthi isinye kwisithathu sabantu sibulawe.—ISityhilelo 1:10; 9:12, 18; 11:14.
Iinkumbi Zixhotyiselwe Idabi
13. Zinjani ezi nkumbi?
13 Hayi indlela ephawuleka ngayo imbonakalo yezo nkumbi! UYohane uyichaza ngale ndlela: “Imfano yeenkumbi yayinentsobi yamahashe alungiselelwe idabi; yaye ezintlokweni zazo kwakukho oko kwakubonakala ngathi zizithsaba ezinjengegolide, nobuso bazo babunjengobuso babantu, kodwa zazineenwele ezinjengeenwele zabafazi. Amazinyo azo ayenjengalawo eengonyama; yaye zazinezigcina-zifuba ezinjengezigcina-zifuba zentsimbi. Isandi samaphiko azo sasinjengesandi seenqwelo zamahashe amaninzi, ebaleka esiya edabini.”—ISityhilelo 9:7-9.
14. Kutheni ukucacisa kukaYohane ezi nkumbi kwafanelana neqela lamaKristu awahlaziywayo ngowe-1919?
14 Oku kulicacisa kakuhle iqela elinyanisekileyo lamaKristu awahlaziywayo ngowe-1919. Njengamahashe, ayelungele idabi, elangazelela ukulwela inyaniso ngendlela echazwa ngumpostile uPawulos. (Efese 6:11-13; 2 Korinte 10:4) Kwiintloko zawo uYohane ubona oko kufana nezithsaba zegolide. Kwakungayi kufaneleka ngawo ukuba abe nezithsaba zokoqobo kuba akaqalisi kulawula ngoxa esesemhlabeni. (1 Korinte 4:8; ISityhilelo 20:4) Kodwa ngowe-1919 ayesele ebonakala ngokwabantu basebukhosini. Ayengabazalwana boKumkani, ibe izithsaba zawo zasezulwini ayezigcinelwe logama nje ayeqhubeka ethembekile kude kube sekupheleni.—2 Timoti 4:8; 1 Petros 5:4.
15. Iyintoni intsingiselo (a) yezigcina-zifuba zentsimbi zeenkumbi? (b) yobuso bazo obunjengobabantu? (c) yeenwele zazo ezingathi ziinwele zabafazi? (d) yamazinyo azo anjengaweengonyama? (e) yokwenza kwazo ingxolo enkulu?
15 Embonweni, iinkumbi zinezigcina-zifuba zentsimbi, ezifuzisela ubulungisa obungenakushenxiswa. (Efese 6:14-18) Kwakhona zinobuso obunjengobomntu, olu phawu lubonisa uphawu lothando, ekubeni umntu wayenziwe ngokomfanekiso kaThixo, oluthando. (Genesis 1:26; 1 Yohane 4:16) Iinwele zazo zinde okwezomfazi, nto leyo ekufanekisela kakuhle ukuzithoba kwazo kuKumkani wazo, ingelosi yenzonzobila. Yaye amazinyo azo afana namazinyo engonyama. Ingonyama isebenzisa amazinyo ayo ukutya inyama. Ukususela ngowe-1919 udidi lukaYohane kwakhona lukwazile ukuzondla ngokudla okuqinileyo kokomoya, ingakumbi iinyaniso ezingoBukumkani bukaThixo obulawulwa ‘yiNgonyama yesizwe sikaYuda,’ uYesu Kristu. Kanye njengokuba ingonyama ifuzisela inkalipho, ngokunjalo inkalipho enkulu ibifuneka ekwetyiseni esi sigidimi sihlasela kabuhlungu, ukusikhupha ezimpapashweni nokusisasaza emhlabeni jikelele. Ezo nkumbi zokomfuziselo zenze ingxolo enkulu, ‘njengesandi seenqwelo zamahashe amaninzi abaleka esiya edabini.’ Ngokubona umzekelo wamaKristu enkulungwane yokuqala, azizimiselanga kuhlala zithi cwaka.—1 Korinte 11:7-15; ISityhilelo 5:5.
16. Iyintoni intsingiselo yokuba ezi nkumbi zibe ‘nemisila nolwamvila olunjengoloonomadudwane’?
16 Oku kushumayela kuquka okungakumbi kunokuthetha nje ngomlomo! “Kanjalo, zinemisila nezamvila njengoonomadudwane; yaye emisileni yazo ligunya lazo lokwenzakalisa abantu iinyanga ezintlanu.” (ISityhilelo 9:10) Kuthetha ntoni oku? Njengoko eqhubeka nomsebenzi wawo woBukumkani, ngomlomo nangeempapasho ezishicilelweyo amaNgqina kaYehova akhupha amazwi anegunya asekelwe kwiLizwi likaThixo. Isigidimi sawo sinolwamvila olunjengoloonomadudwane kuba alumkisa ngemini yempindezelo kaYehova esondelayo. (Isaya 61:2) Ngaphambi kokuba isizukulwana esikhoyo seenkumbi zokomoya sahlukane nobomi baso, umsebenzi waso omiselwe nguThixo wokuvakalisa imigwebo kaYehova uya kube ugqityiwe—nto leyo eya kuthetha ukuviswa ubuhlungu kwabo bonke abanyelisi abangoontamo-lukhuni.
17. (a) Yintoni eyavakaliswa kwindibano yowe-1919 yaBafundi BeBhayibhile eyayiya kuqinisa ulwamvila lokunikela kwabo ubungqina? (b) Abefundisi bathuthunjiswe njani, yaye basabela njani?
17 Elo qela leenkumbi lavuya gqitha xa kwavakaliswa ukukhutshwa kwephephancwadi elitsha eliyiThe Golden Age, kwindibano yalo yowe-1919. Eli yayiliphephancwadi elaliphuma kabini ngeveki nelaliyilelwe ukuqinisa ulwamvila lokunikela kwalo ubungqina.e Inkupho yalo yama-27, kaSeptemba 29, 1920, yalubhenca uhanahaniso olwenziwa ngabefundisi ekutshutshiseni Abafundi BeBhayibhile eUnited States ebudeni bowe-1918-19. Ukutyhubela iminyaka yee-1920 neyee-1930, iThe Golden Age yathuthumbisa abefundisi ngamanqaku angakumbi alulwamvila nangemifanekiso ehlekisayo eyabhenca ukuzifaka kwabo ngobuqhophololo kwezobupolitika, ingakumbi izivumelwano ezenziwa ngabefundisi bamaKatolika nozwilakhe wobuFasi nowobuNazi. Ngenjongo yokuziphindezela, abefundisi ‘bayila inkathazo ngommiselo’ baza bahlanganisa ihlokondiba elenza ugonyamelo nxamnye nabantu bakaThixo.—INdumiso 94:20.
Ukuphawulwa Kwabalawuli Behlabathi
18. Nguwuphi umsebenzi ezi nkumbi ekwafuneka ziwenzile, yaye kwenzeka ntoni ngenxa yokuvuthelwa kwexilongo lesihlanu?
18 Iinkumbi zanamhla zazinomsebenzi ezazimele ziwenze. Kwakufuneka kushunyayelwe iindaba ezilungileyo zoBukumkani. Kwakufuneka kubhencwe iimposiso. Kwakufuneka kufunwe izimvu ezilahlekileyo. Njengoko iinkumbi zaziqhubeka nale misebenzi, kwanyanzeleka ukuba ihlabathi likuphawule oku. Ngenxa yokuthobela ukuvuthela kwengelosi ixilongo, udidi lukaYohane luqhubekile lubhenca iNgqobhoko njengefanelwe yimigwebo kaYehova eqatha. Ngokusabela kwixilongo lesihlanu, inkalo ekhethekileyo yale migwebo yabethelelwa kwindibano yaBafundi BeBhayibhile eyayiseLondon, eNgilani, ngoMeyi 25-31, 1926. Le ndibano yabalaselisa esi sigqibo, “Ubungqina Obuya Kubalawuli Behlabathi,” nentetho yesidlangalala eyanikelwa kwiHolo iRoyal Albert eyayisithi “Isizathu Sokuba Amagunya Ehlabathi Axengaxenge—Isicombululo,” yaye umbhalo opheleleyo wale ntetho nesi sigqibo washicilelwa kwiphephandaba eliphambili laseLondon ngosuku olulandelayo. Kamva, iqela leenkumbi lasasaza imibhalo engama-50 ezigidi yephecana elinesi sigqibo ehlabathini lonke—nto leyo eyabathuthumbisa ngokwenene abefundisi! Kwiminyaka kamva, abantu baseNgilani babesathetha ngoku kubhencwa kuhlaba njengolwamvila.
19. Sisiphi isixhobo esingakumbi sokulwa esafunyanwa ziinkumbi zokomfuziselo, yaye sathini ngesibhengezo esenziwa eLondon?
19 Kule ndibano, iinkumbi zokomfuziselo zafumana isixhobo sokulwa esingakumbi, incwadi entsha ephawulekayo enomxholo othi Deliverance. Yayinengxubusho engokweZibhalo yomqondiso ongqina ukuba urhulumente ‘ongumntwana oyinkwenkwe,’ uBukumkani bukaKristu basezulwini, babuzelwe ngowe-1914. (Mateyu 24:3-14; ISityhilelo 12:1-10) Emva koko, yacaphula isibhengezo esapapashwa eLondon ngowe-1917 baza abefundisi abasibhozo, abathi bachazwa “njengabaphakathi kwabona bashumayeli baphambili ehlabathini” basityobela. Babemela iimvaba eziphambili zamaProtestanti—amaBhaptizi, amaCongregational, amaRhabe, amaEpiscopal namaWesile. Esi sibhengezo savakalisa ukuba “amaxesha obunzima akhoyo alatha ngasekupheleni kwamaxesha eeNtlanga” yaye “ukutyhileka kweNkosi kusenokulindeleka nangaliphi na ixesha.” Ewe, abo befundisi babewuqondile umqondiso wobukho bukaYesu! Kodwa ngaba ikho into ababefuna ukuyenza ngabo? Incwadi ethi Deliverance iyasixelela isithi: “Eyona nxalenye iphawulekayo yoku yeyokuba kanye abona bantu batyobela eso sibhengezo bathi kamva basigatya baza babuchasa ubungqina obubonisa ukuba sisekupheleni kwehlabathi nakwimini yobukho besibini beNkosi.”
20. (a) Luluphi ukhetho olwenziwe ngabefundisi ngokubhekisele kwiqela leenkumbi noKumkani walo? (b) Ngubani uYohane athi ulawula iqela leenkumbi, yaye lingubani igama lakhe?
20 Kunokuba bavakalise ngoBukumkani bukaThixo obuzayo, abefundisi beNgqobhoko bakhethe ukuhlala kwihlabathi likaSathana. Abafuni ukuba yinxalenye yeqela leenkumbi noKumkani walo, uYohane athetha la mazwi ngalo: “Zinokumkani phezu kwazo, ingelosi yenzonzobila. NgesiHebhere igama lakhe nguAbhadon [elithetha “Intshabalalo”], kodwa ngesiGrike unegama elinguApoliyon [elithetha “Umtshabalalisi”].” (ISityhilelo 9:11) ‘Njengengelosi yenzonzobila’ ‘noMtshabalalisi,’ ngokwenyaniso uYesu wayevulele uyeha wesibetho kwiNgqobhoko. Kodwa kusekho okungakumbi okuza kulandela!
[Imibhalo esemazantsi]
a Thelekisa uYoweli 2:4, 5, 7 (apho iinkumbi zichazwe njengamahashe, abantu, namadoda, nanjengezenza isandi esinjengesenqwelo yokulwa) neSityhilelo 9:7-9; kwakhona thelekisa uYoweli 2:6, 10 (ochaza ngomphumo obuhlungu wesibetho seenkumbi) neSityhilelo 9:2, 5.
b Bona inqaku elithi “Simanyene Ngokunxamnye Neentlanga Kwintili Yesigqibo” kwiMboniselo kaJuni 1, 1962.
c Phawula ukuba esi sibhalo asinakusetyenziswa ukungqina ukuba kwakukho umlilo kwinzonzobila, ngokungathi inzonzobila yayiluhlobo oluthile lwesihogo somlilo. UYohane uthi wabona umsi ongqingqwa ‘owawunjengomsi’ weziko elikhulu. (ISityhilelo 9:2) Akatsho ukuba ubona amadangatye okoqobo enzonzobileni.
d Igama lesiGrike elisetyenziswe apha livela kwigama eliyingcambu elithi ba·sa·niʹzo, maxa wambi elisetyenziswa ukubhekisela kwintuthumbo yokoqobo; noko ke, likwanokusetyenziselwa intuthumbo yengqondo. Ngokomzekelo, kweyesi-2 kaPetros 2:8 sifunda ukuba uLote ‘wayethuthumbisa umphefumlo wakhe olungisayo’ ngenxa yobubi awabubona eSodom. Iinkokeli zonqulo zexesha labapostile zafumana intuthumbo yengqondo nangona, kambe ke, zayifumana ngenxa yesizathu esahluke ngokupheleleyo.
e Eli phephancwadi lanikwa elinye igama elithi Consolation ngowe-1937 laza ngowe-1946 lanikwa elinye igama elithi Vukani!
[Umfanekiso okwiphepha 143]
Ukuvuthelwa kwexilongo lesihlanu kuzisa uyeha wokuqala kwabathathu
[Umfanekiso okwiphepha 146]
Iintolo zakho zibukhali entliziyweni yeentshaba zoKumkani. (INdumiso 45:5) Umfanekiso ohlekisayo ongasentla owawukhutshwa nala mazwi angasentla ungumzekelo wemininzi eyathi yapapashwa ngeminyaka yee-1930 eyafaka ulwamvila ‘kwabo bangenalo itywina likaThixo’
[Imifanekiso ekwiphepha 147]
IHolo iRoyal Albert, apho kwakhutshwa khona incwadi ethi Deliverance kwaza kwamkelwa nesigqibo esithi “Ubungqina Obuya Kubalawuli Behlabathi”