Isahluko 28

Ukulwa Namarhamncwa Amabini Awoyikekayo

Umbono 8—ISityhilelo 13:1-18

Umbandela: Irhamncwa elineentloko ezisixhenxe, irhamncwa elineempondo ezimbini nomfanekiso werhamncwa

Ixesha lokuzaliseka: Ukususela kumhla kaNimrodi ukuya kwimbandezelo enkulu

1, 2. (a) Uthini uYohane ngenamba? (b) UYohane uyichaza njani ngokomfuziselo intlangano ebonakalayo esetyenziswa yinamba?

INAMBA enkulu iphoselwe phantsi emhlabeni! Ukufundisisa kwethu iSityhilelo kwenza kucace ukuba iNyoka okanye abalandeli bayo abaziidemon abanakuze baphinde bavunyelwe ukuba babuyele ezulwini. Kodwa asikagqibi ukuthetha ngalowo ‘ubizwa ngokuba nguMtyholi, noSathana, lowo ulahlekisa umhlaba omiweyo uphela.’ Ngokweenkcukacha ezingakumbi ingxelo ngokulandelayo ichaza ngeendlela ezisetyenziswa nguSathana ukulwa ‘nomfazi nembewu yakhe.’ (ISityhilelo 12:9, 17) UYohane uthi ngaloo namba injengenyoka: “Yaza yema ngxi phezu kwentlabathi yolwandle.” (ISityhilelo 13:1a) Ngoko makhe sinqumame size sihlolisise indlela esebenza ngayo inamba.

² Amazulu angcwele akasakhathazwa bubukho bukaSathana needemon zakhe. Loo mimoya ingendawo igxothiwe ezulwini yaza yapheleliselwa kummandla womhlaba. Akuthandabuzeki ukuba oku kubangela ukwanda okukhulu koqheliselo lokukhafula kula maxesha siphila kuwo. INyoka enobuqhophololo isayilawula intlangano yomoya eyonakeleyo. Kodwa ngaba ikwasebenzisa intlangano ebonakalayo ukuze ilahlekise uluntu? UYohane uyasixelela esithi: “Yaye ndabona irhamncwa linyuka liphuma elwandle, lineempondo ezilishumi neentloko ezisixhenxe, ezimpondweni zalo izizithsaba ezilishumi, kodwa kwiintloko zalo ingamagama onyeliso. Irhamncwa endalibonayo lalinjengehlosi, kodwa iinyawo zalo zazinjengezebhere, nomlomo walo unjengomlomo wengonyama. Yaza inamba yanika irhamncwa elo amandla alo netrone yalo negunya elikhulu.”—ISityhilelo 13:1b, 2.

3. (a) Ayintoni amarhamncwa awoyikekayo awabonwa ngumprofeti uDaniyeli emibonweni? (b) Amarhamncwa amakhulu achazwe kuDaniyeli 7 ayemela ntoni?

³ Liyintoni eli rhamncwa loyikekayo? IBhayibhile inikela impendulo. Ngaphambi kokuwa kweBhabhiloni ngowama-539 B.C.E., umprofeti ongumYuda uDaniyeli wabona imibono eyayinamarhamncwa awoyikekayo. KuDaniyeli 7:2-8 uchaza ngamarhamncwa amane aphuma elwandle, elokuqala lifana nengonyama, elesibini lifana nebhere, elesithathu lifana nehlosi, yaye “ndabona irhamncwa lesine, eloyikekayo nelinkwantyisayo nelomelele ngokungaqhelekanga . . . yaye lalineempondo ezilishumi.” Eli rhamncwa lifana ngendlela ephawulekayo nerhamncwa elabonwa nguYohane malunga nonyaka wama-96 C.E. Elo rhamncwa likwaneempawu ezifana nezengonyama, ibhere nehlosi, ibe lineempondo ezilishumi. Ayintoni amarhamncwa amakhulu abonwa nguDaniyeli? Uyasixelela esithi: “La marhamncwa makhulu mane, ngookumkani abane abaya kuvela emhlabeni.” (Daniyeli 7:17) Ewe, loo marhamncwa amela ‘ookumkani,’ okanye amagunya obupolitika omhlaba.

4. (a) KuDaniyeli 8, inkunzi yegusha nenkunzi yebhokhwe zazifuzisela ntoni? (b) Yintoni eyayifuziselwa kukwaphulwa kophondo olukhulu lwenkunzi yebhokhwe kuze endaweni yalo kukhule iimpondo ezine?

⁴ Komnye umbono, uDaniyeli ubona inkunzi yegusha eneempondo ezimbini ehlatywa iwe phantsi yibhokhwe enophondo olukhulu. Ingelosi uGabriyeli iyamcacisela oko kuthethwa koku: “Inkunzi yegusha . . . imela ookumkani bamaMedi namaPersi. Yaye inkunzi yebhokhwe exhonti imela ukumkani waseGrisi.” UGabriyeli uhlabela mgama eprofeta esithi uphondo olukhulu lwenkunzi yebhokhwe lwaluya kwaphulwa kuze endaweni yalo kukhule iimpondo ezine. Oku kwenzeka ngenene kwiminyaka engaphezu kwama-200 kamva xa uAlesandire Omkhulu wafayo baza ubukumkani bakhe bahlulahlulwa baba zizikumkani ezine ezalawulwa ziinjengele zakhe ezine.—Daniyeli 8:3-8, 20-25.a

5. (a) Yiyiphi intsingiselo edluliselwa ligama lesiGrike elithetha irhamncwa? (b) Yintoni emelwa lirhamncwa leSityhilelo 13:1, 2 neentloko zalo ezisixhenxe?

⁵ Ngoko ke, kucacile ukuba uMyili weBhayibhile ephefumlelweyo uwajonga amagunya obupolitika omhlaba njengamarhamncwa. Aluhlobo luni lwamarhamncwa? Omnye umgqabazi ubiza irhamncwa leSityhilelo 13:1, 2 ngokuthi “ngumntu okhohlakeleyo,” yaye uyongezelela esithi: “Samkela yonke intsingiselo edluliselwa nguθηρίον [nguthe·riʹon, igama lesiGrike elithetha “irhamncwa”], njengelithetha isidalwa esikhohlakeleyo, esitshabalalisayo, esoyikekayo nesihlaselayo, njl.”b Hayi indlela oko okuyichaza kakuhle ngayo inkqubo yobupolitika ezele ligazi athe uSathana ngokusebenzisa yona walawula uluntu! Iintloko ezisixhenxe zeli rhamncwa zimela amagunya aphambili ehlabathi amathandathu abalaseliswa kwimbali yeBhayibhile ukuza kuthi ga ngomhla kaYohane—iYiputa, iAsiriya, iBhabhiloni, amaMedi namaPersi, iGrisi neRoma—yaye igunya lehlabathi lesixhenxe laprofetwa njengeliza kuvela kamva.—Thelekisa iSityhilelo 17:9, 10.

6. (a) Iintloko ezisixhenxe zerhamncwa ziye zakhokela entwenini? (b) IRoma yasetyenziswa njani nguYehova ekuphumezeni umgwebo wakhe kwinkqubo yezinto yamaYuda, yaye amaKristu aseYerusalem asinda njani?

⁶ Kuyinyaniso ukuba, embalini bekukho amanye amagunya ehlabathi ngaphandle kwasixhenxe—kanye njengokuba irhamncwa elabonwa nguYohane laliyilwe ngumzimba kwaneentloko ezisixhenxe neempondo ezilishumi. Kodwa iintloko ezisixhenxe zimela amagunya aphambili asixhenxe athe, ngalinye ngokwexesha lalo, akhokela ekucinezeleni abantu bakaThixo. Ngowama-33 C.E., ngoxa iRoma yayibalasele, uSathana wasebenzisa loo ntloko yerhamncwa ukubulala uNyana kaThixo. Ngelo xesha, uThixo wayishiya inkqubo yezinto yamaYuda awayengathembekanga waza kamva, ngowama-70 C.E., wavumela iRoma ukuba iphumeze umgwebo wakhe kolo hlanga. Okuvuyisayo kukuba, uSirayeli kaThixo wokwenyaniso, ibandla lamaKristu athanjisiweyo, wayelunyukiswe kwangaphambili, yaye abo babeseYerusalem nakwelakwaYuda babesabele ngaphaya koMlambo iYordan ukuze bakhuseleke.—Mateyu 24:15, 16; Galati 6:16.

7. (a) Yintoni eyayiza kwenzeka ekufikeni kwesiphelo senkqubo yezinto nasekuqaleni kwemini yeNkosi? (b) Yintoni eyangqineka iyintloko yesixhenxe yerhamncwa leSityhilelo 13:1, 2?

⁷ Noko ke, ngasekupheleni kwenkulungwane yokuqala yeXesha Eliqhelekileyo, abaninzi kweli bandla lokuqala babetyekile enyanisweni, yaye ingqolowa engamaKristu okwenyaniso, ‘oonyana bobukumkani,’ ubukhulu becala yayiminxwe ngumdiza, ‘oonyana bongendawo.’ Kodwa ekufikeni kwesiphelo senkqubo yezinto, amaKristu athanjisiweyo kwakhona avela njengeqela elilungelelanisiweyo. Ebudeni bemini yeNkosi, amalungisa ayefanele “aqaqambe njengelanga.” Ngenxa yoko, ibandla lamaKristu lalungelelaniselwa umsebenzi. (Mateyu 13:24-30, 36-43) Ngelo xesha, uBukhosi bamaRoma babungasekho. UBukhosi obukhulu baseBritani, bukunye neUnited States of America enamandla yaba bubo obabubalasele ehlabathini. Eli gunya lehlabathi lintlu-mbini langqineka liyintloko yesixhenxe yerhamncwa.

8. Kutheni kungamele kothuse nje ukuba igunya lehlabathi elintlu-mbini lamaNgesi namaMerika lifaniswa nerhamncwa?

⁸ Ngaba akothusi ukuthi amagunya obupolitika alawulayo alirhamncwa? Oko koko kwathethwa ngabachasi abathile ebudeni beMfazwe Yehlabathi II, xa amaNgqina kaYehova, njengentlangano nanjengabantu ngabanye, athi acelwa umngeni kwiinkundla zomthetho emhlabeni jikelele. Kodwa khawunqumame uze ucinge! Ngaba iintlanga ngokwazo azisebenzisi amarhamncwa okanye izidalwa zasendle njengemiqondiso yazo yesizwe? Ngokomzekelo, kukho ingonyama yaseBritani, ukhozi lwaseMerika, nenamba yaseTshayina. Ngoko kungani kumele kubekho nabani na okuchasayo oku ukuba uThixo onguMyili weBhayibhile Engcwele ukwasebenzisa amarhamncwa ukufuzisela amagunya ehlabathi?

9. (a) Kutheni le nto ubani emele angachasi xa iBhayibhile isithi uSathana unika irhamncwa igunya lakhe elikhulu? (b) USathana uchazwa njani eBhayibhileni, yaye ubaphembelela njani oorhulumente?

⁹ Ngaphezu koko, kutheni le nto ubani emele achase xa iBhayibhile isithi uSathana unika irhamncwa igunya lakhe elikhulu? UThixo unguMthombo waloo mazwi, yaye phambi kwakhe “iintlanga zinjengethontsi e-emeleni nanjengesuntswana lothuli.” Ezo ntlanga beziya kwenza kakuhle ukufuna inkoliseko kaThixo kunokucaphukela indlela iLizwi lakhe lesiprofeto elizichaza ngayo. (Isaya 40:15, 17; INdumiso 2:10-12) USathana akangomntu wasentsomini owabelwe ukuthuthumbisa imiphefumlo elahliweyo kwisihogo somlilo. Ayikho indawo enjalo. Kunoko, kwiZibhalo uSathana uchazwa ‘njengengelosi yokukhanya’—umkhohlisi omkhulu osebenzisa impembelelo enamandla kwimicimbi kawonke-wonke yobupolitika.—2 Korinte 11:3, 14, 15; Efese 6:11-18.

10. (a) Yintoni eboniswa sisibakala sokuba kuphondo ngalunye kwezilishumi kube kukho isithsaba? (b) Yintoni efuziselwa ziimpondo ezilishumi nezithsaba ezilishumi?

¹⁰ Irhamncwa lineempondo ezilishumi kwiintloko zalo ezisixhenxe. Mhlawumbi intloko nganye kwezine yayinophondo olunye yaye iintloko ezintathu zineempondo ezimbini inye. Ngaphezu koko, lalinezithsaba ezilishumi kwiimpondo zalo. Kwincwadi kaDaniyeli, kuchazwa ngamarhamncwa awoyikekayo, yaye inani leempondo zawo limele lijongwe ngokoqobo. Ngokomzekelo, iimpondo ezimbini ezikwinkunzi yegusha zazimela ubukhosi behlabathi obabubunjwa ngamaqela amabini, amaMedi namaPersi, ngoxa iimpondo ezine ezazikwibhokhwe zazimela iindidi ezine zobukhosi obabukho ngexesha elinye nezaziphuma kubukhosi bamaGrike buka-Alesandire Omkhulu. (Daniyeli 8:3, 8, 20-22.) Noko ke, kwirhamncwa elabonwa nguYohane, iimpondo ezilishumi zibonakala zifuzisela okuthile. (Thelekisa uDaniyeli 7:24; ISityhilelo 17:12) Zimela onke amazwe awongamileyo abumba yonke intlangano yobupolitika kaSathana. Zonke ezi mpondo zinogonyamelo yaye zineengcwangu, kodwa njengoko kuboniswe ziintloko ezisixhenxe, ubuntloko bukwigunya elinye nje kuphela lehlabathi ngexesha. Ngokufanayo, izithsaba ezilishumi zibonisa ukuba onke amazwe awongamileyo ayeya kuba negunya lokulawula kwangaxeshanye nelizwe elibalaseleyo, okanye igunya lehlabathi, lelo xesha.

11. Yintoni eboniswa sisibakala sokuba irhamncwa ‘linamagama onyeliso kwiintloko zalo’?

¹¹ Irhamncwa ‘kwiintloko zalo linamagama onyeliso,’ nto leyo ebonisa ukuba lizibanga lingabonisi ntlonipho ngokupheleleyo kuYehova uThixo nakuKristu Yesu. Lisebenzise igama likaThixo nelikaKristu njengenkohliso yokufeza iinjongo zalo zobupolitika; yaye liye lavisisana nonqulo lobuxoki, lada lavumela abefundisi ukuba babe nenxaxheba kwiinkqubo zalo zobupolitika. Ngokomzekelo, iNdlu yeeNkosi yaseNgilani iquka oobhishophu. Iikhadinali zamaKatolika ziphumeze iindima ezibalaseleyo kwezobupolitika kwelaseFransi naseItali, yaye kutshanje abefundisi baye bakwizigxina zobupolitika kuMzantsi Merika. Oorhulumente bashicilela amazwi onqulo asetyenziswa ngabantu athi “SIKHOLOSE NGOTHIXO” kwiimali zabo ezingamaphepha, yaye kwiingqekembe zabo zemali bathi abalawuli babo bakholisekile kuThixo, besithi, ngokomzekelo, bamiselwe “ngenxa yenceba kaThixo.” Konke oku kusisinyeliso ngokwenene, kuba kuzama ukubandakanya uThixo kwinkqubo engcolileyo yobuhlanga neyobupolitika.

12. (a) Yintoni efuziselwa kukuphuma kwerhamncwa “elwandle,” yaye laqalisa nini ukuphuma? (b) Yintoni eboniswa sisibakala sokuba inamba inika irhamncwa lokomfuziselo igunya lalo elikhulu?

¹² Irhamncwa liphuma “elwandle,” nto leyo engumfuziselo ofanelekileyo wabantu abangazolanga oorhulumente babantu abaphuma kubo. (Isaya 17:12, 13) Eli rhamncwa laqalisa ukuphuma kulwandle lwabantu abangazolanga emva phayaa ngemihla kaNimrodi (malunga nenkulungwane yama-21 B.C.E.), xa inkqubo yezinto yasemva koMkhukula, eyayichas’ uYehova, yaqalisa ukuzibonakalisa. (Genesis 10:8-12; 11:1-9) Kodwa kuphela kusebudeni bemini yeNkosi ethe eyokugqibela kwiintloko zalo ezisixhenxe yazibonakalisa ngokupheleleyo. Kwakhona, phawula ukuba yinamba ‘eyanika irhamncwa amandla alo netrone yalo negunya elikhulu.’ (Thelekisa uLuka 4:6.) Irhamncwa liyimveliso kaSathana yobupolitika ephakathi kwenginginya yoluntu. Ngokwenyaniso uSathana ‘ngumlawuli weli hlabathi.’—Yohane 12:31.

Inxeba Elibangel’ Ukufa

13. (a) Yiyiphi intlekele eyehlela irhamncwa ekuqaleni kwemini yeNkosi? (b) Kwenzeka njani ukuba lonke irhamncwa libe leva ubunzima xa enye intloko yafumana inxeba elibangel’ ukufa?

¹³ Ekuqaleni kwemini yeNkosi, irhamncwa lehlelwa yintlekele. UYohane uyasichazela esithi: “Ndaza ndabona enye yeentloko zalo ingathi ixatyelwe yafa, kodwa inxeba lalo lokufa laphila, waza wonke umhlaba walilandela, ulincoma, irhamncwa elo.” (ISityhilelo 13:3) Le ndinyana ithi enye intloko yeli rhamncwa yafumana inxeba elibangel’ ukufa, kodwa indinyana ye-12 ithetha ngokungathi lonke eli rhamncwa leva ubunzima. Kutheni kunjalo nje? Kaloku, iintloko zerhamncwa aziphakami zonke ngaxeshanye. Nganye iye yalugagamela uluntu ngexesha layo, ingakumbi abantu bakaThixo. (ISityhilelo 17:10) Ngaloo ndlela, njengoko imini yeNkosi iqalisa, inye kuphela intloko ekhoyo, yeyesixhenxe, esebenza njengegunya lehlabathi elibalaseleyo. Inxeba elibangel’ ukufa elikuloo ntloko lizisa unxunguphalo olukhulu kulo lonke eli rhamncwa.

14. Labakho nini inxeba elibangel’ ukufa, yaye igosa lomkhosi lawuchaza njani umphumo walo kwirhamncwa likaSathana?

¹⁴ Laliyintoni eli nxeba libangel’ ukufa? Kamva, libizwa ngokuba linxeba lekrele, yaye ikrele lifuzisela imfazwe. Eli nxeba lekrele, elabakho ekuqaleni kwemini yeNkosi, limele ukuba lihlobene nemfazwe yehlabathi yokuqala, eyaliphanzisayo yaza yalethisa amandla irhamncwa lobupolitika likaSathana. (ISityhilelo 6:4, 8; 13:14) Umbhali uMaurice Genevoix owayeligosa lomkhosi ebudeni baloo mfazwe, wathi ngayo: “Wonke umntu uyaqonda ukuba kuyo yonke imbali yoluntu, imbalwa imihla eye yabaluleka njengoAgasti 2, 1914. Okokuqala yayiyiYurophu kwaza kungekudala emva koko phantse bonke abantu bazifumanisa bebandakanyekile kweso siganeko soyikekayo. Iindibano, izivumelwano, imithetho yokuziphatha, zonke iziseko zagungqa; ukususela nje kumhla omnye ukuya kolandelayo, yonke into yayithandatyuzwa. Esi siganeko sasiza kukudlula okwakuxelwe kwangaphambili nezinto ezazilindelwe ngokusengqiqweni. Ekubeni sasisikhulu, sinesiphithiphithi noburhalarhume umphumo waso usasichaphazela.”—UMaurice Genevoix, ilungu leAcadémie Française, ocatshulwe kwincwadi ethi Promise of Greatness (1968).

15. Intloko yesixhenxe yerhamncwa yalifumana njani inxeba elibangel’ ukufa?

¹⁵ Kwintloko yesixhenxe ebalaseleyo yerhamncwa, loo mfazwe yaba yintlekele enkulu. Kunye namanye amazwe aseYurophu, iBritani yaphulukana nabafana bayo abaninzi. Kwidabi elinye nje kuphela, iDabi loMlambo iSomme ngowe-1916, kwangxwelerheka amajoni angama-420 000 aseBritani, kunye nawaseFransi ali-194 000 nawaseJamani angama-440 000—iingxwelerha zazingaphezu kwesi-1 000 000! Kwakhona, iBritani—nayo yonke iYurophu—yaphanza ngokwezoqoqosho. UBukhosi obukhulu baseBritani batsala nzima yiloo mfazwe yaye abuzange buphucule ngokupheleleyo. Ngenene, loo mfazwe, eyayinamazwe angama-28 aphambili awayenenxaxheba kuyo, yabangela lonke ihlabathi ukuba ligxadazele ngokungathi lalifumene inxeba elibangel’ ukufa. NgoAgasti 4, 1979, kwiminyaka engama-65 emva kokuqhambuka kweMfazwe Yehlabathi I, iThe Economist, yaseLondon, eNgilani, yathi: “Ngowe-1914 ihlabathi laphulukana nomanyano elingekakwazi ukuphinda lulufumane ukususela ngoko.”

16. Ebudeni bemfazwe yehlabathi yokuqala, iUnited States yabonisa njani ukuba yayiyinxalenye yegunya lehlabathi elintlu-mbini?

¹⁶ Kwangaxeshanye, iMfazwe Enkulu, njengoko yayibizwa njalo ngoko, yavulela indlela yokuba iUnited States ivele ngokucacileyo njengenxalenye yeGunya Lehlabathi lamaNgesi namaMerika. Kwiminyaka yokuqala yemfazwe, uluvo lwabantu abaninzi lwabangela ukuba iUnited States ingazifaki kuloo mfazwe. Kodwa njengoko umbhali-mbali uEsmé Wingfield-Stratford wabhalayo, “yayingumcimbi wokuba, ngeli xesha lamanqam aqatha, iBritani neUnited States zaziya kukubekela ecaleni na ukungavisisani kwazo ngenjongo yokufeza umanyano [lwazo] olunamandla nokunyamekelana okufanayo.” Njengoko iziganeko zaqhubekayo, la mazwe amanyana. Ngowe-1917 iUnited States yanikela ngobuncwane bayo nangabantu bayo ukuze ikhuthaze umgudu wemfazwe waMazwe Amanyeneyo awayesele egxadazela. Ngaloo ndlela, intloko yesixhenxe, eyayiquka iBritani neUnited States, yaphumelela.

17. Kwenzeka ntoni kwinkqubo kaSathana yasemhlabeni emva kwaloo mfazwe?

¹⁷ Ihlabathi emva kwemfazwe lalahluke kakhulu. Inkqubo kaSathana yasemhlabeni, nangona yayiphanziswe linxeba elibangel’ ukufa, yahlaziyeka yaza yaba namandla angakumbi kunanini na ngaphambili yaza ke yanconywa ngabantu ngenxa yamandla ayo okuzihlaziya.

18. Kunokutshiwo njani ukuba uluntu ngokubanzi luye ‘lwalincoma, lwalilandela irhamncwa’?

¹⁸ Umbhali-mbali uCharles L. Mee, Omnci., ubhala oku: “Ukuwa kolungelelwaniso oludala [okwabangelwa yimfazwe yehlabathi yokuqala] kwakuyintshayelelo efunekayo ekusasazekeni kokuzilawula, ukubakho kwenkululeko yamazwe amatsha nabantu abakwimigangatho eyahlukeneyo, ukuvulelwa kwenkululeko entsha nokuzimela geqe.” Into eyayikhokela kweli xesha lasemva kwemfazwe yayiyintloko yesixhenxe yerhamncwa, ngoku eyayiphilile, yaye iUnited States of America iphumeza indima ebalaseleyo. Eli gunya lehlabathi lintlu-mbini lakhokela ekumeleni uManyano Lwezizwe neZizwe Ezimanyeneyo. Ngonyaka wama-2005, igunya lobupolitika laseUnited States lalikhokele amazwe anelungelo elingakumbi ekuyileni umlinganiselo ophakamileyo wokuphila, ekulweni izifo, nasekuhambiseleni phambili ubugcisa. Lalide labeka amadoda ali-12 enyangeni. Ngoko ke, akumangalisi ukuba uluntu ngokubanzi luye ‘lwalincoma, lwalilandela irhamncwa.’

19. (a) Uluntu lugqithisele njani ekulincomeni irhamncwa? (b) Ngubani onegunya elingenakukhanyelwa phezu kwazo zonke izikumkani zomhlaba, yaye sikwazi njani oku? (c) USathana ulinikela njani igunya kwirhamncwa, yaye oko kunawuphi umphumo kubantu abaninzi?

¹⁹ Uluntu lude lwenza okungaphezulu kunokuncoma irhamncwa, njengoko uYohane ngokulandelayo esithi: “Yaye bayinqula inamba ngenxa yokuba yanika irhamncwa igunya, balinqula nerhamncwa besithi: ‘Ngubani na onjengerhamncwa elo, ingubani na onako ukulwa idabi nalo?’” (ISityhilelo 13:4) Ngoxa uYesu wayelapha emhlabeni, uSathana wazibanga enegunya phezu kwazo zonke izikumkani zomhlaba. UYesu akazange akuphikise oku; enyanisweni, yena ngokwakhe wabhekisela kuSathana njengomphathi wehlabathi waza akavuma ukuba nenxaxheba kwiipolitiki zaloo mhla. Kamva uYohane wabhala ngamaKristu okwenyaniso wathi: “Siyazi ukuba thina singabakaThixo, kodwa ihlabathi liphela lisemandleni ongendawo.” (1 Yohane 5:19; Luka 4:5-8; Yohane 6:15; 14:30) USathana unikela igunya kwirhamncwa, yaye oku ukwenza ngokobuhlanga. Ngaloo ndlela, endaweni yokuba lumanyane ngothando lobuthixo, uluntu lwahlulelene ngenxa yekratshi lobuzwe nelobuhlanga. Abantu abaninzi banqula, ngokungathi kunjalo, loo nxalenye yerhamncwa inegunya elizweni abahlala kulo. Ngaloo ndlela lonke irhamncwa liyanconywa lize linqulwe.

20. (a) Abantu balinqula ngayiphi ingqiqo irhamncwa? (b) Kutheni amaKristu anqula uYehova uThixo engenanxaxheba ekunqulweni okunjalo kwerhamncwa, yaye alandela umzekelo kabani?

²⁰ Linqulwa ngayiphi ingqiqo? Ngengqiqo yokuthanda ilizwe ngaphezu kokuthanda uThixo. Abantu abaninzi bathanda ilizwe abazalelwe kulo. Njengabemi abalungileyo, nawo amaKristu okwenyaniso ayabahlonela abalawuli nemifuziselo yelizwe ahlala kulo, ayayithobela imithetho yaye afak’ isandla kwimpilo-ntle yebutho lawo neyabamelwane bawo. (Roma 13:1-7; 1 Petros 2:13-17) Noko ke, akanakuzinikela ngendlela emfamekileyo kwelinye ilizwe nxamnye nawo onke amanye. Imfundiso ethi, “lilizwe lethu, enoba lenza kakuhle okanye akunjalo” asiyoyamaKristu. Ngoko amaKristu anqula uYehova uThixo akanakuba nasabelo ekunquleni ngokunekratshi nangokuthand’ izwe nayiphi na inxalenye yerhamncwa, kuba oku bekuya kuthetha ukunqula inamba—umthombo ekuvela kuwo igunya lerhamncwa. Akanakubuza ngendlela encomayo athi: “Ngubani na onjengerhamncwa elo?” Kunoko, alandela umzekelo kaMikayeli—igama lakhe elithetha ukuthi “Ngubani Na OnjengoThixo?”—njengoko ephakamisa ulongamo lukaYehova lwendalo iphela. Ngexesha elimiselwe nguThixo, lo Mikayeli, uKristu Yesu, uya kwenza idabi nerhamncwa aze aloyise, kwanjengokuba woyisayo ekugxotheni uSathana ezulwini.—ISityhilelo 12:7-9; 19:11, 19-21.

Ukulwa Nabangcwele

21. UYohane ukuchaza njani ukusebenzisa kukaSathana irhamncwa?

²¹ USathana onobuqhophololo wayenamacebo okwenza ukuba irhamncwa liphumeze iinjongo zakhe. UYohane usicacisela esithi: “Yaye [irhamncwa elineentloko ezisixhenxe] lanikwa umlomo othetha izinto ezinkulu nezinyeliso, lanikwa negunya lokusebenza iinyanga ezingamashumi amane anesibini. Laza lawuvula umlomo walo ngokunyelisa uThixo, ukuba linyelise igama lakhe nendawo yakhe yokuhlala, abo kanye bahlala ezulwini. Lanikwa ukuba lenze imfazwe nabo bangcwele lize liboyise, lanikwa igunya phezu kwezizwe nabantu neelwimi neentlanga zonke. Nabo bonke abo bahlala emhlabeni baya kulinqula; ekungekho namnye kubo onegama elibhaliweyo kumsongo wobomi weMvana eyaxhelwayo, ukususela ekusekweni kwehlabathi.”—ISityhilelo 13:5-8.

22. (a) Zibhekisela kwesiphi isihlandlo sexesha iinyanga ezingama-42? (b) Ebudeni beenyanga ezingama-42, ‘oyiswa’ njani amaKristu athanjisiweyo?

²² Iinyanga ezingama-42 ezikhankanywe apha zibonakala zifana neminyaka emithathu enesiqingatha ekuthi ebudeni bayo abangcwele bahlaselwe luphondo oluphuma kwelinye lamarhamncwa akwisiprofeto sikaDaniyeli. (Daniyeli 7:23-25; bona kwaneSityhilelo 11:1-4.) Ngaloo ndlela, ukususela ekupheleni kowe-1914 ukusa kowe-1918, ngoxa amazwe awayesilwa ayedlavulana ngokoqobo njengamarhamncwa, abemi baloo mazwe bacinezelelwa ukuba banqule irhamncwa, babandakanyeke kunqulo lobuhlanga, bade balungele ukufela ilizwe labo. Ingcinezelo enjalo yakhokelela kubunzima obukhulu obafunyanwa ngabathanjiswa abaninzi, ababenoluvo lokuba babemele bathobele uYehova uThixo noNyana wakhe, uKristu Yesu. (IZenzo 5:29) Iimvavanyo zabo zafikelela kwincopho ngoJuni 1918 xa ‘boyiswayo.’ EUnited States, amagosa aphambili nabanye abameli beWatch Tower Society bavalelwa entolongweni ngokuphosakeleyo, waza umsebenzi olungelelanisiweyo wokushumayela owawusenziwa ngabazalwana bawo abangamaKristu wathintelwa kanobom. Ekubeni lalinegunya ‘kwizizwe nabantu neelwimi neentlanga zonke,’ irhamncwa lawuthintela umsebenzi kaThixo ehlabathini lonke.

23. (a) Uyintoni ‘umsongo wobomi weMvana,’ yaye yintoni ebigqityezelwa ukususela ngowe-1918? (b) Kutheni le nto ukoyisa kwentlangano kaSathana ‘abangcwele’ kulilize nje?

²³ Kwabonakala ngathi uSathana nentlangano yakhe boyisile. Kodwa kwakungenakubazisela iingenelo ezihlala ithuba elide, ekubeni kwakungekho namnye kwintlangano kaSathana ebonakalayo owayenegama elalibhalwe “kumsongo wobomi weMvana.” Ngokufuziselayo, lo msongo unamagama abo baya kulawula noYesu kuBukumkani bakhe basezulwini. Amagama okuqala abhalwa kuyo ngePentekoste yowama-33 C.E. Yaye kwiminyaka esusela ngoko, kuye kongezelelwa amagama angakumbi. Ukususela ngowe-1918, ukutywinwa kwabaseleyo beendlalifa zoBukumkani ezili-144 000 bekugqityezelwa. Kungekudala, amagama abo bonke aya kubhalwa ngokungacimekiyo kumsongo wobomi weMvana. Akukho namnye kubachasi abanqula irhamncwa eliya kuthi igama lakhe libhalwe kuloo msongo. Ngoko naluphi na uloyiso ababonakala benalo aba ‘kwabangcwele’ lulilize, luyinto nje yokomzuzwana.

24. UYohane uhlab’ ikhwelo lokuba beve ntoni abo banengqiqo, yaye amazwi aviweyo athetha ntoni kubantu bakaThixo?

²⁴ Ngoku uYohane uhlab’ ikhwelo kwabo banengqiqo ukuba baphulaphule ngenyameko: “Lowo unendlebe, makeve.” Uhlabela mgama athi: “Lowo umiselwe ukuthinjwa, uyemka aye ekuthinjweni. Lowo ubulala ngekrele, umele abulawe ngekrele naye. Oku kuthetha unyamezelo nokholo kwabo bangcwele.” (ISityhilelo 13:9, 10) UYeremiya wabhala amazwi afana ncam nala kwiminyaka eyandulela owama-607 B.C.E., ngenjongo yokubonisa ukuba imigwebo kaYehova yayingasenakuba sajikwa kwisixeko saseYerusalem esasingathembekanga. (Yeremiya 15:2; bona kwanoYeremiya 43:11; Zekariya 11:9.) Ngexesha lokuvavanywa kwakhe okukhulu, uYesu walicacisa elokuba abalandeli bakhe babengamele balalanise, xa wathi: “Bonke abathabatha ikrele baya kutshabalala ngekrele.” (Mateyu 26:52) Ngokufanayo, ngoku kwimini yeNkosi abantu bakaThixo bamele babambelele ngokuqinileyo kwimigaqo yeBhayibhile. Abantu abangaguqukiyo abanqula irhamncwa abayi kusinda ngomzuzu wokugqibela. Thina sonke kuya kufuneka sinyamezele, sibe nokholo olungenakugungqiswa, ukuze sisinde kwiintshutshiso neemvavanyo ezisengaphambili.—Hebhere 10:36-39; 11:6.

Irhamncwa Elineempondo Ezimbini

25. (a) UYohane ulichaza njani elinye irhamncwa lokomfuziselo elithi livele ehlabathini? (b) Yintoni eboniswa ziimpondo ezimbini zerhamncwa elitsha nokuphuma kwalo emhlabeni?

²⁵ Kodwa ngoku kuvela elinye irhamncwa ehlabathini. UYohane uyachaza esithi: “Ndaza ndabona elinye irhamncwa linyuka liphuma emhlabeni, yaye lalineempondo ezimbini njengemvana, kodwa laqalisa ukuthetha njengenamba. Yaye lisebenzisa lonke igunya lerhamncwa lokuqala elisemehlweni alo. Kwaye lenza ukuba umhlaba nabo bahlala kuwo balinqule irhamncwa lokuqala, elinxeba lalo lokufa laphilayo. Yaye lenza imiqondiso emikhulu, ngokokude lenze nomlilo uhle uze emhlabeni emehlweni oluntu uphuma ezulwini.” (ISityhilelo 13:11-13) Eli rhamncwa lineempondo ezimbini, nto leyo ebonisa ukumanyana kwamagunya amabini obupolitika. Yaye lichazwa njengeliphuma emhlabeni, kungekhona elwandle. Ngaloo ndlela, liphuma kwinkqubo yezinto kaSathana yasemhlabeni esele imiselwe. Limele ukuba liligunya lehlabathi, esele likho, gunya elo eliphumeza indima ebalulekileyo ebudeni bemini yeNkosi.

26. (a) Liyintoni irhamncwa elineempondo ezimbini, yaye lihlobene njani nerhamncwa langaphambili? (b) Iimpondo zerhamncwa elineempondo ezimbini zifana njani nezemvana, ibe lifana njani ‘nenamba’ xa lithetha? (c) Abantu abathanda ubuhlanga ngenene banqula ntoni, yaye ubuhlanga bufaniswe nantoni? (Bona umbhalo osemazantsi.)

²⁶ Linokuba liyintoni? LiGunya Lehlabathi lamaNgesi namaMerika—elifana nentloko yesixhenxe yerhamncwa lokuqala kodwa liphumeza indima ekhethekileyo! Ukukhethwa kwalo kulo mbono njengerhamncwa elisecaleni kuyasinceda ukuba sibone ngokucace ngakumbi indlela elenza ngokuzimele geqe ngayo ehlabathini. Eli rhamncwa lokomfuziselo lineempondo ezimbini libunjwa ngamagunya obupolitika amabini alawula ngexesha elinye nazimeleyo, kodwa asebenzisanayo. Ukuba neempondo ezimbini kwalo “njengemvana” kubonisa ukuba lizenza elinobulali nelingahlaseliyo, njengohlobo oluphucukileyo lorhulumente elimele lonke ihlabathi liphethukele kuye. Kodwa lithetha “njengenamba” ngendlela yokuba lisebenzisa ingcinezelo nezisongelo kwanogonyamelo oluphandle naphi na apho ulawulo lwalo lungamkelwayo khona. Alikukhuthazanga ukuzithoba kuBukumkani bukaThixo obuphantsi kolawulo lweMvana kaThixo, kodwa kunoko, likhuthaze izilangazelelo zikaSathana, inamba enkulu. Likhuthaze ukwahlukana ngokobuhlanga nentiyo efak’ isandla ekunqulweni kwerhamncwa lokuqala.c

27. (a) Sisiphi isimo sengqondo serhamncwa elineempondo ezimbini esiboniswa sisibakala sokuba lenza kuhle umlilo ezulwini? (b) Abantu abaninzi balijonga njani irhamncwa lanamhla elineempondo ezimbini?

²⁷ Eli rhamncwa lineempondo ezimbini lenza imiqondiso emikhulu, lide lenze ukuba umlilo uhle uvela ezulwini. (Thelekisa uMateyu 7:21-23.) Lo mqondiso wokugqibela usikhumbuza ngowenziwa nguEliya, umprofeti kaThixo wamandulo owalwa nabaprofeti bakaBhahali. Xa wathi ngempumelelo wathoba umlilo ezulwini egameni likaYehova, ngokungathandabuzekiyo oku kwangqina ukuba wayengumprofeti wokwenyaniso nokuba abaprofeti bakaBhahali babengabobuxoki. (1 Kumkani 18:21-40) Njengabo baprofeti bakaBhahali, irhamncwa elineempondo ezimbini linoluvo lokuba lineziqinisekiso ezaneleyo njengomprofeti. (ISityhilelo 13:14, 15; 19:20) Ewe, lizibanga liyoyisile imikhosi yobubi kwiimfazwe zehlabathi ezimbini yaye laphumelela nasekulweni nento ekufane kuthiwe bubuKomanisi obungahloneli Thixo! Ngenene, abaninzi bajonga irhamncwa lanamhla elineempondo ezimbini njengomlondolozi wenkululeko nomthombo wezinto eziphathekayo ezintle.

Umfanekiso Werhamncwa

28. UYohane ubonisa njani ukuba irhamncwa elineempondo ezimbini alikho msulwa njengoko iimpondo zalo ezifana nezemvana beziya kubonisa njalo?

²⁸ Ngaba eli rhamncwa lineempondo ezimbini limsulwa njengoko bekuya kuboniswa ziimpondo zalo ezifana nezemvana? UYohane uhlabela mgama esithi: “Yaye lilahlekisa abo bahlala emhlabeni, ngenxa yemiqondiso elanikwa ukuba liyenze emehlweni erhamncwa, ngoxa lixelela abo bahlala emhlabeni ukuba balenzele umfanekiso irhamncwa elalinenxeba lekrele ukanti laphila. Laza lanikwa ukuba liwunike impefumlo umfanekiso werhamncwa, khon’ ukuze umfanekiso werhamncwa uthethe yaye ubangele ukuba babulawe bonke abo bangayi kuwunqula konke konke umfanekiso werhamncwa.”—ISityhilelo 13:14, 15.

29. (a) Iyintoni injongo yomfanekiso werhamncwa, ibe wayilwa nini? (b) Kutheni le nto umfanekiso werhamncwa ungeyonto ingaphiliyo nje?

²⁹ Uyintoni lo ‘mfanekiso werhamncwa,’ yaye iyintoni injongo yawo? Injongo kukukhuthaza ukunqulwa kwerhamncwa elineentloko ezisixhenxe wona ongumfanekiso walo yaye ngaloo ndlela, ngokungathi kunjalo, ubangela irhamncwa ukuba lihlale likho ngonaphakade. Lo mfanekiso uyilwa emva kokuba irhamncwa elineentloko ezisixhenxe liphilisiwe kwinxeba lalo lekrele, oko kukuthi, emva kokuphela kwemfazwe yehlabathi yokuqala. Lo asingomfanekiso ungaphiliyo, njengalowo wenziwa nguNebhukadenetsare kumathafa aseDura. (Daniyeli 3:1) Eli rhamncwa lineempondo ezimbini liphefumlela ubomi kulo mfanekiso ukuze uphile uze uphumeze indima yawo kwimbali yehlabathi.

30, 31. (a) Izibakala zembali ziwufanisa uyintoni lo mfanekiso? (b) Ngaba kukho nabaphi na abaye babulawa ngenxa yokungavumi ukunqula lo mfanekiso? Cacisa.

³⁰ Iziganeko zembali ziwufanisa lo mfanekiso njengentlangano eyayilwayo, neyakhuthazwa yaza yaxhaswa yiBritani nayiUnited States neyayisaziwa ekuqaleni njengoManyano Lwezizwe. Kamva kwiSityhilelo 17, uza kubonakala phantsi komqondiso owahlukileyo, lowo werhamncwa eliphilileyo, eliphefumlayo, elimbala ungqombela nelizimeleyo. Eli qumrhu lezizwe ngezizwe ‘liyathetha,’ kuba ngokuqhayisa lizibanga ililo kuphela elikwaziyo ukuzisa uxolo nonqabiseko kuluntu. Kodwa eneneni liye laba yindawo yokuhlangana kwamalungu amazwe ukuze athethe amazwi amabi nezithuko. Liye lasongela ngokubandeza amalungelo athile okanye ngokusikwa kwalo naliphi na ilizwe okanye abantu abangalithobeliyo igunya lalo. Ngenene, uManyano Lwezizwe lawagxotha amazwe angazange azithobele iingcamango zalo. Ekuqaleni kwembandezelo enkulu, ‘iimpondo’ zomkhosi zalo mfanekiso werhamncwa ziya kutshabalalisa.—ISityhilelo 7:14; 17:8, 16.

³¹ Ukususela ngeMfazwe Yehlabathi II, umfanekiso werhamncwa—ngoku obonakaliswa njengentlangano yeZizwe Ezimanyeneyo—sele ubulele ngendlela yokoqobo. Ngokomzekelo, ngowe-1950 umkhosi weZizwe Ezimanyeneyo wangenelela idabi elaliphakathi koMntla Korea noMzantsi Korea. Umkhosi weZizwe Ezimanyeneyo, ukunye nowoMzantsi Korea, wabulala abantu bakuMntla Korea nabaseTshayina abaqikelelwa kwi-1 420 000. Ngokufanayo, ukususela ngowe-1960 ukuya ngowe-1964 imikhosi yeZizwe Ezimanyeneyo yayiseCongo (eKinshasa). Ngaphezu koko, iinkokeli zehlabathi, kuquka upopu Paul VI noJohn Paul II, baye baqhubeka beqinisekisa ukuba lo mfanekiso ulithemba lokugqibela nelona lihle lomntu ekuziseni uxolo. Bathi, ukuba uluntu luyasilela ukuwuthobela, isizwe salo siya kubhanga. Ngaloo ndlela ngokufuziselayo babangela ukuba kubulawe bonke abantu abangavumiyo ukuhambisana nomfanekiso baze bawunqule.—Duteronomi 5:8, 9.

Uphawu Lwerhamncwa

32. UYohane ukuchaza njani ukulawula kukaSathana iinxalenye zobupolitika zentlangano yakhe ebonakalayo ukuze abangele ubunzima kwabaseleyo bembewu yomfazi kaThixo?

³² Ngoku uYohane ubona indlela uSathana azilungiselela ngayo iinxalenye zobupolitika zentlangano yakhe ebonakalayo ukuze abangele ubunzima obukhulu kwabaseleyo bembewu yomfazi kaThixo. (Genesis 3:15) Uphinda achaze “irhamncwa” ngokwalo: “Yaye linyanzela bonke abantu, abancinane nabakhulu, nabazizityebi nabangamahlwempu, nabakhululekileyo nabangamakhoboka, ukuba banikwe uphawu esandleni sabo sokunene okanye emabunzini abo, nokuba kungabikho bani ukwaziyo ukuthenga okanye ukuthengisa ngaphandle komntu onalo uphawu, igama lerhamncwa okanye inani legama lalo. Apha kulapho ubulumko bufuneka khona: Lowo unayo ingqiqo makalibale inani lerhamncwa, kuba linani lomntu; yaye inani lalo lingamakhulu amathandathu anamashumi amathandathu anesithandathu.”—ISityhilelo 13:16-18.

33. (a) Liyintoni igama lerhamncwa? (b) Inani elisisithandathu linxulunyaniswa nantoni? Cacisa.

³³ Irhamncwa linegama, ibe eli gama liyinombolo ethi: 666. Isithandathu, njengenani, sinxulunyaniswa neentshaba zikaYehova. Indoda engumFilisti yakwaRefa ‘yayinkulu ngokungaqhelekanga,’ yaye ‘iminwe yayo neenzwane zayo zazingantandathu.’ (1 Kronike 20:6) UKumkani uNebhukadenetsare wakha umfanekiso wegolide owawuziikubhite ezi-6 ububanzi nowawuphakame kangangeekubhite ezingama-60, ukuze amanyanise amagosa akhe obupolitika kunqulo olunye. Xa abakhonzi bakaThixo bengazange bavume ukunqula umfanekiso wegolide, ukumkani wayalela ukuba baphoswe kwiziko lomlilo. (Daniyeli 3:1-23) Inani elisisithandathu alifikeleli kwelisisixhenxe, lona elimela ukuphelela ngokwembono kaThixo. Ngoko ke, ukubhalwa kathathu kwesithandathu kuthetha ukungafezeki ngokupheleleyo.

34. (a) Yintoni efuziselwa sisibakala sokuba inani lerhamncwa “linani lomntu”? (b) Kutheni ama-666 eligama elifanelekileyo lenkqubo yehlabathi likaSathana lobupolitika?

³⁴ Igama lifanisa umntu. Ngoko eli nani lilifanisa njani irhamncwa? UYohane uthi “linani lomntu,” kungekhona elomntu wokomoya, ngoko eli gama liyasinceda ukuba siqinisekise ukuba irhamncwa lelasemhlabeni, lifuzisela oorhulumente babantu. Kanye njengokuba isithandathu singaphantsi kwesixhenxe, ngokunjalo ama-666—isithandathu kumlinganiselo wesithathu—ligama elifanelekileyo lenkqubo yobupolitika enkulu yehlabathi esilela ngokulusizi ukufikelela kumlinganiselo kaThixo wemfezeko. Irhamncwa lehlabathi lobupolitika lilawula ngokuphakamileyo phantsi kwenani eliligama elingama-666, ngoxa ezobupolitika ezinkulu, unqulo olukhulu, noshishino olukhulu zigcina elo rhamncwa lisebenza njengomcinezeli woluntu nomtshutshisi wabantu bakaThixo.

35. Kuthetha ntoni ukuphawulwa ebunzi okanye kwisandla sokunene ngegama lerhamncwa?

³⁵ Kuthetha ntoni ukuphawulwa ebunzi okanye kwisandla sokunene ngegama lerhamncwa? Xa uYehova wanika amaSirayeli uMthetho, wawaxelela oku: “La mazwi am aze abe sentliziyweni yenu nasemphefumlweni wenu, niwabophe abe ngumqondiso esandleni senu, yaye abe sisibopho esisebunzi phakathi kwamehlo enu.” (Duteronomi 11:18) Oku kwakuthetha ukuba amaSirayeli ayeza kuwugcina lo Mthetho ngalo lonke ixesha phambi kwawo, ukuze uphembelele zonke izenzo neengcamango zawo. Abathanjiswa abali-144 000 kuthiwa banegama likaYise nelikaYesu libhalwe emabunzini abo. Oku kubafanisa njengabakaYehova uThixo noYesu Kristu. (ISityhilelo 14:1) Ngokuxelisa oku, uSathana usebenzisa uphawu lweedemon lwerhamncwa. Nabani na obandakanyeka kwimicimbi yemihla ngemihla enjengokuthenga nokuthengisa ucinezelelwa ukuba enze izinto ngendlela irhamncwa elenza ngayo, ngokomzekelo, njengasekubhiyozeleni iiholide. Balindeleke ukuba banqule irhamncwa, balivumele ukuba lilawule ubomi babo, ukuze bafumane uphawu lwalo.

36. Abo bangavumiyo ukwamkela uphawu lwerhamncwa baye baba naziphi iingxaki?

³⁶ Abo bangavumiyo ukwamkela uphawu lwerhamncwa baye baba neengxaki ezizingisileyo. Ngokomzekelo, ukususela ngeminyaka yee-1930, kwafuneka balwe amadabi amaninzi ezinkundleni baze banyamezele izenzo zamahlokondiba zogonyamelo nezinye iintshutshiso. Kumazwe obuzwilakhe, baphoswa kwiinkampu zoxinaniso, apho abaninzi bafela khona. Ukususela ngemfazwe yehlabathi yesibini, abafana abayinyambalala baye beva ubunzima ngokuvalelwa ithuba elide ezintolongweni, bambi bade bathuthunjiswa baza babulawa, ngenxa yokungavumi kwabo ukulalanisa kubuKristu. Kwamanye amazwe amaKristu akakwazi ngokoqobo ukuthenga okanye ukuthengisa; wambi akakwazi ukufumana umhlaba wokwakha; amanye ayadlwengulwa, ayabulawa, okanye agxothwe kwilizwe lawo lokuzalwa. Ngoba? Ngenxa yokuba ngokuqhutywa sisazela esilungileyo akavumi ukuthenga iqweqwe leqela lobupolitika.d—Yohane 17:16.

37, 38. (a) Kutheni le nto ihlabathi liyindawo enzima kwabo bangavumiyo ukuba nophawu lwerhamncwa? (b) Ngoobani abagcina ingqibelelo, yaye bazimisele ukwenza ntoni?

³⁷ Kweminye imimandla yomhlaba, unqulo lubandakanyeke ngokupheleleyo kubomi basekuhlaleni kangangokuba nabani na omela inyaniso yeBhayibhile uyahlaselwa yintsapho nabahlobo bakhe bangaphambili. Kufuna ukholo olunzulu ukunyamezela. (Mateyu 10:36-38; 17:22) Kwihlabathi apho uninzi lwabantu lunqula ubutyebi bezinto eziphathekayo nalapho ukunganyaniseki kuxhaphakileyo, umKristu wokwenyaniso ngokufuthi kufuneka akholose ngokupheleleyo ngoYehova ukuba uya kumxhasa ekuhambeni kwakhe ngekhondo elithe tye. (INdumiso 11:7; Hebhere 13:18) Kwihlabathi elizele kukuziphatha okubi, ukuhlala ucocekile yaye unyulu kufuna ukuzimisela okukhulu. AmaKristu athi agule adla ngokucinezelwa ngoogqirha nangabongikazi ukuba aphule umthetho kaThixo ongobungcwele begazi; kude kufuneke axhathise nemiyalelo yasenkundleni engqubana nokholo lwawo. (IZenzo 15:28, 29; 1 Petros 4:3, 4) Yaye kule mihla yokwanda kwabantu abangaqeshwanga, kuya kusiba nzima ngakumbi ngomKristu wokwenyaniso ukuphepha umsebenzi oya kuthetha ukulalanisa kwingqibelelo yakhe phambi koThixo.—Mika 4:3, 5.

³⁸ Ewe, ihlabathi liyindawo enzima kwabo bangenalo uphawu lwerhamncwa. Into yokuba abaseleyo bembewu yomfazi kwanesihlwele esikhulu esingaphezu kwezigidi ezithandathu babe bagcina ingqibelelo phezu kwazo nje zonke iingcinezelo zokwaphula imithetho kaThixo, iyimbonakaliso ebalaseleyo yamandla nentsikelelo kaYehova. (ISityhilelo 7:9) Ngokumanyeneyo, kuwo wonke umhlaba, ngamana thina sonke singaqhubeka sizukisa uYehova neendlela zakhe zobulungisa, njengoko singavumi ukufumana uphawu lwerhamncwa.—INdumiso 34:1-3.

[Imibhalo esemazantsi]

[Umfanekiso okwiphepha 195]

Layalelwa ukuba liphefumlele umfanekiso werhamncwa