UmHla Wokuzalwa

Ingcaciso: Yimini yokuzalwa kukabani okanye sisikhumbuzo saloo mini. Kwezinye iindawo isikhumbuzo sokuzalwa kukabani, ngokukodwa esomntwana, sibhiyozelwa ngetheko nokudluliswa kwezipho. Olu asiloqheliselo lweBhayibhile.

Ngaba iimbekiselo zeBhayibhile kwimibhiyozo yomhla wokuzalwa ziyenza ibe yekholekileyo? Zimbini kuphela iimbekiselo ezenziwa yiBhayibhile ngemibhiyozo enjalo:

Gen. 40:20-22: “Kwathi ngomhla wesithathu, umhla wokuzalwa kukaFaro, wabenzela isidlo bonke abakhonzi bakhe, . . . Wambuyisela umphathi wabangcamli kubungcamli bakhe; . . . Ke yena umphathi waboji bezonka wamxhoma.”

Mat. 14:6-10: “Kwakubon’ ukuba kwenziwa isikhumbuzo sokuzalwa kukaHerode, yathi intombi kaHerodiya yangqungqa esazulwini, yamkholisa uHerode. Ekuthe ke koko wayithembisa ngesifungo ukuba woyinika oko ingakucelayo. Ke yona, iqhutywe ngunina, yathi, Ndinike apha ngesitya intloko kaYohane umbhaptizi. . . . Wasusa umntu, wamnqumla uYohane intloko entolongweni apho.”

Yonke into eseBhayibhileni ilapho ngesizathu. (2 Tim. 3:16, 17) AmaNgqina kaYehova ayaliphawula elokuba iLizwi likaThixo linikela ingxelo engentle ngemibhiyozo yemihla yokuzalwa yaye ke ayazinxwema kuyo.

AmaKristu okuqala namaYuda amaxesha okubhalwa kweBhayibhile ayijonga njani imibhoyozo yemihla yokuzalwa?

“Izikhumbuzo zemihla yokuzalwa ngokuqhelekileyo zazingacingwa ngamaKristu elo xesha.”—The History of the Christian Religion and Church, During the Three First Centuries (New York, 1848), nguAugustus Neander (iguqulelwe nguHenry John Rose), iphe. 190.

“AmaHebhere amva akujonga ukubhiyozelwa kwemihla yokuzalwa njengenxalenye yonqulo lwezithixo, imbono leyo eyayingqinwa kakhulu yinto awayeyibona kwimisitho eyayiqhutywa ngokuqhelekileyo neyayinxulumene nale mihla.”—The Imperial Bible-Dictionary (London, 1874), ehlelwe nguPatrick Fairbairn, Umqu. I, iphe. 225.

Iyintoni imvelaphi yamasiko athandwa ngabantu anxulumene nemibhiyozo yemihla yokuzalwa?

“Amasiko ngamasiko abantu ababhiyozela ngawo imihla yabo yokuzalwa anomtyangampo wembali. Imvelaphi yawo ikumlingo nonqulo. Amasiko okuvuyisana, okunikela ngezipho nokubhiyoza—aphelela ngokulumeka amakhandlela—intsingiselo yawo kumaxesha amandulo yayikukukhusela umbhiyozo womhla wokuzalwa kwiidemon nokuqinisekisa unqabiseko lwakhe kunyaka olandelayo. . . . UbuKristu bawucekisa umbhiyozi womhla wokuzalwa njengesiko labahedeni de kwayinkulungwane yesine.”—Schwäbische Zeitung (isihlomelo sephephancwadi Zeit und Welt), Aprili 3/4, 1981, iphe. 4.

“AmaGrike ayekholelwa ekubeni wonke umntu wayenomoya omkhuselayo okanye idaemon owawunyamekela ukuzalwa kwakhe uze umlinde njengoko ephila. Lo moya wawuhlobene ngokuyimfihlelo nothixo omini yakhe yokuzalwa lo mntu awazalwa ngayo naye. KwanamaRoma ayixhasa le ngcamango. . . . Le ngcamango yazityhutyha iinkolelo zabantu yaye ibonakaliswa kwisithunywa esingumlondolozi, kumama onguthixo othelekelelwayo nengcwele enceda indawo ethile. . . . Isiko lamakhandlela avuthayo phezu kwekeyiki laqalwa ngamaGrike. . . . Iikeyiki ezinobusi ezingqukuva okwenyanga nezazikhanyiswe ngamakhandlela zazibekwa ezibingelelweni zetempile [ka-Artemis]. . . . Ngokwenkolelo yohlanga, amakhandlela omhla wokuzalwa ajizekwe ngomlingo okhethekileyo weminqweno emihle. . . . Amakhandlela akhanyisiweyo nemililo yamadini ayenentsingiselo ekhethekileyo eyimfihlelo ukususela oko umntu waqalisa ukwenzela oothixo bakhe izibingelelo. Ngaloo ndlela amakhandlela omhla wokuzalwa ayimbeko nozuko kumntwana okhumbula umhla wokuzalwa yaye azisa ithamsanqa. . . . Imibuliso yomhla wokuzalwa nokunqwenelelwa ulonwabo yinxalenye esisiseko yale holide. . . . Ntlandlolo ingcamango yayimile nzulu kumlingo. . . . Imibuliso yomhla wokuzalwa inamandla aphumela ekulungeni okanye ekuguleni kuba ngale mini ubani usondelelene gqitha nelemimoya.”—The Lore of Birthdays (New York, 1952), nguRalph noAdelin Linton, iphe. 8, 18-20.

Iimbutho ezintle zentsapho nezihlobo ezibakho ngamanye amaxesha ukuba zitye, zisele yaye zonwabe azichasekanga

INtshu. 3:12, 13: “Akukho nto ilungileyo phakathi kwabo, ingekukuvuya nokuzizuzela okulungileyo ebomini babo. Kwanokuba wonke umntu adle, asele, abone okulungileyo emigudwini yakhe yonke: Sisipho sikaThixo eso.”

Bona kwaneyoku-1 yabaseKorinte 10:31.