ISini

Ingcaciso: Ngamalungu ezidalwa zasemhlabeni abangela inzala ngokuhlangana kwabazali ababini. Umahluko phakathi kwamalungu esini amadoda nawamabhinqa unemiphumo enomlinganiselo omkhulu kubomi babantu. Ekubeni inguThixo ngokwakhe onguMthombo wobomi ibe ekubeni abantu bemele babonakalise iimpawu zakhe, amandla okuvelisa ubomi ngeentlobano zesini amele aphathwe ngentlonelo enzulu.

Ngaba iBhayibhile ifundisa ukuba iintlobano zesini zisisono?

Gen. 1:28: “Wabasikelela uThixo [uAdam noEva], wathi kubo uThixo, Qhamani, nande, niwuzalise umhlaba niweyise.” (Ukuzalisekisa lo myalelo wobuthixo kwakuya kufuna ukuba babe neentlobano zesini, akunjalo na? Ukwenjenjalo kwakungayi kuba sisono kodwa kwakuya kuvisisana nenjongo kaThixo yokuzalisa umhlaba. Bambi abantu bacinge ukuba ‘isiqhamo esalelweyo’ sase-Eden mhlawumbi sasiyimbekiselo yokomfuziselo kumqathango wobuthixo okanye kwanesalelo seentlobano zesini kuAdam noEva. Kodwa oko akuvisisani nomyalelo kaThixo ocatshulwe ngasentla. Kwakhona akuvisisani nesibakala sokuba, nangona uAdam noEva badlayo kwisiqhamo esalelweyo e-Eden, ukukhankanywa kokuqala ukuba neentlobano zesini kwabo kwenzeka emva kokuba begxothiwe apho.—Gen. 2:17; 3:17, 23; 4:1.)

Gen. 9:1: “UThixo wamsikelela uNowa noonyana bakhe, wathi kubo, Qhamani, nande, nizalise ihlabathi.” (Le ntsikelelo ibhekele phaya, kunye nokuphindwa komyalelo wobuthixo wokuzala, zanikelwa emva koMkhukula womhlaba ngomhla kaNowa. Imbono kaThixo ngeentlobano zesini ezingokwasemthethweni yayingekaguquki.)

1 Kor. 7:2-5: “Ngenxa yoomibulo, elowo makabe nowakhe umfazi, athi elowo abe neyakhe indoda. Indoda mayimenzele okumfaneleyo umfazi wayo; enjenjalo ke nomfazi endodeni yakhe. . . . Musani ukwala ukuhlangana, ningathanga nibe nivumelene okomzuzwana, . . . ukuze anganihendi uSathana ngenxa yentswela-kuzeyisa kwenu.” (Ngaloo ndlela okuphosakeleyo kuboniswa kuluhenyuzo, kungezontlobano zesini ezifanelekileyo phakathi kwendoda nomfazi.)

Ngaba iintlobano zesini ngaphambi komtshato ziphosakele?

1 Tes. 4:3-8: “Oku kukuthanda kukaThixo, . . . ukuba nikhumke kulo uhenyuzo; ukuba elowo kuni akwazi ukusizuza asiphathe esakhe isitya enobungcwalisa, enembeko; angathabatheki yinkanuko, njengeentlanga ezingamaziyo uThixo; ukuba kungabikho ugqithisayo, amlumkise umzalwana wakhe emcimbini lowo; ngenxa enokuba iNkosi ngumphindezeli wazo zonke ezi zinto, njengoko sasinixelele ngenxa engaphambili, saniqononondisa. Kuba uThixo akasibizelanga ekungcoleni; usibizele ebungcwaliseni. Ngako oko ke lowo ugibayo, akagibi mntu, ugiba uThixo, owasinikayo nokusinika uMoya wakhe oyiNgcwele.” (Igama lesiGrike elithi por·neiʹa, eliguqulelwe ngokuthi “uhenyuzo,” libhekisela kwiintlobano zesini phakathi kwabantu abangatshatanga, kwaneentlobano zesini ezingaphandle komtshato kubantu abatshatileyo.)

Efe. 5:5: “Wonke umenzi wombulo [uhenyuzo, NW], nomntu ongcolileyo, nolibawa, engumkhonzi wezithixo, akanalifa ebukumkanini bukaKristu noThixo.” (Oku akuthethi ukuba nabani na kwixa elidluleyo owayengumhenyuzi akanakuzinandipha iintsikelelo zoBukumkani bukaThixo, kodwa umele ayiyeke loo ndlela yobomi ukuze abe ngokholisekileyo kuThixo. Bona eyoku-1 yabaseKorinte 6:9-11.)

Ngaba iBhayibhile iyakuvumela ukuhlalisana kwendoda nomfazi ngaphandle kokutshata ngokwasemthethweni?

Bona iphepha 357, 358, phantsi komxholo othi “UmTshato.”

Ithini iBhayibhile ngobufanasini?

Roma 1:24-27: “Besezinkanukweni zeentliziyo zabo, uThixo wabanikela nokubanikela ekungcoleni, ukuba bahlazisane ngemizimba yabo; . . . uThixo wabanikela ekuthabathekeni okulihlazo; kuba namankazana abo umsebenzi wasemvelweni awananisela okunxamnye nemvelo; kwaza ngokunjalo ke namadoda, ewushiya umsebenzi wenkazana wasemvelweni, avutha ngokukhanukana kwawo, amadoda esenza kumadoda okuziintloni, ezamkelela umbuyekezo wokulahleka kwawo, abemelwe ke nguwo.”

1 Tim. 1:9-11: “Umthetho lo awuwiselwe lungisa, uwiselwe ke abachasene nomthetho, nabangenakululama, abangahloneli Thixo, nabangaboni, . . . abenzi bombulo [uhenyuzo, NW], amadoda alalanayo, . . . nokuba kukho nto yimbi ichasene nemfundiso ephilileyo; ngokweendaba ezilungileyo zozuko lukaThixo osikelelekileyo.” (Thelekisa iLevitikus 20:13.)

UYuda 7: “Njengokuba iSodom neGomora, nayo imizi engakuyo, . . . [yayisimka] ilandela nyama yimbi, ibekwe ekuhleni ukuba ibe ngumqondiso, iviswa ubetho lomlilo ongunaphakade.” (Igama elithi Sodom liye laba sisiseko segama lesiNgesi elithi “sodomy,” ngokuqhelekileyo elithetha uqheliselo lobufanasini. Thelekisa iGenesis 19:4, 5, 24, 25.)

Siyintoni isimo sengqondo samaKristu okwenyaniso ngabo banembali yokuba ngamafanasini?

1 Kor. 6:9-11: “Abenza umbulo [uhenyuzo, NW], nabakhonzi bezithixo, nabakrexezi, nezifebe, namadoda alalanayo, . . . abayi kubudla ilifa ubukumkani bukaThixo. Naye ninjalo ke inxenye yenu; kuloko nahlanjululwayo, kuloko nangcwaliswayo, kuloko nagwetyelwayo egameni leNkosi uYesu, ngoMoya kaThixo wethu.” (Kungakhathaliseki ukuba ibinjani na imvelaphi yabo, ukuba abantu ngoku bayalutyeshela uqheliselo lwabo lwangaphambili olungcolileyo, basebenzise imilinganiselo kaYehova yobulungisa, baze babe nokholo kwilungiselelo lakhe lokuxolelwa kwezono ngoKristu, banokunandipha ukuma okucocekileyo phambi koThixo. Emva kokuguquka, basenokwamkelwa kwibandla lamaKristu.)

AmaKristu okwenyaniso ayazi ukuba kwaneenkanuko eziphosakeleyo eziye zaba zezendele ngokunzulu, kuquka nezo zinokuba nesizinzi semfuza okanye eziquka oonobangela abangokomzimba okanye oonobangela abangokwemekobume, zinokoyiswa ngabantu abakufuna ngokwenyaniso ukukholisa uYehova. Bambi abantu ngokwemvelo baneemvakalelo ezigqithiseleyo. Mhlawumbi kwixa elidluleyo babegqajukelwa ngumsindo; kodwa ngokwazi ukuthanda kukaThixo, umnqweno wokumkholisa, noncedo lomoya wakhe kwabenza banokuzeyisa. Umntu usenokuba likhoboka lotywala, kodwa, ngentshukumisa efanelekileyo, unokuzibamba ekuseleni aze ngaloo ndlela akuphephe ukuba linxila. Ngokukwanjalo, umntu usenokuziva elingeke ngamandla kwabanye besini esifanayo, kodwa ngokuthobela isiluleko seLizwi likaThixo unokuhlala ecocekile kuqheliselo lobufanasini. (Bona amaEfese 4:17-24.) UYehova akasivumeli ukuba siqhubeke sicinga ukuba ihambo ephosakeleyo ngokwenene ayenzi mahluko; ngobubele kodwa ngokuqinileyo uyasilumkisa ngemiphumo aze alungiselele uncedo oluyintabalala kwabo bafuna ‘ukuhluba umntu omdala nezenzo zakhe, baze bazambathise lowo umtsha.’—Kol. 3:9, 10.

Ngaba imbono yeBhayibhile ngesini mhlawumbi iphelelwe lixesha ibe ingumqathango ongeyomfuneko?

1 Tes. 4:3-8: “Oku kukuthanda kukaThixo, . . . ukuba nikhumke kulo uhenyuzo; . . . Ngako oko ke lowo ugibayo, akagibi mntu, ugiba uThixo, owasinikayo nokusinika uMoya wakhe oyiNgcwele.” (Imbono yeBhayibhile ngesini asinto nje eyaveliswa ngabantu abathile ababephila kwiminyaka emininzi eyadlulayo. Ivela kuMdali woluntu; ikwenza kucace okufunekayo ukuze ube ngokholisekileyo kuye; ikwalungiselela imigaqo yokhokelo efak’ isandla kwiintsapho eziqinileyo nakulwalamano oluhle nolonwabisayo ngaphandle komtshato. Abo basebenzisa esi siluleko bazilondoloza nxamnye neziva ezibi ezingokweemvakalelo nezifo ezenyanyekayo ezihambisana nokuziphatha okubi. Isiluleko seBhayibhile sifaneleke gqitha ekuhlangabezaneni neemfuneko zabo bafuna isazela esicocekileyo phambi koThixo nobomi obungenalukatyo olungeyomfuneko.)

Ukuba Ubani Uthi—

‘Siyintoni isimo sakho sengqondo ngobufanasini?’

Usenokuphendula uthi: ‘Yimbono evakaliswe apha eBhayibhileni. Ndikholelwa ukuba ekuthethayo kubaluleke ngakumbi kunalo naluphi na uluvo lomntu, kuba oku kusinika iingcamango zoMdali woluntu. (1 Kor. 6:9-11) Uya kuphawula ukuba abathile ababa ngamaKristu babekade beqhelisela ubufanasini. Kodwa ngenxa yokuthanda kwabo uThixo, nangoncedo lomoya wakhe, baguquka.’

Okanye unokuthi: ‘Ekuphenduleni oko, ndingathi ndiphawulile ukuba abaninzi abanoluvo lokuba ubufanasini abumele bugxekwe abakholelwa ukuba iBhayibhile iliLizwi likaThixo. Wena mhlawumbi uyijonga njani iBhayibhile?’ Ukuba umntu uthi uyayikholelwa iBhayibhile, mhlawumbi usenokongeza uthi: ‘Ubufanasini asiyombambano intsha. IBhayibhile yandlala imbono kaYehova engaguqukiyo ngendlela ecace gqitha. (Mhlawumbi ungasebenzisa umbandela okwiphepha 339, 340.)’ Ukuba umntu uyabuthandabuza ubukho bukaThixo okanye beBhayibhile, unokongeza uthi: ‘Ukuba bekungekho Thixo, ngokusengqiqweni besingenakuziphendulela kuye ibe ke besinokuphila njengoko sithanda. Ngoko umbuzo wokwenene ngulo, Ngaba ukho uThixo ibe ngaba ubukho bam bubangelwe nguye [kwakhona, mhlawumbi, Ngaba iBhayibhile iphefumlelwe nguThixo]? (Sebenzisa iingcamango ezikwiphepha 350-356 okanye 70-80.)’