IHlabathi

Ingcaciso: Xa liguqulelwa kwigama lesiGrike elithi koʹsmos, igama elithi “ihlabathi” linokuthetha (1) uluntu luphela, ngaphandle kwemeko yalo yokuziphatha okanye ikhondo lobomi, (2) imeko yabantu umntu azalelwe kuyo naphila kuyo, okanye (3) lonke uluntu ngaphandle kwabakhonzi bakaYehova akholiswayo ngabo. Bambi abaguquleli beBhayibhile ngokuphosakeleyo baye basebenzisa igama elithi “ihlabathi” njengelifanayo nelesiGrike elithetha “umhlaba,” “umhlaba omiweyo,” “nenkqubo yezinto.” Ingxubusho elandelayo ingqalelo yayo eyintloko iyitsalela kwintsingiselo yesithathu enikelwe ngasentla yegama elithi “ihlabathi.”

Ngaba ihlabathi liza kutshatyalaliswa ngomlilo?

2 Pet. 3:7: “Izulu langoku, nawo umhlaba lo, kwangelo lizwi [likaThixo] ezo zinto ziqwetyelwe, zigcinelwe, umlilo, kuse kwimini yomgwebo nentshabalalo yabantu abangahloneli Thixo.” (Phawula ukuba ‘ngabantu abangahloneli Thixo,’ kungekhona uluntu luphela, abaza kutshatyalaliswa. Ngokufanayo, indinyana 6 ibhekisela kwintshabalalo ‘yehlabathi’ ngomhla kaNowa. Abantu abangendawo batshatyalaliswa, kodwa umhlaba kwanoNowa nendlu yakhe eyoyik’ uThixo basinda. Ngaba ‘umlilo’ wosuku lomgwebo oluzayo uza kuba ngowokoqobo, okanye ufuzisela intshabalalo epheleleyo? Umlilo wokoqobo ubuya kuba nawuphi umphumo kwiziqu zokoqobo zasezulwini ezinjengelanga neenkwenkwezi ezisele zishushu kakhulu? Ngengxubusho engakumbi engesi sibhalo, bona iphepha 192-194, phantsi komxholo othi “UMhlaba.”)

IMize. 2:21, 22: “Abathe tye baya kulima ilizwe, basale kulo abagqibeleleyo, banqunyulwe ezweni abangendawo, abanginizayo bancothulwe kulo.”

Ngubani olawula eli hlabathi—nguThixo okanye nguSathana?

Dan. 4:35: “[UThixo osenyangweni, uYehova,] esenza yena ngokuthanda kwakhe empini yasemazulwini, nakubemi behlabathi. Akukho bani ubethayo esandleni sakhe, athi kuye, Wenza ntoni na?” (Ethetha ngomba ofanayo, uYeremiya 10:6, 7 ubhekisela kuYehova ‘njengoKumkani weentlanga’ ngenxa yokuba enguKumkani Omkhulu, lowo unokwenza ookumkani abangabantu baziphendulele noya kwenjenjalo nakwiintlanga abazilawulayo. NjengoMdali womhlaba, uYehova unguMlawuli wawo ofanelekileyo, akazange asilahle eso sikhundla.)

Yoh. 14:30: “[UYesu wathi:] Kuba esiza umphathi weli hlabathi, engenanto nam.” (Ngokucacileyo lo mlawuli asingoYehova uThixo, okuthanda kwakhe uYesu asoloko ekwenza ngokunyanisekileyo. Lo “mphathi weli hlabathi” umele ukuba ‘ngongendawo,’ uSathana uMtyholi, ‘lonke ihlabathi elilele’ emandleni akhe, njengoko kuchazwe kweyoku-1 kaYohane 5:19. Nangona uluntu luphila emhlabeni ongokaThixo, ihlabathi elibunjwe ngabo bangengobakhonzi bakaYehova abathobekileyo liphantsi kolawulo lukaSathana ngenxa yokuba abantu abanjalo bathobela yena. Abo bathi ngentliziyo epheleleyo bathobele ulawulo lukaYehova abayonxalenye yelo hlabathi. Thelekisa eyesi-2 yabaseKorinte 4:4.)

ISityhi. 13:2: “Inamba [uSathana uMtyholi] yalinika amandla ayo [irhamncwa], netrone yayo, negunya elikhulu.” (Ukuthelekiswa kwale ngcaciso yeli “rhamncwa” noDaniyeli 7 kubonisa ukuba limela urhulumente wabantu, kungekhona nje omnye kodwa inkqubo yomhlaba yolawulo lobupolitika. Into yokuba uSathana ungumlawuli walo ivisisana noLuka 4:5-7, kwaneSityhilelo 16:14, 16, esichaza amazwi aphuma kwiidemon njengakhokela abalawuli bawo wonke umhlaba ukuya kwimfazwe enxamnye noThixo eArmagedon. Ukulawula kukaSathana ihlabathi kunyanyezelwe nje nguThixo de ixesha elimiselwe Nguye lifike ukuba kuzinziswe imbambano yolongamo lwendalo iphela.)

ISityhi. 11:15: “Kwabakho amazwi amakhulu emazulwini, esithi: Izikumkani zehlabathi zithe zaba zezeNkosi yethu [uYehova] nezikaKristu wayo.” (Xa oku kwenzekayo ngowe-1914, ‘imihla yokugqibela’ yenkqubo ekhoyo engendawo yayiqalisile. Kwakuqalise imbonakaliso entsha yolongamo lukaYehova, ngeli xesha ibonakala ngoNyana wakhe njengoMlawuli onguMesiya. Kungekudala ihlabathi elingendawo liza kutshatyalaliswa, ibe uSathana, umlawuli walo ongumoya ongendawo, uya kuphoswa enzonzobileni angakwazi ukuphembelela uluntu.)

Siyintoni isimo sengqondo samaKristu okwenyaniso ngehlabathi nangabantu abayinxalenye yehlabathi?

Yoh. 15:19: “Ngokuba [abalandeli bakaYesu] ningengabehlabathi, ndaninyulayo mna kulo ihlabathi.” (Ngaloo ndlela amaKristu okwenyaniso akayonxalenye yebutho labantu elikhulu elityekileyo kuThixo. Anyamekela imicimbi eqhelekileyo yabantu, kodwa ayasiphepha isimo sengqondo, intetho, nehambo nto ezo eziphawula ihlabathi nezingqubanayo neendlela zikaYehova zobulungisa.) (Bona iphepha 211-218, kwanelama-200-203.)

Yak. 4:4: “Bakrexezindini, bakrexezikazindini, anazi na ukuba ubuhlobo balo ihlabathi bubutshaba kuye uThixo? Othe ngoko wanga angaba sisihlobo salo ihlabathi, uzenza utshaba lukaThixo.” (Ngenxa yokuba amaKristu akafezekanga, maxa wambi asenokungcoliswa ngokunxibelelana nehlabathi. Kodwa xa elulekwa liLizwi likaThixo, ayaguquka aze azilungise iindlela zawo. Noko ke, ukuba athile, ngokuzikhethela ngabom, azinxulumanisa nehlabathi okanye axelisa umoya walo, abonisa ukuba akasengawo amaKristu okwenyaniso kodwa ayinxalenye yehlabathi elilutshaba noThixo.)

Roma 13:1: “Yonke imiphefumlo mayiwalulamele amagunya awongamileyo. Kuba akukho gunya lingelilo elivela kuThixo; amagunya ke akhoyo amiswe nguThixo.” (Abo basithobelayo esi siluleko abangabo abavukeli, abazami kubhukuqa urhulumente wehlabathi. Bayazithoba kwigunya labalawuli bobupolitika, bebathobela lo gama nje izinto ezifunwa ngabalawuli abanjalo zingangqubani nezinto ezifunwa nguThixo. Oorhulumente abanjalo babonwa kwangaphambili baza baxelwa kwangaphambili nguThixo. Basebenzisa igunya, kungengenxa yokuba wabanikayo, kodwa kungenxa yokubavumela. Ngexesha lakhe elifanelekileyo nabo uya kubashenxisa.)

Gal. 6:10: “Njengoko singathi sibe nethuba, masisebenze okulungileyo kubo bonke, ngokukodwa ke kwabendlu yokholo.” (Ngoko, amaKristu okwenyaniso akarhoxobisi ekwenzeni okulungileyo kubantu abangoowawo. Axelisa uThixo, owenza ilanga liqaqambe kubantu abangendawo nabalungileyo.—Mat. 5:43-48.)

Mat. 5:14-16: “Nina nilukhanyiselo lwehlabathi; . . . Malukhanye ngokunjalo ukhanyiselo lwenu phambi kwabantu; ukuze bayibone imisebenzi yenu emihle, bamzukise uYihlo osemazulwini.” (Ukuze abanye banikele uzuko kuThixo ngenxa yoko kwenziwa ngamaKristu, kucacile ukuba abo bangamaKristu bamele babe ngamangqina akhutheleyo ehlabathini egama nenjongo kaThixo. AmaKristu okwenyaniso abalaselisa ngokuphambili lo msebenzi.)

Iyintoni intsingiselo yeemeko zehlabathi ezikhoyo?

Bona umxholo omkhulu othi “ImiHla Yokugqibela.”