Incwadi YeBhayibhile 35—Habhakuki

Umbhali: NguHabhakuki

Indawo Eyabhalelwa Kuyo: KwelakwaYuda

Ukugqitywa Kokubhalwa Kwayo: Malunga nowama-628 B.C.E. (?)

1. Ziziphi iinyaniso ezipheleleyo ezibalaseliswa kwisiprofeto sikaHabhakuki?

UHABHAKUKI ungomnye wabaprofeti beZibhalo zesiHebhere ekuthiwa ngabangaphantsi. Noko ke, umbono nesihlabo sakhe esiphefumlelwe nguThixo azizincinane nangayiphi na indlela ngokubaluleka kubantu bakaThixo. Sikhuthaza yaye sinik’ amandla, isiprofeto sakhe someleza abakhonzi bakaThixo ngexesha lengcinezelo. Le ncwadi ibalaselisa iinyaniso ezimbini ezipheleleyo ezizezi: UYehova uThixo unguMongami Wendalo Iphela, nokuba amalungisa aphila ngokholo. Kwakhona esi sibhalo sisisilumkiso kwabo bachasa abakhonzi bakaThixo nakwabo bazibabaza ngokuhanahanisayo bengabantu bakhe. Ibeka umzekelo wokuba nokholo olomeleleyo kuYehova, ofanelwe yingoma yendumiso.

2. Yiyiphi inkcazelo enikelwayo ngalo mbhali, uHabhakuki?

² Incwadi kaHabhakuki iqalisa ngala mazwi: “Isihlabo awasibonayo uHabhakuki umprofeti.” (Hab. 1:1) Wayengubani lo mprofeti uHabhakuki (Chavaq·quqʹ, ngesiHebhere), ogama lakhe lithetha “uLwamkelo Olufudumeleyo”? Akunikelwanga nkcazelo ngokuphathelele abazali bakaHabhakuki, uhlanga, iimeko zobomi bakhe, okanye ukufa kwakhe. Enoba wayeyimvumi yasetempileni engumLevi kusini na, oko akunakutshiwo ngokungqalileyo nangona oku kucingelwa ukuba kunjalo ngokusuka kumbhalo osekupheleni kwale ncwadi othi: “Kumongameli owokubethelwa izinto ezineentambo.”

3. Ziziphi iimeko ezichaphazela uYuda ezinceda ekuboneni ixesha eyabhalwa ngalo incwadi kaHabhakuki?

³ Wazivakalisa nini uHabhakuki izihlabo zakhe zesiprofeto? Umbhalo okhankanywe ngasentla namazwi athi “UYehova ke yena usetempileni yakhe engcwele” abonisa ukuba yayisekho itempile yaseYerusalem. (2:20) Oku, kunye nesigidimi sesiprofeto, kubonisa ukuba athethwa kungekudala ngaphambi kokutshatyalaliswa kweYerusalem ngowama-607 B.C.E. Kodwa yayiyiminyaka emingaphi ngaphambi koko? Kumele ukuba kwakusemva kolawulo loKumkani owoyika uThixo uYosiya, ngowama-659-629 B.C.E. Isiprofeto ngokwaso sandlala amavandlakanya ngokuxela kwangaphambili ngomsebenzi abaya kuthi abantu bakwaYuda bangawukholelwa nakuba sele bebaliselwa ngawo. Uyintoni lo msebenzi? Kukuphakamisa kukaThixo amaKaledi (amaBhabhiloni) ukuba ohlwaye uYuda ongathembekanga. (1:5, 6) Oku kwakuya kwenzeka ngeminyaka yokuqala yolawulo lukaKumkani uYehoyakim owayekhonza izithixo, xesha elo laxa kwakuxhaphake ukungakholwa nokungekho sikweni kwaYuda. UYehoyakim wayebekwe etroneni nguFaro Neko, ibe uhlanga lwaluzaliswe yimpembelelo yaseYiputa. Bephantsi kwemeko enjalo aba bantu babevakalelwa kukuba iBhabhiloni yayingenalo nelincinane ithuba lokungenela ilizwe labo. Kodwa ngowama-625 B.C.E. uNebhukadenetsare wamoyisa uFaro Neko kwidabi laseKarkemishe, ngaloo ndlela esoyisa iYiputa. Ngoko ke isiprofeto ngesasinikelwe ngaphambi kweso siganeko. Ngoko izibakala zalatha ekuqaliseni kolawulo lukaYehoyakim (olwaqalisa ngowama-628 B.C.E.), nto leyo etheth’ ukuba uHabhakuki wayephila ngexesha likaYeremiya.

4. Yintoni engqina ukuba incwadi kaHabhakuki iphefumlelwe nguThixo?

⁴ Sinokwazi njani ukuba le ncwadi iphefumlelwe nguThixo? Iincwadi zamandulo ezineenkcukacha zeZibhalo zesiHebhere zingqinela ukubakho kwencwadi kaHabhakuki kwimibhalo engcwele. Ngoxa zingayikhankanyi le ncwadi ngegama, kuyacaca ukuba zazimquka uHabhakuki xa zithetha ‘ngabaProfeti abalishumi elinesibini abaNgaphantsi,’ kuba ngaphandle kwakhe babengenakuba li-12. Umpostile uPawulos wasigqala esi siprofeto njengenxalenye yeZibhalo eziphefumlelweyo waza wawacaphula ngokungqalileyo amazwi akuHabhakuki 1:5, ebhekisela kuwo njengokuthile ‘okuthethiweyo ebaProfetini.’ (IZe. 13:40, 41) Kangangezihlandlo eziliqela wayebhekisela kule ncwadi kwiileta awayezibhala. Ngokuqinisekileyo ukuzaliseka kwamazwi kaHabhakuki anxamnye noYuda neBhabhiloni kumphawula njengomprofeti wokwenyaniso kaYehova, lowo wathetha ngegama nangozuko lwakhe.

5. Ngokufutshane khawushwankathele oko kuqulethwe yincwadi kaHabhakuki.

⁵ Incwadi kaHabhakuki inezahluko ezithathu. Izahluko zokuqala ezibini zikuhlobo lwencoko eqhubeka phakathi kombhali noYehova. Bathetha ngamandla amaKaledi nangosizi oluza kuzela uhlanga lwaseBhabhiloni olwandisa okungekokwalo, oluyizuzela inzuzo embi indlu yalo, olwakha umzi walo ngamagazi nolunqula umfanekiso oqingqiweyo. Isahluko sesithathu sithetha ngobungangamsha bukaYehova ngomhla wedabi, ibe sisesingenakuthelekiswa nanto ngokuba sesichukumisayo nangokuyondelelana kohlobo olubumdlalo esibhalwe ngalo. Esi sahluko singomthandazo okuhlobo lwesimbonono ibe siye sabizwa ngokuba “sesinye seyona mibongo ibalaseleyo kuyo yonke eyesiHebhere.”a

OKUQULETHWE YEKAHABHAKUKI

6. Iyintoni imeko kaYuda, ibe ke ngoko nguwuphi umsebenzi okhwankqisayo oya kuphunyezwa nguYehova?

⁶ Umprofeti ukhala kuYehova (1:1–2:1). Ukungabi nalukholo kukaYuda kwaxhokonxa imibuzo ethile engqondweni kaHabhakuki. Uyabuza, “Kunini na, Yehova, ndizibika, ungeva? Yimbuqo nogonyamelo phambi kwam.” (1:2, 3) Umthetho uyekelelwe, ongendawo urhawula ilungisa, yaye okusesikweni kuphuma kugqwethekile. Ngenxa yoku, uYehova uya kwenza umsebenzi oya kubashiya bethe nkamalala, into abantu ‘abangayi kuyikholelwa nakuba sebeyibaliselwa.’ Ngokwenene ‘uxhoxha amaKaledi’! Into eyoyikisa ngokwenene ngumbono onikelwa nguYehova wolu hlanga luneengcwangu njengoko lusiza ngokukhawuleza. Lunogonyamelo, ibe luhlanganisa abathinjwa balo “njengentlabathi.” (1:5, 6, 9) Akukho nto iya kuluthintela, kwanookumkani nezidwangube, kuba lusuka nje lubahleke bonke. Luthimba yonke indawo enqatyisiweyo. Konke oku kungumgwebo nesohlwayo esivela kuYehova, “oyiNgcwele.” (1:12) UHabhakuki umlindela ngomonde uThixo ukuba athethe.

7. UYehova umthuthuzela njani uHabhakuki?

⁷ Umbono wooyeha abahlanu (2:2-20). UYehova uyaphendula: “Bhala umbono, uwukrole kakuhle emacwecweni.” Nakuba ubonakala uzilazila, usaya kuzaliseka. UYehova umthuthuzela uHabhakuki ngala mazwi: “Lona ilungisa liya kudla ubomi ngokholo lwalo.” (2:2, 4) Utshaba oluzigwagwisayo aluyi kulufikelela usukelo lwalo, nakubeni luqhubeka luzihlanganisela iintlanga nabantu. Ewe, aba ngabo kanye baya kuthetha amazwi akwekwayo ooyeha abahlanu ngokunxamnye nalo besithi:

8, 9. Babhekiswa kuluphi uhlobo lwabantu ooyeha abahlanu bombono?

⁸ “Uha, lowo wandisa okungekwakhe!” Yena ngokwakhe uya kuphangwa. Uya kuphangwa “ngenxa yamagazi oluntu, nangenxa yokuligonyamela kwakho ilizwe.” (2:6, 8) “Yeha, oyizuzela indlu yakhe inzuzo embi.” Ukunqumla kwakhe abantu abaninzi kuya kubangela ukukhala kwamatye nemiqadi yemithi esendlwini yakhe kanye. (2:9) “Yeha ke, owakha umzi ngamagazi.” Abantu bakhe baya kuzixhamlela umlilo nokulambathayo, uvakalisa oko uYehova. “Kuba ihlabathi liya kuzala kukwazi ubuqaqawuli bukaYehova, njengamanzi egubungele ulwandle.”—2:12, 14.

⁹ ‘Yeha kulowo othi ngokucaphuka anxilise ummelwane wakhe ukuze abone ubuze bakhe.’ UYehova uya kumseza kwindebe ekwisandla Sakhe sasekunene, nto leyo eya kumzisela ihlazo endaweni yozuko “ngenxa yamagazi oluntu, nangenxa yokuligonyamela kwakho ilizwe.” Umfanekiso oqingqiweyo umnceda ngantoni umenzi wawo—ngaba ezo zinto asingabo oothixo abangento nabazizidenge? (2:15, 17) “Uha, kothi emthini, Vuka! athi kwilitye elithe cwaka, Suk’ ume! Lingayala na?” Ngokwahlukileyo kwaba thixo bangaphiliyo, “uYehova ke yena usetempileni yakhe engcwele; malithi tu ebusweni bakhe lonke ihlabathi.”—2:19, 20.

10. Nguwuphi umsebenzi owoyikekayo ohambisana kunye nokuvela kukaYehova ngomhla wedabi?

¹⁰ UYehova ngemini yakhe yedabi (3:1-19). Ethandaza ngokunyanisekileyo, uHabhakuki uyikhumbula ngokucacileyo imisebenzi eyoyikekayo kaYehova. Ekuveleni kukaYehova ‘egubungela amazulu endili yakhe; ihlabathi lizala yindumiso yakhe.’ (3:3) Ubuqaqawuli bakhe babunjengokukhanya, ibe icesina yayilandela ezinyaweni zakhe. Wema ngxi, washukumisa umhlaba, ebangela iintlanga ukuba zishukume zize zibe nkumenkume iintaba ezabakho kwasephakadeni. UYehova wahamba ephalisa njengomphumi-mkhosi oligorha ehlube isaphetha yaye eneenqwelo zokusindisa. Iintaba namanzi anzongonzongo zazanyazanyiswa. Ilanga nenyanga zema ngxi, yaye kwatshawuza ukukhanya kweentolo zakhe nokubengezela kwentshuntshe yakhe njengoko wayenyathela emhlabeni, exovula iintlanga ngomsindo. Wabasindisa abantu bakhe nonyuliweyo wakhe waza wasihluba isiseko songendawo, ‘wada wesa entanyeni.’—3:13.

11. Lo mbono umchaphazela njani uHabhakuki, kodwa luyintoni uzimiselo lwakhe?

¹¹ Umprofeti ugevezela amadolo ngulo mbono wobugorha bomsebenzi wangaphambili kaYehova nowomsebenzi wakhe ogungqisa ihlabathi oza kwenzeka. “Ndithe ndakuva, saxuxuzela isisu sam, umlomo wam wabebezela seso sithonga; kwangena impehla emathanjeni am, ndagungqa apho ndimi khona; ukuba ndilindele imini yembandezelo, eza ebantwini oya kubangenela.” (3:16) Noko ke, uHabhakuki uzimisele ukuba kungakhathaliseki ngamaxesha anzima ekumelwe kujongwane nawo—xa umkhiwane ungasayi kutyatyamba, imidiliya ingasayi kuvelisa ndyebo, kungasayi kubakho mpahla imfutshane esibayeni— sekunjalo uya kugcoba kuYehova aze avuye ekuThixo umsindisi wakhe. Uyiqukumbela ingoma yakhe echukumisayo ngala mazwi: “Ungamandla am uYehova iNkosi; uzenza iinyawo zam, zibe njengezamaxhamakazi, andinyathelise emimangweni yam.”—3:19.

ISIZATHU SOKUBA IBE YINGENELO

12. UPawulos umsebenzisa ngokunengenelo kweziphi iimeko uHabhakuki 2:4?

¹² Esigqala isiprofeto sikaHabhakuki njengesincedela ukufundisa, umpostile uPawulos wacaphula kwisahluko 2, indinyana 4 kangangezihlandlo ezithathu ezahlukeneyo. Xa wayebethelela isibakala sokuba iindaba ezilungileyo zingamandla kaThixo okusindisa nabani na onokholo, uPawulos wabhalela amaKristu aseRoma oku: “Kuba ngazo kutyhilwa ubulungisa bukaThixo, buphuma elukholweni buse elukholweni, njengokuba kubhaliwe kwathiwa, Olilungisa ke uya kudla ubomi ngokokholo.” Xa wayebhalela abaseGalati, uPawulos wabethelela ingongoma yokuba intsikelelo ifunyanwa ngokuba nokholo esithi: “Akukho namnye ugwetyelwayo ngomthetho kuye uThixo, kuyabonakala; ngokuba lowo ulilungisa, uya kudla ubomi obuphuma elukholweni.” Kwakhona kwincwadi yakhe eya kumaHebhere uPawulos wabhala ukuba amaKristu ayemele abonakalise ukholo oluphilayo nolusindis’ umphefumlo, waza kwakhona wabhekisela kumazwi kaYehova awawathetha kuHabhakuki. Noko ke, akacaphuli nje kuphela amazwi kaHabhakuki athi, “lowo ulilungisa uya kudla ubomi obuphuma elukholweni,” kodwa ukwacaphula amazwi akhe abhekele phaya akwiSeptuagint yesiGrike athi: “Ukuba ke úthe wahlehla, awuyi kukholiswa nguye umphefumlo wam.” Wandula ke akushwankathele konke oku ngokuthi: “Singabokholo olusa ekuzuzeni umphefumlo.”—Roma 1:17; Gal. 3:11; Heb. 10:38, 39.

13. Ukuzaliseka ngokuchanileyo kweziprofeto zikaHabhakuki ezinxamnye noYuda neBhabhiloni kugxininisa yiphi ingongoma ngokuphathelele imigwebo kaThixo?

¹³ Isiprofeto sikaHabhakuki sisesona sizisa iingenelo kumaKristu namhlanje, ekufuneka abe namandla awaneleyo. Sifundisa ukwayama ngoThixo. Sikwayingenelo ngokulumkisa abanye ngemigwebo kaThixo. Esi sifundo sisisilumkiso esinamandla: Musa ukuyijonga imigwebo kaThixo njengezilazila kakhulu; ‘ayiyi kubuya umva.’ (Hab. 2:3) Isiprofeto sokutshatyalaliswa kukaYuda ngamaBhabhiloni sazaliseka, ibe ngokungasileliyo iBhabhiloni ngokwayo yathinjwa, isixeko sayo sithatyathwa ngamaMedi namaPersi ngowama-539 B.C.E. Esinjani sona isilumkiso ekusiso oku sokukholelwa kumazwi kaThixo! Kungoko, umpostile uPawulos wakufumanisa kuyingenelo ukucaphula kuHabhakuki xa wayelumkisa amaYuda omhla wakhe ngokuba angabi ngangenalukholo esithi: “Lumkani . . . ningafikelwa koko kuthethiweyo ebaprofetini, kusithiwa, bonani, nina badeli, nimangaliswe, nithi shwaka; ngokuba mna ndisebenza umsebenzi ngemihla yenu, umsebenzi eningasayi kukholwa kuwo, nokuba kukho othi anicacisele.” (IZe. 13:40, 41; Hab. 1:5, LXX) AmaYuda angenalukholo awazange amthobele uPawulos, kanye njengokuba engazange asikholelwe isilumkiso sikaYesu sokutshatyalaliswa kweYerusalem; afumana imiphumo yokungabi nalukholo kwawo xa imikhosi yamaRoma yatshabalalisa iYerusalem ngowama-70 C.E.—Luka 19:41-44.

14. (a) Isiprofeto sikaHabhakuki siwakhuthaza njani amaKristu namhlanje ukuba abe nokholo olomeleleyo? (b) Njengoko kubonisiwe kwisiprofeto, yiyiphi intembelo eyonwabisayo abanokuba nayo ngoku abathandi bobulungisa?

¹⁴ Ngokukwanjalo, namhlanje, isiprofeto sikaHabhakuki sikhuthaza amaKristu ukuba abe nokholo olomeleleyo, ngoxa ephila kwihlabathi elizaliswe lugonyamelo. Siwanceda ukuba afundise abanye aze aphendule umbuzo oye wabuzwa ngabantu kulo lonke ihlabathi othi, Ngaba uThixo uya kuzisa impindezelo kongendawo? Kwakhona phawula amazwi esi siprofeto: “Wulinde, kuba uya kuza, awuyi kubuya umva.” (Hab. 2:3) Kungakhathaliseki ukuba ziziphi na iziphithiphithi ezenzekayo emhlabeni, intsalela ethanjisiweyo yeendlalifa zoBukumkani ikhumbula amazwi kaHabhakuki angempindezelo kaYehova yexa elidluleyo athi: “Uphuma ukuba usindise abantu bakho, ukuba usindise umthanjiswa wakho.” (3:13) Ngokwenene uYehova “ungoyiNgcwele” wawo, ukusukela kwakudala, yaye ‘uliLiwa’ eliya kohlwaya abangalungileyo aze aphilise abo abathandayo. Bonke ababuthandayo ubulungisa banokubuvuyela uBukumkani nolongamo lwakhe, besithi: “Mna ke ndiya kudlamka ndikuYehova, ndigcobe ndikuThixo umsindisi wam. Ungamandla am uYehova iNkosi.”—1:12; 3:18, 19.

[Umbhalo osemazantsi]