Isahluko 2
Wazukiswa Ngaphambi Kokuba Azalwe
EMVA kokuba isithunywa sezulu uGabriyeli sixelele ibhinqa eliselula uMariya ukuba uza kuzala umntwana oyinkwenkwe oya kuba ngukumkani ngonaphakade, uMariya uyabuza: “Kuya kuthini na ukubakho oku, ndingazani nandoda nje?”
UGabriyeli ucacisa ngokuthi, “UMoya oyiNgcwele uya kuza phezu kwakho, athi namandla Osenyangweni akusibekele; kungoko loo nto ingcwele izalwa nguwe iya kubizwa ngokuba nguNyana kaThixo.”
Ukuze ancede uMariya asikholelwe isigidimi sakhe, uGabriyeli uhlabela mgama esithi: “Uyabona, uElizabhete, ozalana nawe, naye umithe unyana ebudaleni bakhe; nale yinyanga yesithandathu kuye, lowo bekuthiwa ngongazaliyo; ngokuba akukho nanye into eya kumnqabela yena uThixo.”
UMariya uyamkholelwa uGabriyeli. Yaye usabela njani? Uthi: “Nanko umkhonzazana weNkosi; makwenzeke kum ngokwelizwi lakho.”
Kuthi nje akuba emkile uGabriyeli, uMariya azilungise aze aye kutyelela uElizabhete, ohlala nomyeni wakhe, uZekariya, kwilizwe elineentaba lakwaYuda. Ukusuka kwikhaya likaMariya eNazarete, olu luhambo olude mhlawumbi lweentsuku ezintathu okanye ezine.
Xa ekugqibeleni uMariya efika emzini kaZekariya, uyangena aze abulise. Akubulisa, uElizabhete uzaliswa ngumoya oyingcwele, aze athi kuMariya: “Unentsikelelo wena phakathi kwabafazi; sinentsikelelo nesiqhamo sesizalo sakho. Kuhle ngani na kum, ukuthi unina weNkosi yam eze kum? Kuba uyabona, kuthe lakubakho izwi lombuliso wakho ezindlebeni zam, lwasuka lwaxhuma usana ngokugcoba esizalweni sam.”
Akukuva oku, uMariya usabela ngombulelo osuk’ entliziyweni esithi: “Umphefumlo wam uyenza nkulu iNkosi, nomoya wam ugcobile ngoThixo uMsindisi wam; ngokuba wakukhangela ukuthobeka komkhonzazana wakhe; kuba, uyabona, ziya kuqala kwangoku ukuthi ndingonoyolo zonke izizukulwana; ngokuba wandenzela izinto ezinkulu uSomandla.” Kaloku, phezu kwako nje ukubabalwa kwakhe, uMariya ulusa lonke uzuko kuThixo. Uthi: “Lingcwele igama lakhe. Yaye inceba yakhe ikwizizukulwana ngezizukulwana kwabo bamoyikayo.”
UMariya uhlabela mgama edumisa uThixo ngengoma ephefumlelweyo nebuprofeti, evakalisa esithi: “Wenze amandla ngengalo yakhe, wabachithachitha abanekratshi ekucingeni kweentliziyo zabo. Wabawisa abanamandla ezitroneni zabo, wabaphakamisa abathobekileyo. Wahluthisa abalambileyo ngezinto ezilungileyo; wabandulula abazizityebi belambatha. Wasiza uSirayeli, umkhonzi wakhe, ngokukhumbula inceba yakhe; njengoko wathethayo koobawo bethu, kuAbraham nakwimbewu yakhe ngonaphakade.”
UMariya uhlala noElizabhete kangangeenyanga ezintathu, yaye ngokungathandabuzekiyo uluncedo olukhulu ebudeni bezi veki zokugqibela zokumitha kukaElizabhete. Eneneni kuyinto entle ukuba aba bafazi babini bathembekileyo, bathwele abantwana ngoncedo lukaThixo, babe kunye ngeli xesha lisikelelweyo lobomi babo!
Ngaba uyiphawule indlela uYesu awazukiswa ngayo kwanangaphambi kokuba azalwe? UElizabhete wambiza ngokuthi ‘iNkosi yam,’ yaye umntwana wakhe ongekazalwa waxhuma luvuyo xa uMariya wabonakala okokuqala. Kwelinye icala, kamva abanye bamphatha uMariya nosana lwakhe olwaluseza kuzalwa ngendelelo, njengokuba siza kubona. Luka 1:26-56.
▪ UGabriyeli uthini ukuze ancede uMariya aqonde indlela awayeza kumitha ngayo?
▪ UYesu wazukiswa njani ngaphambi kokuba azalwe?
▪ Ezukisa uThixo uMariya uthini kwingoma yakhe ebuprofeti?
▪ UMariya uhlala ithuba elide kangakanani noElizabhete, yaye kutheni kufanelekile ukuba uMariya ahlale noElizabhete ebudeni beli xesha?