Isahluko 4

Ukhulelwe Kodwa Akatshatanga

UMARIYA ukwinyanga yesithathu ekhulelwe. Uya kukhumbula ukuba inxalenye yokuqala yexesha lokukhulelwa kwakhe uyichithe etyelele uElizabhete, kodwa ngoku ubuyele kowabo eNazarete. Kungekudala imeko yakhe iza kwaziwa nguwonke-wonke kwidolophu yakowabo. Eneneni, ukwimeko enxunguphalisayo!

Okubangela imeko ibe mandundu kukuba uMariya uganelwe ukuba abe ngumfazi kaYosefu ongumchweli. Yaye uyazi ukuba, ngokomthetho kaThixo kuSirayeli, umfazi oganelwe enye indoda, kodwa othi ngabom abe neentlobano zesini nenye indoda, umele axulutywe ngamatye afe. Unokuyicacisa njani into yokukhulelwa kwakhe kuYosefu?

Ekubeni uMariya ebengekho iinyanga ezintathu, sinokuqiniseka ukuba uYosefu ulangazelela ukumbona. Bakudibana, ngokunokwenzeka uMariya umazisa ezi ndaba. Usenokwenza konke okusemandleni akhe ukucacisa ukuba ngumoya oyingcwele kaThixo obangele ukuba akhulelwe. Kodwa, njengokuba usenokuthelekelela, le yinto ekunzima gqitha ukuba uYosefu ayikholelwe.

UYosefu uyalwazi udumo oluhle analo uMariya. Yaye ngokucacileyo umthanda ngokwenene. Kanti, phezu kwako nje oko asenokukuthetha, eneneni kukhangeleka ngathi umithiswe yenye indoda. Sekunjalo, uYosefu akafuni ukuba axulutywe ngamatye afe okanye ahlaziswe esidlangalaleni. Ngoko ugqiba kwelokuba amale ngasese. Ngaloo mihla, abantu abaganeneyo babejongwa njengabatshatileyo, yaye kwakufuneka uqhawulo-mtshato ukuze kupheliswe ukuganana.

Kamva, njengoko uYosefu esacinga ngale mibandela, uyahamba aye kulala. Isithunywa sezulu sikaYehova siyamvelela ephupheni size sithi: “Musa ukoyika ukumthabathela kuwe uMariya, umfazi wakho; kuba oko kukhawulweyo phakathi kwakhe kungoMoya oyiNgcwele. Uya kuzala unyana ke, umbize ngegama elinguYesu; kuba yena eya kubasindisa abantu bakhe ezonweni zabo.”

Hayi indlela anombulelo ngayo uYosefu ekuvukeni kwakhe! Ngaphandle kokulibazisa wenza kanye oko akuyalelwe sisithunywa sezulu. Umthabathela kowabo uMariya. Ngokungathi kunjalo, esi senzo sasesidlangalaleni sisebenza njengomsitho womtshato, sinikela isaziso sokuba uYosefu noMariya ngoku batshate ngokusemthethweni. Kodwa uYosefu akabi nazintlobano zesini noMariya lo gama esamithi uYesu.

Khangela! UMariya unzima, kodwa uYosefu umkhwelisa e-esileni. Bayaphi, yaye kungani bethabatha uhambo ngoxa uMariya sele eza kubeleka? Luka 1:39-41, 56; Mateyu 1:18-25; Duteronomi 22:23, 24.

▪ Sinjani isimo sengqondo sikaYosefu akuva ngokukhulelwa kukaMariya, yaye ngoba?

▪ UYosefu unokumala njani uMariya ekubeni bengekatshati?

▪ Sisiphi isenzo sasesidlangalaleni esisebenza njengomsitho womtshato kaYosefu noMariya?